Hebrianɛ 11 - Nyangbo New Testament

Gana Tɛyɛyɛkɛŋã Mɛ

¹ Tɛyɛyɛkɛŋã nu kɛgɛ olu awɔ̃ nɛ ɛlɛ abha pɛ oɖi kɛdɔ̃ gɛ ɔtɛ ɔmɔ nɛidzo mɛ.

² Nɛidzo ɛlɛ nabhaa ebelianɛ nɛibui ku Owusoso Akaa awɔ̃.

³ Denɔ tɛyɛyɛkɛŋã mɛɛ, bulũ kɛlɛ mɛ ɔsɛ, kibui Owusoso Akaa aɖɔ alɔkɔ abhɛtɛ kanɔ nɔ̀ mɛ nɔ̀. Kliso kɛgɛ bɔmɔ otsiɛ nɔ, babhɛtɛ ɛlɛ edenɔ kɛgɛ bɔtɛlà mɔ mɛ.

⁴ Nɛ tɛyɛyɛkɛŋã mɛɛ, Abel akɔ Owusoso Akaa ɔdɔ̃ pɔpɔɛ gbangbã ɔdɛ Kain. Gana tɛyɛyɛkɛŋã mɛɛ, yɛibui ku Owusoso Akaa awɔ̃ kɛlɛ aɖɔaɖɔ gbangbã nɛ yɛɔdɔ̃ kɔkɔɔ shu. Abel etitsí, pɔ nɛ tɛyɛyɛkɛŋã mɛɛ, akaɖɔaɖɔ.

⁵ Tɛyɛyɛkɛŋã mɛ kide sɛ befeke Henox avɛnɔ itití nɛ yɛkpã mɛ, egitsí so bagɛlà amɔɛ, ɔmɔsɛ Owusoso Akaa yɛefeke ashɛnɔ. Flogo tɛ befeke yɛɛ, edzi anunɔ gɛ yɛibui ku Owusoso Akaa awɔ̃.

⁶ Kɛba gagalĩ sɛ tɛ oku Owusoso Akaa awɔ̃, onupɛ tɛyɛyɛkɛŋã ma wɔahɔɛ. Ɔmɔsɛ anɔ nyia anɔ gɛ aba yɛamɛɛ, kɛlɛ sɛ tɛ ayɛkɛ aŋã asɛ Owusoso Akaa alɛ, kɛlɛ abuia ɛbhɛ akɔ bagɛ apɛ yɛ nɛ̀ awuhũ dzadzã.

⁷ Gana tɛyɛyɛkɛŋã mɛɛ, gɛ bakɔ Noa yɛeti asɛ kɛgɛ kabaɖi bàba ɛlɛ mɛɛ, alɔkɔ atɔ̃ lulũ gbangbã afatɛ kelĩabha ohu pɛ alɔkɔ ebu yɛɔpã nɔ. Alɔkɔ yɛtɛyɛyɛkɛŋã ebu kanɔ mɛanɛ nɛpɔ nɔ̀, kɛlɛ edzi kaŋãsiɛelete gbangbã gɛide tɛyɛyɛkɛŋã mɛ.

⁸ Tɛyɛyɛkɛŋã kɔ ɔsɛ gɛ betseɖe Abraham asɛ ashɛ avɛ esiakpa bhlatɔ abha tɛ kebe dzi yɛayɛ idegbaa, elũ atɔ̃, kɛlɛ avɛ, gɛ etinyi ɛkɛlɛ gɛ avɛ kura tsyɛ flogo.

⁹ Nɛ tɛyɛyɛkɛŋã mɛɛ, Abraham ebhui bɔpã nɛ esiakpa gɛ kebe dzi yɛayɛ nabha, asɛ efu ana nɛ kɛmadi bhlatɔ mɛ. Abraham, Isak ɔlɔkɔ ɔplɛnɔ Yakob pete nɔ, apɔtɛ ɔgba mɛ baazã, gɛ balɛ tsyɛ enu kaŋãsi alɛ gɛ batɔɖɔ elu alɛ elete.

¹⁰ Ɔmɔsɛ ezeɖi idzo mɛ akɔ ɔma hohoe toli gɛ ɔlɛ tidzudzu esi kpɛkpɛ ɛklagbueleteɛ, nɛ̀ agɛ atá ɔma pɛ ebhui ɔlɛ, yɛenu Owusoso Akaa.

¹¹ Nɛ tɛyɛyɛkɛŋã mɛɛ, gɛ Abraham edzì anyɛ sheshè, kɛlɛ Sara tsyɛ edzì anɔ gɛ bɔmɔ gɛzã yɛishu tsyɛ elo, ebedzi banɔ gelee akaa, ɔmɔsɛ ayɛkɛ Owusoso Akaa gɛ atɔɖɔ tɛtɔtɔɖɔ ɛlɛ akɔɛ asɛ enu anunɔ gɛ àbhɛtɛ kɛgɛ lɛ ɛlɛ ɔzãkɔ nabha aŋã.

