Kibui Bubú Kasɛ 14 - Nyangbo New Testament

Obhoshieyiɛ Nɛ̀ Banɔ Ihotu Ikpã Zɛzɛ̃ Nɛ̀ Afɛtalɛ Nɛ̀ Talɛ

¹ Izilu awɔ̃ ɖi kɛlɛ ɛmɔ obhoshieyiɛ gɛ ɔzã ititíɛ nɛ Zion Butu nabha, nɛ banɔ ohotu ikpã zɛzɛ̃ nɛ̀ afɛtalɛ nɛ̀ talɛ, bagɛ alɛ utúɔ bafɔnɔ yɛ nɛ̀ Yɛakaa nɛinye atɔɖɔɔ nɛishi.

² Kɛlɛ ilũ kaɖɔ odenɔ ititíɛ ɔmɔ asɛ bulĩ gɛɛtsɛ̀ gagalĩ, nɛ̀ asɛ subha tɛlɛlɛ̀ɛ ana. Kɛlɛ ozĩɛ gɛ izilũɔ oyi asɛ ihui asangũelete gɛ bebho balɛ asangũ ana.

³ Kɛlɛ bazhã ɔdzɛ̃ vɔvɔ nɛ ekusiegbuɔ, bagã talɛ nɛ̀ banɔ sheshèɛ otugbà. Anɔ nanà agɛlà akpasɛ ɔdzɛ̃ ɔdɛ banɔ ohotu ikpã zɛzɛ̃ nɛ̀ afɛtalɛ nɛ̀ talɛ ete ko, gɛ balɛ enu bagɛ bebhui ebu nɛ esiakpa nabha.

⁴ Balɛ enu anɔ gɛ bagɛ dɛ badzɛ̃ shu eɖi, kɛlɛ bazã ishu dadalɛ mɛ. Bazã Obhoshieyi niede avɛ ɔkɔ nyia ɔkɔ gɛ avɛɛ. Bedzi alɛ edenɔ banɔ gelee ishi, kɛlɛ balɔkɔ alɛ akɔ Owusoso Akaa nɛ̀ Obhoshieyiɛ, ɔmɔ asɛ busieyuyu gɛ bapɔ eputɔ ana.

⁵ Asɛnɛ ɛbui agɛzã balɛ olugbũ mɛ oɖi, kɛlɛ bamɛ tsitsí ibui nanà tsyɛ ma balɛishu.

Baxɔ̃ɛdɛ Tatá Teli

⁶ Ɛmɔ axɔ̃ɛdɛ bhlatɔ teli gɛ ezepruru afala nɛ kɛlɛ́ nɔ mɛ gɛ evunɔ Kibui Gbangbã gɛbazã tihɔɔ sɛ tɛ adɛɖɔ etseɖe esiakpa abhanɛ kɛmadi ka nyia ka, egbogbo, beluhũ nɛ̀ banunɔ pete.

⁷ Akpɛ ozĩ gagalĩ asɛ, “Nosì Owusoso Akaa nɛifu, tɛ nɔkɔɛ ishu dadalɛ, ɔmɔsɛ yɛebhu kukulu ibeɛ na ɛkɛlɛ́. Nɔkpɛ ɛtakpu esi ɔkɔ yɛ gɛ abhɛtɛ itití, kesiakpa, aƒu nɛ̀ belĩɛ gɛ bepí edekoeyì nɛ ɛxɔa nɛishiɛ.”

⁸ Axɔ̃ɛdɛ bhalà tsyɛ azaba, kɛlɛ aɖɔ asɛ, “Ayɛmɔo! Babilonia Gbagbla ayɛ mɔo. Yɛ gɛ akɔ ɛmadi bazabhɛtɛ ɔmamɛdɛdɛ ebui, ɔmɔ asɛ kibuku gɛ bunu buku anɔ ana.”

⁹ Axɔ̃ɛdɛ tramɛ tsyɛ azaba nɛ taabha alɛ niede kɛlɛ akpɛ ozĩ gagalĩ asɛ, “Onupɛ anɔ teli akpɛ ɛtakpu esi akɔ agãhoeɛ nɛ̀ yɛtɛzazã mɛ fafatɛɛ pɛ atsà yɛná nɛ ketúɔ alo nɛ ɔhɔɛɛ,

¹⁰ anɔ alɛ tsyɛ abawɔ̃ɛ Owusoso Akaa ɔmɔpɔɛ wain gɛ bakɔ akpɛ nɛ̀ ohumi pɛ keyi pɔɛ nɛ ɔmɔpɔɛ kayintse nɔ mɛ. Babàwɔa anɔ alɛ ɔnyɔnyɔ̃ nɛ kifu aklagbuɔ, nɛ baxɔ̃ɛdɛ dadalɛ nɛ̀ Obhoshieyi namɛ.

