Hebrianɛ 13 - Nyangbo New Testament

Buluhũ Huhu Gɔgɔɛ Nɔ

¹ Nɔvɛ ɛlɛ abha tɛ nɔɔdɛmɛ nɔ nɛ bagɔlɔ.

² Nɔdɛmɛ befu yɛyɛkɛ ibui, ɔmɔsɛ nɛ mati matì mɛɛ, beteli bayɛkɛ Owusoso Akaa axɔ̃ɛdɛɛ.

³ Nɔbaka bagɛ alɛ ɔɖavũɔ mɛ, asɛ wɔnɔ nɛ alɛ bakpɛ nɛ ɔɖavũɔ mɛ ana, kɛlɛ bagɛ bawɔa alɛ ɔnyɔnyɔ̃ nɔ, ɔmɔ asɛ wɔnɔ tsyɛ wɔnɔ mɔ ɔtɔ ɔlɛ ana.

⁴ Wɔnɔ badzɛenyine nɛ̀ banyɛedziniɛ, nɔkpɛ ɛtakpu esi ɔkɛ bagɔlɔ shu nɛ̀ wɔnɔ ɔwɔ̃sɔkɔ tsyɛ, ɔmɔsɛ Owusoso Akaa ebekulu ebhu nɛ̀ agɛ adɛ ɔma mɛ nɛ̀ bagɛ baŋã agɔlɔ.

⁵ Tɛdɛdɛmɛ nɔ nɛ̀ ehoeyi pɛpɛ ɔfala nɛifu tɛzã ɔnɔ mɛ, pɔ nɔkɔ kɛgɛ ɛlɛ wɔnɔ ahɔɛ ku wɔnɔ awɔ̃, ɔmɔsɛ Owusoso Akaa aɖɔ asɛ, “Ɛtɛba shɛnɛ ahɔɛ nɛ wɔshu alo tɛ mɛshɛ̃ yɔlɔ wɔ ɖa.”

⁶ Kɛlɛ bɔɖɔ nɛ̀ awɔ̃ lulu ɔsɛ, “Apaleteɛ yɛenu anunɔ gɛ aaplɛni mɛ, kifu tɛbayi mɛ. Kiɖuwoe anɔ abalà abhɛtɛ ni mɛ?”

⁷ Nɔbaka banɔlũazazã gaɖɔ Owusoso Akaa ibuiɛ akɔ ɔnɔɔ. Nolũ awɔ̃ oɖi balɛ ɛkpã tɛzazã mɛ tɛ nɔkpasɛ alɛ tɛyɛyɛkɛŋã.

⁸ Yesu Kristo tenikpo alɛ gɛ azã ivũɔ, yɛalɛ oboɔ nɛ̀ tihɔɔ.

⁹ Nɔtɛkɔ ɔsɛ bɔdɔ̃ kakasɛ ka nyia ka ɛdi zɛgbana ɔnɔ. Kɛpɛ ɔkɔ ɔlɔ etúɔ asɛ tɛ lamɔ ohumi ɔgana tibhui bhuibu mɛ, pɔ anɛ bɔŋaŋã ɔsha gɛ ɛlɛ beshu pɛ lɛ tɛ plɛnɔ banunɔ gɛ baŋã ɔdɔ̃.

¹⁰ Bɔdɔ̃ pɔpɔɛ osubha toli ɔlɛ ɔlɔ ahɔɛ gɛ bagɛ bakpɛ ɛtakpu esi nɛ trɛwɔɛgba mɛɛ, bagɛ mɔ idzo aŋã ɔlɛ abha ɔdɔ̃.

¹¹ Banɔlũazazã gbagbla alɔkɔ bagã dzyosu avɛnɔ Ɔdadalɛ Ɔkɔ Ɔdɛɛ, asɛ bɔdɔ̃ kɔkɔ́ nɛ ebui kpa ɛtakpu ana, bagã pɔɔ, baapɔɛ alɛ nɛ kagba niede.

¹² Nɛidzo ɛlɛ nabhaa, Yesu tsyɛ amɔ̃ bɔtɔ nɛ ɔma ɔlɛ kakãdeɛ ɔsɛ tɛ alɔkɔ yɛdzyosu nɔ adalɛ banɔ shu nɔ.

