Filipianɛ 2 - Nyangbo New Testament

Tɛgagã Nɛ Kristo Ishu Esi Zhizhinì Ulũ

¹ Onupɛ nɔmɔ̃ kemì kpɛkpɛ tieli odenɔ tenikpo bhɛbhɛtɛ nɛ Kristoɔ, onupɛ nɔmɔ ishumɛ yɔyɔ tili tsyɛ odenɔ yɛ tɛdɛdɛmɛ nɔ mɛ, onupɛ bɔkpɛ ɔha nɛ Ɔfɔfuĩa nɔ, onupɛ bɔbhɛtɛ ɛyamɛ yɔyɔ ebui pɛ buɖi banɔ ashagabui,

² kɛlɛ nɔkɔ mɛ same mɔmɔ ana nɛ bɔlɔ ekpeɖekpeɖe tenikpo tɛbhɛbhɛtɛ shu, gɛ tɛdɛdɛmɛ nɔ tinikpo ɛlɛ lɛ ɔlɔ ahɔɛ, pɛ bɔlɛ tenikpo nɛ ɔfɔfuĩa nɛ̀ ebui tɔtɔɖɔ mɛ.

³ Nɔtɛ bhɛtɛ kibui nanà ɔlɔkɔ pɛ ishu tɛpɛpɛ̃ nɔ, alo ishu fefeke gɛ ma kɛnanà mɛ, pɔ nɔ ozhinì ishu esi, tɛ nɔmɔ babhlatɔ asɛ bapɛ̃ adɛ ɔnɔ shu.

⁴ Wɔnɔ mɛ anɔ nanà etiɖì kɛgɛ apɛ akɔ yɛishu ete, pɔ eɖì kɛgɛ bapɛ̃ kɔ babhlatɔ tsyɛ.

⁵ Wɔnɔ ɛkpã zazãna zã ɔmɔasɛ kana gɛ Yesu Kristo yɛ tsyɛ lɛɛ ana.

⁶ Anɔ gɛ alɛ Owusoso Akaa tɛzazã mɛ, tsyɛ agɛ mɔ yɛishu asɛ ashɔ nɛ̀ tɛzazã asɛ Owusoso Akaa kinu kɛdɔ̃ gɛ abalà nyanà

⁷ pɔ abhɛtɛ ishu asɛ etinu kɛdɔ̃ nanà, pɛ abhɛtɛ yɛishu asɛ axɔ̃ɛdɛ ana, gɛ babhɛtɛ yɛ nɛ anɔdzyrame yɛ tɛlɛlɛ mɛ.

⁸ Pɔ bamɔ yɛ tɛlɛlɛ mɛ asɛ anɔdzyrame ana, ezhinì yɛishu esi kɛlɛ elũ atɔ̃ akɔ butsí, butsiɛ nɛ butsi osiɛ shu tsyɛ!

⁹ Kliso Owusoso Akaa ewunu yɛatɔɖɔ ɔɖaɖama ɔkɔ ɔdɛ kɛlɛ akɔyɛ yɛinyèɛ gɛ ɖama ɔdɛ kinye ka nyia ka ɛdi,

¹⁰ sɛ tɛ onupɛ bekulu Yesu inyeɛ, tɛ bedzu kikulusi ka nyia ka esi, nɛ kititiɛ nɛ̀ kesiakpa niesi,

¹¹ kɛlɛ kineke ka nyia ka dalɛ kɛlɛ mɛ ɔsɛ Yesu Kristo yɛenu Apaleteɛ, ɔkɔ Owusoso Akaa gɛenu Akaa shu tɛdadalɛ.

Titsetsé Asɛ Awɔ̃ɛɛ Ana

¹² Mɛɔbhia alɛ mɔ, klisoɔ, asɛ kana gɛ nɔolũ atɔ̃ kibè nyia beɛ, anɛ gɛ ɛlɛ wɔnɔ ɔbha ete, pɔ nɔbhɛtɛ ɛlɛ ɔdɛ ana gɛ onupɛ ɛma ɔnɔ ɔbha tsyɛ, nɔzã ɛlɛ abha ɔzɔwɔa axɔ̃ɛ ɔkɔ wɔnɔ ɛkpã tɛyɛyɛkɛ lu nɛ̀ ɛkpã nɛ kifusisi nɛ̀ tishushukù mɛ,

¹³ ɔmɔsɛ Owusoso Akaa yɛawɔa axɔ̃ɛ nɛ ɔnɔ mɛ, flogo tɛ ɔtɔɖɔ ɛbui tili, nɛ̀ tɛ obu katsɛɖɛ tieli nɛ yɛ tɛtɔtɔɖɔ gbangbã nɔlũ.

