Kibui Bubú Kasɛ 13 - Nyangbo New Testament

¹ Kɛlɛ agãhoeɛ alɔɛtití nɛ aƒu nɔtɔ̃. Kɛlɛ ɛmɔ agãhoe teli gɛ edekoeyì nɛ aƒuɔ mɛ. Edzu ashà lɔfɔ, atakpu tegegene alii kɛlɛ ekusikutu itsiɖi kɔsha ka nyia ka abha. Bafɔnɔ kibusoinye nɛ kɛtakpuɔ ka nyia ka shu.

Agãhoe Edekoeyì Nɛ aƒuɔ Mɛ

² Agãhoeɛ gɛ ɛmɔ̃ eyì awɔɛkɔ, pɔ yɛtsɛɖɛ xɔ̃nɔ zã asɛ agudu ɛyɛ, kɛlɛ olugbũɔ oyi dzyata ɔyɛ. Kɛtsɔpɛ hohoeɛ shɛnɛ ahɔɛ nɛ yɛohumi, ekusiegbuɔ nɛ̀ bukusi ŋaŋãa shu akɔ agahoeɛ.

³ Nɛ bɔdɔ̃ ɖiɖi ulũɔ, agãhoe alɛ atɛ nyã kɛpɔ̃ hohoe tili nɛ yɛtakpuɔ tinikpo eɖi, flogo pɛ kibe ɛlɛ babá. Kɛbhɛtɛ kanɔ mɛ anɛ pete ibi, kɛlɛ bazã agahoeɛ niede.

⁴ Banɔ akpɛ ɛtakpu esi akɔ kɛtsɔpɛ, ɔmɔsɛ kɛlɔkɔ ɛlɛ ukusi ŋaŋã akɔ agãhoeɛ. Bazakpɛ ɛtakpu esi akɔ agãhoeɛ pɛ bezebisi asɛ, “Afana gɛ alɛ asɛ agãhoe alɛ dza? Afana gɛ abalà ata keyu nɛ̀ yɛ dza?

⁵ Bebuidzo akɔ agãhoeɛ asɛ tɛ aɖɔ ishu fefeke nɛ̀ ebusoebui, kɛlɛ tɛ aŋã bukusi nɛ bewoele afɛtalɛ nɛ̀ taabha mɛ.

⁶ Azaɖɔaɖɔ akɔalà Owusoso Akaa, etuturu yɛinyeɛ nɛ̀ yɛɔzãkɔ, nɛ̀ banunɔ gɛ alɛ ititíɛ.

⁷ Bakɔɛ ohumi sɛ tɛ alɔkɔ keyu nɛ banɔ dadalɛ shu, tɛ eté alɛ. Kɛlɛ ayɛkɛ bukusi ŋaŋã ohumi nɛ egbogbo, banɔ, beluhũ nɛ̀ ɛmadi ka nyia ka ahɔɛ.

⁸ Kesiakpa abha anɛ pete abakpɛ ɛtakpu esi akɔ agãhoeɛ, bagɛ alɛ enye bagɛ fɔnɔ akpɛ ɛkpã eplukpa gɛenu Obhoshieyiɛ gɛ beyiɛ ayɛ mɛ, denɔ kanɔ mɛ esi kpɛkpɛ mɛ.

⁹ Anunɔ gɛ batɔ̃ alɛ yɛahɔɛ, tɛ elũ.

¹⁰ Onupɛ kɛlɛ sɛ tɛ anɔ teli azã anɔ esiɛ, anɔ esi yɛbavɛ adɛzã. Onupɛ kɛlɛ sɛ bɛtɛ̀ balɔkɔ tɛ beyí anɔ teli nɔɔ, bɛtɛ̀ babàlɔkɔ eyí nɔ. Baɖɔ kɛlɛ ana, sɛ tɛ bagɛ badalɛ balɛishuɔ tɛ baadɔ fɔ̃ɔ nɛ̀ kemi kpɛkpɛ nɛ̀ tɛyɛyɛkɛŋã mɛ.

Agãhoe Ekoeyì Ede Kesiakpa Mɛ

¹¹ Kɛlɛ ɛzɛmɔ agãhoe bhlatɔ gɛ ekoeyì ede kesiakpa mɛ. Edzu asha taabha asɛ obhoshieyi, pɔ azaɖɔaɖɔ gɛ keyì kɛtsɔpɛ ayɛ.

¹² Awɔa ohumi nɔ gɛ ɔzã agãhoe gɛ eputɔ shu axɔ̃ɛ, nɛ yɛinye mɛ. Akɔ asɛ kesiakpa nɛ̀ kalɛ mɛ anunɔ nyɔ̃ɔ akpɛ ɛtakpu esi akɔ agãhoe gɛeputɔ gɛ kɛpɔ̃bi zã yɛishuɔ.

¹³ Agã alɛ abhɛtɛ ohumi nɛ̀ atsyindzye ebui akasɛ, gɛ alà ekulu kifu edenɔ kititíɛ ɔmana kesiakpa gɛ banɔ bazamɔ.

¹⁴ Nɛ bɔdɔ̃ bubú kasɛ ɛlɛ shu soɔ bakɔɛ ohumi sɛ tɛ azawɔa axɔ̃ɛ nɛ agãhoeɛ gɛeputɔ nɛinye mɛ, kɛlɛ azawɔɛ banunɔ nɛ esiakpa nabha. Akɔ balɛ ɔsha asɛ bafatɛ osí nɛ agãhoe gɛ beté nɛ̀ bɛtɛ̀ pɛ akalɛ nɛ̀ ɛkpãa, yɛtɛzazã mɛ.

¹⁵ Bakɔɛ ohumi asɛ tɛ akɔ agãhoeɛ gɛeputɔ yɛafafatɛ ɔfɔfuĩa sɛ tɛ aɖɔaɖɔ, tɛ akɔ asɛ anunɔ gɛ agɛ dɛmɛ asɛ tɛ akpɛ ɛtakpu esi akɔ afafatɛɛ, tɛ beyìi.

¹⁶ Kidzi ɔsha nyanyã ɔsɛ, anuvɔ nɛ̀ esheshè, ehoeyielete nɛ̀ etsyuitsyui, anɔ gɛ alɛ yɛishu ahɔɛ mɛ nɛ̀ anɔ dzidzì, sɛ tɛ batsa ɛná akɔɛ nɛ kɛŋã ɔhɔɛ alo nɛ ketuɔ,

¹⁷ sɛ tɛ anɔ nanà atɛmɔ ɛdzo edzi alo adɛ kɛdɔ̃ nanà, onupɛ agɛtsa ɛná gɛinu agãhoe nɛinye alo kɛlɛ tɛkakalàa mɛ.

¹⁸ Kɛlɛ sɛ tɛ balɔkɔ bubutì agã ibui ɛlɛ mɛ nɔ. Anunɔ gɛelũ ebui esiɛ, tɛ avɛ ekpeɖekpeɖe mɛ nɛ aná alɛ tɛkakalà shu eɖi, gɛ anɔ teli udɔ̃ kakalà ete bunu. Yɛanà tsatsà tɛkakalà mɛ lɛ akpã tehlo, afɛtehlo nɛ̀ tehlo (666).