¹² Kliso denɔ Abraham tenikpo alɛ gɛ asɛ etsí ebeke mɛɛ, yɛeyi mɔmɔ́ alɛ ebékpè asɛ awɔ̃ɛ nɛititíɛ kɛlɛ asɛ ayisɛ nɛ aƒutɔ̃, gɛ lama tɛkaklà mɛ ana.

¹³ Banɔ alɛ pete nɔ, tɛyɛyɛkɛŋã ɛlɛ zã alɛ ahɔɛ flogo pɛ bétsí. Pɔ bagɛ yɛkɛ ɔdɔ̃ gɛ batɔɖɔ elu akɔ alɛ. Bamɔ bɔlɛ ete, kɛlɛ batsyana ɔlɛ edenɔ kitsí. Badɛmɛ atɔɖɔ ɛlɛ abha asɛ befu nɛ̀ baafafala ete benu nɛ esiakpa nabha.

¹⁴ Bànɔ nɔ̀ gɛ baɖɔ ebui alɛ nɛidiɛ, kɛkasɛ ɔsɛ baapɛ esiakpa gɛenu balɛ ahɔɛ ayɛ.

¹⁵ Pɛ otɛ ɔsɛ baza baka esiakpa mɛ gɛ bedeɛ, tsyɛ alo batɛ mɔ ɛdzo etsyina avɛ.

¹⁶ Nɛ kɛlɛ nɛinye mɛɛ, baapɛ balɛ ahɔɛ esiakpa gɛ apɛ adɛ gɛ kenu itití ayɛ. Kliso kiwũi tiyi Owusoso Akaa asɛ bezekului asɛ balɛ Owusoso Akaa, ɔmɔsɛ ebhui ɔma hohoe toli elu akɔ alɛ.

¹⁷ Nɛ tɛyɛyɛkɛŋã mɛɛ, gɛ Owusoso Akaa efeke Abraham eɖiɛ, alɔkɔ Isak akɔ, asɛ ɔdɔ̃ pɔpɔɛ ana. Gɛ yɛenu anunɔ gɛ batɔɖɔ tɛtɔtɔɖɔ ɛlɛ elu akɔ tsyɛ elo, adɛmɛ alɔkɔ eyiɛ gɛenu yɛeyianyɛ tenikpo nɔ asɛ ɔdɔ̃ pɔpɔɛ,

¹⁸ gɛ Owusoso Akaa aɖɔ etseɖe yɛasɛ, “Denɔ Isak mɛɛ, babàmɔ wɔɛeyi mɔmɔ́ alɛ.” tsyɛ elo

¹⁹ Abraham ayɛkɛ aŋã asɛ, Owusoso Akaa abalà akɔ anɔ alɔ ede bekpu mɛ, kliso kidzi ibui gbã sɛ edzinɔ Isak ayɛkɛ edzu nɛ ɛkpã.

²⁰ Nɛ tɛyɛyɛkɛŋã mɛɛ, Isak eyula tutu esi akɔ Yakob nɛ̀ Esau, nɛ kɛgɛ bebèdzi nɛ alɛ ɛkpã mɛ nabha.

²¹ Nɛ tɛyɛyɛkɛŋã mɛɛ, flogo tɛ Yakob adã olugbũɔ, eyula tutu esi akɔ Yosef yɛeyi alɛ, kɛlɛ gɛ edzyui paŋãa nɛ yɛosi vuvũ abhaa, akpɛ ɛtakpu esi akɔ Owusoso Akaa.

²² Nɛ tɛyɛyɛkɛŋã mɛɛ, Yosef gɛ yɛitsíbe naa, aɖɔ ibui elu nɛ Israeleyiɛ tɛshɛshɛ nɛ Egipte shu, kɛlɛ ashɔrɔ ebui elu nɛ yɛaxɔa shu.

²³ Nɛ tɛyɛyɛkɛŋã mɛɛ, Mose yɛakaa nɛ̀ yɛelĩ bekpũi nɛ bewoele tatá mɛ, nɛ kibeɛ gɛ bamɔɛ, edzi eyi gbangbã teli idi, kɛlɛ begisí ifu nɛ Farao yɛɔsha kpɛkpɛɛ shu.

²⁴ Tɛyɛyɛkɛŋã kɔ ɔsɛ gɛ Mose esheɛ, agaadɛmɛ asɛ Farao yɛeshui yɛenu.

²⁵ Pɔ adɛmɛ asɛ tɛ amɔ bɔtɔ nɛ̀ Owusoso Akaa yɛeyi alɛ ɔdɛ ɔsɛ tɛ aŋã kanɔ mɛ ɛkpã dzyɛdzyɛ gɛ lɛtɛ bazã tihɔɔ nɔ.

²⁶ Adɛmɛ asɛ tɛ aŋã kiwuĩ nɛ Kristo ɛtakpu, gɛ kɛyɛkɛ edzi ɔdɛ ehoeyi udɔ̃ gɛ abamɔ edenɔ Egipte, ɔmɔsɛ elu awɔ̃ nɛ kɛbhɛ gɛ bababuia akɔɛ idegbaa nabha.

