Filipianɛ 3 - Nyangbo New Testament

Awɔ̃lulu Ama Ishupi Lɛ Mɛ

¹ Gɔgɔɛ nɔ mɛadzya alɛ mɔ, nɔmɔ same nɛ Apaleteɛ mɛ. Kitinu bɔtɔ ɔkɔ mɛ sɛ iwlui kaa fɔnɔ ebui alɛ sɛsɛ ɔnɔ, kɛlɛinu kibui gɛ ba po ɔnɔ.

² Nɔolù awɔ̃ nɛ̀ bebu alɛ piapii, banɔ alɛ gɛ abhɛtɛ ebui kpa, banɔ alɛ gɛ bakpɛ apɔ̃ nɛ ishupiɛ shu.

³ Ɔmɔsɛ bɔlɔ nu kɛhɔ̃a bhui bhuiɛ, bɔlɔ agɛ ɛlɔkɔ ɔfɔfuĩa nɔ ɔkpɛ kɛtakpu esi ɔkɔ Owusoso Akaa nɔ, gɛ bɔdalɛ Yesu Kristo shu, pɛ buti lu awɔ̃ nɛ ishudzya nabha,

⁴ gɛ mɛtsyɛ kibui tili shu so pɛ awɔ̃ lulu alɛ nɛidi alɛ̀ mɛahɔɛ nɛ ishupiɛ mɛ. Onupɛ abhɛtɛ anɔ teli asɛ kibui tili shu so pɛ elu awɔ̃ nɛ ishudzya ɛlɛ nabha, ebui alɛ mɛahɔɛ ɔdɛ anɔ alɛ,

⁵ gɛ bebhui kɛhɔ̃a akɔ mɛ nɛ kiwui sɛmì nabha, pɛ inu Israel eyi gɛide Benyamin kigbogboɔ mɛ, gɛinu Hebrieyi gbangbã, pɔ nɛ ɔsha nulũɔ, idzi Farisieyi,

⁶ gɛ ɛtɔɖɔ ɛlɛ gagalĩ, pɛ ɛzɛ tɔnɔ ɔha niede, basɛ anɔ gɛ abhɛtɛ atɔɖɔ ɔshaa nabha xɔnɔ, kibui nanà gɛzã mɛishu.

⁷ Pɔ kɛgɛ ɛta mɔ nɛ ebui alɛ mɛɛ, Kristo soɔ ɛga mɔ alɛ.

⁸ Kɛgɛ zɛdɛɛ, ɛlɔkɔ ɛlɛ sɛ ɛgɛ mɔ̃ kɛnanà odenɔ kɛxɔ̃ɛ ɛlɛ mɛ, nɛ gɛinu kibui hohoe ɔdɛ ɔkɔmɛ sɛ ɛmɔ̃ Kristo Yesu gɛenu mɛ Apaleteɛ gɛ yɛ shu so pɛ ɛga mɔ̃ kɛdɔ̃ nanà nɔ. Ɛmɔ ebui alɛ sɛ tɛwɔnɔ̃ ete lenu sɛ tɛ ɛmɔ̃ Kristo

⁹ tɛ bamɔ mɛ tsyɛ nɛ yɛ mɛ, gɛnɛ sɛ tɛ ɛmɔ tɛzazã piapii gɛide ɔsha mɛ akɔ mɛishu, pɛ kide tɛyɛyɛkɛŋã nɛ Kristo mɛ gɛ kinu kibui gbangbã bhɛbhɛtɛ gɛide Owusoso Akaa mɛ pɛ kide tɛyɛyɛkɛŋã mɛ.

¹⁰ Ɛpɛ sɛ tɛ mɛiti Kristo nɛ̀ ohumi nɔ gɛ ɔlɔkɔ yɛalɔ edenɔ bekpuɔ mɛ, nɛ̀ ɔhakpɛkpɛ gɛ ɔkɔ sɛ bɔmɔ ɔtɔ ɔlɛ plɛni, tɛ budzi asɛ yɛ ana nɛ yɛutsi mɛ,

¹¹ klisoɔ, nɛ ɔkɔ toliɛ, tɛ mɛtsyɛ mɔ tɛlɔlɔ denɔ bekpuɔ mɛ.

