Efesoanɛ 5 - Nyangbo New Testament

¹ Nɔkpasɛ Owusoso Akaa ɛkpã, asɛ bunuvɔɛ gɛ adɛmɛ nɔ ana,

² tɛ nɔzã nɛ ɛkpã nɛ tɛdɛdɛmɛ nɔ mɛ, asɛ kana gɛ Kristo adɛmɛ ɔlɔ ɛbui pɛ alɔkɔ yɛishu akɔ asɛ bɔdɔ̃ kɔkɔ gɛɛlɔ̃ huhuhu nɛ̀ bɔdɔ̃ pɔpɔɛ ɔkɔ Owusoso Akaa.

³ Pɔ nɛ wɔnɔ ɛshiɛ, kɛma sɛ tɛ belũ ɔnɔ ɔdɔ̃ nɛ ɔmamɛ dɛdɛ shu, alo atsɔ̃bui ka nyia ka ɛdi shu, alo anɔ gɛ apɛɛ kɛdɔ̃ gbagbla adɛ, ɔmɔsɛ ebui alɛ agɛpɛ akɔ Owusoso Akaa yɛanɔ dadalɛ.

⁴ Nɔtɛ zɔɖɔ atsɔ̃bui nɛ̀ bɔga ebui nɛ̀ kaɖɔ gɛ kama kalɛ ɔzãkɔ, pɔ nɔlɔkɔ ahɔɛ huhu ɔkɔ Akaa.

⁵ Nɛ kibui ɛlɛ shuɔɔ, nɔ ɔbɔ ɔtɔɖɔ ahɔɛ nɛ ɛlɛ abha ɔsɛ, ɔmamɛ dɛdɛ, ishu madalɛ madalɛ alo anɔ gɛ apɛɛ ɛdɔ̃ akɔ yɛ ete shu, anɔ alɛ nɛidi enu obudi elete, kɛlɛ atɛ bamɔ kaŋãsiɛ galɛ Kristo nɛ̀ Owusoso Akaa bukusi ɔŋãkɔ mɛ.

⁶ Nɔtɛkɔ ananà awɔɛ ɔnɔ nɛ ebui gɛ lama alɛ mɛ shu, ɔmɔsɛ ebui alɛ nɛidi shu Owusoso Akaa ɔmɔpɔɛ ɔba bagɛ etielũ atɔ̃ nabha.

⁷ Klisoɔ nɔtɛ kpɛ alɛ ɔha.

⁸ Ɔmɔsɛ nɔ tɛzã otumũ mɛ oɖi, pɔ otsiɛ xɔnɔɔ nɔonu tɛdadalɛ nɛ Apaleteɛ mɛ. Nɔzã nɛ ɛkpã asɛ bunuvɔɛ gɛ balɛ amɛ adalɛ ana

⁹ tɛ nɔ pɛɛ kɛgɛ ikù Apaleteɛ sameɛ,

¹⁰ ɔmɔsɛ busi eyuyuɔ gɛenu tɛdadalɛ akpasɛ ebuiɛ gɛ apɛ̃ petee mɛ, kibui gbagbã bhɛbhɛtɛ, nɛ̀ kibui igbã.

¹¹ Nɔtɛ kpɛ ɔhɔɛ nɛ otumũ ebui bhɛbhɛtɛ nɔnɔ gɛ kɛnanà ma alɛ mɛ mɛ̀, pɔ nɔobu alɛ ɔkasɛ boŋ.

¹² Ɔmɔsɛ kiwũi ibui kinu tsyɛ ɔsɛ tɛ baɖɔ ebui nɔnɔ gɛ bagɛ etie lũ atɔ̃ abhɛtɛ nɛ tikpukpũ mɛ.

¹³ Pɔ kɛka nyia ka gɛ tɛdadalɛ bu kasɛɛ, kidzi kɛdɔ̃ gɛ baamɔ̃,

¹⁴ ɔmɔsɛ kiwuiɛ kɛlɛ ɔkɔ ɔsɛ bamɔ̃ kɛka nyia ka. Kliso pɛ baɖɔ asɛ, “Nyɛmɛ, O wɔ agɛ ɔɔdɔ̀ taɖaa, lɔ odenɔ bekpuɔ mɛ, kɛlɛ Kristoɔ aba tsé kifu atɔɖɔ wɔabha.”

¹⁵ Nɔoɖi piapii nɛ kana gɛ nɔodzinɔ wɔnɔ ɛkpã shu-nɔtɛ zã asɛ bagɛ etinyi ibui, pɔ asɛ bagɛ enyi ibui ana,

¹⁶ tɛ nɔwɔa kibè ka nyia ka shu axɔ̃ɛ piapii, ɔmɔsɛ ewuiɛ enu ewui kpa.

¹⁷ Klisoɔ nɔotidzì bawɔaga, pɔ nɔolũ kɛgɛ Apaleteɛ apɛɛ asɛ ɔbhɛtɛ.

