Hebrianɛ 9 - Nyangbo New Testament

Kɛtakpu Esi Kpɛkpɛ Nɛ Kesiakpa Trɛwɔɛgba Mɛ

¹ Nɛ kibe ɛlɛ, ɔsha zã olugbũ nyanyã kukuɔ shu ɔkɔ ɛtakpu esi kpɛkpɛ nɛ esiakpa trɛwɔɛagba mɛ.

² Bedzu trɛwɔɛagba. Nɛ kalɛ uvũ gɛiputɔ mɛɛ, bedzu kifu osi, ɔkpɔlɔ̃ nɛ̀ kifufulũ gɛ ɛlɛishu badalɛ. Bekulu ɛkɛlɛ asɛ Ɔdadalɛ Ɔkɔ.

³ Nɛ kɛpɔtɛ bhalà niedeɛ buvũ lɛ ɛkɛlɛ gɛ bekulu ɛkɛlɛ asɛ, Ɔdadalɛ Ɔkɔ Ɔdɛ.

⁴ Nɛ buvũ lɛ mɛɛ, kilifi ɔpɔɛkɔ osubha gɛ balɔkɔ sikã abhɛtɛ ɔlɛ nɔ, nɛ̀ olugbũ nyanyã aɖaka gɛ bedere sikã nɛ yɛishu alɛ. Nɛ aɖaka nɔ mɛɛ, sikãitsikpi gɛ manà akpasɛ ɛlɛ mɛ, Aron yɛosi vuvũ gɛ obu awlɔakpa, nɛ̀ aklagbu taabha nabha gɛ bafɔnɔ olugbũ nyanyã ebuiɛ atɔɖɔɔ azã.

⁵ Bekerubim alɛ aɖaka nabha gɛ baakasɛ Owusoso Akaa yɛishu dadalɛ, kɛlɛ balɛ ɔsɛ̀ fè tɔɖɔ ɛkɛlɛ gɛ bɔmɔ ashagabui ɖiɖi odenɔ nabha. Bɔtɛ balà bu ebui alɛ nyɔ̃ɔ mɛ ɔvɛnɔ otugbà otsiɛ.

⁶ Onupɛ bedzu udɔ̃ nɛ bɔlɛ ɔzãkɔ ebeke ana, kɛlɛ banɔlũazazã etsoku trɛwɔɛagba gɛ alɛ ɔtɔ̃ ɛbeɛ pɛ adɛ axɔ̃ɛ nɛ ɛkɛlɛ.

⁷ Banɔlũazazã gbagbla ete ko yɛamɔ idzo etsoku ovuede uvũɔ mɛ, kɛlɛ ɛdɛ tinikpo nɛ kɛgɔ ka nyia ka mɛ. Onupɛ avɛɛ, alɔkɔ agã dzyosu evunɔ sɛ tɛ alɔkɔ akɔ nɛ yɛahɔɛ ɛtakpu nɛ̀ banunɔ ebui mati mati gɛ babhɛtɛ nɛ ɛtakpu.

⁸ Nɛ kɛlɛ mɛɛ, Ɔfɔfuĩa Gbangbã obu kɛlɛ ɔkasɛ ɔsɛ, gɛ trɛwɔɛuvũɔ gɛiputɔ lɛ ɛkalɛ koɔ, kɛkasɛ ɔsɛ bekebu idzoɔ gɛili ɔvɛ Ɔdadalɛ Ɔkɔ Ɔdɛ akasɛ.

⁹ Kinu udɔ̃ kakasɛ ɔlɔkɔ shɔnɔ nɛ kibe ɛlɛ shu, sɛ ɔdɔ̃ kɔkɔ nɛ̀ bɔdɔ̃ pɔpɔɛ nɔ gɛlà dalɛ bagɛ azakpɛ ɛtakpu esiɛ etú mɛ ebuiɛ shu.

