Kibui Bubú Kasɛ 12 - Nyangbo New Testament

Adzɛ Nɛ̀ Kɛtsɔpɛ Hohoeɛ

¹ Kibui hohoe nɛ̀ kɛgɛ̀ bhɛtɛ ibiɛ tili bu ishu kasɛ nɛ kititíɛ. Adzɛ teli alɔkɔ kiwiɛ akpɛ asɛ akpɛkpɛ, woele nɔ azã yɛtsɛɖɛ niesi kɛlɛ ekumu ekusikutuɔ gɛ awɔ̃ɛ lɔfɔ nɛ̀ taabha azã kɛlɛ ishuɔ.

² Adzɛ emunɔ ɛya, kɛlɛ azakpɛ ozĩ gagalĩ gɛ ɛya zɛtãɛ pɛ avɛ ɔmɔkɔɔ.

³ Kɛdɔ̃ bhlatɔ tsyɛ zibu ishu kasɛ nɛititíɛ. Kɛtsɔpɛ dzadzã hohoe tili gɛ kɛtá atakpu tegegene pɛ kidzu asha lɔfɔɔ, kumu bekusi ekutu tegegene nɛ atakpuɔ.

⁴ Kɛlɛ otse hohoeɛ xoele awɔ̃ɛ nɛawɔ̃pɛ tramɛ afalanɔ nɛ ititíɛ atsɛ akpɛ esiakpa. Kɛtsɔpɛ lɔɛtití nɛ adzɛ gɛ azã kamɔ̃tuɔ otugbà sɛ tɛ tsĩɔ ɔlɛ gɛ amɔ̃ eyiɛ koɔ tɛ alɔkɔɛ amɛnɔ.

⁵ Adzɛ amɔ̃ eyianyɛ. Yɛenu anunɔ gɛ abalɔkɔ ɔɖaɛshi agbana ɛmadiɛ pete nɔ. Kɛlɛ babhɛ eyiɛ nɛ adzɛ ahɔɛ ewunɔ avɛnɔ Owusoso Akaa nɛ eyiɛ ekusiegbuɔ shu.

⁶ Adzɛ ebu tɛtsɛɖɛ mɛ avɛ oxui, nɛ ɛkɛlɛ gɛ Owusoso Akaa abálɛ elu akɔɛ, kɛlɛ beɖi yɛabha nɛ ɛkɛlɛ, nɛ ewui ohotu zɛzɛ̀, akpã taabha nɛ̀ tehlo mɛ (1,260).

⁷ Bakpa keyu tá nɛititíɛ. Mixael nɛ̀ yɛaxɔ̃ɛdɛ alɔkɔ eyu nɛ kɛtsɔpɛ hohoeɛ shu, kɛlɛ kɛtsɔpɛ hohoeɛ nɛ̀ yɛaxɔ̃ɛdɛ abatsyɔa nɛ̀ alɛ ɔkɔ keyuɔ tɛtatá.

⁸ Pɔ ohumi ɔgɛzã kɛtsɔpɛ nɛ̀ kɛlɛ axɔ̃ɛdɛ ahɔɛ, kliso balɛ ɔzãkɔ ɔyala nɛititíɛ.

⁹ Balɔkɔ kɛtsɔpɛ hohoeɛ awɔanyã akpɛ esiakpa, eblidzya alɛ gɛ bekulu asɛ Abosam alo Satana pɛ agbana kanɔ nɔ̀ pete aganà kidzo kpa abhaa, balɔkɔ yɛ nɛ̀ yɛaxɔ̃ɛdɛ awɔanyã akpɛ esiakpa.

¹⁰ Kɛlɛ ilũ ozĩ gagalĩ loyi odenɔ kititíɛ ɔsɛ, “Otsi alɛ bɔlɔ tibubu, ohumi nɛ̀ ɔlɔ Owusoso Akaa ukusi ŋaŋã ba, nɛ̀ yɛ Kristo ukusi ŋaŋã. ɔmɔsɛ anunɔ gɛ ebhui ɔlɔ adzya alɛ nulũɔ, anunɔ gɛ ebhui alɛ ulũ nɛ Owusoso Akaa na mɛ elishi nɛ̀ emuzeɛ, bawɔanyã yɛakpɛ esiakpa.

¹¹ Baxɔ̃ɛdɛ aŋã kɛtsɔpɛ nabha ɔgana Obhoshieyiɛ dzyosu nɔ mɛ nɛ̀ yɛibui gbangbã tɛdadalɛ mɛ, bagɛ adɛmɛ nɔ nɛ̀ balɛ ɛkpã adɛ pɛ besì butsí ifu.

¹² Kliso wɔnɔ ititíeleteɛ nɔmɔ same nɛ̀ wɔnɔ agɛ ɔlɛ alɛ mɛɛ! Pɔ kɛba gagalĩ ɔkɔ kesiakpa nɛ̀ aƒuɔ, ɔmɔsɛ Abosam ezhi aba ɔnɔ ɔkɔ! Ɔmɔpɔɛ nyɔ̃ɔ ɔlɔ ɔkpasɛ yɛmɛ, ɔmɔsɛ enyi asɛ yɛibe ɛlɛ gulũi.”

¹³ Gɛ kɛtsɔpɛ hohoeɛ mɔ ɔsɛ balɔkɔ yɛ atɛ akpɛ kesiakpaa soɔ, atɔ̃nɔ adzɛ gɛ amɔ eyianyɛ niede.

¹⁴ Balɔkɔ bɔsɛ gbagbla tɔɔbha gɛ buyi odi ɔyɛ nɛidiɛ akɔɛ asɛ tɛ alɔkɔ epruru avɛ ɛkɛlɛ gɛ babálɛ elu akɔɛ nɛ oxuiɛ, sɛ tɛ beɖi yɛabha nɛ ɛkɛlɛ nɛ agɔ tata nɛ̀ kapɛ mɛ. Kɛbakɔ ɔsɛ kɛtsɔpɛ tɛbamɔ adzɛ.

¹⁵ Kɛlɛ kɛtsɔpɛ hohoeɛ pí bulĩ odenɔ olugbũɔ mɛ asɛ kelĩkekpu ana sɛ tɛ bulĩɛ bhui adzɛ nulũ tɛ buvũi.

¹⁶ Pɔ kesiakpa ebhui adzɛ ebu. Kesiakpa yaka olugbũ mɛ, pɛ kamɛnɔ̀ bulĩɛ gɛ kɛtsɔpɛ pí sɛsɛ̀.

¹⁷ Kɛtsɔpɛ hohoeɛ kpɛ ɔmɔpɔɛ nyagã nɛ adzɛ shu, kɛlɛ kikoeyi vɛ sɛ dɛtá eyu nɛ̀ adzɛ yɛeyi alɛ gɔgɔ̃ɛ nɔ-gɛ abhɛtɛ nɛ Owusoso Akaa yɛɔsha nabha pɛ banyana ebui dadalɛ mɛ nɛ Yesu shu evunɔɔ.

¹⁸ Kɛlɛ kɛtsɔpɛ hohoeɛ lɔɛtití nɛ aƒu nɔ ɔtɔ̃.