Bìoball air-loidhne

Kibui Bubú Kasɛ 1 - Nyangbo New Testament

Otugba Ibui

¹ Ebui bubu kasɛ gɛ Owusoso Akaa akɔ Yesu Kristo asɛ tɛ ebu akasɛ yɛaxɔ̃ɛdɛ nɛ ebuiɛ gɛ etibedze pɛ labàbaa alɛ mɛɛ shu. Akɔ tititì ɛlɛ ɔgana yɛaxɔ̃ɛdɛ gɛ akpɛ asɛsɛ Yohanɛs ɔkɔɔ.

² Yohanes adalɛ kɛka nyia ka mɛ gɛ amɔɔ, gɛinu Owusoso Akaa ibuiɛ nɛ̀ Yesu Kristo yɛishu dadalɛ shu.

³ Tiyuyula ɔkɔ anunɔ gɛ aakalà ebuiɖɔluanɔ ebui alɛ, kɛlɛ tiyuyula ɔkɔ banunɔ gɛ belũ alɛ pɛ bayɛkɛ kɛgɛ bafɔnɔ eluɔ akpɛ itúɔ mɛ, ɔmɔsɛ kibeɛ tsu ba.

Tɛsɛsɛnɔ Nɛ̀ Owusoso Akaa Nɛinye Kpɛkpɛ Nɛitití

⁴ Mɛ Yohanes, Mɛfɔnɔ ebui alɛ sɛsɛ baha tegegeneɛ galɛ Asia ɔdɔ̃ mɛ ɔsɛ, Tibhui bhuibu nɛ̀ ishu yɔyɔ ɔkɔ ɔnɔ odenɔ anunɔ gɛ alɛ pɛ atɛzã eɖi, pɛ azabàbaa, nɛ̀ odenɔ ɛfɔfuĩa tigegeneɛ nɛ yɛ ekusiegbuɔ otugbà,

⁵ kɛlɛ odenɔ Yesu Kristo gɛenu anunɔ gɛ adalɛ ebuiɛ alɛ nɛ àlɛ ɔzãkɔ shu, pɛ enu eyi gɛ eputɔ ede bekpuɔ mɛ, pɛ aŋã ukusi nɛ kesiakpa abha ekusi nabha. Yɛenu anunɔ gɛ adɛmɛ nɛ ɔlɔ pɛ ebu ɔlɔ edenɔ ebui kpa mɛ nɛ̀ yɛdzyosu nɔ,

⁶ edzu ukusi aŋãsi akɔ ɔlɔ pɛ abhɛtɛ ɔlɔ bunu banɔlũazazã sɛ tɛ bɔdɛ axɔ̃ɛ ɔkɔ yɛ Owusoso Akaa nɛ̀ Yɛakaa, yɛyɛ́ kɛlɛinu ishu dadalɛ nɛ̀ ohumi odenɔ otsiɛ ɔvɛnɔ tihɔ tihɔ! Amen.

⁷ Noɖio abà nɛ̀ ɔmɔlɔ̃, kɛlɛ kiwuhũ ka nyia ka bamɔɛ, bagɛ bashɔɛ nɛ̀ bɔɖadɔ̃ tsyɛ abamɔɛ, yɛ soɔ, kanɔmanɛ pete abamɔ̃ ɔwɔ̃nyɔnɔ. Kana kɛbàba ɛlɛ mɛ! Amen.

⁸ Apalete Owusoso Akaa aɖɔ asɛ, “Mɛinu agɛ Eputɔ nɛ̀ Agɔgɔɛ nɔ tsyɛ, gɛ ɛlɛ otsiɛ, pɛ ɛtɛzã ɖi, pɛ ɛzɛbàbaa, mɛinu Ohumieleteɛ.”

Yesu Tibubu Kasɛ

⁹ Mɛ, wɔnɔ adzya Yohanɛs, gɛ bɔzã itsu nɛ bɔtɔ mɛ pɛ bɔkpɛ emi, dɔ fɔ̃ɔ ɔkɔ bukusiɛ gɛinu ɔlɔ ɔyɛ ɔgana Yesu mɛ, ɛzã Patmo bulĩetukpɔ nabha, nɛ Owusoso Akaa ibuiɛ gɛ ɛɖɔ dalɛ Yesu shu so.