¹¹ Kɛlɛ ɔnyɔ̃ gɛ obokoeyi ode balɛ bɔtɔ ɔmɔ ɔkɔɔ, lɔbɔ vɛ abha ana tihɔ, tihɔ. Elishi nɛ̀ kemuzeɛ, timoemoele tɛbazã ɔkɔ bagɛ akpɛ ɛtakpu esi akɔ agãhoe nɛ̀ yɛtɛzazã mɛ fafatɛ alo anɔ nyia anɔ gɛ agãhoe nɛná nɛ̀ yɛinye lɛ yɛishuɔ.

¹² Kɛlɛ sɛ tɛ bagɛ balɛishu badalɛ, pɛ babhɛtɛ nɛ Owusoso Akaa yɛɔsha nabha, pɛ begi tsodzi nɛ Yesu edeɛ, tɛbadɔ fɔ̃ɔ nɛ kemi kpɛkpɛ mɛ.

¹³ Kɛlɛ ilũ ozĩ loyi odenɔ ititíɛ ɔsɛ, “Fɔnɔ ɔsɛ, beyula bagɛ bazã Apaleteɛ mɛ flogo pɛ betsíɛ, denɛ otsiɛ ɔvɛnɔ.” Ɔfɔfuĩa nɔ ɔɖɔ ɔsɛ, “Ee, bebèmoelɛ odenɔ balɛ axɔ̃ɛ wɔawɔa mɛ, ɔmɔsɛ balɛ axɔ̃ɛ wɔawɔa abazã alɛ ede avɛ.”

Kesiakpa Abha Bɔdɔ̃ Pɔpɔ̃

¹⁴ Kɛlɛ ilu awɔ̃ iɖi kɛlɛ ɛmɔ ɔmɔlɔ̃ fufu toli, kɛlɛ anɔ teli azã ɔlɛ abha “asɛ anɔdzyrame yɛeyi ana” gɛ ekumu sikã ekusikutu kɛlɛ ɛhɛakpa gɛ bapɔɛ amɔ nɔ azã yɛahɔɛ.

¹⁵ Kɛlɛ axɔ̃ɛdɛ bhlatɔ tsyɛ ezekoeyì ede owusoso akaavũɔ mɛ, kɛlɛ akpɛ ozĩ agagalĩ ekulu anunɔ gɛ etsiɖi ɔmɔlɔ̃ nabha asɛ “Lɔkɔ wɔhɛakpa, tɛ ɔpɔɛ bɔdɔ̃, ɔmɔsɛ kibe na ɔkɔ bɔdɔ̃ tɛpɔpɔ̃ nɛ kanɔ nɔ̀ mɛ, ɔmɔsɛ bɔdɔ̃ ɖaɖa nɛ esiakpa nabha shè.

¹⁶ Kliso anunɔ gɛ azã ɔmɔlɔ̃ nabha awɔa yɛhɛakpa shu axɔ̃ɛ akana afala nɔ nɛ esiakpa nabha, kɛlɛ apɔ̃ kesiakpa abha ɔdɔ̃ eyuyuɔ.

¹⁷ Axɔ̃ɛdɛ bhlatɔ ezekoeyì ede owusoso akaavũɔ mɛ nɛititíɛ kɛlɛ ɛhɛakpa ŋaŋã teli azã yɛtsyɛ ahɔɛ.

¹⁸ Axɔ̃ɛdɛ bhlatɔ gɛ bakɔɛ ohumi nɛ kifu abha tsyɛ ekoeyì ede bɔdɔ̃ pɔpɔɛ osubha shu, kɛlɛ akpɛ ozĩ gagalĩ etseɖe axɔ̃ɛdɛ gɛ evũ nɔ ɛhɛakpa asɛ, “Lɔkɔ wɔhɛakpa ŋaŋãa tɛ ɔpɔ̃ wain asa nɛ wain aya mɛ nɛ esiakpa, ɔmɔsɛ wain eshè akɔ tɛpɔpɔ̃.”

¹⁹ Axɔ̃ɛdɛ awɔ̃anya yɛhɛakpa afalanɔ nɛ kesi nabha, eshogò yɛɔdɔ̃ pɔpɔ̃ pɛ abalɛ bɔlɛ akpɛ Owusoso Akaa yɛɔmɔpɔɛ wain izitɔ mɛ.

²⁰ Bezhi eku izitɔ mɛ pɛ betũ ɛtsɛɖɛ nɛ wain nabha nɛ ɔma nɛakãdeɛ kɛlɛ dzosu akpɛ ekoeyì ede kizĩɛ mɛ. Dzyosu nɔ mɛ edzu ɔmɔ asɛ bɔtsɛɖɛkpɔ tuti, kɛlɛ akpɛ avɛ asɛ ɛtsɛkɔ ɛkpã zɛzɛ̃ nɛ̀ afɛtasɛ.