Galatianɛ 2 - Nyangbo New Testament

Banɔkpɛkpɛ Ayɛkɛ Paulo

¹ Nɛ agɔ lɔfɔ nɛ̀ talɛ edeɛ, iziwu ɔvɛ Yerusalem, otsi alɛ xɔnɔ mɛ nɛ Barnaba. Ɛgbana Tito tsyɛ plɛnɔ mɛishu ɔvɛnɔ.

² Ɛdɛ ɛkɛlɛ nɛ kibui bubu kasɛ tili shu, kɛlɛ ɛɖɔ kibui gbangbã gɛitseɖe bagɛ etinu Yudanɛ tsyɛ tseɖe alɛ. Pɔ ɛbhɛtɛ ɛlɛ̀ ete ɔkɔ bagɛ alɛ otugbà ɔkɔ banunɔ, nɛ kifu sisí mɛ ɔsɛ ɛzɛdɛ kɛxɔ̃ɛ alo ɛkaadɛ ɛxɔ̃ɛ kpɛ ɛlɛɛ mɛ.

³ Pɔ Tito gɛedzi Helanɔ pɛ azã mɛɔbha tsyɛ elo, ananà agɛ tɔɖɔ ɛlɛ asɛ bebhui kɛhɔ̃a akɔɛ.

⁴ Kibui ɛlɛ bayì ɔmɔsɛ asɛnɛ badzya teli aba afala eku bɔlɔ ɛzãkɔɔ tɛ belu awɔ̃ eɖi ɔlɔ ishuahɔɛmɛ zazã gɛ lɛ ɔlɔ ahɔɛ nɛ Kristo mɛ, tɛ̀ betsyina ɔlɔ budzì banɔ dzidzi.

⁵ Bɔgɛ shɛnɛ ahɔɛ bɔlɔ shu kɔ alɛ nɛ kibe nanà mɛ, ɔsɛ tɛ kibui gbangbã gɛlɛ kibui gbã shuɔ zã ɔnɔ ɔkɔ.

⁶ Bagɛ awɔ̃ɛ anɔ asɛ ɛzãkɔ lɛ balɛ ahɔɛ xɔnɔɔ, kɛka nyia ka ɛdi gɛ benu tsyɛ elo, kitinu kibui gɛ gã ɔtɔ ɔkɔ mɛ, Owusoso Akaa etiekulù kebhu nɛ kana gɛ bɔmɔ anɔ shu, banɔ alɛ agɛ lɔkɔ kɛnanà ɔplɛnɔ mɛ ibuiɛ.

⁷ Nɛ kidzo bhlatɔ abhaa tsyɛ, bamɔ asɛ balɔkɔ ɛlɛ akpɛ ahɔɛ akɔ mɛ ɔsɛ tɛ mɛdɛ ɖɔ kibui gbangbã tseɖe bagɛ etinu Yudanɛ, asɛ kana gɛ Petro tsyɛ adɛ Yudanɛ ɔkɔ ana.

⁸ Ɔmɔsɛ Owusoso Akaa gɛ awɔa axɔ̃ɛ ɔplɛnɔ Petro asɛ anɔkpɛkpɛ ɔkɔ Yudanɛ anaa, yɛawɔa axɔ̃ɛ nɛ mɛ tsyɛ asɛ anɔkpɛkpɛ ɔkɔ bagɛ etinu Yudanɛ.

⁹ Yakobo, Petro nɛ̀ Yohanes gɛenu kibuiɛ kɛlɛ bubhi kashàa, bakɔ mɛ nɛ̀ Barnaba ahɔɛ ɔkɔ kɛdzyà bhɛbhɛtɛ nɛ kibeɛ gɛ bamɔ tibhui bhuibuɔ gɛ bakɔ mɛ. Badɛmɛ atɔɖɔ ɛlɛ abha asɛ tɛ̀ bɔvɛ bagɛ etinu Yudanɛ ɔkɔ, tɛ balɛ tsyɛ avɛ Yudanɛ ɔkɔ.

¹⁰ Kɛgɛ bebisi odenɔ bɔlɔkɔ kɛlɛinu ɔsɛ tɛ bɔzã ɛlɛ abha tɛ bɔzɛ bakà betsyuitsyuiɛ tsyɛ, kibuiɛ gɛ ɛlɛ mɛpɛ ɔsɛ tɛ ɛbhɛtɛɛ.

Paulo Agɛ Dɛmɛ Atɔɖɔ Petro Ibui Bhɛbhɛtɛ Abha

¹¹ Kibeɛ gɛ Petro aba Antioxia nɔ, mɛ Paulo ɛgɛ dɛmɛ tɔɖɔ yɛebui bhɛbhɛtɛ abha nɛ yamɛ, ɔmɔsɛ ata esi.

