Hebrianɛ 6 - Nyangbo New Testament

¹ Kliso nɔkɔ bɔshɛnɛ ahɔɛ nɛ kesi kpɛkpɛ ɔdɔ̃ kakasɛ nɛ Kristo shuɔ lu, tɛ bushe tɔɖɔ. Nɔtɛ ɔkɔ buwlui zɛkasɛ ɔdɔ̃ nɛ kitú mɛ tsyitsyina ebuiɛ gɛ lagbana anɔ akpɛ butsí mɛɛ shu, nɛ̀ ɔdɔ̃ kakasɛ vɔvɔ nɛ kɛyɛkɛ gɛ bɔba yɛkɛ Owusoso Akaa nabha ɔŋã shu,

² bɔdɔ̃ kakasɛ nɛ bulĩkpɛkpɛ ɔkɔ anɔ, ahɔɛ tɔtɔɖɔ nɛ banɔ abha, tɛlɔlɔ odenɔ bekpu mɛ nɛ̀ kebhu gɔgɔɛ tikukulu shu.

³ Onupɛ Owusoso Akaa adɛmɛɛ, bɔba bhɛtɛ ɛlɛ ana.

⁴ Kɛba gagalĩ ɔkɔ bagɛ batɛmɔ Owusoso Akaa tɛdadalɛ mɛ eɖi, pɛ bemini yɛdɔ̃ kɔkɔ gɛide ititíɛ eɖi, pɛ bayɛkɛ Ɔfɔfuĩa Gbangbã,

⁵ pɛ bamɔ ɔdzyɛ nɛ Owusoso Akaa Ibuiɛ mɛ eɖi, nɛ kɛlɛ ihumi nɛibe gɛ bàba flogo,

⁶ pɛ bashɛrɛrɛ avɛ ide, pɛ kɛlɛ sɛ tɛ bewlui akɔ betsyina itú mɛɛ, nu ibui gɛ gagalĩ. Ɔmɔsɛ kɛgɛ kɛlɛ shu bashɛnɛ ahɔɛ, lɛ asɛ gɛ bewlui aka akpalà Owusoso Akaa Yɛeyiɛ nɛ butsí osíɛ shu, pɛ bakpɛ yɛawuĩ nɛ banɔɛishi.

⁷ Kesiakpa nabha gɛ subha adɔ pɛ kamɔ tɛyɔyɔ ibe nyiɛ be, pɛ kakɔ ɔdɔ̃ gbangbã yu nɛ alɛ abha ɔkɔ bayadɛɛ, kamɔ Owusoso Akaa tiyuyula.

⁸ Kesiakpa nɔnɔ́ pɔ gɛ kanyi nɛ̀ egbegbe ete alɛ adɔ nɛ alɛ abhaa, kagɛpɛ akɔ kɛdɔ̃ nanà, pɔ kedzi esiakpa gɛ Owusoso Akaa aɖɔ ibui akpɛ. Kɛlɛ gɔgɔɛ nɔɔ, bebètsu alɛ ifu.

⁹ Mɛɔbhia alɛ mɔ, gɛ bɔɖɔ ebui alɛ nanà tsyɛ elo, wɔnɔ xɔnɔ bɔyɛkɛ wɔnɔ abha ŋã nɛ wɔnɔ ibui gbangbã-nɛ̀ ebuiɛ gɛ aplɛnɔ wɔnɔ tibubuɔ shu.

¹⁰ Owusoso Akaa etinu asɛnɛ elete, pɛ abadzɛkɛ wɔnɔ axɔ̃ɛ wɔawɔa nɛ̀ wɔnɔ tɛdɛdɛmɛ nɔ nɛ̀ banɔ gɛ nobu ɔkasɛ ɔgana nɛ tɛpɛplɛnɔɔ gɛ nɔkɔ yɛaxɔ̃ɛwɔa. Gɛ notsiɖi ɛlɛ abha ɔkɔ yɛanunɔ tɛpɛplɛnɔ ɔmana otsiɛ.

¹¹ Bɔpɛ sɛ tɛ wɔnɔ mɛ aka nyia aka avɛ emi kpɛkpɛ alɛ nɛidi abha ɔvɛnɔ kibe gɔgɔ̃, sɛ tɛ nɔmɔ kɛgɛ ɛlɛ idzo mɛ noɖiɛ.

¹² Bɔgɛ pɛ sɛ nodzi banɔ zhɔzhɔrɛ, pɔ nɔkpasɛ bagɛ azã nɛ̀ ɛkpã ɔgana tɛyɛyɛkɛŋã nɛ̀ tɛdɔdɔ fɔ̃ɔ mɛ, pɛ bayɛkɛ kɛgɛ batɔɖɔ eluɔ.

Owusoso Akaa Atɔɖɔ Kɛklagbu Nɛ Yɛtɛtɔtɔɖɔ Nabha

¹³ Gɛ Owusoso Akaa abhɛtɛ yɛtɛtɔtɔɖɔ akɔ Abrahamuɔ, atanà yɛishu akɔɛ, ɔmɔsɛ anɔ nanà ama gɛ egbogblo adɛ yɛ pɛ abatanà so,

¹⁴ kɛlɛ aɖɔ asɛ, “Ɛbayula wɔ kokoko, kɛlɛ ɛbakɔ wɔ beshui gelee.”

¹⁵ So gɛ Abraham adɔ fɔ̃ pɛ epoɔ, abayɛkɛ kɛgɛ batɔɖɔ eluɔ.

¹⁶ Banɔ atanà anunɔ gɛ egbogblo adɛ alɛɛ, bɔdɔ̃ tatanà tɔɖɔ kɛklagbu nɛ kibui tili gɛ baɖɔ elu nabha, kɛlɛ bɔlɔkɔ ebhui ibui wɔawlɔãkɛ mɛ nɔ.

¹⁷ Gɛ Owusoso Akaa apɛ asɛ tɛ akasɛ asɛ yɛtɛtɔtɔɖɔ ɛlɛ tɛbà tsyina ɔkɔ bagɛ abaŋã kaŋãsiɛ eɖi soɔ, atanà ɔdɔ̃ atɔɖɔ ɛlɛ abha.

¹⁸ Owusoso Akaa abhɛtɛ ɛlɛ ana asɛ, nɛ ebui taabha alɛ gɛ atɛ balà etsyina, pɛ Owusoso Akaa ebedzi asɛnɛ eleteɛ, kɛlɛ sɛ ɔlɔ agɛ bú tɛtsɛɖɛ mɛ ba yɛdɔ̃ kɔkɔ gɛ bulu awɔ̃ nɛ ɛlɛ abha ɔkɔɔ, tɛ bɔkpɛ ishu emi.

¹⁹ Kidzo mɛ ɖiɖi ɛlɛ kɛlɛ nyana bɔlɔ atɔwuiɛ evunɔ asɛ kɛnyana gɛ sɛkɛ anyana kelĩ abha ohu evunɔ pɛ lɔtɛ hɔa ana. Agã kɛpɔtɛ gɛ balɔkɔ ebhui buvũɔ mɛ nɔ̀ mɛ. Etsoku ɔdadalɛ ɔkɔ pɛ avɛ kɛpɔtɛ niede,

²⁰ nɛ ɛkɛlɛ gɛ Yesu eputɔ editsoku nɛ ɔlɔ inye mɛ. Etsyina edzi banɔlũazazã gbagbla tihɔɔ ɔmɔ asɛ Melxizedek ana.