Efesoanɛ 6 - Nyangbo New Testament

Bunuvɔɛ Nɛ̀ Balɛ Elĩ Nɛ̀ Akaa Alɛ

¹ Bunuvɔɛ nɔ, nɔolũ atɔ̃ ɔkɔ ɔnɔ elĩ nɛ̀ wɔnɔ akaa alɛ nɛ Apaleteɛ mɛ, ɔmɔsɛ kibui ɛlɛ pɛ̃.

² “Nɔkpɛ kɛtakpu esi ɔkɔ wɔnɔ akaa nɛ̀ wɔnɔ elĩ,” gɛ ɔlɛ onu ɔsha gɛiputɔ gɛ batɔɖɔ kibui lu aplɛnɔ ɔlɛ,

³ “sɛ tɛ apɛ̃ kɔ wɔ tɛ ɔmɔ ɛkpã dzlolo nɛ kesiakpa nabha.”

⁴ Beyiaka mɔ, nɔtɔ kpɛ wɔnɔ eyi alɛ ɔmɔpɔɛ, pɔ, nɔnyɔnɔ alɛ nɛ Apaleteɛ yɛɔdɔ̃ kakasɛ nulũ.

Banɔ Dzidzì Nɛ Bapalete

⁵ Banɔ dzidzi mɔ, nɔolũ atɔ̃ ɔkɔ ɔnɔ esiakpa abha apaleteɛ nɛ kɛtakpu esi kpɛkpɛ nɛ̀ kifu sisi mɛ, nɛ wɔnɔ etú dadalɛ mɛ, asɛ kana gɛ nobolũ atɔ̃ ɔkɔ Kristo ana.

⁶ Nɔotilũ atɔ̃ kɔ alɛ sɛ tɛ noku balɛ awɔ̃ nɛ kibeɛ gɛ balɛ awuhũɔ etsiɖi wɔnɔ abha ete, pɔ asɛ banɔ dzidzi ɔkɔ Kristo ana, tɛ nɔbhɛtɛ Owusoso Akaa tɛpɛpɛ odenɔ wɔnɔ etúɔ mɛ.

⁷ Nɔkpɛ kɛtakpu esi nɛ̀ wɔnɔ etúɔ nyɔ̃ɔ, asɛ gɛ onupɛ Apaleteɛ nɔkpɛ̀ ketakpu esi ɔkɔ ana, gɛnɛ banɔ,

⁸ ɔmɔsɛ nɔonyi ɔsɛ Apaleteɛ aba buia kɛbhɛ̃ akɔ aka nyia aka ɔkɔ kɛgbangbã ka nyia ka ɛdi gɛ abhɛtɛɛ, gɛ onu ɔnɔ dzidzi alo ishu ahɔɛmɛ azazã elete yɛenu tsyɛ.

⁹ Kɛlɛ wɔnɔ bapaleteɛ tsyɛ, nɔbhɛtɛ ɔkɔ wɔnɔ banɔ dzidziɛ nɛ kidzo ɛlɛ nabha. Nɔtɛ kpɛ alɛ ɛkpã ifù, ɔmɔsɛ nɔonyi ɔsɛ agɛ yɛenu wɔnɔ Apaleteɛ nɛ̀ balɛ ayɛ alɛititíɛ, kɛlɛ yɛetiɖi banɔ amɛ.

Owusoso Akaa Ɔɖa Akpɛkpɛ Gɛ Balɔkɔ Epo Ishu Nɔ

¹⁰ Gɔgɔɛ nɔ, nɔzã gagalĩ nɛ Apaleteɛ mɛ, nɛ̀ yɛohumi nɔ gɛɔdɛ.

¹¹ Nɔlɔkɔ Owusoso Akaa ɔɖa akpɛkpɛ gɛ nɔlɔkɔ po ishu nɔ ɔkpɛ, sɛ tɛ nɔlà zã abosam ebui tɔtɔɖɔ nulũ.

¹² Ɔmɔsɛ bɔtɛ tà keyù nɛ̀ ishupi nɛ̀ dzyosu, pɔ nɛ̀ beekusi, nɛ̀ ɔshaeleteɛ, nɛ̀ kanɔ alɛ mɛ otumũ mɛ ihumi nɔ gɛ ɛŋã kabha, nɛ̀ ɛfɔfuĩa gagalĩ zizĩɛ nɛ kititì ɔdɔ̃ mɛ.

