Galatianɛ 5 - Nyangbo New Testament

Ishu Ahɔɛmɛ Zazã Nɛ Kristo Mɛ

¹ Ishu ahɔɛmɛ zazã shu so pɛ Kristo akɔ ɔlɔ ishu ahɔɛmɛ zazã. Kliso nɔzã gagalĩi, kɛlɛ nɔtɛ ɔkɔ kɔ ɔwɔ̃nyɔnɔ zã wɔnɔ mɛ nɛ banɔ dzidzi ɛkɔɔ shu.

² Nɔ olu awɔ̃ nɛ̀ mɛebuiɛ! Mɛ, Paulo, itseɖe ɔnɔ sɛ onupɛ nɔkɔ bebhui kɛhɔ̃a akɔ ɔnɔɔ, Kristo ezeke edzi kɛdɔ̃ nanà akɔ ɔnɔ kuraa.

³ Iwlui ka dalɛ ɛlɛ mɛ ɔkɔ anyɛ ka nyia ka gɛ alɔkɔ yɛishu akɔ bebhui kɛhɔ̃a akɔ asɛ, kɛlɛ sɛ abhɛtɛ atɔɖɔ ɔshaa petee abha.

⁴ Wɔnɔ bagɛ nɔpɛ ɔsɛ tɛ balɔkɔ ɔshaa bhui bɔtsyɔa akɔ ɔnɔ ɔnɔɔ, nobu ishu ɔtɔ nɛ Kristoɔ shu, nɔshɛ nɛ ɔnɔ tibhui huibuɔ niede.

⁵ Pɔ nɛ tɛyɛyɛkɛŋã mɛɛ, budzi ipo tɛzazã piapi nɔ gɛ buɖi kidzo mɛ ɔkɔ ɔganà Ɔfɔfuĩa nɔ mɛ gagalĩ.

⁶ Ɔmɔsɛ nɛ Kristoɔ Yesu mɛɛ, kɛnanà ma kɛhɔ̃a bhui bhui alo kɛhɔ̃a mabhui mabhui mɛ. Kɛgɛ ɛlɛ sɛ beɖiɛ kɛlɛinu tɛyɛyɛkɛŋã gɛibu ishu kasɛ ɔgana tɛdɛdɛmɛ nɔ mɛ.

⁷ Nɔzɔ̀ dɛ kɛxɔ̃ɛ gbangbã. Pɔ afana gɛ akpɛ ɛlɛ nɛ wɔnɔ mɛ ɔsɛ tɛ nɔ otolũ atɔ̃ ɔkɔ kibuiɛ gɛlɛ ɛlɛ ɔzãkɔ dza?

⁸ Bulũ wɔɛwɔɛ ɛlɛ nɛidi gɛide agɛ yɛekulu ɔnɔ ɔkɔ.

⁹ “Kɛdɔ̃ɛyi bhlui nɔ gɛ nyanyã ɔdɔ̃, kɛlɛ kɔ pɛ mɔwɔɛ nɔ petee anyanyã.”

¹⁰ Ilù awɔ̃ nɛ Apalete nabha sɛ nɔtɛ bɔmɔ kibui ɛlɛ ɔgana kidzo bhlatɔ abha. Anunɔ gɛ etsyinà ɔnɔ ekpeɖekpeɖeɛ mɛ, aba buia ɛlɛ shu ɛbhɛ, anunɔ ɛdi gɛ yɛenu tsyɛɛ o.

¹¹ Mɛadzya alɛ mɔ, onupɛ itsiɖi ɛlɛ abha ɖɔ kaɖɔ nɛ kɛhɔ̃a bhui bhuiɛ shuɔ pɔ, kiɖeso pɛ baka atɔnɔ miede? Nɛ Kibui ɛlɛ shuɔ, kibui kpa gɛ babhɛtɛ nɛ butsi osiɛ shuɔ batsà odì akpɛ ɛlɛ mɛ.

¹² Nɛ banɔ alɛ gɛ beetũ ebuiɛ kpɛ shu xɔnɔɔ, ɛta pɛ ɔsɛ tɛ̀ balɛ xɔnɔ agã kidzo ka nyia ka abha tɛ̀ badɛ tsaɖà balɛishu flogo!

¹³ Mɛadzya alɛ mɔ, bekulu ɔnɔ asɛ nɔzã ishu ahɔɛ mɛ. Pɔ nɔtɛ lɔkɔ ɔnɔ ishu ahɔɛ mɛ zazãa lɔkɔ ɔgana kibui kpa bhɛbhɛtɛ mɛ, pɔ nɔplɛnɔ agɔlɔ nɛ tɛdɛdɛmɛ nɔ mɛ.