Tɛwɔawlɔ̃akɛ Ɔkɔ Kabha Ŋaŋã

¹² Gɛnɛ sɛ gɛ mɛahɔɛ atɛdɔ ebui alɛ pete abha, alo gɛ batɛ bhɛtɛ mɛ mɛidzì anɔ nanà, pɔ ɛwlɔãkɛ sɛ tɛ mɛahɔɛ adɔ kɛgɛ kɛlɛ shu so pɛ Kristo ahɔɛ adɔ mɛ abha.

¹³ Mɛadzya alɛ mɔ, ɛtɛ mɔ mɛishu otsiɛ asɛ mɛahɔɛ atɛdɔ ɛlɛ abha. Pɔ kibui tinikpo gɛ ɛbhɛtɛɛ kɛlɛinu ɔsɛ, ɛbà dzɛkɛ ebui nɔnɔ gɛatɛ fala tɛ ɛwlɔakɛ ɔkɔ kɛgɛ lɛ mɛ otugbà boŋ,

¹⁴ Ɛwlɔ̃akɛ sɛ tɛ mɛŋã kabha tɛ ɛyɛkɛ kɛbhɛɛ gɛ ɛlɛ shu so pɛ Owusoso Akaa ekulu mɛ ɔvɛnɔ ititiɛ ɔmana Kristo Yesu mɛ.

¹⁵ Kɛlɛ sɛ bɔlɔ agɛ ishèɛ petee zilu awɔ̃ ɖi ebuiɛ ana. Kɛlɛ onupɛ nɛ kawɔ̃pɛ tieli mɛ wɔ bhɛtɛ ekpeɖekpeɖe bhlatɔ mɛ tsyɛɛ, kɛlɛ tsyɛ Owusoso Akaa abadãlɛ ɛlɛ mɛ akɔ wɔ.

¹⁶ Nɔkɔ bɔzã nɛ̀ ɛkpã nɛ kɛgɛ bɔtɛ yɛkɛ ete shu.

¹⁷ Mɛadzya alɛ mɔ, nɔbhɛtɛ tenikpo nɛ̀ bagɔgɔɛ nɔ tɛ nɔzã nɛkpã nɛ mɛ ɛyɛ ulũ, tɛ nɔ olù awɔ̃ nɛ̀ bagɛ edzi nɛ ɛkpã nɛ edzoɔ gɛ bɔkasɛ wɔnɔ shu.

¹⁸ Ɔmɔsɛ, asɛ gɛ izi tseɖe ɔnɔ bafalanɔ, pɛ ɛkaɖɔ ɛlɛ nɛ̀ ɛwɔmɛɛ, banɔ kpekpèɛ edzi nɛ̀ ɛkpã asɛ banɔ gɛ agɛ dɛmɛ Kristo yɛutsi osiɛ.

¹⁹ Kɛgɛ babà alɛ abha kɛlɛinu butsí, balɛ obudiɛ ɔlɛonu balɛ kevũɔ, same eku alɛ nɛ kibui nɔnɔ shu gɛ kɛlɛ sɛ baŋã kiwũi. Balɛ ekpeɖekpeɖeɛ mɛ etsiɖi kesiakpa abha ɔdɔ̃ abha.

²⁰ Pɔ bɔlɔ xɔnɔɔ, bɔlɛ epi alɛ itití. Kɛlɛ bulipo agɛ aba yɛkɛ kɔ ɔlɔ edenɔ ɛkɛlɛ gagalĩ, gɛenu Apalete Yesu Kristo,

²¹ anɔ gɛ, ohumi ɔlɛ yɛahɔɛ, pɛ alɔkɔ agbanà kɛka nyia ka ɔkpɛ yɛesi nɔ, ebè tsyina ɔlɔ ishudzya ɛlɛ gɛ ma kɛnanà mɛɛ tɛ bɔzã asɛ yɛɔyɛ dadalɛ.