Efesoanɛ 2 - Nyangbo New Testament

Bakɔ Wɔ Ɛkpã Nɛ Kristo Mɛ

¹ Wɔnɔ xɔnɔɔ, notitsí ɔbɔ fala nɛ wɔnɔ kesi tata nɛ̀ ebui kpa bhɛbhɛtɛ mɛ,

² gɛ alɛ mɛ nɔtɛ zã oɖi nɛ kibeɛ gɛ nɔkpà tɔnɔ kanɔ nɔ̀ mɛ edzoɔ nɛ̀ agɛ yɛaŋã bukusi nɛ bukusi ɔpã gɛ kpasɛ kɛlɛ́ɛ nɔ mɛ, ɔfɔfuĩa nɔ gɛ lɔɔwɔa axɔ̃ɛ otsiɛ nɛ batɔ̃ gagalĩ eleteɛ mɛ.

³ Bɔlɔ petee tsyɛ tɛzã balɛishi ɖi nɛ kibè tili gɛ bafala, pɛ bɔzɛ kpɛ samè nɛ bɔlɔ ebui kpa bhɛbhɛtɛ shu, kɛlɛ bɔzɛ pɛedzo alɛ pɛ bɔɔ bhɛtɛ ekpeɖekpeɖe mɛ nɛ alɛishu. Asɛ gɛ banɔ gɔgɔ̃ɔ aza bhɛtɛɛ, budzi banɔ gɛ ɔmɔpɔɛ kpa ɔzã bɔlɔ mɛ.

⁴ Pɔ, nɛ yɛ tɛdɛdɛmɛ nɔ gi gbogblo ɔkɔ ɔlɔ soɔ, Owusoso Akaa gɛ yɛashagabuiɛ ayɛkɛ kedziɛ,

⁵ akɔ bɔmɔ ɛkpã ɔplɛnɔ Kristo nɛ kibeɛ gɛ butsí nɛ bɔlɔ esi tata mɛ, ashagabui ɖiɖi so pɛ bebu ɔlɔ.

⁶ Kɛlɛ Owusoso Akaa efeke ɔlɔ aplɛnɔ Kristo kɛlɛ alɔkɔ ɔlɔ adɛzã esi ɔplɛnɔ yɛishu nɛ kititì bukusi ɔŋãkɔ nɛ Kristo Yesu mɛ,

⁷ sɛ tɛ nɛ agɔɔ gɛ lababaa mɛɛ, aba kasɛ yɛ ehoeyi ɔdɔ̃ gɛ batɛ balà alɔkɔ shɔnɔ bɔnanà ɔgana tibhui bhuibu mɛ, gɛ akasɛ nɛ yɛ ɛyamɛ gbangbã bhɛbhɛtɛ ɔkɔ ɔlɔ nɛ Kristo Yesu mɛ.

⁸ Ɔmɔsɛ tibhui bhuibu shu so pɛ bebu ɔlɔ ɔgana tɛyɛyɛkɛŋã mɛ, kɛlɛ kɛgi de wɔnɔ ɔkɔ, pɔ Owusoso Akaa yɛdɔ kɔkɔ kinu,

⁹ gɛnɛ wɔnɔ axɔ̃ɛ wɔawɔa mɛ, sɛ tɛ ananà atɛ befeke yɛishu.

¹⁰ Owusoso Akaa ahɔɛ ɛdɔ̃ bhɛbhɛtɛ bunu, gɛ babhɛtɛ nɛ Kristo Yesu mɛ sɛ tɛ bɔwɔa axɔ̃ɛ gbangbã, gɛ Owusoso Akaa eputɔ abalɛ elu akɔ ɔlɔ sɛ bɔbhɛtɛ.