¹⁴ Bebhui ɔshaa petee gulũi nɛ̀ ɔsha kɔkɔ tonikpo ɔlɛ ɔsɛ, “Dɛmɛ nɛ wɔhagbo asɛ gɛ ɔdɛmɛ nɛ wɔshu ana.”

¹⁵ Onupɛ nɔ onemì agɔlɔ asɛ tɛ̀ novũ agɔlɔ mɛnɔ ana, nɔoɖi piapii onu gɛnɛ ana, noboyì agɔlɔ.

Ɛkpã Zazãna Nɛ Ɔfɔfuĩa Nulũ

¹⁶ Kliso ɛɖɔ sɛ, nɔzã nɛ̀ ɛkpã nɛ ɔfɔfuĩa nulũ, kɛlɛ nɔzɔkɔ kpɛ same nɛ̀ kanɔ alɛ mɛ ebui kpa tɛpɛpɛ nɔ shu.

¹⁷ Ɔmɔsɛ kɛgɛ kanɔ mɛ ebui kpa adɛmɛ nɔ agã ɔtɔ nɛ agɛ Ɔfɔfuĩa nɔ dɛmɛ nɔ shu, kɛlɛ Ɔfɔfuĩa nɔ tsyɛ ɔgã ɔtɔ nɛ kɛgɛ kanɔ mɛ ebui kpa adɛmɛ nɔ. Balɔɛtití nɛ bagɔlɔ shu, sɛ tɛ ɔtɛ bhɛtɛ kɛgɛ ɔpɛɛ nɔ.

¹⁸ Pɔ onupɛ Ɔfɔfuĩa nɔ ɔlɔ gbanà wɔɔ, ɔma ɔshaa niesi.

¹⁹ Ebuiɛ gɛ akpà ɔplɛnɔ ebui kpa bhɛbhɛtɛ edzoɔ awɔ̃ɛ asɛ, ɔmamɛ dɛdɛ, atsɔ̃bui bhɛbhɛtɛ nɛ̀ ɛkpã kpa tɛŋaŋã,

²⁰ ibudi ebui bhɛbhɛtɛ nɛ̀ banɔ tatã, anɔ nyanyana kpɛ ɛyamɛ, ebela pɛpɛɛ, kiwuhũ dzadzã, ɔmɔpɔɛ zizĩ kpɛkpɛ, mɛ ɛyɛ ete tɛpɛpɛ̃, kibui esi malũ malu, kititì lɔlɔ nɛ agɔlɔ shu

²¹ nɛ̀ kawɔ̃kpɛ, bunù tibubuku, edzo kpa ede tɛtɔtɔnɔ, nɛ agɛ dzi asɛ alɛ nɛidi. Ɛkpɛ ɔnɔ ɔsha, asɛ gɛ ɛtɛ kpɛ bafala nɔ ɔsɛ, banɔ gɛ edzi nɛ ɛkpã ɛlɛ nɛidiɛ batɛ bavɛ Owusoso Akaa bukusi ŋaŋãa mɛ.

²² Pɔ Ɔfɔfuĩa nɔ eyuyuɔ yɛenu tɛdɛdɛmɛ nɔ, same mɔmɔ, ishu yɔyɔ, tɛdɔdɔ fɔ̃ɔ, ɛyamɛ gbangbã tɛbhɛbhɛtɛ, kibui gbangbã tɛbhɛbhɛtɛ, kibui gbã tɛɖɔɖɔ,

²³ ishu nyanyãnà, nɛ̀ ishu abha tɛŋaŋã. Ɔsha nanà ɔgɛnyã ebui alɛ nɛidi.

²⁴ Bagɛ enu Kristo Yesu ayɛ xɔnɔ, bakpalà balɛ ebui kpa bhɛbhɛtɛ nɛ̀ kɛgɛ badɛmɛ nɔ nɛ̀ kɛgɛ bapɛ nɔ nɛ butsi osiɛ shu.

²⁵ Gɛ budzi nɛ ɛkpã nɛ Ɔfɔfuĩa nɔ mɛ soɔ, nɔkɔ bɔgã nɛ̀ ɔfɔfuĩa nɔ.

²⁶ Nɔtɛ kɔ buzi feke ɔlɔ ishu, tɛ bɔzɛ kpɛ bagɔlɔ ɔmɔpɔɛ nɛ̀ awɔ̃.