Efesoanɛ 1 - Nyangbo New Testament

¹ Mɛ Paulo gɛedzi anɔkpɛkpɛ ɔkɔ Kristo Yesuɔ nɛ Owusoso Akaa tɛtɔtɔɖɔ ulũ, Mɛ sɛsɛ̀ bagɛ ayɛkɛ aŋã nɛ Efeso pɛ bakpasɛ Kristo Yesu mɛ keplukpa alɛ,

² Tibhui bhuibu nɛ̀ ishu yɔyɔ odenɔ Owusoso Akaa nɛ̀ bɔlɔ Apalete Yesu Kristo ɔkɔ.

Ɔfɔfuĩa Mɛ Tiyuyula Nɛ Kristo Mɛ

³ Nɔkɔ bɔkpɛ Owusoso Akaa gɛenu bɔlɔ Apalete Yesu Kristo Yɛakaa nɛinye nɛitití, anɔ gɛ alɔkɔ ɔfɔfuĩa mɛ tiyuyula ka nyia ɛdi gɛ kpasɛ Kristo mɛ eyula akɔ ɔlɔ odenɔ kititiɛ.

⁴ Ɔmɔsɛ yɛebu ɔlɔ sɛ bɔzã yɛ mɛ, flogo pɛ kanɔ nɔ̀ aba kpɛ esi, tɛ bɔlɔ shu dalɛ tɛ batɛ mɔ ibui zizĩ nanà nɛ ɔlɔ shu nɛ yɛamɛ. Nɛ̀ tɛdɛdɛmɛ nɔ mɛɛ,

⁵ atɛ tɔɖɔ ɛlɛ ɔsɛ ababhɛtɛ ɔlɔ akpɛ otugbà tɛ budzi asɛ yɛeyi alɛ ana ɔgana Yesu Kristo abha, nɛ yɛ tɛpɛpɛ nɛ̀ tɛtɔtɔɖɔ ulũ,

⁶ ɔkɔ yɛinyeɛ tɛkpɛkpɛ nɛitití nɛ̀ tibhui bhuibu dadalɛ gɛ alɔkɔ akɔ ɔlɔ kɛbhɛ mabuia mabuia ɔgana agɛ yɛadɛmɛ nɔ nabha.

⁷ Nɛ yɛ mɛɛ, bebu ɔlɔ ɔgana yɛ dzyosu nɔ mɛ, ebui kpa tɛlɔlɔkɔ tsye, nɛ Owusoso Akaa ehoeyi udɔ̃ gɛ alɔkɔ ebhui ɔlɔ ebuɔ mɛ

⁸ gɛ alɔkɔ akɔ nɛ tikpekpè nɛ bubuti nɛ̀ ebui esi lulũ petee mɛ.

⁹ Kɛlɛ akɔ butì ebui kpukpũɔ gɛ akpasɛ yɛ kibui gɛ apɛ, pɛ atɔɖɔ ɔganà Kristo abha,

¹⁰ sɛ tɛ balɔkɔ ɛlɛ akpɛ axɔ̃ɛ wɔawɔa mɛ gɛ onupɛ kibeɛ bana sɛ tɛ laba alɛ mɛɛ, tɛ balɔkɔ ebuiɛ petee nɛititíɛ nɛ̀ kesiakpa nabha akpɛ itsu tɛ lazã anɔ tenikpo esi, anɔ gɛenu Kristoɔ.

¹¹ Yɛ mɛ bebu ɔlɔ tsyɛ, gɛ atɔɖɔ ɛlɛ asɛ ababhɛtɛ ɔlɔ akpɛ otugbà nɛ yɛ tɛtɔtɔɖɔ ulũ, anɔ gɛ yɛawɔa axɔ̃ɛ sɛ labhɛtɛ tenikpo nɛ kɛgɛ yɛatɔɖɔ nɛ̀ kɛgɛ yɛapɛ ulũ,

¹² sɛ tɛ ɔlɔ bagɛ idzì banɔ gɛeputɔ gɛ buɖì idzo mɛ ɔkɔ Kristoɔ, tɛ bɔzã ɔkɔ yɛishu dadalɛ tɛkpɛkpɛ nɛitití.

