Kibui Bubú Kasɛ 16 - Nyangbo New Testament

Owusoso Akaa Ɔmɔpɔɛ Buyintse Tugegeneɛ

¹ Izilũ ozĩ gagalĩ toli odenɔ akaavũɔ mɛ lozo otseɖe baxɔ̃ɛdɛ tegegeneɛ asɛ, “Nokoeyi ɔvɛ oditsyina Owusoso Akaa ɔmɔpɔɛ buyintse tugegeneɛ ɔbalɛ esiakpa nabha.”

² Axɔ̃ɛdɛ gɛ eputɔ avɛ adɛ balɛ̀ yɛɔmɔpɔɛ kayintse nɔ nɛ esiakpa nabha kɛlɛ bagɛ batsà agã yɛná pɛ bazakpɛ ɛtakpu esi akɔ yɛ tɛzazã afafatɛɛ, badɔ ebi kpa teli idi nɛ̀ apɔ̃ zizĩ.

³ Axɔ̃ɛdɛ bhalà avɛ adɛ balɛ̀ yɛɔmɔpɔɛ kayintse nɔ akpɛ aƒuɔ mɛ, kɛlɛ etsyina edzi dzyosu ɔmɔ asɛ anɔ tsitsí ayɛ ana, kɛlɛ ɛkpã ɛdɔ̃ ka nyia ka nɛ aƒuɔ mɛ tsí.

⁴ Axɔ̃ɛdɛ tramɛ abalɛ̀ yɛayintse nɔ akpɛ bulĩkekpuɔ nɛ̀ belĩɛ gɛ ekoeyì edenɔ ɛxɔɛishiɛ mɛ kɛlɛ betsyina edzi dzyosu.

⁵ Kɛlɛ ilũ axɔ̃ɛdɛ gɛ ezeɖi belĩ nabha yɛaɖɔ asɛ, “Obhui ebui mɛ piapii nɛ wɔbhu kukulu ulɛ mɛ, wɔ gɛ ɔlɛ pɛ ɔtɛzã oɖi, pɛ onu Anɔ Dadalɛɛ, ɔmɔsɛ wɔebhu kukluɔ alɛ kàlɛ ɔzãkɔ,

⁶ ɔmɔsɛ balɛ eyí wɔanɔ dadalɛ nɛ̀ ebuiɖɔluanɛ, kɛlɛ wɔkɔ alɛ dzyosu ɔsɛ tɛ bawɔ̃ɛ asɛ gɛ kɛshɔ̃ nɔ kɔ alɛ.”

⁷ Kɛlɛ ilũ kaɖɔ odenɔ bɔdɔ̃ pɔpɔɛ osubha mɛ ɔsɛ, “Kɛgbã Apalete Owusoso Akaa Ohumielete, kɛgbã wɔ bubhu kukuluɔ mɛ dalɛ.”

⁸ Axɔ̃ɛdɛ lɛlɛ̃mɛ abalɛ̀ yɛɔmɔpɔɛ kayintse nɔ nɛ kiwi nabha, kɛlɛ kiwiɛ yɛkɛ ohumi ɔsɛ tɛ kinye pɔɛ anɔ asɛ kifu.

⁹ Kɛkpɛkpɛ́ɛ gagalĩɛ gɛide kiwiɛ mɛ tã banunɔ, kɛlɛ bazaɖɔ ebui akpɛ Owusoso Akaa nɛinyeɛ, anɔ gɛ yɛahɔɛ ohumi ɔlɛ nɛ bɔtɔ ebui alɛ nulũɔ, pɔ bagɛ dɛmɛ etsyina pɛ bákpɛ ɛtakpu esi akɔɛ.

¹⁰ Axɔ̃ɛdɛ trimiɛ abalɛ̀ yɛɔmɔpɔɛ kayintse nɔ atɔɖɔ agãhoe ekusiegbu nabha, kɛlɛ otumũ oku nɛ yɛukusiaŋãsiɛ mɛ. Banɔ azatã balɛ enike nɛ̀ ɔwɔ̃nyɔnɔ,

¹¹ kɛlɛ bazaɖɔ ebui kpa akpɛ Owusoso Akaa, nɛ balɛ ɔtɔ nɛ̀ apɔ̃ gɛ bazanyãa shu, pɔ bagɛ dɛmɛ etsyina eté mɛ nɛ ebui kpa gɛ baza bhɛtɛ shu.

