Biblia Todo Logo
Bìoball air-loidhne

- Sanasan -

Kibui Bubú Kasɛ 17 - Nyangbo New Testament


Adzɛ Kedulũ Azazãeleteɛ Nɛ̀ Agãhoeɛ

1 Baxɔ̃ɛdɛ tegegene gɛ ɔmɔpɔɛ buyintse zã alɛ ahɔɛ ɔmayɛmɛ tenikpo aba pɛ ebetseɖe mɛasɛ, “Ba, ɛbakasɛ wɔ batɔ̃ pɔpɔ̃ ɔkɔ adzɛ kedulũ azazã gbagbla, gɛ ezhi azã belĩ gelee abhaa.

2 Gana adzɛ alɛ abhaa, kesiakpa abha ekusiɛ abhɛtɛ ɔmamɛ dɛdɛ ebui, kɛlɛ kanɔ mɛanɛ awɔ̃ɛ, yɛɔmamɛ dɛdɛ unuɔ ebuku.”

3 Kɛlɛ axɔ̃ɛdɛ agbana mɛ nɛ Ɔfɔfuĩa mɛ avɛnɔ oxui toli. Ɛkɛlɛ mɛdɛ mɔ adzɛ teli gɛ ezhi azã agãhoe dzadzã teli gɛ ebuso enye edi, edi azã yɛishuɔ akana. Atakpu tegegene alɛ azã yɛishu kɛlɛ edzu asha lɔfɔ.

4 Adzɛ akpɛ akpɛkpɛ teli gɛ yɛɔkɔ toli okpelĩ kɛlɛ ɔkɔ toli xɔ̃nɔ ɔdzã, kɛlɛ ezetsé edenɔ sikã ɔdɔ̃ nɛ̀ aklagbu gbangbã nɛ̀ bakukɔliɛ gɛ ayɛkɛ edzi mɛ. Sikãiyintse azã yɛahɔɛ gɛ keyukù nɛ̀ atsɔ̃bui nɛ̀ ebuitsyutsyulĩɛ gɛ amɔ edenɔ yɛɔmamɛ dɛdɛ axɔ̃ɛ wɔawɔa mɛ.

5 Bafɔnɔ kinye ɛlɛ gɛ abhɛtɛ akɔ yɛishuɔ nɛ kɛtakpuɔ asɛ, KIBUI ƐLƐ KPŨ BABILONIA GBAGBALA BUDULŨ AZAZÃELETE ELĨƐ NƐ̀ KANƆ MƐ PETEE ATSƆ̃BUI ELETE.

6 Ɛmɔ sɛ adzɛ ebuku ɔgana banɔ dadalɛ nɛ̀ bagɛ bazaɖɔ kaɖɔ nɛ Yesu shuɔ, balɛ dzyosu tɛwɔɛwɔɛ mɛ, banɔ alɛ gɛaza dalɛ Yesu shuɔ dzyosu nɔ. Gɛ ɛmɔ yɛ, kɛbhɛtɛ mɛibi popopo.

7 Kɛlɛ axɔ̃ɛdɛ ebisi mɛasɛ, “Kiɖeso pɛ kɛbhɛtɛ wɔɛibi? Ɛbaɖɔ kibui kpukpũɔ nɛ adzɛ alɛ nɛ̀ agãhoe nabha gɛ etsiɖi, pɛ atakpu tegegene nɛ̀ asha lɔfɔ alɛ yɛishuɔ tseɖe wɔ.

8 Agãhoeɛ gɛ ɔmɔɔ, atɛzã eɖi, otsiɛ xɔnɔ abha ma, kɛlɛ ebekoeyì ede ozĩ dzudzuɔ mɛ aba pɛ bebèyíi. Banunɔ gɛ alɛ esiakpa nabha, pɛ bagɛ fɔnɔ balɛ enye akpɛ ɛkpãelete nɛeplukpa mɛ odenɔ kibeɛ gɛ kanɔ alɛ akpɛ esiɛ, kɛbabhɛtɛ alɛ ibi, onupɛ bamɔ agãhoeɛ. Ɔmɔsɛ atɛzã eɖi kɛlɛ abha ma, pɔ azababa.