¹³ Kɛlɛ wɔnɔ tsyɛ ɔkpasɛ Kristoɔ nɛ kibeɛ gɛ nolũ kibuiɛ gɛinu kibui gbãa, kibui gbangbã gɛ yɛkɛ ɔnɔ lu nɛkpã. Gɛ nɔyɛkɛ ɔŋã soɔ, atsà kɛna ɔkɔ ɔnɔ elu pɛ balɔkɔ adadã edere ɔnɔ ulũ, nɛ̀ Ɔfɔfuĩa Gbangbã gɛ atɔɖɔ eluɔ akɔ ɔnɔ,

¹⁴ gɛenu kɛdɔ̃ gɛ alɔkɔ akpɛ ide ɔkɔ ɔlɔ kaŋãsiɛ odiyinɔ kibeɛ gɛ bebu bagɛ enu Owusoso Akaa yɛanunɔ ɔkɔ yɛ tɛdadalɛ kpɛkpɛ nɛitití.

Ahɔɛhuhu Nɛ̀ Owusoso Akaa Tikukulu

¹⁵ Nɛ kibui ɛlɛ shu soɔ, odenɔ kibeɛ gɛ ilũ wɔnɔ tɛyɛyɛkɛŋã nɛ Apaleteɛ Yesu abha nɛ̀ wɔnɔ tɛdɛdɛmɛ nɔ ɔkɔ banɔ dadalɛ petee nɔ,

¹⁶ ɛka yɔlɔ ahɔɛhuhu nɛ ɔnɔ ɛtakpu ɖi, nɛ̀ ɔnɔ tɛbabakà nɛ Owusoso Akaa tikukulu mɛ.

¹⁷ Itsiɖi ɛlɛ abha bisi sɛ tɛ bɔlɔ Apalete Yesu Kristoɔ, Akaa gɛ yɛishu dalɛ, sɛ akɔ ɔnɔ Ɔfɔfuĩa mɛ bubutiɛ nɛ̀ kibui bubu kasɛ, sɛ tɛ nɔoti yɛ piapii ɔdɛ.

¹⁸ Ikulu Owusoso Akaa tsyɛ ɔsɛ tɛ ebui mɛ adalɛ akɔ ɔnɔ etú mɛ awuhũɔ sɛ tɛ nɔotì tɛtɔtɔɖɔ nɔnɔ ɛtakpu so pɛ ekulu ɔnɔ, ehoeyi ɔdɔ̃ gɛ lɛ ɔkɔ kaŋãsi dadalɛ gɛakpɛ banɔ dadalɛ mɛ,

¹⁹ nɛ̀ yɛ ohumi hohoe nɔ gɛ batɛ balà lɔkɔ ashɔnɔ ɔnanà, ɔkɔ bɔlɔ bagɛ yɛkɛ aŋãa. Ohumi ɔlɛ odzi asɛ yɛ ohumi gbagbla nɔ gɛ alɔkɔ awɔa axɔ̃ɛ nɔ,

²⁰ gɛ alɔkɔ akpɛ Kristoɔ mɛ nɛ kibeɛ gɛ efeke yɛ edenɔ bekpuɔ mɛ pɛ alɔkɔ yɛ edzu yɛ kɛŋã ahɔɛ mɛ nɛ kitití bukusi ɔŋãkɔ,

²¹ gɛ bɔɖama ɔdɛ bukusi ŋaŋã nɛ̀ ɔsha ka nyia ka ɛdi, ohumi nɛ̀ banɔ abha ŋaŋã, nɛ̀ ɔzãkɔ inye ka nyia ka gɛ babalà akɔ, gɛnɛ obo kanɔ alɛ mɛ ete, pɔ nɛ kanɔ nɔ̀ gɛ kababáa mɛ tsyɛ.

²² Kɛlɛ Owusoso Akaa alɔkɔ kɛka nyia ka akpɛ yɛtsɛɖɛ esi, kɛlɛ ebú yɛ sɛ tɛ edzi kɛtakpu akɔ ɔhaa, ɔlɛ kɛka nyia ka

²³ gɛinu yɛishu dzyaa, nɛ̀ yɛishuɔ petee gɛ alɔkɔ eyuku kɛka nyia ka mɛ nɛ kidzo ka nyia ka abha.