Hebrianɛ 12 - Nyangbo New Testament

Owusoso Akaa Apɔ Batɔ̃ Akɔ Yɛeyi Alɛ

¹ Gɛ bagazã pɛ amɔ ebuiɛ alɛ asɛ ɔmɔlɔ̃ dodo toli gɛ ɔkpɛ ɔkã kana ɔlɔ soɔ, nɔkɔ bubú kɛka nyia ka, nɛ̀ ebui kpa gɛ làkɔ bɔdɔ̃ oboeɛ lu, tɛ bubú tɛtsɛɖɛ mɛ bubuɔ gɛlɛ ɔlɔ otugbàa nɛ̀ emi.

² Nɔkɔ ɔlɔ awuhũ àzã Yesu abha, yɛ gɛ akpɛ ɛlɛ esi pɛ ewoese ɔlɔ tɛyɛyɛkɛŋãa, kɛlɛ gɛ enyi same nɔnɔ́ gɛ alɛ akɔɛ idegba soɔ, akpɛ emi nɛ butsí osiɛ abha zazã bɔtɔ mɛ, kɛlɛ butsí osi abha zazã gɛiku yɛiwũi nanà. Otsi alɛ ezhi azã Owusoso Akaa bukusiegbu nɛŋã mɛ.

³ Noɖi bɔtɔ gɛ anɔ alɛ akpɛ emi amɔ edenɔ banɔ kpa gɛ alɔɛtití nɛishuɔ ahɔɛ mɛɛ, sɛ tɛ anɔ nyia anɔ akpɛ emi tɛ yɛitú titsyina ɔtɔ.

⁴ Gɛ nɔgɔ̃lɛ nɛ̀ ebui kpa tsyɛ elo, kɛkà ba ɛlɛ mɛ sɛ tɛ bàbalɛ wɔnɔ dzyosu esi xɔnɔ.

⁵ Pɔ nɔ dzɛkɛ kemi kpɛkpɛ anɔ ibuiɛ gɛ balɔkɔ ekulu wɔnɔ nɔ̀ asɛ mɛeyianyɛ alɛ mɔɔ dza? Aɖɔ asɛ, “Mɛeyi, tɛɔlɔkɔ Apaleteɛ yɛatɔ̃ pɔpɔ ɔmɔ asɛ bɔwufu ibui kɛlɛ onupɛ etseɖe ni wɔɔ, tɛkɔ kɛpɔɛ wɔ,

⁶ ɔmɔsɛ anunɔ gɛ Apaleteɛ adɛmɛ nɔɔ yɛ yɛapɔ batɔ̃ akɔ, kɛlɛ apɔ batɔ̃ akɔ eyi nɔnɔ́ gɛ ayɛkɛ asɛ eyiɛ.”

⁷ Nɔkpɛ emi nɛ wɔnɔ ɔtɔ gɛlɛ asɛ batɔ̃ pɔpɔ̃ ana mɛ, tɛ nɔyɛkɛ ɛlɛ ɔmɔ asɛ Owusoso Akaa yɛapɔ atɔ̃ akɔ yɛeyi alɛ ana. Pɔ eyi ɖuwoe lu gɛ alɛ pɛ yɛakaa atɛpɔ yɛatɔ̃ mɔɔ dza?

⁸ Onupɛ bagɛpɔ wɔatɔ̃ (kɛlɛ anɔ nyia anɔ pɔɔ, azã batɔ̃ pɔpɔ̃ esi), kɛlɛ notinu bɔpã mɛeyi, ɔma mɛ eyi nonu.

⁹ Kɛgɛ zɛdɛɛ nu ɔsɛ bakaa alɛ ɔlɔ nyɔ̃ɔ ahɔɛ nɛ kanɔ nɔ̀ mɛ gɛ bapɔ atɔ̃ akɔ ɔlɔ, kɛlɛ bɔkpɛ alɛ inye nɛitití nɛ ɛlɛ takpu. Kiɖuwoe gɛkɔ ɔsɛ bɔtaa zhinɔ ishu esi kpɛ bɔlɔ ɛfɔfuĩa mɛ Akaa niesi pɛ bɔbazã nɛ ɛkpãa dza?

¹⁰ Nɛ kibe gulũi tili mɛɛ, bɔlɔ akaa alɛ akɔ ɔlɔ atɔ̃ pɔpɔ nɛ kɛpɛ gɛ bapɛ ulũ. Owusoso Akaa xɔnɔ àpɔ ɔlɔ atɔ̃ asɛ tɛ bɔpɛ, tɛ bɔbazã yɛtɛdadalɛ mɛ.

¹¹ Same atɛzã batɔ̃ ɛpɔbe nanà mɛ, bɔtɔ ɛbe kinu. Nɛ kɛlɛ idegba pɔɔ, kɛmana tɛzazã piapii nɛ̀ ishu yɔyɔ ɔkɔ bagɛ bazã tɛgbagbana niesiɛ.

¹² Kliso nɔtɛkɔ wɔnɔ ɛhɔɛ tsí, kɛlɛ wɔnɔ ekluisi nɔ tsyɛ eti botsò.

¹³ “Nowoese edzoɔ tɛ ladɔ akɔ wɔnɔ ɛtsɛɖɛkpɔ,” sɛ tɛ banɔ gɛ agbã atɛgbã atɔɖɔ, pɔ tɛ bamɔ ishu mɛ gagalĩ.