¹⁰ Bɔdɔ̃ ɔlɛ nu asɛ, bɔdɔ̃ ŋaŋã nɛ̀ ɔdɔ̃ wɔɛwɔɛ nɛ̀ ɛkɔ ediedi ebui tɛbhɛbhɛtɛ ana, alɛ nyɔ̃ɔ enu kanɔ mɛ ebui tɛbhɛbhɛtɛ gɛ lazã ɔvɛnɔ kibeɛ gɛ tɛtɔtɔɖɔ vɔvɔ ɛlɛ baba.

Kristo Yɛdzyosu Nɔ

¹¹ Gɛ Kristo abaa asɛ banɔlũazazã gbagbla ɔkɔ ɔdɔ̃ gbangbã gɛlɛ ɛkɛlɛɛ, agã afala nɛ trɛwɔɛagba gɛ egbogblo pɛ kaná ɔdɛ trɛwɔɛagba ka nyia ka, gɛ anɛ anɔdzyrame yɛahɔɛ yɛedzui alɛ nɔ mɛ. Gulũi nɔɔ, kegide kanɔɛ alɛ mɛ.

¹² Kristo agɛ lɔkɔ bepidzya nɛ̀ banɛtsyɔɛeyi dzyosu evunɔ flogo pɛ etsoku Ɔdadalɛ, Ɔkɔ Ɔdɛ ɔlɛ mɛ. Itsoku tunikpo nɛ ebeɛ pete ulũ yɛadɛ nɛ̀ yɛahɔɛ dzyosu, sɛ tɛ amɔ ɛkpã tihɔɔ akɔ ɔlɔ.

¹³ Bepidzya nɛ̀ banɛtsyɔɛ dzyosu, nɛ̀ banɛtsyɔɛelĩ pɔpɔɛ ɔtɔ̃ɔ gɛ balɔkɔ ahɔɛ nɛ bagɛ balɛishu gɛ dalɛ shuɔ sɛ tɛ balɛishu dalɛ nɛ ishupi mɛ ete.

¹⁴ Kiɖuwoe gɛ bakɔ ɔsɛ, Kristo gɛ agã Ɔfɔfuĩa tihɔɔ nɔ mɛ pɛ alɔkɔ yɛishu akɔ, pɛ bamɛ tsitsí nanà ma yɛishu nɛ Owusoso Akaa na mɛɛ, atɛ alà akɔ asɛ yɛdzyosu nɔ eplu bɔlɔ etú mɛ ebui kpa gɛ lagbana ɔlɔ akpɛ butsí mɛɛ, sɛ tɛ bɔmɔ idzo dɛ axɔ̃ɛ ɔkɔ Owusoso Akaa gɛenu enunuɔ mɔɔ dza!

¹⁵ Nɛ kidzo ɛlɛ nabhaa, Kristo edzi iboe evuvũ akɔ olũgbu nyanyã vɔvɔ ɔlɛ, sɛ tɛ bagɛ bekuluɔ tɛ bamɔ kaŋãsi tihɔɔ ayɛkɛ nɛ tɛtɔtɔɖɔ nulũ, Kristo ebetsí sɛ tɛ ebu balɛ eyinɔ nɛ balɛ ebui kpaa gɛ babhɛtɛ nɛ olugbũ nyanyã gɛ oputɔ nɛibeɛ.

¹⁶ Bawɔa kibui tɔtɔɖɔ lu ɛlɛ shu kɛxɔ̃ɛ onupɛ anunɔ gɛ atɔɖɔ ibuiɛ elu etsí pɛ abhama nɛ ɛkpãa,

¹⁷ ɔmɔsɛ kibui tili gɛ anɔ teli atɔɖɔ eluɔ, kidzi ɛxɔ̃ɛwɔadɔ̃ onupɛ etsíɛ, kɛtɛ wɔa ɛxɔ̃ɛ onupɛ anunɔ akalɛ nɛ ɛkpã.

¹⁸ Kɛlɛ so onupɛ bagɛmɔ dzyosu nɔ, bagɛzɛ eshu olugbũ nyanyã gɛoputɔ ɔkɔ.

