Hebrianɛ 10 - Nyangbo New Testament

Kristo Yɛɔdɔ̃ Pɔpɔɛ Tunikpo Ɔkɔ Ebeɛ Petee

¹ Kɛtɔwui ete ɔsha onu ɔkɔ ebui gbangbã gɛ laba shu-anɛ alɛ enu ebuiɛ gɛ bɔpɛ sɛ tɛ bɔmɔ. Kliso ɔsha tɛbɔlà gã kɛgɔ nyiɛ gɔ ɔdɔ̃ pɔpɔɛ mɛ pɛ lɔbɔbhɛtɛ bagɛ bakpɛ ɛtakpu esi akɔ Owusoso Akaa, sɛ tɛ bana piapii nɔ ɖa.

² Pɛ otɛ ɔsɛ lɔbɔlà bhɛtɛ anɔ sɛ tɛ ana piapii nɔ tsyɛ alo batɛ yɔlɔ bɔdɔ̃ pɔpɔɛ nɔ xɔ̃ɔ. Tsyɛ alo bagɛ bakpɛ ɛtakpu esiɛ shu tabhuì nɛ kibe tinikpo abha ɔvɛnɔ tihɔɔ, kɛlɛ balɛ etúɔ tsyɛ ezebu alɛ ɛpɔ nɛ alɛ ebui kpaa shu.

³ Kɛgɔ nyiɛ gɔ ɔdɔ̃ pɔpɔɛ ɛlɛ, dzi iwui gɛ zɛbakà alɛ ebui kpa gɛ babhɛtɛ afala nɔɔ,

⁴ ɔmɔsɛ banɛtsyɔɛ nɛ̀ bepidzya dzyosu atɛ balà ebu ebui kpa atɛ ɖa.

⁵ Kliso gɛ Kristo aba kanɔ nɔ̀ mɛɛ, aɖɔ asɛ, “Anɛ bɔdɔ̃ pɔpɔɛ nɛ̀ bɔdɔ̃ kɔkɔ wɔpɛ, pɔ ishu gɛ owoese ɔkɔ mɛ,

⁶ bɔdɔ̃ pɔpɔɛ kɔkɔ nɛ̀ ebui kpa bubútɛ ɔdɔ̃ kɔkɔ tiku wɔ same.

⁷ Kɛlɛ mɛɖɔ ɔsɛ, ‘Mɛ nɛ alɛ, bafɔnɔ nɛ keplukpa mɛ nɛ mɛishu asɛ, O, Owusoso Akaa, ɛba sɛ tɛ mɛbhɛtɛ nɛ wɔ tɛtɔtɔɖɔ abha.’ ”

⁸ Aɖɔ eputɔ asɛ, “Ɔkɔ̀ bɔdɔ̃, nɛ̀ bɔdɔ̃ kɔkɔ, bɔdɔ̃ pɔpɔɛ kɔkɔ nɛ̀ ɔdɔ̃ kɔkɔ nɛ ebui kpa ɛtakpu tiku wɔ same, pɛ kɛba dzi sɛ ɔmɔ same nɛ bɔlɛishu” (nɛ ɔsha tɛpɛpɛ ulũ pɔɔ, kɛlɛ sɛ tɛ babhɛtɛ ana flogo).

⁹ Kɛlɛ azaɖɔ asɛ, “Mɛ nɛ alɛ, ɛba sɛ tɛ mɛbhɛtɛ nɛ wɔtɛdɛdɛmɛ ulũ. “Ebu tɛtɔtɔɖɔ gɛiputɔɔ, pɛ akpɛ ɔbhalà nɛ ɔlɛinye mɛ.

¹⁰ Kɛlɛ gana kibui tɔtɔɖɔ ɛlɛ mɛɛ, Owusoso Akaa abhɛtɛ ɔlɔ budzi banɔ dadalɛ ɔgana Yesu Kristo yɛishu tɛlɔlɔkɔ ɔkɔ nɛ ebeɛ pete ulũ.

¹¹ Nɛ kiwui nyiɛ wui abhaa, banɔlũazazã ka nyia ka ewlui avɛ yɛxɔ̃ɛ abha, pɛ balɔkɔ bɔdɔ̃ pɔpɔɛ tunikpo ɛlɛ nɛidi, gɛ tɛlà bu ebui kpa tɛ nɔ akɔ.

