Hebrianɛ 4 - Nyangbo New Testament

Kimoelewui Ɔkɔ Owusoso Akaa Yɛeyi Alɛ

¹ Kliso gɛ tɛtɔtɔɖɔ ɔkɔ yɛomoelekɔ mɛ tɛvɛvɛ tsiɖi lɛ abha soɔ, nɔkɔ bɔzã nawɔ̃ piapii sɛ tɛ wɔnɔ mɛ anɔ nanà atɛ bawɔɛ idzo.

² Kɛɖɔ gɛ baɖɔ Ibui Gbangbã etseɖe olɔɔ, kɛlɛɛ ko baɖɔ etseɖe alɛ tsyɛ, pɔ kibuiɛ gɛ belũɔ gɛ yɛkɛ edzi nanà ɔkɔ alɛ, ɔmɔsɛ bagɛ elũ ɛlɛ agɛ lɔkɔɛ ɛlɛ akpɛ tɛyɛyɛkɛŋã mɛ.

³ Bɔlɔ agɛ yɛkɛŋã xɔnɔɔ, nɔkɔ butsoku omoelekɔ ɔlɛ, asɛ kɛɖɔ gɛ Owusoso Akaa aɖɔ asɛ, “Kliso ɛtana bɔdɔ̃ nɛ mɛɔmɔpɔɛ mɛ ɔsɛ, ‘Beti betsoku mɛomoelekɔ ɔlɛ oɖi.’ ” Pɔ awɔa yɛxɔ̃ɛ ebeke odenɔ kanɔ mɛ bhɛbhɛtɛ ibe ke.

⁴ Nɛ Ibuiɛ ɔkɔ toliɛ, aɖɔ nɛ kiwui gegenemiɛ shu asɛ, “Nɛ kiwui gegenemi nabhaa, Owusoso Akaa emoele edenɔ yɛaxɔ̃ɛ wɔawɔa petee mɛ.

⁵ Azaɖɔ nɛibui ɛlɛ tsyɛ mɛ asɛ, “Betibeku mɛomoelekɔ ɔlɛ oɖi ɖa.”

⁶ Kɛlɛ ɛlɛ mɛ ɔsɛ beteli eku omoelekɔ ɔlɛ, gɛ bagɛ eputɔ elũ Kibui Gbangbã agɛlà etsoku nɛ balɛ atɔ̃ gagalĩɛ shu so.

⁷ Kliso Owusoso Akaa azatɔɖɔ iwui tili gɛ ekulu ɛlɛ asɛ, Oboɔ. Kɛlɛ nɛ ewui dzlolo teli edeɛ aɖɔaɖɔ aganà David abha nɛ ebui alɛ gɛ atɛɖɔ afala nɔ mɛ asɛ, “Oboɔ onupɛ nolũ yɛaɖɔɔ, nɔtɛ ɔgagalĩ wɔnɔ etúɔ mɛ.”

⁸ Pɔ otɛ ɔsɛ omoelekɔ Yosua akɔ alɛɛ, Owusoso Akaa agɛtɛ ewlui aɖɔaɖɔ nɛ kiwui bhlatɔ shu.

⁹ Kliso kimoelewui tili lɛ ɔkɔ Owusoso Akaa yɛeyi alɛ,

¹⁰ ɔmɔsɛ anɔ nyia anɔ gɛ eku Owusoso Akaa omoelekɔ, anɔ alɛ tsyɛ ebemoele edenɔ yɛaxɔ̃ɛ wɔawɔa mɛ, asɛ kimoele gɛ Owusoso Akaa tsyɛ emoele ana.

¹¹ Kliso nɔkɔ bɔkpɛ emi ka nyia ka idi sɛ tɛ butsoku omoelekɔ ɔlɛ, sɛ tɛ anɔ nanà atɛ gagalĩ atɔ̃ tɛ abadɔ oboe asɛ alɛ ana.

¹² Ɔmɔsɛ Owusoso Akaa ibuiɛ lɛ nɛ ɛkpã, gɛ kɛwɔa axɔ̃ɛ. Kibuiɛ lɔŋã ɔdɛ bɛtɛɛ̀ ilugbũ tɛbha- ka nyia ka. Ashɔ banɔ kɛlɛ ayɛ kɛtɔwui, ɔfɔfuĩa, axɔa ɔtsyɔakɔ nɛ̀ axɔamɛɔbɔ mɛ. Kɛlɛ ekulu ebhu nɛ anɔ ekpeɖekpeɖe nɛ̀ yɛetú mɛ ebui bhɛbhɛtɛ.

¹³ Kɛnanà ma tikpukpũ mɛ ɔkɔ Owusoso Akaa nɛ kanɔ alɛ mɛ petee. Batsɛ bɔdɔ̃ nɛ kɛka nyia ka abha, kɛlɛ ka nyia ka dalɛ li nɛ anunɔ gɛ bɔba bhɛtɛ akɔnta ɔkɔɔ nɛ amɛ.

Yesu Gɛenu Banɔlũazazã Gbagbla

¹⁴ Kliso gɛ banɔlũazazã gbagbla, gɛ agã iwusoso nɔ mɛ pɛ yɛenu Owusoso Akaa Yɛeyi Yesu soɔ, nɔkɔ bɔnyana bɔlɔ tɛyɛyɛkɛŋã gɛ ɛlɛ mɛ bɔdalɛ vunɔ gagalĩi.

¹⁵ Ɔmɔsɛ anɛ banɔlũazazã gɛ atɛ balà elũ bɔtɔ gɛlɛ ɔlɔ shuɔ, yɛalɛ ɔlɔ ahɔɛ, pɔ enu anɔ gɛ befekeɖi nɛ kɛka nyia ka mɛ ɔmɔ asɛ bɔlɔ ana-pɔ yɛxɔnɔ kibui kpa nanà gɛzã yɛishu.

¹⁶ Kliso nɔkɔ butso plɛnɔ Owusoso Akaa ekusiegbuɔ gɛ alɔkɔ ebhui ɔlɔ ebu nɔɔ, nɛité kpɛkpɛ mɛ sɛ tɛ onupɛ kiwui gagalĩɛ batɔnɔ ɔlɔɔ, tɛ ebeɖi ɔlɔ ashagabui tɛ ebhui ɔlɔ ebu.