¹⁸ Nɔtɛwɔɛ bunu obuku, kɛdɔ̃ gɛ gbana anɔ kpɛ same mɔmɔ falanɔ ɛfú mɛ. Pɔ nɔkɔ ɔfɔfuĩa nɔ zã ɔnɔ mɛ.

¹⁹ Nɔɖɔ kaɖɔ kpɛ agɔlɔ ɔkɔ nɛ̀ ɛdzɛ zhazhã nɛ̀ ɔfɔfuĩa mɛ ɛdzɛ zhazhã. Nɔzhã ɛdzɛ odenɔ ɔnɔ etúɔ mɛ ɔkɔ Apaleteɛ,

²⁰ tɛ nɔozohu Owusoso Akaa gɛ enu Akaa ahɔɛ kibe nyia ibe ɔkɔ kɛka nyia ka, nɛ bɔlɔ Apalete Yesu Kristo inyeɛ mɛ.

²¹ nɔkpɛ kɛtakpu esi ɔkɔ agɔlɔ tɛ nɔlɔkɔ kpɛ bagɔlɔ same ɔkɔ Kristo.

Banyɛedzini Nɛ̀ Badzɛenyine

²² Banyɛ edzinì mɔ, nɔkpɛ kɛtakpu esi ɔkɔ wɔnɔ enyine alɛ asɛ gɛ nɔbhɛtɛ ɔkɔ Apaleteɛ ana.

²³ Ɔmɔsɛ adzɛ enyineɛ yɛenu kɛtakpu ɔkɔ yɛedzinì asɛ kana gɛ Kristo tsyɛ enu kɛtakpu akɔ ɔhaa ana, yɛishu dzyaa, gɛ bɔlɛishu yɛenu agɛ Yɛebu ɔlɔ.

²⁴ Nɛ kana gɛ ɔhaa akpɛ kɛtakpu esi akɔ Kristo soɔ, kana ɛbe kɛlɛ sɛ tɛ banyɛ edziniɛ tsyɛ akpɛ kɛtakpu esi akɔ balɛ enyine alɛ nɛ kɛka nyia ka mɛ.

²⁵ Badzɛ enyine, nɔ dɛmɛ nɔ nɛ̀ wɔnɔ edzinì alɛ, asɛ kana gɛ Kristoɔ tsyɛ adɛmɛ nɔ nɛ̀ ɔhaa pɛ alɔkɔ yɛishu akɔ nɛ ɔlɛ takpuɔ ana,

²⁶ sɛ tɛ abhɛtɛ tɛ ɔlɛ ishuɔ dalɛ nɛ tipuplu nɛ̀ ɔlɛ tiwuwulu nɔ nɛ̀ bulĩ ɔganà kibuiɛ mɛ,

²⁷ sɛ tɛ alɔkɔ ɔlɛ akɔ yɛishu asɛ ɔha gɛ lootséɛ, tɛ kibo, ishupi bɔbɔlɔ alo kihututũ nanà tɛzã ɔlɛ shu, pɔ tɛ lɔdalɛ tɛ batɛ mɔ bamɛ tsitsí nana nɛ ɔlɛ shu.

²⁸ Nɛ kidzo ɛlɛ abhaa, kɛlɛ sɛ tɛ̀ baadzɛ enyine tsyɛ adɛmɛ nɔ nɛ̀ balɛ edzini alɛ asɛ balɛ ahɔɛ ishupi ana. Anunɔ gɛ adɛmɛ nɔ nɛ̀ yɛedziniɛ, adɛmɛ nɔ nɛ̀ yɛishu.

²⁹ nɛ alɛ petee edeɛ, ananà aka nyanà yɛishupiɛ akpɛ ɛyamɛ eɖi, pɔ akɔ yɛishu bɔŋaŋã pɛ eɖi ɔlɛ abha, asɛ kana gɛ kristo tsyɛ abhɛtɛ ɔhaa,

³⁰ ɔmɔsɛ bunu yɛishudzya nɔ wɔpɛ̃.

³¹ “Nɛ kibui ɛlɛ shu so anyɛ aba shɛ nɛ yɛakaa nɛ̀ yɛelĩɛ ɔbha, pɛ aba dɛ bhɛtɛ tenikpo nɛ yɛedzinì, kɛlɛ balɛ taabha ebedzi ishudzya tunikpo.”

³² Kibui gikpũ pɛ kɛlɛ mɛ dzú nɛ ɛlɛ, pɔ ɛɖɔ kaɖɔ nɛ Kristo nɛ̀ ɔhaa shu.

³³ Pɔ, kɛlɛ sɛ tɛ wɔnɔ mɛ aka nyia aka tsyɛ adɛmɛ nɛ̀ yɛedzinì asɛ gɛ adɛmɛ nɔ nɛ yɛishu ana, kɛlɛ sɛ tɛ anyɛ edziniɛ akpɛ kɛtakpu esi akɔ yɛinyineɛ.