Filipianɛ 4 - Nyangbo New Testament

¹ Mɛadzya alɛ mɔ, wɔnɔ agɛ ɛdɛmɛ nɔ pɛ ɛpɛ ɔnɔ amɛ sɛ mɔ, wɔnɔ agɛ onu mɛ same nɛ̀ kabha ŋaŋã ikutu, kana kɛlɛ sɛ nɔzã gagalĩi nɛ Apaleteɛ mɛ, mɛ ɔbhia alɛ gɛ ɛdɛmɛ nɔ!

Banɔ Emi Kpɛkpɛ

² Ɛɛkɔ Ewodia nɛ̀ Sintixe ɛtakpu sɛ tɛ nɔolũ bagɔlɔ esi nɛ Apaleteɛ mɛ.

³ Ee, kɛlɛ ibisi odenɔ wɔnɔ agɛ onu mɛ ɔhagbo axɔ̃ɛwɔa ɔkɔ ɔsɛ tɛ, nɔ plɛnɔ badzɛ alɛ gɛ gɛazã aplɛnɔ mɛ gagalĩi nɛ kibui gbangbã axɔ̃ɛ wɔawɔa mɛ, ɔlɔkɔ plɛnɔ Klemens nɛ̀ mɛ ɔhagbo axɔ̃ɛwɔa gɔgɔɛ nɔ, gɛ balɛ inyeɛ kpasɛ ɛkpã eplukpa mɛ.

⁴ Nɔmɔ same nɛ Apaleteɛ mɛ kibe nyia bè, iwlui kaɖɔ ɛlɛ sɛ, nɔmɔ same!

⁵ Nɔkɔ wɔnɔ ishu nyanyana dzi kibui mɔmɔ ɔkɔ banɔ nɔ̀ petee. Apaleteɛ etso aba.

⁶ Nɔtɛ lɔkɔ ɔwɔ̃nyɔnɔ nɛ kɛnanà shu, pɔ nɛ kɛka nyia ka mɛɛ, nɔ ganà ɛlɛ nɛ Owusoso Akaa tikukulu, kɛdɔ̃ bibisì, nɛ̀ ahɔɛ huhú mɛ, nɔ lɔkɔ wɔnɔ ɛdɔ̃ bibisìɛ lu Owusoso Akaa namɛ.

⁷ Kɛlɛ Owusoso Akaa ishu yɔyɔɔ gɛidɛ ebui esi lulũ ka nyia ka ɛdiɛ mɛɛ, aba gbanà ɔnɔ etúɔ nɛ̀ ekpeɖekpeɖeɛ nɛ Kristo Yesu mɛ.

⁸ Gɔgɔɛ nɔ, mɛadzya alɛ mɔ, kɛnɔnɔ gɛ lɛ ɛlɛ ɔzãkɔ, kɛnɔnɔ gɛ dzã kiwuhũ, kɛnɔnɔ gɛ pɛ̃, kɛnɔnɔ gɛ ɛlɛ shu dalɛ̃, kɛnɔnɔ gɛlɛ sɛ badɛmɛ nɔ, kɛnɔnɔ gɛ kiku anɔ same, onupɛ kibui gbangbã tili, kɛpɛ̃ ɔsɛ bakpɛ ɛlɛ nɛititíɛ, nɔ bhɛtɛ ekpeɖekpeɖe mɛ nɛ alɛ nɛidi shu.

⁹ Kɛnɔnɔ gɛ nɔ kpasɛ alo nɔ yɛkɛɛ alo nolũ odenɔ mɛ ɔkɔɔ, alo pɛ nɔmɔ ɛlɛ nɛ mɛ mɛɛ, nɔ bhɛtɛ ɛlɛ abha. Kɛlɛ Owusoso Akaa gɛenu ishu yɔyɔ anunɔ abazã aplɛnɔ ɔnɔ.

Ahɔɛ Huhu Ɔkɔ Balɛ Ɔdɔ̃ Kɔkɔ

¹⁰ Ɛmɔ same hohoe nɛ Apaleteɛ mɛ sɛ gɔgɔɛ nɔ owlui ɔlɔkɔ tili nɛ ɛlɛ mɛ ɔkɔ mɛ. Kibui gbã, nɔ lɔkɔ tili nɛ ɛlɛ mɛ, pɔ nɔgɛ mɔ idzo tɛ nobu ɛlɛ ɔkasɛ.

