Kibui Bubú Kasɛ 11 - Nyangbo New Testament

Kibui Mɛadadalɛelete Taabha Teli

¹ Balɔkɔ kishi gɛ bedzyidzyi udɔ̃ nɔ̀ pɛ kɛlɛ ɔmɔ asɛ kɛgbɛ̃ ishi nɔ akɔ mɛ kɛlɛ etseɖe mɛasɛ, “Vɛ tɛ odi dzyidzyi Owusoso Akaavũɔ nɛ̀ bɔdɔ̃ pɔpɔɛ osubhaa, tɛ ɔkalà banunɔ gɛ bakpɛ ɛtakpu esi nɛ ɛkɛlɛ.

² Pɔ etseɖe mɛasɛ iti dzyidzyi kevude ɔkɔ, ɔmɔsɛ batɛ lɔkɔ ɛkɛlɛ akɔ bagɛ etinu Yudanɛ. Kɛlɛ nɛ bewoele afɛtalɛ nɛ̀ taabha mɛɛ, bebètũ ɛtsɛɖɛ nɛ ɔma dadalɛ ɔlɛ nabha.

³ Ɛbakɔ mɛibui mɛadadalɛelete taabhaa ohumi tɛ baɖɔ ebui elu nɛ ewui ohotu zɛzɛ̃, akpã taabha nɛ̀ afɛtehlo (1,260) mɛ, gɛ akpanyã apɔtɛ mɛ babàzã.”

⁴ Balɛ enu bɔbɔ̀ isí tɛɛbhaa nɛ̀ ifu isíi tɛɛbhaa gɛzã kesiakpa Apalete namɛɛ.

⁵ Onupɛ anɔ teli apɛ asɛ tɛ awɔa ɔfɔ̃ nɛ alɛɛ, kifu koeyi odenɔ alɛ ilugbũɔ mɛ pɛ kɛpɔɛ bagɛ batɛ dɛmɛ nɛ̀ alɛ. Kidzo ɛlɛ nabha anunɔ gɛ apɛ asɛ awɔa ɔfɔ̃ nɛ̀ alɛɛ ebetsì.

⁶ Ohumi ɔlɛ balɛ ahɔɛ, sɛ tɛ badã kititíɛ akpɛ subha dɔdɔ nɛ kibeɛ gɛ baaɖɔ ebui eluɔ, kɛlɛ nɛ ohumi ɔlɛ nulũɔ, balà bhɛtɛ bulĩ butsyina dzi dzyosu, kɛlɛ bakɔ banyã kpa ka nyia ka idi azaba esiakpa nabha, asɛ kɛpɛ gɛ bapɛ.

⁷ Onupɛ badalɛ alɛ ebuiɛ mɛ ebekeɛ, agãhoeɛ gɛ ekoeyì ede ozĩ dzudzuɔ mɛɛ, aba bágɔ̃lɛ nɛ̀ alɛ, gɛ aŋã alɛ abha, kɛlɛ eyí alɛ.

⁸ Balɛ etsitsíɛ abawɔ tipɔ nabha nɛ ɔma gbagbla ɔlɛ gɛ bekulu ɔlɛ inye nɛ sahɔ̃ɛ aɖɔ mɛ asɛ, Sodom alo Egipte, nɛ̀ ɛkɛlɛ tsyɛ gɛ bakpala balɛ Apaleteɛ nɛ butsí osí shuɔ.

⁹ Nɛ ewui tata nɛ̀ apɛ mɛɛ, banɔ bebède ɔkɔ nyia ɔkɔ, egbogbo, beluhũ nɛ̀ amadi ababá ebeɖi banɔ tsitsíɛ, pɔ batɛ bakɔ ɛdzo asɛ tɛ bavɔbɔ alɛ.

¹⁰ Kanɔ mɛ anɛ pete abamɔ same, aŋã iwui nɛ banɔ taabha alɛ utsíɛ shu, kɛlɛ bebebu alɛ same mɔmɔ akasɛ ɔgana bɔdɔ̃ kɔkɔ́ bagɔlɔ mɛ, ɔmɔsɛ ebuiɖɔluanɔ taabha alɛ awɔa ɔfɔ̃ nɛ bagɛ alɛ kanɔ nɔ̀ mɛɛ, shu fanɔ.