¹³ So nɔkɔ bukoeyi vɛ Yesu yɛɔbha nɛ buvũ niede tɛ bakpɛ ɔlɔ tsyɛ awuĩ nɛidi gɛ bakpɛ yɛ.

¹⁴ Ɔmɔsɛ nɛ kanɔ alɛ mɛɛ, ɔma nanà ɔma gɛ ɔbɔkpɛ emi ɔzã tihɔɔ, pɔ buuɖi ɔgɛ ɔbɔba nɛidzo mɛ.

¹⁵ Kliso gana Yesu abhaa, nɔkɔ bɔzɛ lɔkɔ kitití kpɛkpɛ gɛlɛ asɛ bɔdɔ̃ pɔpɔɛ anaa zɛkɔ Owusoso Akaa- gɛenu ebuiɛ gɛ baɖɔ adalɛ yɛinyeɛ shu nɔ.

¹⁶ Nɔtɛ dzɛkɛ ibui gbangbã tɛbhɛbhɛtɛ nɛ̀ kɛdɔ̃ kɔkɔ banɔ bhlatɔ, ɔmɔsɛ bɔdɔ̃ pɔpɔɛ ɛlɛ nɛidi ku Owusoso Akaa awɔ̃.

¹⁷ Nolũ atɔ̃ ɔkɔ bagɛ alɛ̀ ɔnɔ lũɔ, tɛ nɔkpɛ ɛtakpu esi ɔkɔ alɛ gɛ balɛ eɖi wɔnɔ abha, pɛ balɛ enu banunɔ gɛ babàkɔ akɔnta nɛ wɔnɔ shuɔ. Nolũ atɔ̃ nɛ alɛ, sɛ tɛ balɛ ɛxɔ̃ɛ wɔawɔa etsyina edzi same ibui, pɔ nɔtɛkpɛ bɔtɔ gɛ tɛba mana ɔnɔ ibui gbangbã nanà nɔ.

¹⁸ Nookulu Owusoso Akaa nɛ ɔlɔ ɛtakpu. Bɔyɛkɛ ŋã sɛ bɔlɛ nɛ etú dadalɛ mɛ, kɛlɛ bɔɔpɛ sɛ tɛ bɔzã nɛ̀ ɛkpã dadalɛ nɛidzo nyiɛ idzo abha.

¹⁹ Ɛkpalà ɔnɔ ɔsɛ nokulu Owusoso Akaa sɛ tɛ adalɛ idzo akɔ mɛ tɛ mɛitso dzi tsyina ba ɔnɔ ɔbha nɛibe gulũi mɛ.

²⁰ Tɛ ishu yɔyɔeleteɛ gɛenu Owusoso Akaa, anunɔ gɛ gana olugbũ nyanyã tihɔɔ dzyosu alɛ mɛ, pɛ akɔ Apalete Yesu alɔ ede bekpu mɛ, gɛ yɛenu Ibhoshi agbagbanaelete gbagblaa,

²¹ alɔkɔ ɔdɔ̃ gbangbã ka nyia ka idi akɔ ɔnɔ sɛ tɛ nɔbhɛtɛ nɛ yɛibui tɔtɔɖɔ nabha, tɛ abhɛtɛ kɛgiku yɛawɔ̃ nɛ bɔlɔ mɛ ɔgana Yesu Kristo abha. Yɛyɛ́ kɛlinu ishu dadalɛ odenɔ otsiɛ ɔvɛnɔ tihɔ, tihɔ. Amen.

²² Mɛadzya alɛ mɔ, ɛɛkpalà ɔnɔ gagalĩi sɛ tɛ nɔyɛkɛ uluhũɔ gɛihu kɔ ɔnɔ gana eplukpa gulũi alɛ gɛ ɛfɔnɔ sɛsɛ ɔnɔ mɛ.

²³ Ɛkɔ ɔnɔ tititì sɛ bashɛnɛ ahɔɛ nɛ ɔlɔ adzya Timoteo shu, kɛlɛ kibeɛ gɛ anya ebeku mɛɔbha koɔ, bɔnɛ yɛ babá tɛ ɛbaɖi unɔ.

²⁴ Nɔsɛnɔ bagɛ agbana ɔnɔ nɛ̀ Owusoso Akaa anɔ petee. Bagɛ bede Italia aba pete asɛnɔ ɔnɔ.

²⁵ Owusoso Akaa tibhui bhuibuɔ zã plɛnɔ wɔnɔ petee.