Hebrianɛ 2 - Nyangbo New Testament

Lu Awɔ̃ Piapii Nɛ Kibuiɛ Shu

¹ Kɛlɛ sɛ bulu awɔ̃ piapii nɛ ebuiɛ gɛ bulũ ɔshu, sɛ tɛ bɔtɛ shrɛrɛ tsrakɛ idzo.

² Onupɛ kibuiɛ gɛ akaa yɛaxɔ̃ɛdɛ abaɖɔ alɛ ɛnyã ɔlɔ, kɛlɛ bagɛ alɔɛtití nɛ ɛlɛishu alo pɛ begilũ atɔ̃ɔ, babàmɔ batɔ̃ pɔpɔ̃ gɛ ashɔnɔɔ,

³ kɛlɛ́ bɔbalà bu tɛtsɛɖɛ mɛ, onupɛ bɔshɛnɛ ahɔɛ nɛ tibubu gbagbla ɛlɛ nɛidi shu? Apaleteɛ etiputɔ akɔ tìtitì nɛ tibubu ɛlɛ shu, kɛlɛ bagɛ elũ ibuiɛ eputɔ nɔɔ, adɛmɛ atɔɖɔ kɛlɛ abha akɔ ɔlɔ asɛ kɛlɛ ɛlɛ ɔzãkɔ.

⁴ Owusoso Akaa tsyɛ aɖɔaɖɔ adalɛ ɛlɛishu ɔgana ɔdɔ̃ tibubu kasɛ, ebui gɛ leku ifu nɛ̀ atsyindzye ebui edi edi mɛ, ɔlɔkɔ plɛnɔ Ɔfɔfuĩa Gbangbã ɔdɔ̃ ɔkɔkɔ nɛ yɛtɛdɛdɛ mɛ ulũ.

Babhɛtɛ Yesu Asɛ Yɛadzya Alɛ Ana

⁵ Bukusiŋaŋã nɛ kanɔ nɔ̀ mɛibui gɛ baɖɔ asɛ kɛbabáa, anɛ baxɔ̃ɛdɛ niesi balɔkɔ ɛlɛ akpɛ.

⁶ Pɔ ɔkɔ toli ɔlɛ gɛ anɔ teli adalɛ ɛlɛ mɛasɛ, “Kiɖe gɛinu anɔdzyrame pɛ wɔɛwuhũ tsiɖi yɛabha ana, Nɛ̀ anɔdzyrame yɛeyiɛ pɛ oɖi yɛabha ana?

⁷ Ɔbhɛtɛ yɛ yɛezhi esi ibɔɛ bhlui ko adɛ akaa axɔ̃ɛdɛ, ɔkɔɛ ishu dadalɛ, kɛlɛ ɔkpɛ yɛinye nɛitití

⁸ kɛlɛ ɔlɔkɔ kɛka nyia ka ɔkpɛ yɛesi.” Gɛ Owusoso Akaa alɔkɔ kɛka nyia ka akpɛ yɛesiɛ, kɛlɛ́ kɛdɔ̃ nanà gɛ gɔ̃ gɛ atɛ baŋã ɛlɛ abha. Pɔ otsiɛ nɔɔ, kɛɛ kasɛ ɔlɔ ɔmɔ asɛ, kɛka nyia ka ma yɛohumi esi.

⁹ Pɔ bɔmɔ Yesu, anunɔ gɛ bezhinɔ yɛesi ibɔɛ adɛ baxɔ̃ɛdɛɛ, otsi alɛ Owusoso Akaa akɔɛ ishu dadalɛ, pɛ akpɛ yɛinye nɛitití, ɔmɔsɛ yɛamɔ bɔtɔ pɛ etsí. Kɛlɛ nɛ Owusoso Akaa yɛ tibhui bhuibu nulũɔ, tɛ ètsí nɛ anɔ ka nyia ka yɛulũ.

¹⁰ Tɛ agbana beyianyɛ gelee amana ishu dadalɛ mɛɛ, kɛpɛ sɛ Owusoso Akaa gɛ yɛenu anunɔ gɛ yɛabhɛtɛ kɛka nyia ka, pɛ yɛahɔɛ mɛ bɔlɛ, sɛ tɛ abhɛtɛ Kristoɔ gɛ ebu ulɔ piapii nɔ, ɔgana bɔtɔ mɛ.

¹¹ Anunɔ gɛ yɛakɔ banɔ tɛdadalɛ, nɛ̀ bagɛ babhɛtɛ asɛ tɛ badalɛ pete nɔɔ, bede kishopo tinikpo mɛ. Kliso kiti nu kiwuĩ ibui ɔkɔ Yesu asɛ tɛ ekulu alɛ asɛ yɛadzya alɛ.

¹² Kɛlɛ aɖɔ asɛ, “Ɛbaɖɔaɖɔ dalɛ wɔɛnyeɛ shu ɔkɔ mɛadzya alɛ, kɛlɛ nɛ ɔha namɛɛ, ɛbazhã wɔdzɛ kpɛ wɔɛnye nɛitití.”

¹³ Azaɖɔ asɛ, “Ɛbalu awɔ̃ nɛ wɔabha.” Kɛlɛ azavɛ kɛlɛ abha asɛ, “Ɔmɔ mɛ, nɛ̀ beyiɛ gɛ Owusoso Akaa akɔ mɛɛ.”

¹⁴ Gɛ ishupi nɛ̀ dzyosu alɛ beyi alɛ mɛɛ, Yesu tsyɛ ezhinɔ ishu esi asɛ balɛ ana, sɛ tɛ gana yɛutsíɛ mɛɛ, tɛ etũ ɔtsɛɖɛ ayɛ Satana gɛ yɛahɔɛ mɛ butsí ohumi nɔ ɔlɛɛ, gɛ yɛenu anɔ zizĩɛ

¹⁵ sɛ tɛ akɔ bagɛ butsí vũ alɛ asɛ banɔ dzidzi, pɛ bezesi utsí ifuɔ, ishu ahɔɛ mɛ zazã.

¹⁶ Ɔmɔsɛ kibui gbã kinu ɔsɛ anɛ akaa axɔ̃ɛdɛ yɛaplɛnɔ, pɔ Abraham yɛeshui alɛ.

¹⁷ Klisoɔ, kɛlɛ sɛ babhɛtɛi asɛ yɛadzya alɛ nɛidzo ka nyia ka abha, sɛ tɛ edzi banɔlũazazã gbagbla gɛ abalà eɖi ashagabui pɛ ababhɛtɛ ibui gɛlɛ ɛlɛ ɔzãkɔ, nɛ Owusoso Akaa ɛxɔ̃ɛ mɛ, sɛ tɛ alɔkɔ yɛishu akɔ nɛ banunɔ ebui kpa bhɛbhɛtɛ shu.

¹⁸ Ɔmɔsɛ gɛ amɔ bɔtɔ nɛ yɛtifefeke ɖi mɛ soɔ, abalà aplɛnɔ banunɔ gɛ beefeke eɖiɛ tsyɛ.