²⁷ Nɛ tɛyɛyɛkɛŋã mɛɛ, ashɛ nɛ Egipte, kɛlɛ ɔmɔpɔɛ nɔ gɛ ekusiɛ akpɛɛ logiku yɛifu, pɔ akpɛ emi avɛ ɛlɛ abha, ɔmɔsɛ azamɔ anunɔ gɛ alɛ tikpukpũ mɛɛ.

²⁸ Nɛ tɛyɛyɛkɛŋã mɛɛ, Mose akpɛ Tɛdɔdɔfala nɛ̀ dzyosu hɔɛhɔ̃ɛ ɔkɔɔ, sɛ tɛ anunɔ gɛ eyí beyikusiɛ nɛ Egipteɛ, etibeyí Israelanɛ xɔnɔ ayɛ.

²⁹ Tɛyɛyɛkɛŋã mɛ kide sɛ Israelanɛ balà agãfala nɛ Aƒu Dzadzã mɛ, ɔmɔ asɛ kesiakpa kpakpa abha ana, pɔ gɛ Egipteanɛ tsyɛ apɛ asɛ tɛ batsakɛ anaa, bulĩɛ vũ alɛ.

³⁰ Nɛ tɛyɛyɛkɛŋã mɛɛ, Yeriko bɔkã egiliɛ atsaɖà ebu alɛ, gɛ Israelanɛ baagã akana ɔma nɛ ewui tegegene mɛ.

³¹ Nɛ tɛyɛyɛkɛŋã mɛ kɛkɔ sɛ kedulũazazã Raxab egitsí aplɛnɔ batɔ̃ gagalĩelete, ɔmɔsɛ ayɛkɛ Israelanɛ gɛ bakpɛ asɛ bedilu awɔ̃ eɖi udɔ̃ abaɖɔɔ.

³² Kɛlɛ kiɖuwoe lu mɛzɛ baɖɔ plɛnɔ? Kibeɛ mà mɛahɔɛ gɛ ɛbalɔkɔ ɖɔaɖɔ nɛ Gideon, Barak, Simson, Yefta, David, Samuel nɛ̀ ebuiɖɔluanɛ shu,

³³ kɛlɛ denɔ balɛ tɛyɛyɛkɛŋã mɛɛ, beté ɛmadi, bekulu bubhu, kɛlɛ bayɛkɛ kɛgɛ batɔɖɔ elu akɔ alɛ, kɛlɛ teli xɔnɔ badzyata ilugbũ bazanyana amɔnɔ̃,

³⁴ beteli elĩ efuɔ gɛ azatã nɛ̀ ɔɖɛklɛmɛ nɔ, baabɛtɛ̀ ilugbũ tɛbha ŋaŋã gɛité alɛ, kɔ ɔsɛ ohumi ozoku bagɛ bebotsoɔ mɛ, pɛ bazawɔa bunye nɛ buyu ɔtakɔ pɛ beté bagɛ alɔkɔ ɔyu nɛ balɛishuɔ.

³⁵ Banɔ teli anyɛmɛ beyi teli gɛ etsí flogo nɔ, pɛ bedzini alɛ akpɛ ahɔɛ akɔ balɛ elĩ alɛ. Bawɔa ɔfɔ̃ nɛ beteli shu, pɔ bagɛkɔ ɛtakpu asɛ tɛ bashɛnɛ ahɔɛ nɛ balɛishu, sɛ tɛ babamɔ tɛlɔlɔ gbangbã odenɔ bekpu mɛ.

³⁶ Bebu olugbũ mɛ nɛ beteli shu pɛ behusi teli, banyã beteli pɔ nɛ̀ ɛɖahui pɛ bakpɛ alɛ nɛ ɛɖavũ mɛ.

³⁷ Behu teli aklagbu kɛlɛ bayɛ teli mɛ akpa bɔwɔ̃pɛ tɔɔbha mɛ nɛ̀ saa, teli xɔnɔ beté alɛ eyí nɛ̀ babɛtɛ̀. Beteli pɔɔ, ibhoshi nɛ̀ bepidzyapi mɛ bazazã, bazafala akpakpa nɛ̀ bɔbhɛ, bazatɔnɔ̃ alɛ ede pɛ bazawɔa ɔfɔ̃ nɛ alɛishu,

³⁸ kanɔ alɛ mɛ etinu ɔgbangbã ɔkɔ kɔ alɛ. Bazanyɔ̃ afala nɛ ixui nɛ̀ betu abha, bazafala nɛ ɛxɔɛishi nɛ̀ izĩ mɛ.

³⁹ Banɔ alɛ nyɔ̃ɔ nɔ, tɛyɛyɛkɛŋã dalɛ balɛishu, pɔ balɛ mɛ anɔ nanà agɛ yɛkɛ kɛgɛ Owusoso Akaa atɔɖɔ eluɔ.

⁴⁰ Owusoso Akaa atɔɖɔ ibui gbangbã tili elu akɔ ɔlɔ, kɛlɛ kɛgɛ apɛɛ nɔ kɛli nu ɔsɛ, nɛ tenikpo bhɛbhɛtɛ mɛɛ, abakɔ kɛka nyia ka ba ɛlɛ mɛ, nɛ alɛ tɛtɔtɔɖɔ ulũ.