Efesoanɛ 4 - Nyangbo New Testament

Tenikpo Bhɛbhɛtɛ Nɛ Kristo Yɛishudzyaa Mɛ

¹ Asɛ ɔɖavũ mɛ azazã ɔkɔ Apaleteɛ anaa, ɛkpalà ɔnɔ sɛ tɛ nɔzã nɛ ɛkpã nɔnɔ gɛ shɔnɔ tikukuluɔ gɛ nɔyɛkɛ nulũ.

² Nɔ ozhinì ishu esi tɛ nɔ nyanà ishu ovunɔ piapii, nɔdɔ fɔ̃ɔ, tɛ nɔmɔ̃ ɔtɔ mɛ kɔ agɔlɔ nɛ tɛdɛdɛmɛ nɔ mɛ.

³ Nɔgã kidzo ka nyia ka abha tɛ nɔzã tenikpo nɛ Ɔfɔfuĩa nɔ mɛ ɔgana ishu yɔyɔ gɛ nyanà ɔnɔ ovunɔɔ mɛ.

⁴ Ishudzya tinikpo nɛ̀ Ɔfɔfuĩa tonikpo ɔlɔ lɛ, asɛ kana gɛ bekulu ɔnɔ akɔ kidzo mɛ ɖiɖi tinikpo nɛ kibeɛ gɛ bekulu ɔnɔ.

⁵ Apalete tenikpo, tɛyɛyɛkɛŋã tinikpo, bulĩkpɛkpɛ tunikpo,

⁶ Owusoso Akaa tenikpo gɛenu Akaa ɔkɔ aka nyia aka, anɔ gɛ adɛ alɛ petee, pɛ awɔa axɔ̃ɛ ɔgana alɛ petee mɛ, kɛlɛ kpasɛ yɛanɔ nɔ̀ petee mɛ.

⁷ Pɔ bɔlɔ mɛ anɔ ka nyia ka, akɔ yɛ tibhui bhuibu asɛ kana gɛ Kristo ayá ɛlɛ akɔ.

⁸ Kɛlɛ so pɛ kibuiɛ ɖɔ ɔsɛ, “Kibeɛ gɛ ewu avɛ kititíɛ faa nɔ, agbana bagɛ awɔ keyuɔ aplɛnɔ yɛishu kɛlɛ akɔ banɔ ɔdɔ̃

⁹ (Gɛ “ewu avɛ” kɛlɛ esi enu ɔsɛ ezhi aba kesiɛ gɛenu kesiakpa nabha tsyɛ dza?

¹⁰ Anunɔ gɛ yɛezhi abaa esiɛ, yɛenu agɛ yɛewu avɛ faã ɔdɛ kitití ɛzãkɔ petee sɛ tɛ eyuku kanɔ nɔ̀ mɛ ɔkɔ nyia ɔkɔ.)

¹¹ Yɛenu anɔ gɛ akɔ asɛ beteli edzi banɔkpɛkpɛ, tɛ beteli edzi ebuiɖɔluanɔ, beteli tɛ baɖɔ yɛebuiɛ akanà, kɛlɛ beteli tsyɛ tɛ bedzi kibuiɛ aɖɔɖɔ elete nɛ̀ kɛlɛ adɔ̃kasɛ,

¹² sɛ tɛ babalɛ̀ Owusoso Akaa anunɔ akɔ axɔ̃ɛ wɔawɔa nɛ̀ axɔ̃ɛ dɛdɛ, sɛ tɛ babhɔ Kristo yɛishudzyaa ewunɔ kabha

¹³ odiyinɔ ɔsɛ bɔlɔ petee tɔnɔ tenikpo bhɛbhɛtɛ nɛ tɛyɛyɛkɛŋã mɛ, nɛ̀ Owusoso Akaa Yɛeyiɛ kibuititiɛ mɛ pɛ bushè, pɛ bɔlɔ tɛzazã petee tsyinà gɛ ná nɛ Kristo mɛ.

¹⁴ Kɛlɛ bɔza kazã asɛ bunuvɔɛ ana, pɛ kɛlɛ́ɛ mɛɔdɔ̃ kakasɛ ka nyia ka ɛdi bazi fù ɔlɔ falanɔ ɔvɛnɔ ɛkɛlɛ ɔmana ɛkɛlɛ̀ nɛ̀ banɔdzyrame bɔshɛ nɛ̀ banɔ wɔɛwɔɛ edzoɔ gɛ batɔɖɔ eluɔ shu.

¹⁵ Pɔ bɔɖɔ kibui gbã nɛ tɛdɛdɛmɛ nɔ mɛ, bɔbà shè nɛ ebuiɛ petee mɛ nɛ Kristo anɔ gɛinu ɔlɔ ɛtakpuɔ mɛ.

¹⁶ Odenɔ yɛ mɛɛ, ishudzya petee, tsà pɛ bazɛɛ anyanã ɛlɛ ovunɔ, pɛ bushè pɛ lɛbhɔ ishu utɔɖɔ nɛ tɛdɛdɛmɛ nɔ mɛ, asɛ kɛwɔa gɛ kawɔ̃pɛ ka nyia ka awɔa kɛlɛ axɔ̃ɛ ana.