¹² Pɔ gɛ Kristo abalɔkɔ yɛishu akɔ, bɔkɔ tunikpo, nɛ ebui kpa nɛ takpu, nɛ ebeɛ pete ulũɔ, adɛzã esi nɛ Owusoso Akaa nɛ ŋã mɛ.

¹³ Denɔ kibe ɛlɛ ɔvɛnɔɔ, alɛ epo kiwui ɛlɛ nabha gɛ babà lɔkɔ bagɛ batɛ adɛmɛ niɛ abhɛtɛ yɛtɛtsɛɖɛ egbu,

¹⁴ ɔmɔsɛ gana bɔdɔ̃ pɔpɔɛ tunikpo mɛɛ, abhɛtɛ bagɛ balɛishu badalɛɛ, bamɔ tɛdadalɛ tihɔɔ.

¹⁵ Ɔfɔfuĩa Gbangbã tsyɛ ɔdalɛ ibui mɛ ɔkɔ ɔlɔ nɛ kɛli shu. Aɖɔ eputɔ nɔ asɛ,

¹⁶ “Ɔmɔ olũgbu nyanyã gɛ ɛbanyã nɛ alɛ nɛ kibe ɛlɛ niedeɛ, Apaleteɛ aɖɔ asɛ, ɛbalɔkɔ mɔsha kpɛ alɛ etúɔ mɛ, kɛlɛ ɛbafɔnɔ ɛlɛ nɛ balɛ ekpeɖekpeɖeɛ mɛ.”

¹⁷ Kɛlɛ azaɖɔ aplɛnɔ asɛ, “Balɛ ebui kpa nɛ̀ ɔsha abha mabhɛtɛ mabhɛtɛ ɛzabaka.”

¹⁸ Kliso gɛ balɔkɔ ebui alɛ pete etsyeɛ, kɛlɛ bɔdɔ̃ pɔpɔɛ sɛ tɛ bebu ebui kpa atɛ nɔ nanà abha ma.

Buluhũ Huhu Ɔkɔ Emi Kpɛkpɛ

¹⁹ Kliso mɛadzya alɛ mɔ, gɛ bɔyɛkɛŋã sɛ bɔbatsoku buvũɔ Ɔdadalɛ Ɔkɔ Ɔdɛ mɛ nɛ Yesu dzyosu nɔ mɛ soɔ,

²⁰ gɛ ɛkpã nɛ̀ idzo vɔvɔ ɛlɛ dalɛ kɔ ɔlɔ ɔgana kɛpɔtɛ gɛinu yɛishupiɛ mɛɛ,

²¹ kliso otsi alɛ gɛ banɔlũazazã hohoe alɛ àlɛ Owusoso Akaa ɔpã nulũɔ,

²² nɔkɔ butso ɔplɛnɔ Owusoso Akaa nɛ̀ etúɔ gɛ akpɛ igu nɛ tɛyɛyɛkɛŋã gagalĩi mɛ, etúɔ gɛ beplu alɛ mɛ ebui zizĩ eyinɔ nɛ bɔlɔ ishupiɛ gɛ bewulu nɔ piapii nɛ̀ bulĩ dadalɛ.

²³ Nɔkɔ bɔnyana kɛgɛ kɛlɛ mɛ bɔdalɛ, pɛ buuɖi kɛlɛ idzo mɛɛ vunɔ gagalĩi, ɔmɔsɛ anunɔ gɛ yɛatɔɖɔ kibuiɛ lɛ eluɔ abhɛtɛ ibui abha.

²⁴ Nɔkɔ bɔkpɛ ɛtakpu mɛ nɛ kɛnyana gɛ bɔba nyana bagɔlɔ nɛ̀ tɛdɛdɛmɛ nɔ nɛ̀ ebui gbangbã tɛbhɛbhɛtɛ mɛ.

²⁵ Nɔtɛkɔ bɔshɛnɛ ahɔɛ nɛ tɛtsyɔatsyɔa itsu shu, ɔmɔ asɛ kɛbhɛtɛ gɛ beteli baabhɛtɛ ana, pɔ nɔkɔ bɔkpɛ bagɔlɔ emi, kɛlɛ nɔbhɛtɛ ɛlɛ ɔtɔɖɔ ɔdɛ, gɛ nɔɔ mɔ ɔsɛ Kiwuiɛ tso ubaa.

