Kibui Bubú Kasɛ 15 - Nyangbo New Testament

Baxɔ̃ɛdɛ Tegegene Nɛ̀ Bɔtɔ Ebui Tegegeneɛ

¹ Ɛmɔ ibui hohoe bhlatɔ tili nɛititíɛ gɛ kɛbhɛtɛ ibi popopo. Ɛmɔ baxɔ̃ɛdɛ tegegene gɛ bevunɔ utɔ ebui tegegene gɔgɔɛ nɔ, lenu bɔtɔ ebui gɔgɔɛ, ɔmɔsɛ alɛ bu Owusoso Akaa yɛɔmɔpɔɛ gɔgɔɛ nɔ ɔkasɛ.

² Kɛlɛ ɛmɔ aƒu teli idi gɛ alɛ asɛ ahuhɔ̃ɛ ana gɛ kifu kpasɛ yɛmɛ kɛlɛ ɛmɔ bagɛ aŋã agãhoeɛ, yɛafafatɛ nɛ̀ yɛinye nabha, alɔɛtití nɛ aƒu nɔtɔ̃ nɛ̀ bagɛ aŋã yɛenye nabha. Basangũ gɛ Owusoso Akaa akɔ alɛ azã alɛ ahɔɛ

³ kɛlɛ bazazhã Owusoso Akaa axɔ̃ɛdɛ Mose nɛ̀ Obhoshieyiɛ ɔdzɛ asɛ, “Wɔebui bhɛbhɛtɛ egbogblo kɛlɛ labhɛtɛ ibi, Apalete Owusoso Akaa Ohumielete wɔebuiɛ alɛ àlɛ ɔzãkɔ kɛlɛ wɔedzoɔ enu ebui gbã, Wonu Ekusi galɛ odenɔ kuku ibe.

⁴ O Apalete, afana gɛ etibesi wɔɛfu, pɛ atɛ badalɛ wɔɛnyeɛ shu? Ɔmɔsɛ wɔ ete wonu anɔ dadalɛ. Ɛmadiɛ pete ababá abakpɛ ɛtakpu esi nɛ wɔotugbà, ɔmɔsɛ bebu wɔebui gbangbã tɛbhɛbhɛtɛ akasɛ.”

⁵ Kidegba ilu awɔ̃ ɖi kɛlɛ ɛmɔ akaavũɔ nɛititíɛ gɛ bunu Trɛwɔɛagbaa mɛ gɛ baɖɔ Kibui Dadalɛ nɛ alɛ mɛɛ, kadalɛ azã.

⁶ Denɔ akaavũɔ mɛɛ, baxɔ̃ɛdɛ tegegeneɛ nɛ̀ bɔtɔ ebui tegegeneɛ ekoeyì aba. Bazã bɔdɔ̃ kpɛkpɛ gɛ bɔlɛishu dalɛ pɛ buzitsé ŋelĩŋelĩɛ mɛ, kɛlɛ batsà sikã ɛpɔtɛ ɛwɔ̃ atɔɖɔ nɛ kitéɛ mɛ.

⁷ Kɛlɛ bagã talɛ ɔmayɛmɛ tenikpo alɔkɔ sikã buyintse tugegeneɛ mɛ gɛ Owusoso Akaa gɛ alɛ nɛkpã tihɔɔ tihɔɔ ɔmɔpɔɛ oyukuɔ, akɔ baxɔ̃ɛdɛ tegegeneɛ.

⁸ Ɔnyɔ̃ gɛ ode okoeyi nɛ Owusoso Akaa tɛdadalɛ ohumi nɔ mɛɛ oyuku akaavũɔ mɛ, kɛlɛ anɔ nanà aga là ɔlɛ mɛ etsoku eɖi, ɔlɔkɔ ɔvɛnɔ kibeɛ gɛ baxɔ̃ɛdɛ tegegene bɔtɔ ebui tegegeneɛ aba alɛ mɛ ebeke.