Galatianɛ 4 - Nyangbo New Testament1 Kibuiɛ gɛ ɛɖɔ kɛlɛinu ɔsɛ, gɛ agɛ abaŋã kaŋãsiɛ ekenu anuvɔɔ soɔ, agɛ gã ɔtɔ nɛ anɔ dzidzi shu, gɛ bevũɔ petee pɔ enu yiayɛ flogo. 2 Akpasɛ bagɛ anyɔ̃nìi nɛ̀ bagɛ yɛɔdɔ̃ kpasɛ alɛ ahɔɛ mɛ niesi, odiyinɔ kibeɛ gɛ yɛakaa atɔɖɔ eluɔ kɔɛ. 3 Kidzo ɛlɛ nabha, nɛ kibeɛ gɛ budzi bunuvɔɛ nɔ, budzi banɔ dzidzi gɛ bɔzã ɛfɔfuĩa nɔ ebui tɔtɔɖɔ gɛazã kanɔ nɔ̀ mɛ niesi. 4 Pɔ gɛ kibeɛ petee bana nɔ, Owusoso Akaa akpɛ yɛeyianyɛ, gɛ anɔdzɛ yɛamɔ yɛ, gɛ bamɔ yɛ nɛ ɔsha niesi, 5 asɛ tɛ ebu bagɛ akpasɛ ɔshaa niesi, tɛ bɔyɛkɛ kɛgɛ lɛ ɔkɔ beyì anyɛ. 6 Gɛ beyì anyɛ nonu soɔ, Owusoso Akaa asɛsɛ Yɛeyianyɛ Ɔfɔfuĩa nɔ nɛ bɔlɔ etúɔ mɛ, Ɔfɔfuĩa nɔ gɛ okulu bɔdɔ̃ ɔsɛ, “Mɛakaa.” 7 Klisoɔ, oti konu anɔ dzidzi, pɔ eyì anyɛ wɔonu, kɛlɛ gɛ eyì anyɛ wɔonu soɔ, Owusoso Akaa abhɛtɛ wɔ tsyɛ ɔsɛ tɛ odzì kaŋãsi elete. Kɛgɛ Paulo Alɔkɔ Nɛ Ɛlɛ Mɛ Akɔ Galatianɛ 8 Kibeɛ gɛ bafala, pɛ nɔogitì Owusoso Akaa, nɔodzi banɔ dzidzi ɔkɔ bɔdɔ̃ tuli gɛinu ibudì. 9 Pɔ otsiɛ xɔnɔ gɛ nɔonyi Owusoso Akaa, alo gɛ Owusoso Akaa tsyɛ enyi ɔnɔ soɔ, kiɖe so pɛ nozo otsyina ɔvɛ ebuiɛ gɛ ama kɛnanà mɛ pɛ leku ashagabuiɛ shuɔ dza? Nɔkɔ pɛ ɔsɛ tɛ nowlui odzi banɔ dzidzi ɔkɔ alɛ dza? 10 Nɔ olu awɔ̃ oɖi ewuiɛ nɛ̀ bewoele nɔ, kibeɛ nɛ̀ agɔɔ gɛetsyina xɔɔ! 11 Isi ifu kɔ ɔnɔ, ɔsɛ ɔdɛ tsyɛ izĩ mɛibe nɛ wɔnɔ ɛtakpu. 12 Mɛadzya alɛ mɔ, ɛkɔ ɔnɔ ɛtakpu ɔsɛ, nɔzã asɛ mɛ ana, ɔmɔsɛ ɛtɛzã asɛ wɔnɔ oɖi. Nɔgɛ bhɛtɛ kibui kpa nanà mana mɛ ɔkɔ. 13 Asɛ gɛ nɔonyi ana, bɔnyã bɔlɛkɔ so pɛ iputɔ ɖɔ kibui gbangbã ɛlɛ tseɖe ɔnɔ. 14 Gɛ mɛ bɔnyã dɔdɔ dzì tifefekeɖi ɔkɔ wɔnɔ tsyɛ elo, ɛgɛ iku wɔnɔ ɛnyɛnyɛ̃. Pɔ, nɔyɛkɛ mɛ asɛ onupɛ Owusoso Akaa axɔ̃ɛdɛ mɛinu dza, asɛ gɛ onupɛ mɛinu Kristo Yesuɔ dza. 15 Kiɖuwoe gɛ ba nɛ wɔnɔ same mɔmɔ petee abha dza? Ɛba là dalɛ ɛlɛ mɛ ɔsɛ, pɛ otɛ ɔsɛ nɔbhɛtɛ anaa tsyɛ alo, nɔtɔ obù ɔnɔ awuhũɔ ɔlɔkɔ kɔ mɛ. 16 Otsi alɛ idzì anɔ gɛ atɛa dɛmɛ wɔnɔ ibui so pɛ itseɖe ɔnɔ kibuiɛ gɛlɛ ɛlɛ ɔzãkɔ dza? 17 Banɔ alɛ apɛɛ gagalĩi asɛ tɛ baŋã wɔnɔ abha, pɔ gɛnɛ kɔ kibui gbangbã nanà so. Kɛgɛ bapɛ kilɛinu ɔsɛ tɛ bebu wɔnɔ ɔtɔ nɛ ɔlɔ shu, ɔsɛ tɛ nɔzã