²⁶ Onupɛ bútì ibuiɛ gɛlɛ ɛlɛ ɔzãkɔ, flogo pɛ bɔkà tsodzi vɛ ebui kpa bhɛbhɛtɛ abhaa, kɛlɛ bɔdɔ̃ pɔpɔɛ nanà bhama ɔkɔ ebui kpaa tibubu tɛ,

²⁷ kifu sisí tili idi mɛ ko bɔbazã pɛ bɔbaapo kɛpɔ bubú, nɛ̀ kifù hohoeɛ gɛ baapɔɛ bagɛ batɛ dɛmɛ nɛ̀ Owusoso Akaa.

²⁸ Bezeyí anɔ nyia anɔ gɛ agɛ dɛmɛ atɔɖɔ Mose yɛɔsha nabhaa, nɛ̀ ashagabui maɖimaɖi. Onupɛ banɔ taabha alo tatá adalɛ ibui mɛ nɛ yɛishuɔ.

²⁹ Kɛlɛɛ batɔ̃ pɔpɔ̃ gagalĩ ɖuwoe lu gɛ bɔyɛkɛŋã sɛ babàkɔ anunɔ gɛ akpata Owusoso Akaa Yɛeyiɛ, pɛ agɛ lɔkɔɛ nanà nɛ dzyosu olugbũ nyanyã gɛ alɔkɔ adalɛ yɛishu nɔ mɛ, pɛ ebu olugbũ mɛ nɛ Ɔfɔfuĩa nɔ gɛ lobhui banɔ obuɔ shu oɖiɛ mɔɔ dza?

³⁰ Ɔmɔsɛ bunyi anunɔ gɛ aɖɔ asɛ, “Mɛinu anunɔ gɛ ibisi otití, ɛbabhɛtɛ kpɛ ɔlɛ inye mɛ,” kɛlɛ azaɖɔ ɔsɛ, “Apaleteɛ ebekulu ebhu nɛ̀ yɛamadiɛ.”

³¹ Kinu ibui gɛiku ifù sɛ tɛ anɔ teli atsɛ eku Owusoso Akaa enunuɔ ahɔɛ mɛ.

³² Nɔbaka ewuiɛ gɛ abafala pɛ nɔyɛkɛ tɛdadalɛ oɖi. Kibe ɛlɛ nɔzã piapii, nɔɔkpɛ emi ɔzɔwlɔãkɛ gagalĩi nɛ bɔtɔ gelee mɛ.

³³ Nɛ kibeɛ tili mɛɛ, baakwala ɔnɔ nɛ ɔmɛishi pɛ baatɔnɔ ɔnɔ ede. Kibeɛ tili pɔɔ, baalɔkɔ ɔnɔ akpɛ bagɛ balɛ tsyɛ azamɔ bɔtɔ ɔlɛ nɛidiɛ nɛishi.

³⁴ Nɔɔnyɔnɔ awɔ̃ nɛ bagɛ bakpɛ nɛ ɛɖavũ mɛɛ shu, kɛlɛ nɔdɛmɛ bayɛkɛ ɔnɔ ahɔɛ mɛ bɔdɔ̃ tsyɛ nɛ ɔnɔ ahɔɛ faa. Ɔmɔsɛ nonyi ɔsɛ bɔdɔ̃ gbangbã gɛdɛ ɔlɛ bazã ɔnɔ ahɔɛ tihɔɔ kiwui tili.

³⁵ Kliso nɔtɛ shɛnɛ ahɔɛ nɛ wɔnɔ awɔ̃ luluɔ shu olu, ɔmɔsɛ kɛbhɛ babuia hohoe lɛ kɛlɛishu ɔkɔ ɔnɔ.

³⁶ Nɔkpɛ emi, pɛ nɔbhɛtɛ nɛ Owusoso Akaa yɛtɛtɔtɔɖɔ lu abhaa, nɔbɔ yɛkɛ kɛgɛ atɔɖɔ elu asɛ abakɔ ɔnɔɔ.

³⁷ Ɔmɔsɛ nɛ kibe gulũi mɛ koɔ, “Anɔ nɔ̀ gɛ yɛabaa, atɛ bawɔ ede.

³⁸ Mɛ anɔ gbangbã pɔɔ, abazã nɛ̀ ɛkpã gana tɛyɛyɛkɛŋã mɛ. Kɛlɛ etsodzi etsyina avɛ kideɛ, yɛibui zaazã mɛuli.”

³⁹ Bɔlɔ xɔnɔ bɔma banunɔ gɛ betsodzi etsyina avɛ ideɛ pɛ betsíɛ nɛishi, pɔ bɔlɔ nu bagɛ ayɛkɛ aŋã, pɛ bebu ɔlɔ.