Hebrianɛ 3 - Nyangbo New Testament

Yesu Egbogblo Adɛ Mose

¹ Kliso mɛadzya dadalɛanɛ gɛ bekulu edeni ititíɛ, nɔkɔ wɔnɔ ekpeɖekpeɖe mɛ azã Yesuɔ gɛenu anɔkpɛkpɛ nɛ̀ banɔlũazazã gbagbla gɛ yɛinye shu bɔɖɔaɖɔ dalɛɛ shu.

² Yesu abhɛtɛ ibui gɛlɛ ɛlɛ ɔzãkɔ akɔ anunɔ gɛ akpɛ yɛ ɔmɔ asɛ kɛbhɛtɛ gɛ Mose abhɛtɛ nɛ Owusoso Akaavũ ka nyia ka mɛ ana.

³ Yesu ayɛkɛ inye gbagbla adɛ Mose, ɔmɔ asɛ kɛyɛkɛ gɛ evũdzuɔ ayɛkɛ inye gbagbla adɛ buvũɔ gɛ bedzuɔ ana.

⁴ Buvũ ka nyia kaa, anɔ teli ko yɛedzu ulɛ, pɔɔ Owusoso Akaa yɛenu anunɔ gɛ yɛedzu kɛka nyia ka.

⁵ Mose abhɛtɛ ibui gɛlɛ ɛlɛ ɔzãkɔ nɛ Owusoso Akaavũ ka nyia ka mɛ asɛ axɔ̃ɛdɛ, pɛ azaɖɔaɖɔ adalɛ ebui mɛ nɛ agɛ babàɖɔ idegba mɛɛ shu.

⁶ Kristo xɔnɔ alɔkɔ ibui gɛlɛ ɛlɛ ɔzãkɔ, gɛ eɖi Owusoso Akaavũ nabha asɛ Eyi ana. Kɛlɛ bɔlɔ nu yɛɔpãa, onupɛ bɔkpɛ emi zã yɛede, pɛ buɖi yɛidzo mɛ nɛ̀ awɔ̃luluɔ gɛ butù itèlũ kɔɔ.

Titsetseɖenɔ Nɛ̀ Bagɛ Agɛ Yɛkɛ Aŋãa

⁷ Kliso asɛ kɛɖɔ gɛ Ɔfɔfuĩa Gbangbã ɔɖɔɔ, “Oboɔ onupɛ nolũ yɛaɖɔɔ,

⁸ nɔtɛ ɔgagalĩ wɔnɔ etúɔ mɛ asɛ kɛbhɛtɛ gɛ nɔbhɛtɛ nɛitití lɔlɔ mɛ nɛ tifefekeɖi ibe nɛ oxuiɛ,

⁹ nɛ ɛkɛlɛ gɛ wɔnɔ ashuĩ alɛ efeke mɛ eɖi pɛ bakpɛ mɛ uluhũɔ kɛlɛ nɛ agɔ afɛtalɛ mɛɛ, bamɔ ebuiɛ gɛ ɛbhɛtɛɛ.

¹⁰ Kɛlɛso pɛ ɛkpɛ ɔmɔpɔɛ nɛ kibelianɛ shu, pɛ ɛɖɔ ɔsɛ, ‘Balɛ etúɔ ebu ɔtɔ nɛ mɛishu kiwui nyiɛ wui, kɛlɛ bagɛlà eti mɛedzoɔ.’

¹¹ Kliso aɖɔ nɛ bɔdɔ̃ tatanà nɛ ɔmɔpɔɛ mɛ asɛ, ‘Beti beku mɛomoelekɔ mɛ eɖi ɖa.’ ”

¹² Mɛadzya alɛ mɔ, noɖi ɛlɛ ɔkɔ ɔsɛ, ebui kpa bhɛbhɛtɛ nɛ̀ etúɔ gɛ agɛ yɛkɛ aŋã pɛ letsyina nɛ Owusoso Akaa gɛ alɛ nɛ ɛkpã niedeɛ azã ɔnɔ ahɔɛ.

¹³ Pɔ nɔkpɛ bagɔlɔ emi iwui nyiɛ iwui, gɛ kiwui lɛ bekulu asɛ Oboɔ nɔ, sɛ tɛ wɔnɔ mɛ ananà aba gagalĩ atɔ̃ nɛ anɔ wɔɛwɔɛ mɛ.

¹⁴ Bɔbá sɛ tɛ bɔmɔ ɔtɔ plɛnɔ Yesu onupɛ bɔnyana kidzo mɛ ɖiɖi ebuiɛ gɛtɛ zã ɔlɔ ahɔɛ bafala nɔ mɛ vunɔ gagalĩ ɔvɛnɔ ewuiɛ gɔgɔɛ nɔ.

¹⁵ Ɔmɔ asɛ kɛɖɔ gɛ baɖɔ asɛ, “Oboɔ nolũ Owusoso Akaa nɛaɖɔɔ, nɔtɛ ɔgagalĩ wɔnɔ etúɔ mɛ ɔmɔ asɛ kɛbhɛtɛ gɛ nɔbhɛtɛ nɛ kitití lɔlɔ ibeɛ.”

¹⁶ Banɔ ɖuwoe lu gɛ béelũ Owusoso Akaa ebui, pɛ baalɔɛtití nɛishu? Pɛnɔsɛ anɛ alɛ enu agɛ Mose agbana edenɔ Egipteɛ dza?

¹⁷ Kɛlɛ fakɔ anɛ ibui gɛzɛpɔɛ yɛ nɛ agɔ afɛtalɛ nyɔ̃ɔ mɛɛ dza? Pɔ anɛ balɛ enu bagɛ bazabhɛtɛ ebui kpa pɛ bawɔlɛ ebho, nɛ oxuiɛ mɔɔ dza?

¹⁸ Kɛlɛ fakɔ anɛ pɔ Owusoso Akaa atanà bɔdɔ̃ akɔ asɛ beti beku yɛomoelekɔ oɖi gɛ kitinu banɔ alɛ gɛ begi zelũ batɔ̃ akɔɛ mɔɔ dza?

¹⁹ Kliso kɛlɛ mɛ dalɛ kɔ ɔlɔ ɔsɛ, banɔ alɛ agɛlà eku ɛkɛlɛ nɛ balɛ mayɛkɛ, mayɛkɛŋã shu so.