Budzì Tenikpo Nɛ Kristo Mɛ

¹¹ Klisoɔ, nɔ bakà ɔsɛ kuku ibeɛ wɔnɔ bagɛ bamɔ́ ɔnɔ pɛ nɔotinu Yudanɛ pɛ beze kulu ɔnɔ asɛ “bagɛ begi bhui kɛhɔ̃a akɔ” banɔ alɛ gɛ ezekulu ishu asɛ “kɛhɔ̃a bhui bhui” (gɛ bebhui nɛ ishudzyaa mɛ nɛ̀ banɔdzyrame ahɔɛ)

¹² nɔ bakà ɔsɛ nɛ kibe ɛlɛ, bebu ɔnɔ ɔtɔ nɛ Kristo shu, kɛlɛ bebu ɔnɔ ɔtɔ sɛ nɔma Israelanɛ nɛ̀ befuɔ balɛ olugbũnyanyã gɛ batɔɖɔ eluɔ mɛ, gɛ otugbà mɛ ɖiɖi nɛ̀ Owusoso Akaa agɛzã bɔlɔ ahɔɛ nɛ kanɔ nɔ̀ mɛ.

¹³ Pɔ otsi alɛ xɔnɔ nɛ Kristo Yesu mɛɛ, wɔnɔ bagɛ nɔtɛ zã kitsí oɖiɛɛ, bagbana ɔnɔ ɔplɛnɔ ɔgana Kristo yɛ dzyosu nɔ mɛ.

¹⁴ Ɔmɔsɛ yɛenu ɔlɔ ishu yɔyɔɔ, gɛ abhɛtɛ ɔlɔ ediɛ taabha budzi tenikpo kɛlɛ ezĩ kɛgi bhui bɔlɔ ishiɛɛ, gɛinu kigiliɛ gɛ mana kishi zizĩɛ,

¹⁵ nɛ kibeɛ gɛ ebu ɔsha gɛ ɔlɛ mɛ yɛazã nɛ ishudzyaa mɛ nɛ̀ ɔlɛ ɛkɔɔ eyinɔ. Yɛ tɛtɔtɔɖɔ kɛlɛinu sɛ tɛ abhɛtɛ akɔ yɛishu anɔ vɔvɔ tenikpo odenɔ banɔ taabha mɛ, sɛ tɛ amana ishu yɔyɔ,

¹⁶ nɛ ishudzya ɛlɛ bedzì tinikpo mɛ, sɛ tɛ abhɛtɛ alɛ taabha tenikpo ɔkɔ Owusoso Akaa ɔgana butsi osi nabha, gɛ ɔlɛ abha yɛetsí pɛ ebu kishi zizĩɛ.

¹⁷ Aba ɖɔ̀ ishu yɔyɔ ebui etseɖe wɔnɔ bagɛ nɔzã odzlolo ɔkɔ, pɛ aɖɔ ishu yɛyɔyɔ ebui etseɖe bagɛ etso aplɛnɔ yɛ tsyɛ.

¹⁸ Ɔmɔsɛ ɔgana yɛabha bɔlɔ ediɛ taabha mɔ kidzo ɔvɛ Akaa ɔkɔ ɔganà ɔfɔfuĩa tonikpo mɛ.

¹⁹ Nɛ kibui ɛlɛ shu soɔ, nɔ otikonu bededeba alo beefù, pɔ nɔonu Owusoso Akaa yɛanɔ nɛ̀ Owusoso Akaa yɛɔpãmɛ ayɛ,

²⁰ gɛ bedzu atɔɖɔ banɔkpɛkpɛ nɛ̀ ebuiɖɔluanɔ balɛ ebui nabha, ɔplɛnɔ Kristo Yesuɔ gɛ yɛenu odekrekpu ɛklagbu hohoeɛ.

²¹ Yɛabha babhɔ buvũɔ atɔ̃ atsà, pɛ buwu kabha pɛ bɔba dzì Akaavũɔ gɛ bɔlɛ shu dalɛ nɛ Apaleteɛ mɛ.

²² Kɛlɛ yɛmɛ babhɔ ɔnɔ tsyɛ akpɛ itsù sɛ tɛ nɔodzì ɔzãkɔ gɛ Owusoso Akaa abazã nɛ̀ yɛ ɔfɔfuĩa nɔ.