Galatianɛ 3 - Nyangbo New TestamentTɛyɛyɛkɛŋã Pɛnɔsɛ Ɔsha Nabha Tɛbhɛbhɛtɛ 1 Wɔnɔ Galatianɛ awɔaga! Afana gɛ atã ɔnɔ nɛ̀ ohui ana dza? Nɛ wɔnɔ amɛɛ, nɔmɔ piapii ɔsɛ bakpalà Yesu Kristo nɛ butsi osiɛ shu. 2 Ɛba pɛ ɔsɛ tɛ mɛ ɛkpasɛ kibui tinikpo odenɔ wɔnɔ ɔkɔ, ɔsha nabha tɛbhɛbhɛtɛ mɛ nɔyɛkɛ Ɔfɔfuĩa nɔ, pɛnɔsɛ tɛyɛyɛkɛŋã nɛ kɛgɛ nɔolũ nabha soɔ dza? 3 Bawɔaga nɔonu ana dza? Gɛ nɔkpɛ esi nɛ̀ Ɔfɔfuĩa nɔ bekeɛ pɔ, otsi nɔpɛ ɔsɛ tɛ nɔmɔ kɛgɛ nɔpɛ nɔ ɔgana anɔdzyrame ebui bhɛbhɛtɛ mɛ dza? 4 Bɔwɔã tɔ nɔtɔ̀ ɔkɔ kɛdɔ̃ nanà mamɔ mamɔ dza, gɛ onupɛ kɛgbã kinu ɔsɛ bɔtɔ ɔlɛ ma kɔ kɛdɔ̃ nanà dza? 5 Pɔ bɔlɔkɔ Owusoso Akaa alɔkɔ yɛ Ɔfɔfuĩa nɔ akɔ ɔnɔ pɛ abhɛtɛ yɛ atsyindzye ebui nɛ ɔnɔ ɛshi nɛ gɛ nɔbhɛtɛ ɔtɔɖɔ ɔshaa nabha so, pɛnɔsɛ gɛ nɔyɛkɛ kɛgɛ nolũ nabha ɔŋã soɔ dza? 6 Nɔolu awɔ̃ oɖi Abraham, “Ayɛkɛ Owusoso Akaa nabha aŋã, kɛlɛ balɔkɔ ɛlɛ nɛishu asɛ kibui gbangbã bhɛbhɛtɛ kinu.” 7 Nɔolũ ɛlɛ esi ɔsɛ, bagɛ ayɛkɛ aŋã enu Abraham yɛeyi alɛ. 8 Kibuiɛ gɛ bafɔnɔ eluɔ tɛmɔ putɔ nɔ ɔsɛ Owusoso Akaa ebe bhui bɔtsyɔa akɔ bagɛ etinu Yudanɛ odenɔ balɛ tɛyɛyɛkɛŋã mɛ, kɛlɛ eputɔ akɔ Abraham etì kibui gbangbã ɛlɛ elu ɔsɛ, “Gana wɔabha, bebe yulà akɔ amadiɛ petee.” 9 Klisoɔ beyulà akɔ bagɛ ayɛkɛ aŋã aplɛnɔ Abrahamuɔ, anyɛ gɛ tɛyɛyɛkɛŋã lɛ yɛahɔɛ. 10 Bagɛ elu awɔ̃ nɛ ɔsha nabha tɛbhɛbhɛtɛ xɔnɔ, baɖɔ kibui akpɛ alɛ, ɔmɔsɛ bafɔnɔ elu asɛ, “Baɖɔ kibui akpɛ anɔ ka nyia ka gɛ agɛ zã ɛlɛ abha abhɛtɛ atɔɖɔ kɛka nyia ka gɛ bafɔnɔ akpɛ ɔsha keplukpa mɛ.” 11 Kɛlɛ mɛ dalɛ ɔsɛ bagɛ lɔkɔ ɔsha ebhui bɔtsyɔa akɔ ananà nɔ nɛ Owusoso Akaa namɛ, ɔmɔsɛ, “Bagɛ enu ebui gbangbã bhɛbhɛtɛ eleteɛ abazã nɛ̀ ɛkpã ɔgana tɛyɛyɛkɛŋã mɛ.” 12 Ɔshaa ɔgɛ kpà plɛnɔ tɛyɛyɛkɛŋãa, nɛidzo bhlatɔ tsyɛ abhaa, “Anunɔ gɛ abhɛtɛ ebui alɛ nɛidiɛ abazã nɛ̀ ɛkpã nɛ ɛlɛ shu.” 13 Kristo ebu ɔlɔ odenɔ kibuiɛ gɛ baɖɔ akpɛ ɔlɔ ɔsha niesi, kɛlɛ yɛebedzi kibuiɛ gɛ baɖɔ akpɛ ɔlɔ, ɔmɔsɛ bafɔnɔ elu asɛ, “Baɖɔ kibui akpɛ anɔ ka nyia ka gɛ akpɛ ohui oli nɛ busi mɛ.” 14 Ebu ɔlɔ ɔsɛ tɛ tiyuyula gɛ balɔkɔ akɔ Abrahamuɔ ba bagɛ etinu Yudanɛ tsyɛ ɔkɔ ɔgana Kristo Yesu abha, ɔsɛ tɛ ɔgana tɛyɛyɛkɛŋã mɛɛ, bɔba yɛkɛ kɛgɛ Ɔfɔfuĩa nɔ tɔɖɔ lu kɔ ɔlɔ. Ɔshaa Nɛ̀ Kɛgɛ Batɔɖɔ Eluɔ 15 Mɛadzya alɛ mɔ, nɔkɔ mɛɖɔ kibui ɛlɛ lɔkɔ shɔnɔ kiwui nyia wui ɛkpã zazãna shu. Asɛ kana gɛ ananà atɛ balà ebu, alo pɛ abalà lɔkɔ kɛdɔ̃ nanà aplɛnɔ anɔdzyrame olugbũ nyanyã nɔnɔ gɛ batɔɖɔ eluɔ akɔɛ nɔ, kana ibe kɛlɛ nɛ kibui ɛlɛ tsyɛ mɛ. 16 Baɖɔ ebuiɛ gɛ batɔɖɔ eluɔ etseɖe Abraham nɛ̀ yɛeshui alɛ. Kibuiɛ gɛ bafɔnɔ eluɔ gɛɖɔ ɔsɛ “ɔkɔ wɔ beshui alɛ” gɛ kɛlɛ esi kɛlɛinu ɔsɛ banɔ kpekpèɛ, pɔ kɛɖɔsɛ, “nɛ̀ wɔ eshui nɔ,” gɛ kɛlɛ esi ɔsɛ enu anɔ tenikpo, gɛenu Kristoɔ. 