¹³ Klisoɔ, nɔ lɔkɔ wɔnɔ Owusoso Akaa ɔɖa akpɛkpɛ ɔdɔ̃ petee gɛ nɔlɔkɔ opo ishu nɔɔ ɔkpɛ, sɛ tɛ onupɛ ewui zizĩ ebekuɔ, nɔ bɔlà ɔtsyɔa etelũ nɛ alɛ, kɛlɛ onupɛ ewui alɛ abafalaa, nobo wlui ɔzã gagalĩ.

¹⁴ Klisoɔ nɔzã gagalĩ, tɛ nɔ lɔkɔ kibui gbã atsatsà tɔɖɔ ɔnyã kashɛ nɔ, ɔlɔkɔ ɔplɛnɔ kitemɛ ɔɖaa akpɛkpɛ gɛ yɛishu kibui gbangbã bhɛbhɛtɛ ɔkpɛ ɔtɔɖɔ yɛɔzãkɔ

¹⁵ nɛ̀ tɛ wɔnɔ tsɛɖɛ zã nɛ̀ awɔ̃ nɛ kibui gbangbã gɛ mana ishu yɔyɔ mɛ.

¹⁶ Ɔlɔkɔ plɛnɔ ebui alɛ petee nɔ, nɔ lɔkɔ ɔɖaɛtɛ̃ gɛinu tɛyɛyɛkɛŋã, gɛ ɛlɛ nɔbɔ lɔkɔ olĩ ɔpɔ̃ɛ ifuɔ gɛide anɔ zizĩɛ ɔkɔ ɔbaa.

¹⁷ Nɔ lɔkɔ ɔɖaɛkutuɔ gɛ yɛkɛ ɔkɔ anɔ ovunɔ, nɛ̀ ɔfɔfuĩa mɛ bɛtɛ̀ɛ, gɛinu Owusoso Akaa ibuiɛ.

¹⁸ Kɛlɛ nɔokulu Owusoso Akaa nɛ Ɔfɔfuĩa nɔ mɛ kibe nyia be nɛ̀ Owusoso Akaa tikukulu nɛ̀ tibibisi ka nyia ka ɛdi. Gɛ alɛ akpasɛ wɔnɔ kɛtakpuɔ mɛ soɔ, nɔzã nɛ̀ awɔ̃ tɛ nɔzã Owusoso Akaa tikukulu abha ɔkɔ bagɛ ayɛkɛ aŋã petee.

¹⁹ Nɔ okulu Owusoso Akaa kɔ mɛ tsyɛ, sɛ tɛ onupɛ ɛdalɛ mɛolugbũɔ, babàkɔ mɛ ebui ɖɔɖɔ sɛ tɛ ɛdalɛ kibui kpukpũɔ gɛ kpasɛ kibui gbangbã mɛ kifù masi masi,

²⁰ gɛ kɛlɛ so pɛ ɛlɛ wɔnɔ inyè mɛ pɛ ɛkpasɛ ɛɖahui mɛ. Nɔokulu Owusoso Akaa sɛ tɛ ɛlà dalɛ ɛlɛ mɛ nɛ kifù masi masi mɛ asɛ gɛ kɛlɛ sɛ ɛbhɛtɛ.

Tɛsɛsɛnɔ Gɔgɔɛ Nɔ

²¹ Tixiko, adzyaa gɛ ɛdɛmɛ nɔ pɛ enu axɔ̃ɛdɛ gbangbã nɛ Apaleteɛ mɛ, ebetseɖe ɔnɔ kɛka nyia ka, sɛ tɛ wɔnɔ tsyɛ otì kana gɛ ɛlɛɛ nɛ kɛnɔnɔ gɛ ɛbhɛtɛɛ.

²² Kibui ɛlɛ shu mɛ lɔkɔ yɛ sɛsɛ ɔnɔ, sɛ tɛ nɔotì kana gɛ bɔlɛɛ, sɛ tɛ akpɛ ɔnɔ emi.

²³ Ishuyɔyɔ ɔkɔ badzyaa, nɛ̀ tɛdɛdɛmɛ nɔ ɔplɛnɔ tɛyɛyɛkɛŋã odenɔ Owusoso Akaa gɛenu Akaa nɛ̀ Apalete Yesu Kristo ɔkɔ.

²⁴ Tibhui bhuibuɔ zã ]plɛnɔ wɔnɔ bagɛ nɔ dɛmɛ nɔ ɔlɔ Apalete Yesu Kristoɔ nɛ̀ tɛdɛdɛmɛ nɔ gɛlɛ tihɔɔ nɔ.