9 “Kɛlɛ sɛ bɔlɔkɔ ekpeɖekpeɖe mɛ nɛ̀ bubutì olu awɔ̃ oɖi kibui ɛlɛ mɛ. Atakpu tegegeneɛ enu butukpɔ tugegeneɛ gɛ bɔlɛ abha adzɛ ezhi azã.

10 Balɛ tsyɛ enu bekusi tegegene. Teetì nɛ alɛ mɛ abha ma, tenikpo nɔ alɛ, pɔ tenikpo nɔ aka aba otsiɛ. Pɔ onupɛ abaa, abazã nɛ kibe gulũi mɛ ete.

11 Agãhoeɛ gɛ atɛzã eɖi pɛ abha ma, yɛenu ekusi asɛmiɛ. Enu bekusi tegegeneɛ mɛ anɔ tenikpo gɛ etsiɖi idzo mɛ avɛ yɛutsi mɛ.

12 “Asha lɔfɔɔ gɛ ɔmɔɔ, enu bekusi lɔfɔ gɛ bakamɔ bukusi ɔŋãkɔ kaku alɛ ahɔɛ, pɔ nɛ ɔɖa tatá tonikpo mɛɛ, babà yɛkɛ ohumi sɛ tɛ bedzi bekusi aplɛnɔ agãhoeɛ.

13 Tɛtɔtɔɖɔ tinikpo kɛlɛ lɛ̀ alɛ ahɔɛ sɛ tɛ balɔkɔ balɛ ohumi nɛ̀ bukusi ŋaŋã akɔ agãhoeɛ.

14 Babà lɔkɔ eyu nɛ Obhoshieyiɛ shu, pɔ Obhoshieyiɛ abaŋã alɛ abha, ɔmɔsɛ yɛenu Apalete akɔ bapaleteɛ nɛ̀ Ekusi akɔ bekusiɛ-bagɛ babà plɛni yɛɛ, balɛ enu bagɛ ekuluɔ, bagɛ ebuɔ nɛ̀ bagɛ ayɛkɛ yɛabha aŋãa.”

15 Kɛlɛ axɔ̃ɛdɛ etseɖe mɛasɛ, “Belĩɛ gɛ ɔmɔ pɛ kedulũazazã eleteɛ ezhi azã balɛ abhaa, benu banɔ aza, ɛmadi nɛ̀ beluhũ edi edi.

16 Agãhoeɛ nɛ̀ asha lɔfɔ gɛ ɔmɔɔ, atɛ badɛmɛ nɔ̀ nɛ̀ kedulũ azazã eleteɛ nɛibui. Babà gbani yɛakpɛ tizizĩ mɛ, kɛlɛ babà shɛ ayɔlɔ yɛ kɛdɔ̃ makpɛ makpɛ nɛishu. Babàtã yɛɔdzya kɛlɛ babàpɔɛ yɛ nɛ̀ kifu.

17 Ɔmɔsɛ Owusoso Akaa akpɛ ɛlɛ nɛ alɛ etúɔ mɛ asɛ tɛ babhɛtɛ nɛ kɛgɛ atɔɖɔ eluɔ nabha, sɛ tɛ badɛmɛ tɛ balɔkɔ balɛ ohumi nɔ akɔ agãhoeɛ tɛ alɔkɔ aŋã ukusiɛ nɔ, ɔvɛnɔ kibeɛ gɛ Owusoso Akaa yɛibuiɛ babà ɛlɛ mɛ.

18 Adzɛ gɛ ɔmɔɔ, yɛenu ɔma gbagbla gɛ lɔŋã bukusi nɛ kesiakpa bekusi nabha.”

© (Active), Ghana Institute of Linguistics, Literacy and Bible Translation. All rights reserved.

Lean sinn:



Sanasan