Tɛshɛ Nɛ̀ Ahɔɛ Nɛ Owusoso Akaa Shu

¹⁴ Nɔgã idzo ka nyia ka abha tɛ nɔzã nɛ ishu yɔyɔ mɛ nɛ̀ anɔ ka nyia ka tɛ wɔnɔ shu dalɛ, ɔmɔsɛ onu anɛ tɛdadalɛ mɛɛ, anɔ nanà atɛ balà amɔ Apaleteɛ.

¹⁵ Nɔnyana ishu piapii sɛ tɛ noti tsodzi nɛ Owusoso Akaa tibhui bhuibuɔ shu. Nɛ kidzo ɛlɛ nabhaa anɔ nanà atɛzã asɛ tɛwɔa kɛtɛtɛ́ gɛ tishè pɛ tɛlɔkɔ ɛlɛ abɔɛ zĩ udɔ̃ gelee nɔ ana.

¹⁶ Nɔnyana ishu piapii sɛ tɛ anɔ nanà etidzi ɔmamɛadɛdɛ elete alo anɔ gɛ akaa ɔfɔfuĩa nɔ ma yɛmɛ asɛ Esau ana, gɛ atsrakɛ yɛeyianyɛ ukusi ɔzãkɔ nɛ̀ kɛŋaŋã esugba tienikpo nɔ ana.

¹⁷ Kidegba gɛ azapɛ tiyuyula asɛ eyianyɛ ekusi anaa, bagɛ kɔɛ. Gɛ alɔkɔ yoyo bibi tsyɛ elo, anɔ nanà agalà etsyina kibuiɛ gɛ atɔɖɔ eluɔ.

¹⁸ Anɛ butuɔ gɛ nɔtɛ bɔlà ohunɔ shu nɔba, nɛ̀ butuɔ gɛ sɔlɛ ɛtã, otumũ kuku, kawlagoe alo fluflũ mɛ nɛ̀ kɛlɛ́ gagalĩ fufù,

¹⁹ ɛkɛlɛ gɛ babɔ exoele nɛ̀ ozĩ kpɛkpɛ toli idi, kɛlɛ bagɛ elũɔ akɔ ɛtakpu asɛ batɛ aɖɔ ibui nanà etseɖe alɛ,

²⁰ ɔmɔsɛ batɛ akalà azã ɔsha gɛ bakpɛ akɔ alɛ niesi. “Agã yɛete yɛehunɔ butuɔ tsyɛ elo, kɛlɛ sɛ tɛ behui aklagbu eyí.”

²¹ Kɛgɛ Mose amɔɔ ku yɛifu, so aɖɔ asɛ, “Ishuku nɛ̀ kifusisi.”

²² Otsi alɛ nɔba Zion Butuɔ, gɛinu kitití Yerusalem, Owusoso Akaa enunuɔ yɛɔma gbagbla mɛ. Noboku baxɔ̃ɛdɛ ihotu, ihotuɔ nɛ̀ balɛ same mɔmɔ̃ ɛzaa mɛ.

²³ Nɔba, wɔnɔ ɔhamɛeyi gɛ oputɔ, bagɛ alɛ enye bafɔnɔ elu nɛititíɛ. Nɔba Owusoso Akaa, gɛ yɛekulu ebhu nɛ̀ anɔ nyia anɔ, nɛ̀ banɔ gbangbã ɛfɔfuĩa nɔ gɛ babhɛtɛ piapii nɔ,

²⁴ Yesu gɛ evũ iboe nɛ̀ olugbũ nyanya vɔvɔ, nɛ̀ dzyosu hɔɛhɔ̃ɛ gɛ aɖɔaɖɔ gbangbã ɔdɛ Abel dzyosu nɔɔ.

²⁵ Nolu awɔ̃ tɛ notitso dzi nɛibuiɛ gɛ anunɔ aɖɔ niede. Onupɛ bagɛlà ebu tɛtsɛɖɛ mɛ ashɛ nɛ anunɔ gɛ etseɖe nɔ nɛ̀ alɛ nɛ esiakpa alɛ nabhaa, kɛlɛ bɔlɔ pɔ balà bu tɛtsɛɖɛ mɛ onupɛ butso dzi nɛ anunɔ gɛ etseɖe nɔ ɔlɔ nɛ kititíɛ ɔbha?

²⁶ Nɛ kibe ɛlɛ, yɛaɖɔ ezeshuku esiakpa, pɔ otsi alɛ atɔɖɔ elu asɛ, “Anɛ esiakpa ete mɛba suku, kititíɛ tsyɛ baplɛnɔ.”

²⁷ Ebui alɛ asɛ, “Ɛzɛbabhɛtɛɛ” kɛkasɛ kibu gɛ bebèbu bɔdɔ̃ gɛ balà shukuɔ atɛɛ-gɛ bunu kanɔ mɛ ɔdɔ̃-sɛ tɛ kɛgɛ batɛ balà eshukuɔ tɛ kɛwɔ ɛlɛ ɔzãkɔ.

²⁸ Kliso gɛ bɔyɛkɛ bukusi ŋaŋã ɛlɛ gɛ bɔtɛbalà shukuɔ, nɔkɔ buhu ahɔɛ, tɛ bɔlɔkɔ ɛtakpu esi kpɛkpɛɛ gɛshɔnɔ, nɛ̀ kifu sisíɛ ɔkɔ Owusoso Akaa,

²⁹ ɔmɔsɛ bɔlɔ Owusoso Akaa, enu kifu gɛpɔɛ bɔdɔ̃.”