¹⁹ Kliso onupɛ Mose akalà ɔsha ka nyia ka akɔ banunɔ pete nɔ, azalɔkɔ banɛtsyɔɛeyi dzyosu, bulĩ nɛ̀ obhoshi tɛkã dzadzã ɔlɔkɔ plɛnɔ hisɔp (tɛwɔa tili gɛ Yudanɛ alɔkɔ eshu ɔkɔ nɔ) shu pɛ alɔkɔ azahɔ̃ɛ nɛ keplukpa nɛ̀ banunɔ abha.

²⁰ Azaɖɔ asɛ, “Olugbũ nyanyã dzyosu nɔ gɛ Owusoso Akaa akpɛ elu akɔ ɔnɔ asɛ tɛ nɔnyana ɔlɛ mɛ ovunɔɔ, nɔ ɔlɛ.”

²¹ Nɛidzo ɛlɛ nabhaa yɛazahɔɛ dzyosu nɔ nɛ trɛwɔɛagba nɛ̀ kɛka nyia ka shu axɔ̃ɛ gɛ bawɔa nɛ ɔkɔ oshukɔ nabha.

²² Kibui gbã kinu nɛ ɔsha nulũ ɔsɛ tɛbalɔkɔ dzyosu adalɛ kɛka nyia ka shu nɔ, kɛlɛ onupɛ dzyosu agɛ balɛ nɛ esiɛ, kibui tɛlɔlɔkɔ otsye nanà tsyɛ ma.

²³ So awuhũ dzadzã ibui kidzi sɛ tɛ balɔkɔ ɔdɔ̃ pɔpɔɛ adalɛ ɔdɔ̃ gɛ budzi asɛ kitití uyɛ ɛtɔwuiɛ ana shu. Kitití udɔ̃ pɔɔ, bɔdɔ̃ gɛ balɔkɔ adalɛ bɔlɛishu nɔɔ, pɛ̀ dɛ ɔlɛ.

²⁴ Ɔmɔsɛ Kristo egitsoku trɛwɔɛagba gɛ banɔ bedzu pɛ kenu kagbangbã ɔdɛ ɛtɔwui ɛyɛ mɛ. Kitití boŋ yɛavɛ pɛ alɛ Owusoso Akaa na mɛ nɛ bɔlɔ inye mɛ.

²⁵ Kristo agɛvɛ ititíɛ sɛ tɛ ewlui adɛ̀ alɔkɔ yɛishu akɔ edzinɔ akɔ, ɔmɔ asɛ kitsoku gɛ banɔlũazazã gbagbla etsoku Ɔdadalɛ Ɔkɔ Ɔdɛ kɛgɔ nyiɛ gɔ nɛ̀ dzyosu gɛ etinu yɛahɔɛ ayɛ yɛenuɔ.

²⁶ Pɛ otɛ ɔsɛ kana kɛlɛɛ, tsyɛ alo Kristo atazã bɔtɔ gelee odenɔ kanɔ mɛ esi kpɛkpɛ ibe. Pɔ otsiɛ nɔ Kristo aba kanɔ nɔ̀ mɛ nɛ tɛbaba tinikpo ete mɛ ko nɛ kibe gɔgɔɛ lɛ mɛ, sɛ tɛ alɔkɔ yɛishu akɔ, sɛ tɛ ebu ɔlɔ ebui kpa atɛ.

²⁷ Asɛ ɛtɔɖɔ gɛ batɔɖɔ akɔ anɔdzyrame asɛ tɛ etsí titsitsí tinikpo, kɛlɛ nɛ ɛlɛ niedeɛ, bebèkulu ebhu nii,

²⁸ kliso Kristo alɔkɔ yɛishu akɔ nɛ kibe tinikpo mɛ, sɛ tɛ ebu banɔ gelee ebui kpa atɛ, kɛlɛ azababa bɔbhalà, anɛ ɔlɔ ebui kpa tɛyɛyɛkɛ so pɛ azababa, pɔ ababá sɛ tɛ ebu bagɛ belu awɔ̃ nɛ yɛtɛbabá nabhaa.