Hebrianɛ 8 - Nyangbo New Testament

Banɔlũazazã Gbagbla Ɔkɔ Olugbũ Nyanyã Vɔvɔ

¹ Kibui nɛiwuhũ gɛ bɔɖɔ nu ɔsɛ, Banɔlũazazã Gbagbla alɛ nɛidi alɛ bɔlɔ ahɔɛ, gɛ azã Ohumielete egbu nɛŋã mɛ nɛititíɛ,

² pɛ adɛ axɔ̃ɛ nɛ ɔdadalɛ ɔkɔ, trɛwɔɛagba gbangbã gɛ Apaleteɛ alɔkɔ yɛahɔɛ edzu nɔ, gɛ ketinu anɔdzyrame yɛedzu alɛ.

³ Bezèdzu banɔlũazazã gbagbla ka nyia ka sɛ tɛ azalɔkɔ bɔdɔ̃ kɔkɔ akɔ, tɛ azapɔɛ bɔdɔ̃ tsyɛ, kliso kinu awuhũ dzadzã ibui sɛ tɛ kɛdɔ̃ tili zã yɛtsyɛ ahɔɛ tɛ azakɔ.

⁴ Pɔ otɛ ɔsɛ kanɔ nɔ̀ mɛ yɛalɛɛ, etibedzi banɔlũazazã, ɔmɔsɛ banɔ alɛ, gɛ bakɔ ɔdɔ̃ nɛ ɔsha nulũ kukuku.

⁵ Badɛ axɔ̃ɛ nɛ trɛwɔɛagba ɔdadalɛ ɔkɔ, gɛ lodzi asɛ kitití ɔyɛ nɛ̀ kɛtɔwui nɛidi ana. Kliso pɛ Owusoso Akaa ebui ɛlɛ mɛ akɔ Mose nɛ trɛwɔɛagbaa tidzudzuɔ shu asɛ, “Ɖi kɛlɛ ɔkɔ ɔsɛ ɔbhɛtɛ kɛka nyia ka kɛna asɛ kɛgɛ bebu akasɛ wɔ nɛ butu nabha.”

⁶ Kɛxɔ̃ɛ dɛdɛɛ pɔ gɛ Kristo ayɛkɛɛ, kigbogblo dɛ balɛ ɛyɛ, asɛ kigbogbloɔ gɛ yɛolugbũ nyanyã gɛ alɔkɔ evũ iboe nɛ bɔlɔ ishiɛ nɔ tsyɛ ogbogblo ɔdɛ balɛ ɔyɛ kukuɔ ana. Ɔmɔsɛ lode tɛtɔtɔɖɔ luɔ gɛpɛ̃ dɛ okukuɔ mɛ.

⁷ Pɛ otɛ ɔsɛ kibui nanà gizĩ nɛ olugbũ nyanyã gɛ oputɔ ɔlɛ shuɔ, tsyɛ alo bagɛ takpɛ ɔbhlatɔ nanà nɛ ɔlɛ nɛinye mɛ.

⁸ Pɔ Owusoso Akaa amɔ esitata ɛbui nɛ banunɔ shu kɛlɛ aɖɔ asɛ, “Apaleteɛ adalɛ kɛlɛ mɛ asɛ, kibe lɛ ɛba, gɛ ɛbabhɛtɛ olugbũ nyanyã vɔvɔ nɛ̀ Israel upãa kɛlɛ nɛ̀ Yuda yɛɔpã.

⁹ Kɛtɛ bazã asɛ olugbũ nyanyã gɛ ɛnyã nɛ̀ balɛ ashuĩ alɛ gɛ ɛgbana alɛ nɛ̀ ahɔɛ odenɔ nɛ Egipte ɔmɔsɛ bagɛ zabhɛtɛ nɛ olugbũɔ gɛ ɛnyã nɛ alɛ nabha, kɛlɛ itsyina nɛ alɛ ede, Apaleteɛ adalɛ kɛlɛ mɛ ana.

¹⁰ Olugbũ nyanyã gɛ ɛbanyã nɛ̀ Israel upã nu ɔlɛ Apaleteɛ adalɛ kɛlɛ mɛ asɛ, nɛibe ɛlɛ niedeɛ, ɛbakpɛ mɛ ɔshaa nɛ balɛ ekpeɖekpeɖeɛ mɛ kɛlɛ ɛbafɔnɔ ɛlɛ nɛ balɛ etú nabha. Ɛbadzi balɛ Owusoso Akaa, kɛlɛ bebèdzi mɛeyi alɛ.

¹¹ Otsi alɛ anɔ nanà azakasɛ yɛɔhagbo ɔdɔ̃, alo etseɖe yɛadzya asɛ, ‘Apaleteɛ nɛ alɛ,’ ɔmɔsɛ balɛ pete bebèti mɛ, odenɔ anuvɔ bhlui nabha ɔvɛnɔ esheshè nabha.

¹² Ɔmɔsɛ ɛbalɔkɔ alɛ atakpu mɛ gagalĩ mɛ ebui tsye alɛ kɛlɛ ɛzabaka balɛ ebui kpa bhɛbhɛtɛ iɖi.”

¹³ Gɛ ekulu olugbũ nyanyã ɔlɛ asɛ, “ɔvɔvɔɔ,” kɛkasɛ ɔsɛ ɔgɛ oputɔ otsyina odzi okuku. Kɛlɛ kɛdɔ̃ nɔnɔ́ gɛ kishe pɛ kidzi ikukuɔ bɔyàla kɛyala.