gagalĩi ɔplɛnɔ alɛ. 18 Kɛpɛ̃ ɔsɛ tɛ nɔzã gagalĩi, gɛ onupɛ kɛgɛ ɛlɛ nɔtɔɖɔ pɛ̃, kɛlɛ nɔzã ɛlɛ abha ana kiwui nyia wui, gɛnɛ gɛ onupɛ ɛlɛ ɔnɔ bha ete. 19 Mɛeyi alɛ gɛ ɛdɛmɛ nɔɔ, gɛ wɔnɔ shu so pɛ ɛya ɛlɛ katã mɛ odiyinɔ kibeɛ gɛ Kristo afala eku wɔnɔ mɛ flogo, 20 tsyɛ alo ɛpɛ sɛ tɛ mɛzã ɔnɔ ɔbha otsiɛ tɛ mɛitsyina mɛebui ɖɔɖɔ flogo, ɔmɔsɛ mɛ ekpeɖekpeɖe mɛ aka dɔ nɛ wɔnɔ shu! Hagar Nɛ̀ Sara 21 Nɔotseɖe mɛ, wɔnɔ bagɛ ɔpɛ ɔsɛ tɛ nɔzã ɔsha niesi, pɔ nɔotinyi kɛgɛ ɔshaa ɔɖɔɔ dza? 22 Ɔmɔsɛ bafɔnɔ elu asɛ, beyianyɛ taabha azã Abraham ahɔɛ, adzɛ dzidziɛ amɔ̃ tenikpo, kɛlɛ adzɛ gɛ alɛ yɛishu ahɔɛ mɛ tsyɛ amɔ̃ tenikpo. 23 Bamɔ̃ yɛeyianyɛ gɛ ede ekoeyi nɛ adzɛ dzidziɛ mɛ, asɛ gɛ bamɔ anɔ ana, pɔ yɛeyianyɛ gɛ ede ekoeyi nɛ adzɛ gɛ azã yɛishu ahɔɛ mɛ xɔnɔɔ, bamɔɛ nɛ kibui gɛ batɔɖɔ eluɔ shu. 24 Babà lɔkɔ ebui alɛ asɛ bubuti ebui ɖɔɖɔ, ɔmɔsɛ badzɛ taabha azã olugbũnyanyã tɛbha ulũ. Olugbũ nyanyã tonikpo ode Sinai Ketukpɔ nabha kɛlɛ lɔ mɔ beyiɛ gɛ kɛlɛ sɛ bedzi banɔ dzidzi. Hagar nɛ alɛ. 25 Otsiɛ nɔ, Hagar ashɔnɔ Sinai Ketukpɔ nɛ Arabia gɛ abhɛtɛ tenikpo nɛ̀ obo ɔma gbagbla Yerusalem, ɔmɔsɛ yɛ nɛ̀ yɛeyi alɛ edzì banɔ dzidzi. 26 Pɔ Yerusalem ɔma gɛɔlɛ kititíɛ xɔnɔ ɔlɛ ishu ahɔɛ mɛ, kɛlɛ yɛenu bɔlɔ elĩɛ. 27 Ɔmɔsɛ bafɔnɔ elu asɛ, “Mɔ same, O adzɛ gɛ ɔtɛ ɔmɔ eyi, adzɛ gɛ atɛ ɔmɔ beyi nanà, lɔ tsiɔ tɛ ɔkpɛ ozĩ gagalĩ, wɔ gɛ ɛya katã wɔ oɖi, ɔmɔsɛ adzɛ gɛ yɛishu bashɛnɛ ahɔɛ yɛeyi alɛ ekpè ɔdɛ adzɛ gɛ anyɛ alɛ yɛahɔɛ.” 28 Mɛadzya alɛ mɔ, otsiɛ nɔ, asɛ Isak ana, nɔonu beyi gɛ batɔɖɔ kibui elu akɔ. 29 Nɛ kibe ɛlɛ, eyianyɛ gɛ bamɔ asɛ gɛ bamɔ̃ kanɔ mɛ anɔ ana, atɔnɔ eyianyɛ gɛ bamɔ edenɔ Ɔfɔfuĩa nɔ ɔlɛ ohumi mɛ niede. Kana kidzi otsiɛ tsyɛ. 30 Pɔ kiɖuwoe Kibuiɛ gɛ bafɔnɔ luɔ ɖɔ dza? “Kakà adzɛ dzidziɛ nɛ̀ yɛeyianyɛ oyinɔ, ɔmɔsɛ adzɛ zidziɛ yɛeyianyɛ atɛ ba mɔ ɔŋãkɔ nɛ kaŋãsiɛ mɛ ɔplɛnɔ adzɛ gɛ alɛ yɛishu ahɔɛ mɛ yɛeyianyɛ eɖi.” 31 Klisoɔ, mɛadzya alɛ mɔ, butinu beyi ɔkɔ adzɛ dzidziɛ, pɔ bunu beyianyɛ ɔkɔ adzɛ gɛ alɛ yɛishu ahɔɛ mɛ. |
© (Active), Ghana Institute of Linguistics, Literacy and Bible Translation. All rights reserved.