¹¹ Pɔ nɛ ewui tata nɛ̀ apɛ niedeɛ, Owusoso Akaa akɔ yɛɔfɔfuĩa nɔ oboku alɛ mɛ, kɛlɛ bamɛ ɛkpã alɔ. Kɛlɛ kifu dɛ bagɛ amɔ kɛgɛ ba ɛlɛ mɛɛ.

¹² Kɛlɛ ebuiɖɔluanɛ taabha belũ ozĩ gagalĩ odenɔ ititíɛ ɔsɛ, “Nowu ɔba ɛkɛlɛ.” Kɛlɛ bewu avɛ ititíɛ nɛ ɔmɔlɔ̃ mɛ, nɛ kibeɛ gɛ bagɛ atɛ adɛmɛ nɛ alɛ ezeɖi alɛ asɛsɛ.

¹³ Nɛ ɔɖa tatá ɔlɛ tututu mɛɛ, kesiakpa eshuku gagalĩ kɛlɛ ɔma ɔlɛ awɔ̃pɛ lɔfɔmiɛ ɔyɛ obho. Banɔ ihotu tigegene etsí nɛ esiakpaa tishushukùɔ mɛ. Kifu dɛ bagɛ azã nɛ ɛkpãa, kɛlɛ bakpɛ Owusoso Akaa nɛinye nɛitití.

¹⁴ Bɔtɔ bhalà gagalĩ ɛlɛ bafala, pɔ bɔtramɛ babà gulũi.

Kexoele Gegenemiɛ Tɛbɔbɔ̀

¹⁵ Axɔ̃ɛdɛ gegenemiɛ abɔ yɛexoele nɔ, kɛlɛ izĩ kpɛkpɛ gagalĩ yi nɛititíɛ ɔsɛ, “Kanɔ mɛ ukusi ŋaŋãa tsyina dzi bɔlɔ Apaleteɛ, nɛ̀ yɛ Kristo ɔyɛ, kɛlɛ yɛabaŋã ukusiɛ ovɛnɔ tihɔ, tihɔ.”

¹⁶ Kɛlɛ banɔ sheshè afɛtaabha nɛ̀ talɛ̃ gɛ bazã ekusiugbu nabha nɛ Owusoso Akaa otugbà ezhi ekumu, pɛ bakpɛ ɛtakpu esi akɔ Owusoso Akaa,

¹⁷ Pɛ bazaɖɔ asɛ, “Buhu wɔahɔɛ Apalete Owusoso Akaa Ohumielete, anunɔ gɛ alɛ pɛ atɛzã eɖi, ɔmɔsɛ ɔlɔkɔ wɔohumi gbagbla ɔkpɛ wɔkusi ŋaŋã niesi nɔ.

¹⁸ ɛmadiɛ kpɛ ɔmɔpɔɛ, kɛlɛ wɔmɔpɔɛ nɔ ɔba. Kebhu kukulu ɔkɔ banɔ tsitsí nɛibe na, kɛlɛ kɛbhɛ buiabe na ɔkɔ baxɔ̃ɛdɛ gɛ benu ebuiɖɔluanɛ nɛ̀ wɔanunɔ dadalɛ nɛ̀ bagɛ elũ atɔ̃ akɔ wɔɛinyeɛ, bunuvɔɛ nɛ̀ besheshè- kɛlɛ kibe na sɛ tɛ beyí banunɔ gɛ bezĩ esiakpa.”

¹⁹ Badalɛ Owusoso Akaavũɔ nɛititíɛ, kɛlɛ nɛ yɛuvũɔ mɛɛ, bamɔ yɛolugbũ nyanyã aɖaka nɔ. Kɛba ɛlɛ mɛɔsɛ, subhaɛfu ziboele, ɛkɛlɛ ozogũ kɛlɛ subha azalɛ́ɛ, kɛlɛ kesiakpa ezeshuku pɛ amɔklagbu hohoe azadɔ.