¹² Axɔ̃ɛdɛ hlomiɛ abalɛ̀ yɛɔmɔpɔɛ kayintse nɔ akpɛ Frat Kelĩkekpu hohoeɛ mɛ, kɛlɛ kalɛ mɛ bulĩɛ pete butsì, sɛ tɛ olĩdiɛ otsyina odzi kidzo ɔkɔ bekusiɛ gɛ bede kiwiɛ otukɔɔ.

¹³ Kɛlɛ ɛmɔ ɛfɔfuĩa zizĩ tɛtá gɛ leyì avɔbɔ, gɛ lekoeyì ede kɛtsɔpɛ, agãhoeɛ nɛ̀ asɛnɛ elete ebuiɖɔluanunɔ ilugbũɔ mɛ.

¹⁴ Linu ɛfɔfuĩa zizĩ gɛ lɛbhɛtɛ atsyindzye ebui akasɛ, kɛlɛ likoeyi vɛ dɛgã kanɔ nɔ̀ mɛ ekusi nabha, sɛ tɛ eshogò alɛ ɔkɔ keyu tɛtatá nɛ̀ Owusoso Akaa ohumielete nɛiwui gbagbla nabha.

¹⁵ “Ɖio, ɛba ɔmɔ asɛ ezĩ ana! Beyula anunɔ gɛ alɛ nɛ awɔ̃, pɛ alɔkɔ yɛɔdɔ̃ kpɛkpɛ elu yɛɔbha sɛ tɛ atɛzã bɔdɔ̃ makpɛ makpɛ, sɛ tɛ etibu yɛishu elu nɛ awuĩ mɛ.”

¹⁶ Kɛlɛ ɛfɔfuĩa nɔ gbanà bekusiɛ edi shogò nɛ ɔkɔ toli gɛ bekulu nɛ Hebrianɛ uluhũɔ mɛ asɛ, Armagedon.

¹⁷ Axɔ̃ɛdɛ gegenemiɛ abalɛ̀ yɛɔmɔpɔɛ kayintse nɔ akpɛ kɛlɛ́ nɔ mɛ, kɛlɛ ozĩ gagalĩ toli oyi odenɔ akaavũɔ mɛ ɔsɛ, “Kibele oo!”

¹⁸ Kɛlɛ subha ìfu bubú kpɛ esi, ɛkɛlɛ ozogũ, subha azalɛ́ɛ, kɛlɛ kesiakpa tsyɛ ezeshuku gagalĩ. Kesiakpa shushukù alɛ nɛidi nanà kaba ɛlɛ mɛ ana oɖi denɔ kibeɛ gɛ babhɛtɛ anɔdzyrame atɔɖɔ kalɛ abha, kalɛ tishushukù nulũ gagalĩ.

¹⁹ Kɛlɛ ɔma hohoeɛ ɔyɛ ɔkpɛ bɔwɔ̃pɛ tɔɔta mɛ, kɛlɛ ɛmadi ɛlɛ ɛma hohoeɛ lɛyɛ zĩ. Owusoso Akaa abakà Babilonia ɔma Gbagbla kɛlɛ alɔkɔ yɛɔmɔpɔɛ wain kayintse nɔ gɛ keyiɛ akɔɛ nɛ yɛɔmɔpɔɛ kpɛkpɛ gagalĩɛ mɛ.

²⁰ Bulĩmɛetukpɔ ka nyia ka yala, kɛlɛ ɛgamɔ betu nanà.

²¹ Amɔklagbu hohoe gɛ alɛ mɛ bupu zã asɛ kilo afɛeti ana ezezhi adɔ banɔ abha. Kɛlɛ bazaɖɔ ebui akpɛ Owusoso Akaa, nɛ amɔklagbuɔ gɛ lazadɔɔ shu, ɔmɔsɛ bɔtɔ gɛzɛ baa, kuifu fanɔ.