Efesoanɛ 3 - Nyangbo New Testament

Paulo Yɛebui Ɖɔɖɔ Ɔkɔ Bagɛ Etinu Yudanɛ

¹ Nɛ kibui ɛlɛ shu soɔ, mɛ Paulo, gɛinu buvũazazã ɔkɔ Kristo Yesu nɛ wɔnɔ bagɛ nɔotinu Yudanɛ ɛtakpu-.

² Kɛlɛ ɛlɛ mɛ ɔsɛ nɔolũ Owusoso Akaa yɛ tibhui bhuibu ɛxɔ̃ɛ gɛ akɔ mɛ akɔ ɔnɔ,

³ gɛ kɛlɛinu, kibui kpukpũɔ gɛ bebu akasɛ mɛ, asɛ gɛ ɛtɛ fɔnɔ lu gulũi nɔ.

⁴ Denɔ kibui ɛlɛ tɛkaklà mɛ, nɔobolũ mɛibui ɛlɛ mɛ piapi nɛ Kristo yɛebui kpukpũɔ shu,

⁵ kibui gɛ begi bu akasɛ banɔ nɛ kibeɛ gɛtɛ bafala mɛ, asɛ gɛ Ɔfɔfuĩa nɔ obu ɛlɛ ɔkasɛ Owusoso Akaa anɔkpɛkpɛ dadalɛ nɛ̀ ebuiɖɔluanɔ.

⁶ Kibui kpukpũ ɛlɛ kɛlɛinu ɔsɛ ɔgana kibui gbangbã nabha, bagɛ etinu Yudanɛ tsyɛ abamɔ̃ kaŋãsiɛ ɔplɛnɔ Israel, gɛ bebedzi banɔ tenikpo gɛede ishudzya tinikpo mɛ, nɛ̀ banɔ gɛ aba yɛkɛ ɔdɔ̃ itsù nɛ tɛtɔtɔɖɔ lu nulũ nɛ Kristo Yesu mɛ.

⁷ Ɛbadzì axɔ̃ɛdɛ ɔkɔ kibui gbangbã ɛlɛ nɛ Owusoso Akaa kɛdɔ̃ kɔkɔ nɛ̀ tibhui bhuibuɔ gɛ akɔ mɛ ɔganà yɛohumi nɔ axɔ̃ɛ wɔawɔa mɛ.

⁸ Gɛ mɛinu anɔ bhlui ɔdɛ nɛ bagɛ edzì bhlui nɛ Owusoso Akaa yɛanɔ petee ishi tsyɛ elo, mɛ ɛyɛkɛ tibhui bhui ebu ɛlɛ, sɛ tɛ mɛɖɔ Kristo ehoeyi ɔdɔ̃ gɛ ɔtɛ bɔmɔ nɛ ɔkɔ nanà ibui otseɖe bagɛ etinu Yudanɛ,

⁹ nɛ̀ tɛ mɛ dalɛ ɛlɛ mɛ ɔkɔ aka nyia aka nɛ kɛxɔ̃ɛ kpukpũ ɛlɛ gɛ asɛ agɔ kpekpè nɛ alɛ bekpũ ɛlɛ nɛ Owusoso Akaa mɛ, anɔ gɛ yɛabhɛtɛ kɛka nyia ka.

¹⁰ Yɛ tɛtɔtɔɖɔ kɛlɛ idzì ɔsɛ otsiɛ nɔ, ɔgana ɔha nabhaa, kɛlɛ sɛ bebu Owusoso Akaa bubutiɛ gɛ bukpè tɔɖɔɔ ɔkasɛ bekusiɛ nɛ̀ ihumi eleteɛ nɛ kititì ɔdɔ̃ mɛ,

¹¹ nɛ kɛgɛ atɔɖɔ ɔkɔ ɛkpã tihɔɔ nɔ, gɛ abhɛtɛ ɛlɛ ebeke ɔgana Kristo Yesu bɔlɔ Apaleteɛ mɛ.

¹² Nɛ yɛ mɛ̀, nɛ̀ ɔgana tɛyɛyɛkɛŋã nɛ yɛabha, bɔba là tso plɛnɔ Owusoso Akaa nɛ̀ ishu ahɔɛmɛ zazã nɛ̀ awɔ̃ lulu mɛ.

¹³ Ibisi denɔ wɔnɔ ahɔɛ mɛ sɛ, nɔotì yi idè nɛ mɛ bɔtɔ gɛ ɛtɔ nɛ ɔnɔ shuɔ, gɛ bɔlɛinu wɔnɔ ishu dadalɛ.

Owusoso Akaa Tikukulu Ɔkɔ Efesoanɛ

¹⁴ Nɛ kibui ɛlɛ shu so pɛ idzu ekluisi esi nɛ Akaa namɛ,

¹⁵ ganà anɔ nɔ̀ gɛ yɛabha yɛeshopo alɛ petee, nɛititíɛ nɛ̀ kesiakpa ayɛkɛ balɛ inyeɛ.

¹⁶ Ikulu Owusoso Akaa asɛ odenɔ yɛ ehoeyi ɔdɔ̃ dadalɛ mɛɛ, tɛ akɔ nɔ gagalĩ nɛ̀ yɛohumi nɔ ɔgana yɛ Ɔfɔfuĩa nɔ gɛ ɔlɛ ɔnɔ mɛ,

¹⁷ sɛ tɛ Kristo azã wɔnɔ etúɔ mɛ ɔgana tɛyɛyɛkɛŋã mɛ. Kɛlɛ ikulu Owusoso Akaa sɛ tɛ nɔkpɛ igu tɛ wɔnɔ tɛdɛdɛmɛ nɔ gagalĩ,

¹⁸ tɛ ohumi ɔzã wɔnɔ ahɔɛ, ɔplɛnɔ bagɛ ayɛkɛ aŋã petee, tɛ nɔ nyana kana gɛ Yesu tɛdɛdɛmɛ nɔ nɛ anɔ dzeɛ pɛ kɛɖama pɛ kidzuɔ gɛinu Kristoɔ tɛdɛdɛmɛ nɔ ovunɔ,

¹⁹ sɛ tɛ nɔoti tɛdɛdɛmɛ nɔ ɛlɛ gɛ dɛ kibui titì-ɔsɛ tɛ Owusoso Akaa oyuku wɔnɔ mɛ piapii nɛ yɛ kɛlɛɛ gɛ alɛɛ nulũ.

²⁰ Otsi nɔ agɛ yɛabhɛtɛ ebuiɛ gɛ batɛ là alɔkɔ shɔnɔ ebui nanà, ɔdɛ agɛ bubisiɛ petee alo pɛ bɔbhɛtɛ ekpeɖekpeɖe mɛ nɛ alɛ shuɔ, nɛ yɛohumi nɔ gɛ lɔwɔa axɔ̃ɛ nɛ ɔlɔ mɛ nulũ,

²¹ ishu dadalɛ ɔkɔyɛ nɛ ɔhaa mɛ, nɛ̀ Kristo Yesu mɛ ɔgana kibeɛ petee gɛ babaa mɛ, odenɔ tihɔɔ ɔvɛnɔ tihɔɔ! Amen.