¹⁴ Nɔtɛ bhɛtɛ kibui nanà nɛ ishu kpakpãmɛ alo ebui wɔawlɔ̃akɛ mɛ,

¹⁵ sɛ tɛ batɛmɔ bamɛ tsitsí nanà nɛ ɔnɔ shu, pɔ tɛ wɔnɔ shu dalɛ asɛ Owusoso Akaa yɛeyi alɛ gɛ batɛ amɔ kibui zizĩ nɛ ɔnɔ shu, nɛ obo kanɔ kɔklɔ̃ nɛ̀ ebui kpa bhɛbhɛtɛ alɛ mɛ gɛ wɔnɔ xɔnɔ̃ otsè asɛ awɔ̃ɛɛ gɛ alɛ kititiɛ ana,

¹⁶ nɛ kana gɛ nɔnyanà ɛkpã mɛ ibuiɛ ovunɔɔ shu, sɛ tɛ ɛlà tũ ahɔɛ nɛitélũ nɛ Kristo kiwui nabha, sɛ ɛgɛ wɔa ɛxɔ̃ɛ alo ɛtɔ bɔwɔãa.

¹⁷ Pɔ edzi asɛ babalɛ mɛ dzyosu esi odenɔ wɔnɔ ishu tɛlɔlɔkɔ ɔkɔ nɛ̀ kɛxɔ̃ɛ wɔawɔa gɛide tɛyɛyɛkɛŋã mɛɛ tsyɛ elo, same eekù mɛ nɛ ɔnɔ petee shu.

¹⁸ Klisoɔ wɔnɔ tsyɛ ɔmɔ same plɛnɔ mɛ.

Timoteo Nɛ̀ Epafrodito

¹⁹ Ilù awɔ̃ nɛ Apalete Yesu abha sɛ ɛbàkpɛ Timoteo nɛ ɔnɔ ɔkɔ odunũ ɔlɛ, sɛ tɛ mɛtsyɛ mɔ same gɛ onupɛ ɛyɛkɛ ɔklasɔ̃ nɛ wɔnɔ shuɔ.

²⁰ Ananà bhama mɛahɔɛ ɔdɛ yɛ, gɛ alɔkɔ kibui nɛ wɔnɔ tɛpɛpɛ shu kɛgbãa.

²¹ Ɔmɔsɛ aka nyia aka apɛ yɛishu tɛpɛpɛ̀, gɛnɛ Yesu Kristo ayɛ shu.

²² Pɔ nɔonyi ɔsɛ Timoteo alɔkɔ yɛishu akɔ, ɔmɔsɛ asɛ eyi gɛ alɛ yɛakaa ɔbhaa, akpɛ kɛtakpu esi aplɛnɔ mɛ nɛ Owusoso Akaa ebuiɛ axɔ̃ɛ wɔawa mɛ.

²³ Klisoɔ, ɛkpɛ kemi, sɛ tɛ mɛ sɛsɛ yɛ gɛ onupɛ ɛmɔ kɛvɛɛ gɛ ebuiɛ avɛ alɛ abha nɛ mɛɛ.

²⁴ Kɛlɛ ɛyɛkɛ mɛishu abha aŋã nɛ Apaleteɛ mɛ ɔsɛ mɛtsyɛ babà tsĩɔɔ ɔlɛ.

²⁵ Pɔ ɛmɔ sɛ kɛpɛ̃ ɔsɛ mɛidzini Epafrodito gɛenu mɛadzya sɛsɛ, nɛ̀ mɛ ɔhagbo xɔ̃ɛwa nɛ keyu atata pɛ enu wɔnɔ axɔ̃ɛdɛ gɛ nɔsɛsɛ ɔsɛ ezeɖi mɛabhaa.

²⁶ Edzè gɛ aka mɔ ɔnɔ ɖi, kɛlɛ ɔwɔ̃nyɔnɔ ɔkpasɛ yɛ mɛ ɔmɔsɛ nɔolũ ɔsɛ yɛishumɛ zĩ.

²⁷ Kibui gbã yɛishumɛ zĩ bafala nɔ, gɛ atɔ ɛbɔɛ tɛ etsí. Pɔ Owusoso Akaa eɖi yɛ ashagabui, kɛlɛ gɛnɛ yɛ ete, pɔ mɛtsyɛ, sɛ tɛ ɛtɛba mɔ ɔwɔ̃nyɔnɔ dzinì mɔ.

²⁸ Kliso ɛka pɛɛ gagalĩ sɛ tɛ mɛ sɛsɛ yɛ, sɛ tɛ onupɛ nɔzɔmɔ yɛɛ, same ebeku ɔnɔ kɛlɛ mɛ ɔwɔ̃nyɔnɔ obozhi kesi.

²⁹ Nɔtsyanà yɛ nɛ Apaleteɛ mɛ nɛ̀ same hohoe, tɛ nɔkpɛ ɛtakpu esi ɔkɔ banyɛ gɛ edzì asɛ yɛ ana,

³⁰ ɔmɔsɛ agɔ̃ kɛbɔɛ tɛ etsí nɛ Kristo yɛxɔ̃ɛ shu, gɛ alɔkɔ yɛkpã sɛ tɛ akɔ mɛ tɛpɛplɛnɔ gɛ nɔgɛ là kɔ mɛɛ shu.