¹² Flogo tɛ banyɛ teli ebede Yakobo ɔkɔ abaa, azaŋã bɔdɔ̃ nɛ̀ bagɛ etinu Yudanɛ. Pɔ gɛ bebekuɔ, akpà kide yi pɛ ebu yɛishu ɔtɔ nɛ bagɛ etinu Yudanɛ shu, ɔmɔsɛ kifu ziyi yɛ nɛ̀ bagɛ azã kɛhɔ̃a bhui bhui kɛzaa mɛ.

¹³ Yudanɛ bhlatɔ tsyɛ azã yiede nɛ kibui ɛlɛ shu, kɛlɛ nɛ kibui ɛlɛ shuɔ bagbana Barnaba tsyɛ atsrakɛ idzo.

¹⁴ Kibeɛ gɛ ɛmɔsɛ batɛ agã nɛ kibui gbangbã gɛlɛ ɛlɛ ɔzãkɔ nabhaa, itseɖe Petro nɛ balɛ nyɔ̃ɔ amɛ ɔsɛ, “Yudaeyi wɔonu, pɔ odzi nɛ̀ ɛkpã asɛ anɔ gɛetinu Yudaeyi, wɔɛkpã ma asɛ Yudaeyi ana. Kiɖe so pɛ otũ ɛlɛ ɔkpɛ bagɛ etinu Yudanɛ ulũ xɔnɔ ɔsɛ beze shu Yudanɛ ɛkɔ dza?

¹⁵ “Bɔlɔ gɛinù Yudaeyi mɔmɔ, gɛ butidzi asɛ ‘Bagɛ etinu Yudanɛ gɛ balɔkɔ alɛ asɛ ebui kpa babhɛtɛ eleteɛ’

¹⁶ bunyi ɔsɛ beti bhui bɔtsyɔa akɔ anɔ nɛ yɛ ɔsha abha tɛbhɛbhɛtɛ shu, pɔ ɔganà tɛyɛyɛkɛŋã nɛ Yesu Kristo abha mɛ. Klisoɔ, bɔlɔ tsyɛ lɔkɔ bɔlɔ tɛyɛyɛkɛŋã kpɛ Kristo Yesu mɛ ɔsɛ tɛ bebhui bɔtsyɔa akɔ ɔlɔ nɛ Kristo abha tɛyɛyɛkɛŋã mɛ, gɛnɛ nɛ ɔsha nabha tɛbhɛbhɛtɛ shu so, ɔmɔsɛ ganà ɔsha nabha tɛbhɛbhɛtɛ mɛɛ, betibe bhui bɔtsyɔa akɔ anɔ nanà.

¹⁷ “Onupɛ nɛ kibeɛ gɛ bɔpɛ ɔsɛ tɛ bebhui bɔtsyɔa akɔ ɔlɔ nɛ Kristoɔ mɛɛ, kɛlɛ mɛ dalɛ ɔsɛ bɔlɔ tsyɛ ebui kpa bhɛbhɛtɛ elete bunu. Pɔ kɛlɛ esi nu ɔsɛ Kristo atɔɖɔ ahɔɛ nɛ ebui kpa tɛbhɛbhɛtɛ abha dza? Gɛnɛ ana!

¹⁸ Onupɛ idzini kɛgɛ izĩɛ woeseɛ, kɛlɛ ɛkasɛ ishu ɔsɛ anɔ gɛ atɛ bhɛtɛ tɔɖɔ ɔsha abha mɛinu.

¹⁹ Ɔmɔsɛ gana ɔsha nabha, itsí nɛ ɔsha shu, ɔsɛ tɛ mɛ zanà ɛkpã ɔkɔ Owusoso Akaa.

²⁰ Bakpalà mɛ ɔplɛnɔ Kristo nɛ butsi osiɛ shu kɛlɛ gɛnɛ mɛ kalɛ nɛkpã, pɔ Kristoɔ yɛakpasɛ mɛ mɛ̀. Ɛkpã gɛ ɛlɛ mɛidzinɔ nɛ ishudzya mɛɛ, idzi nɛ ɛlɛ nɛ tɛyɛyɛkɛŋã nɛ Owusoso Akaa Yɛeyianyɛ mɛ, anɔ gɛ adɛmɛ mɛibui pɛ alɔkɔ yɛishu akɔ nɛ mɛtakpu.

²¹ Ɛgɛ lɔkɔ mɛ Owusoso Akaa tibhui bhuibuɔ lu ɛwɔ̃a, ɔmɔsɛ onupɛ babàmɔ kibui gbangbã tɛbhɛbhɛtɛ ɔgana ɔshaa mɛɛ, kɛlɛ Kristoɔ etsí bɔwɔ̃a kua!”