Galatianɛ 1 - Nyangbo New Testament

¹ Mɛ Paulo, anɔkpɛkpɛ gɛ anɛ baanɔ alo anɔ yɛasɛsɛ mɛ, pɔ Yesu Kristo nɛ̀ Owusoso Akaa, gɛ yɛefeke yɛ odenɔ bekpuɔ mɛ-

² nɛ̀ ɔhamɛ anunɔ petee gɛ alɛ mɛɔbhaa, Bɔlɔ sɛsɛ keplukpa alɛ nɛ Galatia ɔha mɛ.

³ Tibhui bhuibu nɛ̀ ishu yɔyɔ zã plɛnɔ wɔnɔ odenɔ Owusoso Akaa nɛ̀ Apalete Yesu Kristo ɔkɔ,

⁴ anɔ gɛ alɔkɔ yɛishu akɔ nɛ bɔlɔ ibui kpa nɛtakpu, ɔsɛ tɛ ebu ɔlɔ odenɔ obo kanɔ alɛ ebui kpa bhɛbhɛtɛ mɛ, nɛ tɛtɔtɔɖɔ gɛide Owusoso Akaa gɛenu bɔlɔ Akaa ɔkɔ,

⁵ yɛ kɛlɛ ɔsɛ badalɛ yɛishu odenɔ tihɔɔ ɔvɛnɔ tihɔɔ mɛ. Amen.

Kibui Gbangbã Nanà Bha Ma

⁶ Kɛbhɛtɛ mɛibi ɔsɛ tsiɔ̃ ɔlɛ koɔ, nɔ vɛlɛ shɛnɛ ahɔɛ nɛ anunɔ gɛ yɛekulu ɔnɔ amana Kristo yɛ tibhui bhuibuɔ mɛ shu olú, pɛ nɔ otsyina ɔvɛ ebui bhlatɔ gɛ bafɔnɔ eluɔ shu,

⁷ gɛ letinu kibui gbangbã kuraa. Kɛba wɔ̃ɛ ɔsɛ, banɔ teli balɛ eetsyina wɔnɔ ekpeɖekpeɖeɛ mɛ, kɛlɛ baapɛ asɛ tɛ bezĩ Kristo yɛibui gbangbã.

⁸ Pɔ onupɛ bɔlɔ, alo axɔ̃ɛdɛ teli gɛede owusoso nɔ mɛ abaɖɔ kibui gbangbã tili gɛ kɛgã ɔtɔ nɛ kɛgɛ bɔɖɔ tseɖe wɔnɔ shuɔ, kɛlɛ bebu anɔ alɛ ɛpɔ tihɔɔ!

⁹ Asɛ gɛ bɔtɛ ɖɔ bafala nɔ anaa, ɛkaaɖɔ ɛlɛ otsiɛ tsyɛ ɔsɛ, Onupɛ anɔ teli aɖɔ kibui gbangbã bhlatɔ tili nɛ kɛgɛ nɔtɛ yɛkɛ niedeɛ, kɛlɛ bebu anɔ alɛ ɛpɔ tihɔɔ!

¹⁰ Banɔ mɛpɛ otsiɛ ɔsɛ baɖɔ atɔɖɔ mɛibuiɛ nabha pɛnɔsɛ Owusoso Akaa dza? Pɛnɔsɛ banɔ mɛpɛ ɔsɛ tɛ mɛiku alɛ awɔ̃ dza? Onupɛ ɛka pɛ ɔsɛ tɛ mɛiku banɔ awɔ̃ɔ, kɛlɛ ɛtɛ balà dzi axɔ̃ɛdɛ ɔkɔ Kristo.

Owusoso Akaa Yɛekulu Paulo

¹¹ Mɛadzya alɛ mɔ, ɛpɛ ɔsɛ tɛ nɔotì ɔsɛ, kibui gbangbã ɛlɛ gɛ ɛɖɔɔ kitinu banɔdzyrame ebui fafatɛ.

¹² Ɛgɛ yɛkɛ ɛlɛ odenɔ ananà ɔkɔ, pɛ ebedzi asɛ bɔkasɛ bakasɛ mɛ ɛlɛ, pɔ ɛyɛkɛ ɛlɛ odenɔ kibui bubu kasɛ gɛide Yesu Kristo ɔkɔ mɛ.

¹³ Ɔmɔsɛ nɔotilũ mɛ ɛkpãa gɛ ɛzã bafala nɔ nɛ Yudanɛ ɛkɔɔ tishushuɔ shu, kɛtɔnɔ gɛ ɛzɛ tɔnɔ ɔha niede gagalĩi pɛ ɛpɛ ɔsɛ tɛ̀ mɛyɛ yɛɛ.

¹⁴ Ɛzɛmɔ otugbà vɛvɛ nɛ Yudanɛ ɛkɔ mɛ ɔdɛ Yudanɛ gelee gɛ bɔnɛ alɛ kpasɛ agɔ mɛ, kɛlɛ ɛzã mɛakaa alɛ ɛkɔɔ tishushu ebuiɛ nabha gagalĩi.

¹⁵ Pɔ Owusoso Akaa anɔ gɛ yɛebu mɛ elu flogo pɛ baba mɔ mɛ, pɛ yɛekulu mɛ akpɛ yɛ tibhui bhuibuɔ mɛɛ, same ebekui

¹⁶ ɔsɛ tɛ ebu Yɛeyi Anyɛɛ akasɛ ɔgana mɛabha, tɛ mɛdɛ ɖɔ yɛibuiɛ nɛ bagɛ etinu Yudanɛ nɛishi, ɛgɛ yɛkɛ kibuititì odenɔ ananà ɔkɔ,

¹⁷ kɛlɛ igi wu ɔvɛ Yerusalem tsyɛ ɔsɛ tɛ mɛdɛ mɔ bagɛ eputɔ edzi banɔkpɛkpɛ ɔkɔ mɛ, pɔ tsiɔ̃ ɔlɛ ɛshɛ vɛ Arabia kɛlɛ kidegbaa izitsyina ba Damasko.

¹⁸ Kɛlɛ nɛ agɔ tata edeɛ, ɛbawù ɔvɛ Yerusalem ɔsɛ tɛ mɛ nɛ Petro butì bagɔlɔ, kɛlɛ ɛzã yɛɔbha ewui lɔfɔ nɛ̀ teti.

¹⁹ Ɛgɛ mɔ banɔkpɛkpɛ alɛ mɛ anɔ nanà—ɔdɛ Yakobo ete, gɛenu Apaleteɛ yɛadzya.

²⁰ Ɛtɔɖɔ kɛklagbu nɛ̀ ɛlɛ abha kɔ ɔnɔ nɛ Owusoso Akaa namɛ ɔsɛ, kibuiɛ gɛ ɛfɔnɔ kɔ ɔnɔ, tinu kɛsɛnɛ ibui.

²¹ Kidegbaa, ɛfala ɛdɛ Siria nɛ̀ Kilikia tsyɛ.

²² Ɔhaa gɛ ɔzã Kristo mɛ nɛ Yudea nɔ egitì mɛ.

²³ Bulũ bhui bhui ɛlɛ ete belũ nɛ mɛishu asɛ, “Anyɛ gɛ aza atɔnɔ bɔlɔ ede abafala nɔɔ, otsi alɛ xɔnɔ yɛtsyɛ aɖɔ tɛyɛyɛkɛŋã ibuiɛ gɛ apɛ asɛ ayɛɛ afalanɔ flogo.”

²⁴ Kɛlɛ bakpɛ Owusoso Akaa nɛinye nɛitití nɛ mɛtakpu.