Filimon 1 - Nyangbo New Testament

¹ Paulo gɛedzi anɔ gɛazã ɔɖavũmɛ nɛ Yesu yɛtakpuɔ, nɛ̀ Timoteo gɛenu bɔlɔ adzya, Bɔsɛsɛ wɔ Filimon gɛenu bɔlɔ ɔbhia nɛ̀ axɔ̃ɛwɔa ɔhagbo keplukpa alɛ,

² bɔsɛsɛ Apia gɛenu bɔlɔ ada, nɛ̀ Arxipo bɔlɔ ɔhagbo keyuta nɛ̀ ɔhaa gɛɔtɔ̃ ɛtakpu nɛ wɔ ɔpãmɛ keplukpa alɛ.

³ Tibhui bhuibu nɛ̀ ishu yɔyɔ odenɔ Owusoso Akaa nɛ̀ Apalete Yesu ɔkɔ akɔ wɔ.

Ahɔɛhuhu Nɛ̀ Owusoso Akaa Tikukulu

⁴ Ihu ahɔɛ nɛ wɔɛtakpu nɛ mɛ Owusoso Akaa tikukulu mɛ kibe nyia be,

⁵ ɔmɔsɛ ilũ wɔ tɛyɛyɛkɛŋã nɛ Apalete Yesu abha nɛ̀ wɔtɛdɛdɛmɛ nɔ ɔkɔ bagɛ ayɛkɛ yɛabha aŋãa petee nɔ.

⁶ Ikulu Owusoso Akaa sɛ tɛ ɔgagalĩ nɛ wɔ tɛyɛyɛkɛŋã bɔdɔ̃ kakasɛ mɛ, sɛ tɛ ɔmɔ ebui esi lulũ nɛ kibui gbangbã ka nyia ka gɛ kpasɛ Kristo mɛ.

⁷ Wɔ tɛdɛdɛmɛ nɔ kɔ mɛ mɔ same gbagbla nɛ̀ kemi kpɛkpɛ, ɔmɔsɛ wɔ, asɛ adzya ana, ɔkɔ sɛ bagɛ ayɛkɛ aŋãa etúɔ mɛ etsyina edzì avɔvɔ.

Paulo Akɔ Filimon Kɛtakpu Sɛ Edzinɔ Onesimo Ayɛkɛ

⁸ Klisoɔ, gɛ kinu kibui gbã ɔsɛ itisi kifù nɛ Kristo mɛ pɛ ɛbalà ɛkɔ wɔ ɔsha nɛ kɛgɛ ɛlɛ sɛ ɔbhɛtɛ shu tsyɛ elo,

⁹ ɛkɔ wɔ ɛtakpu nɛ kɛgɛ kɛlɛinu tɛdɛdɛmɛ nɔ shu. Mɛ Paulo anɔ sheshè pɛ otsi alɛ inu ɔɖavũmɛ azazã nɛ Kristo Yesu ɛtakpu,

¹⁰ ɛkɔ wɔ ɛtakpu nɛ mɛeyianyɛ Onesimo shu, anɔ gɛ edzì mɛeyianyɛ nɛ kibeɛ gɛ ɛzã ɛɖahuiɛ mɛ.

¹¹ Kibeɛ gɛ bafalaa, agɛ pɛ̃ akɔ kɛnanà nɛ wɔ amɛ, pɔ otsi alɛ xɔnɔ ebedzì anɔ gɛ yɛishu axɔ̃ɛ wɔawɔa alɛ akɔ wɔ nɛ̀ mɛ.

¹² Idzinì anɔ gɛ ɛdɛmɛ nɔ nɛ mɛitúɔ mɛ̀ petee nɔ sɛsɛ wɔ.

¹³ Tsyɛ alo ɛta pɛ sɛ tɛ azã mɛɔbha tɛ ayɛkɛ wɔ zãkɔ ɔkɔ mɛ tɛpɛplɛnɔ nɛ kibeɛ gɛ ɛkpasɛ ɛɖahuiɛ mɛ ɔkɔ kibui gbangbã flogo.

¹⁴ Pɔ ɛgɛ pɛ sɛ tɛ ɛbhɛtɛ kɛnanà gɛ ɔgɛ kpɛ mɛ, onupɛ tɛpɛplɛnɔ babà tyɛ, gɛnɛ gɛ bebètũ ɛlɛ akpɛ wɔ ulũ.

¹⁵ Ɔdɛ tsyɛ kɛgɛ ɛlɛ shu so pɛ bebu yɛɔtɔ nɛ wɔ ɔbha ɔkɔ kibè tiliɛ kɛlɛinu ɔsɛ tɛ etsodzi aba wɔkɔ tihɔɔ,

¹⁶ ezeke dzi anɔ dzidzì, pɔ aba pɛ adɛ anɔ dzidzi, kɛlɛ abazã asɛ adzya ana gɛ ɔdɛmɛnɔ. Ɛdɛmɛ yɛibui, kɛlɛ ɔbɔ dɛmɛ yɛibui ɔdɛ mɛ asɛ anyɛ nɛ̀ adzya gɛ akpasɛ Apaleteɛ mɛ.

¹⁷ Kliso onupɛ ɔlɔkɔ mɛ asɛ wɔ ɔhagbo axɔ̃ɛwɔa ana, kɛlɛ yɛkɛ yɛ asɛ gɛ ɔbɔ yɛkɛ mɛ tsyɛ ana.

¹⁸ Onupɛ abhɛtɛ kibui kpa tili alo adɔ kɛbhɛ tili nɛ wɔ shuɔ tsyɛ elo, bisi kɛlɛ odenɔ mɛahɔɛ mɛ.

¹⁹ Mɛ Paulo mɛ fɔnɔ kibui ɛlɛ nɛ̀ mɛahɔɛ. Ɛba dzini kɛlɛ buia-ɛgɛ pɛ sɛ tɛ mɛɖɔ sɛ wɔ tsyɛ ɔdɔ kɛbbhɛ nɛ mɛishu.

²⁰ Mɛadzya, ɛpɛ sɛ tɛ ɛmɔ kɛdɔ̃ tili denɔ wɔahɔɛ mɛ nɛ Apaleteɛ inye mɛ, kɔ mɛituɔ dzi kɛvɔvɔ nɛ Kristo mɛ.

²¹ Gɛ ɛyɛkɛ wɔabha ŋã nɛ wɔ atɔ̃ lulũ shu so pɛ ɛfɔnɔ bɔdɔ̃ lɛ kɔ wɔ, ɔmɔsɛ inyi sɛ ɔbɔ bhɛtɛ ɔdɛ kana gɛ ibisiɛ.

²² Kɛlɛ kibui tinikpo katɔ, woese befu ɔtsɛkɔ olú ɔkɔ mɛ, ɔmɔsɛ iɖi idzomɛ ɔsɛ ɛbà tsodzì bà wɔ ɔbha tɛ̀ Owusoso Akaa gɛ okuluɔ ba ɛlɛ mɛ.

²³ Epafra anɔ gɛ akpasɛ ɔɖavũmɛ aplɛnɔ mɛ nɛ Yesu Kristo mɛ asɛnɛ wɔ.

²⁴ Kidzo ɛlɛ nabha Marko, Aristaxo Dema nɛ̀ Luka gɛenu mɛ ɔhagbo axɔ̃ɛwɔa tsyɛ asɛnɛ wɔ.

²⁵ Apalete Yesu Kristo tibhui bhuibuɔ zã plɛnɔ wɔnɔ ɔfɔfuĩa nɔ.