17 Kibuiɛ gɛ ɛɖɔɔ niesi nɛ ɛlɛ ɔsɛ, Ɔshaa, gɛ bakpɛ elu asɛ agɔ akpã talɛ nɛ̀ afɛata nɛ alɛ (430), logibu olugbũ nyanyã gɛ Owusoso Akaa eputɔ anyã elu ɔtɔ ɔsɛ tɛ ebu kɛgɛ atɔɖɔ eluɔ atɛ́ɛ. 18 Onupɛ ganà ɔshaa mɛ babà yɛkɛ kaŋãsiɛ alɛ, kɛlɛ kɛtɛ kanu ɔsɛ kɛgã tɛtɔtɔɖɔ lu mɛ, pɔ nɛ Owusoso Akaa tibhui bhuibuɔ ulũɔ, alɔkɔ ɔsha akɔ Abraham ganà tɛtɔtɔɖɔ luɔ mɛ. 19 Kiɖuwoe shu so pɛ ɔshaa ɔlɛ otsiɛ dza? Bakɔ ɔsha ɔlɛ aplɛnɔ nɛ kibui kpa bhɛbhɛtɛ shu so, odiyinɔ sɛ Eshui nɔ gɛ batɔɖɔ ebui alɛ elu akɔ abekoeyì. Agɛ yɛevũ iboe alɔkɔ ɔsha kpɛ axɔ̃ɛ wɔawɔa mɛ ɔgana baxɔ̃ɛdɛ nabha. 20 Anɔ gɛevũ iboe, atɛzã akɔ kawɔ̃pɛ tienikpo, pɔ Owusoso Akaa alɛ tenikpo. 21 Ɔshaa pɔ, bafɔnɔ ɔlɛ alɔkɔ alɔɛtití nɛ Owusoso Akaa yɛibuiɛ gɛ atɔɖɔ eluɔ shu dza? Gɛnɛ kana kɛlɛ! Ɔmɔsɛ onupɛ bakpɛ ɔsha toli olu gɛ lobo tsyina banɔ ɛkpãa, kɛlɛ kibui gbangbã bhɛbhɛtɛ tade koeyi nɛ ɔshaa mɛ xɔ̃ɔ. 22 Kibuiɛ gɛ bafɔnɔ eluɔ mɛ dalɛ ɔsɛ, kanɔ nɔ̀ petee alɛ kibui kpa bhɛbhɛtɛ ohumi esi, ɔsɛ tɛ tɛtɔtɔɖɔ luɔ gɛ kpa plɛnɔ Yesu Kristo abha tɛyɛyɛkɛŋã mɛ, dzì bagɛ ayɛkɛ yɛabha ŋã nɛdɔ̃. 23 Flogo pɛ tɛyɛyɛkɛŋã ɛlɛ babaa, ɔshaa nyanà ɔlɔ ovunɔ asɛ ɔɖavũmɛ azazã ana, lɔnya bɔlɔ olú ɔvɛnɔ kibeɛ gɛ bebu tɛyɛyɛkɛŋã akasɛ. 24 Klisoɔ bakpɛ ɔshaa elu asɛ tɛ lɔgbana ɔlɔ ɔvɛnɔ Kristo ɔkɔ, ɔsɛ tɛ balɔkɔ tɛyɛyɛkɛŋã ebhui bɔtsyɔa akɔ ɔlɔ nɔ. 25 Otsiɛ alɛ gɛ tɛyɛyɛkɛŋã bakoeyiɛ, bɔbha ma ɔshaa ɔlɛ anɔ abha ɖiɖi esi. Bagɛ Enu Owusoso Akaa Yɛeyi Alɛ 26 Beyì wɔnɔ petee onu ɔkɔ Owusoso Akaa ɔgana tɛyɛyɛkɛŋã gɛ ɛlɛ Kristo Yesu mɛ, 27 ɔmɔsɛ wɔnɔ agɛ bakpɛ ulĩ akɔ petee nɛ Kristoɔ mɛ, nɔkpɛ akpɛkpɛ akɔ ishu ɔplɛnɔ Kristo. 28 Yudaeyi alo Helaeyi nanà abha ma, anɔ dzidzi alo anɔ gɛ alɛ yɛishu ahɔɛ mɛ, anyɛ alo adzɛ abha ma, ɔmɔsɛ wɔnɔ petee odzi tenikpo nɛ Kristo Yesu mɛ. 29 Onupɛ onu Kristo ayɛ, kɛlɛ onu Abraham yɛeshui, nɛ̀ kaŋãsi elete nɛ kɛgɛ batɔɖɔ elu nulũ. |
© (Active), Ghana Institute of Linguistics, Literacy and Bible Translation. All rights reserved.