Anɔ Ɛkpã Zazãna Nɛ Kanɔ Dadalɛ Mɛ

¹⁷ Kliso itseɖe ɔnɔ ibui ɛlɛ, pɛ ɛɛtɔɖɔ̀ ɛklagbu nɛ ɛlɛ abha nɛ Apaleteɛ mɛ ɔsɛ, nɔtɛɔkɔ zã nɛkpã asɛ bagɛ etinu Yudanɛ, nɛ balɛ ekpeɖekpeɖeɛ gɛ ama kɛnanà mɛ.

¹⁸ Balɛ ebui esi lulũɔ mɛ eku otumũ, kɛlɛ bebu ishu ɔtɔ nɛ Owusoso Akaa ɛkpã shu, nɛ kibui matì matiɛ gɛ kpasɛ alɛ mɛ, nɛ gɛ bagagalĩ balɛ etúɔ mɛ so.

¹⁹ Gɛ bagɛ lɔkɔ kɛnanà nɛ ɛlɛ mɛ soɔ, balɔkɔ balɛishu akɔ kanɔ mɛ ɔdzyɛ, sɛ tɛ babhɛtɛ atsɔ̃bui ka nyia ka idi, pɛ betsiɖi ɛlɛ abha abhɛtɛ aplɛnɔ.

²⁰ Pɔ wɔnɔ xɔnɔ gɛ ba sɛ tɛ nɔotì Kristo nɛ kidzo ɛlɛ abha.

²¹ Kɛlɛ ɛlɛ mɛ sɛ nɔolũ yɛɔdɔ̃, kɛlɛ bakasɛ ɔnɔ ɔdɔ̃ nɛ yɛ mɛ, nɛ kibui gɛlɛ ɛlɛ ɔzãkɔ nɛ Yesu mɛ.

²² Bakasɛ ɔnɔ ɔdɔ̃, nɛ ɛkpã gɛ nɔtɛ zã ɔbɔ falanɔ shu, sɛ tɛ nɔ shɛnɛ ahɔɛ nɛ edzo kukuɔ shu, edzoɔ gɛedzì ebui zizĩ ɔganà alɛ anɔ wɔɛwɔɛ gɛ badɛmɛ nabha,

²³ sɛ tɛ babhɛtɛ edzo alɛ avɔvɔ nɛ ebui gɛ alɛ ɔnɔ ekpeɖekpeɖeɛ mɛ,

²⁴ sɛ tɛ nɔodzinì ishu ɔbhɔ avɔvɔ, gɛ babhɛtɛ ɔnɔ sɛ nɔzã asɛ Owusoso Akaa ana nɛ kibui gbangbã bhɛbhɛtɛ nɛ̀ tɛdadalɛ mɛ.

²⁵ Klisoɔ wɔnɔ mɛ aka nyia aka ashɛnɛ ahɔɛ nɛ asɛnɛ sɛsɛ shu, tɛ aɖɔ kibuiɛ gɛlɛ ɛlɛ ɔzãkɔ otseɖe yɛɔhagbo, ɔmɔsɛ bɔlɔ petee kpasɛ ishudzya tunikpo mɛ.

²⁶ “Tɛbhɛtɛ kibui kpa nɛ wɔ ɔmɔpɔɛ kpɛkpɛ mɛ”. Tɛkɔ kiwui dɔ nɛ wɔ ɔmɔpɔɛ kpɛkpɛ mɛ,

²⁷ kɛlɛ tɛkɔ abosam ɔtsɛɖɛ odzukɔ nanà.

²⁸ Agɛ yɛezuruɔ, ayɔlɔ yɛuzĩɛ gɛ ezuruɔ, pɔ awɔa axɔ̃ɛ, tɛ alɔkɔ yɛahɔɛ aza bhɛtɛ kibui tili gɛbà plɛnɔ, sɛ tɛ amɔ kɛdɔ̃ tili akɔ bagɛ apɛ ɛdɔ̃.

²⁹ Nɔtɛ kɔ kibui kpa nanà de koeyi nɛ ɔnɔ olugbũɔ mɛ oɖi, pɔ kɛgɛ ba plɛnɔ pɛ nɔ bɔbhɔ babhlatɔ ɔtɔɖɔ nɛ kɛpɛɛ gɛ bapɛ ulũ, tɛ kɛkɔ sɛ bagɛ elũ kibuiɛ amɔ kibui tili edenɔ ɛlɛ mɛ.

³⁰ Kɛlɛ nɔtɛ kɔ Owusoso Akaa Ɔfɔfuĩa Gbangbã ɔmɔ̃ ɔwɔ̃nyɔnɔ, gɛ ɔlɛ balɔkɔ adã ɔnɔ ɔdɔ̃ elu nɔ, odiyinɔ kiwuiɛ gɛ bebè bu ɔnɔ.

³¹ Nɔobu ishu mɛ pɔpɔɛ, ɔmɔpɔɛ zizĩ nɛ̀ ɔmɔpɔɛ, banɔ kwɔakwɔala nɛ̀ olugbũ edzi gagã, banɔ shu zizĩ ka nyia ka ɛdi nɛ wɔnɔ ɛshi.

³² Nɔbhɛtɛ ɛyamɛ gbangbã tɛ nɔdɛmɛ nɔ nɛ̀ bagɔlɔ, nɔlɔkɔ kibui otsye agɔlɔ, asɛ kana gɛ ɔgana Kristo mɛɛ, Owusoso Akaa alɔkɔ etsye ɔnɔ.