¹⁰ Nɛ Apalete Nɛiwui nabhaa, Ɔfɔfuĩa nɔ oku mɛ mɛ̀ kɛlɛ izilũ ozĩ toli gagalĩ asɛ kexoele babɔ nɛ mɛedeɛ,

¹¹ kaɖɔ asɛ, “Fɔnɔ kɛgɛ ɔmɔ ɔtɔɖɔ eplukpa abha ɔsɛsɛ baha tegegeneɛ gɛ alɛ Efeso, Smina, Pergamo, Tiatira, Sardis, Filadelfia nɛ̀ Ladokia.”

¹² Itsyina sɛ tɛ mɛiɖi anunɔ gɛ aɖɔaɖɔ akɔ mɛ. Gɛ itsyinaa, ɛmɔ sikãefu isí tigegene,

¹³ kɛlɛ nɛ kifu isí nɛishiɛ, ɛmɔ anɔ teli “gɛ azã asɛ anɔdzyrame yɛeyianyɛ ana,” gɛ azã akpɛkpɛ dzlolo gɛ ezhi aba yɛtɛtsɛɖɛ pɛ atsa sikã atsatsatɔɖɔ nɛ yɛitéɛ mɛ.

¹⁴ Yɛtakpuɔ nɛ̀ tɛkã fuli asɛ obhoshi tɛkã, alo asɛ kɛmɔɛklagbu, kɛlɛ yɛawuhũɔ azã asɛ kifu gɛ kɛtã hanyã ana.

¹⁵ Yɛtɛtsɛɖɛ dzã hanyã asɛ ɔɖa dzadzã nɛ kifu gɛtã mɛ, kɛlɛ yɛozĩ ozoyi ɔmɔ asɛ kelĩkekpu gɛ akpɛ hɔa nɔ ana.

¹⁶ Awɔ̃ɛ tegegene azã kɛŋã ɔhɔɛ mɛ, kɛlɛ bɛtɛ̀, ilugbũ tɛbha ŋaŋã teli ikoeyì odenɔ yɛolugbũɔ mɛ. Kɛlɛ yɛamɛ ezetse ɔmɔ asɛ kiwi gɛinye nɛ ɛlɛ tɛdadalɛ mɛ ana.

¹⁷ Gɛ ɛmɔ yɛ, izhi kumu nɛ yɛotugbà ɔmɔ asɛ anɔtsitsí ana. Pɔ alɔkɔ yɛŋã ahɔɛ atɔɖɔ mɛabha pɛ etseɖe mɛasɛ, “Tɛ osí ifu. Mɛinu agɛ Eputɔ nɛ̀ Agɔgɔɛ nɔ.

¹⁸ Mɛinu Enunuɔ, ititsí bafalanɔ, pɔ otsi alɛ ɛlɛ nɛ ɛkpã tihɔ, tihɔ! Kɛlɛ butsí nɛ̀ bekpu ipupukɔɔ lɛ mɛahɔɛ.

¹⁹ Kliso, fɔnɔ agɛ ɔmɔ̃ɔ. Agɛ alɛ otsiɛ nɔ nɛ̀ agɛ abàba nɛ idegba olu.

²⁰ Kibui kpukpũɔ gɛlɛ awɔ̃ɛ tegegeneɛ gɛ ɔmɔ̃ nɛ mɛŋã ɔhɔɛ mɛ nɛ̀ sikãefu isí tigegeneɛ nu ɛlɛ. Awɔ̃ɛ tegegeneɛ enu baxɔ̃ɛdɛ tegegeneɛ ɔkɔ baha tegegene, kɛlɛ ifu isí tegegeneɛ nu bahá tegegeneɛ.

« Roimhe

Air adhart »

Lean sinn:

Ceanglaichean taic

Sanasan