¹¹ Gɛnɛ sɛ kɛdɔ̃ mɛpɛ so pɛ ɛɛɖɔ kibui ɛlɛ, pɔ ɛkpasɛ kana gɛ kɛdɔ̃ ku anɔ awɔ̃ nɛ kɛka nyia ka mɛ.

¹² Inyi idzi gɛ kidzi nɛ kɛdɔ̃ pɛpɛ ibè, kɛlɛ inyi kana gɛ kidzi tɛ bɔdɔ̃ kpekpè tsyɛ zã wɔahɔɛ. Ɛkpasɛ kibui kpukpũɔ gɛ kpasɛ kiku gɛ kɛdɔ̃ ku anɔ awɔ̃ nɛ kibui ka nyia ka ɛdì mɛ, onupɛ bakɔ wɔ kɛŋaŋã oxui alo bɔbhɛ yì wɔ tsyɛ elo, onupɛ bɔdɔ̃ lɛ wɔahɔɛ alo kɛnanà ma wɔahɔɛ.

¹³ Ɛba là bhɛtɛ kɛka nyia ka ɔganà agɛ yɛakɔ mɛ ohumi nɔ abha.

¹⁴ Pɔ apɛ̃ akɔ ɔnɔ sɛ nɔmɔ ɔtɔ ɔplɛnɔ mɛ.

¹⁵ Kidzo ɛlɛ nabhaa, asɛ gɛ wɔnɔ Filipianɛ onyi ɛlɛ anaa, nɛ kesikpɛkpɛ ewuiɛ gɛ atɛ ba fala mɛ gɛ nɔyɛkɛ kibui gbangbãa, gɛ ɛlɔ de Makedonia nɔɔ, ɔha tenikpo tsyɛ ɔgɛ lɔkɔ kɛnanà nɛ kɛdɔ̃ kɔkɔ nɛ ɛlɛ tɛyɛyɛkɛ mɛ, ɔdɛ wɔnɔ ete,

¹⁶ ɔmɔsɛ nɛ kibeɛ gɛ ɛzã Tesalonika tsyɛ elo, nɔzɔ sɛsɛ mɛ tɛpɛplɛnɔ owlui ɔzɔ sɛsɛ gɛ ɛdanà gɛzã mɛahɔɛ.

¹⁷ Gɛnɛ sɛ gɛ ɛpɛ ɛdɔ̃ kɔkɔ so, pɔ iɖi kɛgɛ badzì tiyuyulà kɔ ɔnɔ.

¹⁸ Ɛtɛ yɛkɛ mɛ ɛbhɛ babuia petee, kɛlɛ bazabà buia ɛlɛ atɔɖɔ akɔ mɛ ɔdɛ, baakɔ mɛ bɔdɔ̃ kpekpe, pɔ otsi ko mɛ yɛkɛ bɔdɔ̃ gɛ nɔ sɛsɛ mɛ ɔganà Epafrodito abha. Bunu bɔdɔ̃ gbangbã kɔkɔ, bɔdɔ̃ pɔpɔɛ gɛ kɛlɛ sɛ bayɛkɛ, gɛ buku Owusoso Akaa awɔ̃.

¹⁹ Kɛlɛ mɛ Owusoso Akaa abakɔ ɔnɔ ɔdɔ̃ pɛpɛ nɔ nɛ yɛ ehoeyi udɔ̃ dadalɛ gɛ kpasɛ Kristo Yesu mɛ.

²⁰ Ishu dadalɛ ɔkɔ bɔlɔ Owusoso Akaa gɛenu bɔlɔ Akaa ɔvɛnɔ tihɔɔ tihɔɔ. Amen.

Tɛsɛsɛnɔ Gɔgɔɛ Nɔ

²¹ Ɛɛsɛnɛ bagɛ alɛishu dalɛ pete nɛ Kristo Yesu mɛ. Baadzya gɛalɛ mɛɔbha asɛnɛ wɔnɔ asɛsɛ.

²² Banɔ dadalɛ pete asɛnɛ wɔnɔ asɛsɛ, asɛ banunɔ gɛalɛ Romanɛ Ekusi Gbagbla ɔpãmɛ ana.

²³ Tɛ Apalete Yesu Kristo tibhui bhuibuɔ zã plɛnɔ ɔnɔ ɔfɔfuĩa nɔ. Amen.