Banɔkpɛkpɛ Axɔ̃ɛ 6 - Nyangbo New Testament

Bebú Banɔ Tegegene Tɛ Beɖi Bɔdɔ̃ Abha

¹ Nɛ ewui alɛ mɛ, gɛ badɔkpasɛanɛ tɛkaklà mɛ zikpè tɔɖɔɔ, Helanɛ gɛenu Yudanɛ gɛazã balɛishiɛ bazakpamɛ ishu nɛ Hebrianɛ gɛenu Yudanɛ shu, ɔmɔsɛ beebhui Helanɛ bavɛvɛ edzyini alɛ bho kibe nyia be nɛ bɔŋaŋã tibubú ɔkɔ alɛ mɛ.

² Kliso banɔkpɛkpɛ lɔfɔ nɛ̀ taabha ekulu badɔkpasɛanɛ petee eshogò pɛ betseɖe alɛ asɛ, “Kɛma ɛlɛ ɔzãkɔ ɔsɛ bɔshɛnɛ ahɔɛ nɛ Owusoso Akaa ebuiɛ tɛɖɔɖɔ shu, tɛ̀ buziɖi bɔŋaŋã tɛkɔkɔ anɔ ebui shu.

³ Kliso, mɛadzya alɛ mɔ, nobu banyɛ tegegene nɛ wɔnɔɛshi gɛ nonyi ɔsɛ, Ɔfɔfuĩa Gbangbã nɛ̀ bubutì kpasɛ alɛ mɛ, bɔbà lɔkɔ kɛxɔ̃ɛ ɛlɛ kpɛ ahɔɛ ɔkɔ alɛ

⁴ tɛ kɛkɔ bɔmɔ kibè ɔkɔ Owusoso Akaa tikukulu nɛ̀ yɛibuiɛ tɛɖɔɖɔ.”

⁵ Kɛzaa pete adɛmɛ atɔɖɔ kibui ɛlɛ gɛ bakpɛ amana nabha. Bebu Stefano, anɔ gɛ tɛyɛyɛkɛŋã nɛ̀ Ɔfɔfuĩa Gbangbã oyuku yɛ mɛ nɛ̀ Filipo, Prokoro, Nikanora, Timona, Parmena nɛ̀ Nikanao, anɔ gɛ akpɛ takpu esi akɔ ibudi pɛ ebetsyina edzi Yudaeyi gɛ ede Antioxia.

⁶ Bebu banɔ alɛ akasɛ banɔkpɛkpɛ, kɛlɛ bekulu Owusoso Akaa pɛ batɔɖɔ balɛ ahɔɛ nɛ balɛ abha.

⁷ Kidzo ɛlɛ nabha Owusoso Akaa ibuiɛ yɛɛvɛ, kɛlɛ badɔkpasɛanɛ nɛ Yerusalem bezekpè atɔɖɔ ziazia, kɛlɛ banɔlũazazã kpekpè teli ebelũ batɔ esi akɔ tɛyɛyɛkɛŋã.

Stefano Tivuvũ

⁸ Stefano anɔ gɛ Owusoso Akaa tibhui bhuibu nɛ̀ ohumi ɔzã yɛmɛ, abhɛtɛ atsyindzye ebui nɛ̀ ebui gɛ labhɛtɛ ibì nɛ banunɔ nɛishi bamɔ.

⁹ Pɔ kititì lɔlɔ babá, odenɔ ɔtsyɔakɔ banunɔ gɛ bamɔ ishuahɔɛmɛ zazãa, (asɛ gɛ beekulu alɛ ana) gɛenu Yudanɛ gɛede Kirene nɛ̀ Aleksandro, kɛlɛ beteli tsyɛ ede Kilikia nɛ̀ Asia bɔdɔ̃ mɛ. Banɔ alɛ akpà ebui wlɔakɛ nɛ̀ Stefano,

¹⁰ pɔ, bagɛ lazã yɛubutì nɛ̀ Ɔfɔfuĩa nɔ gɛ ɔlɛ yɛalɔkɔ azaɖɔaɖɔ nulũ.

¹¹ Kliso nɛ tikpukpũ mɛɛ, bawɔɛ banɔ teli ulũ asɛ baɖɔ asɛ, “Bulũ Stefano yɛaɖɔ ebuso ebui nɛ Mose nɛ̀ Owusoso Akaa shu.”

¹² Kliso baɖɔaɖɔ etsuifú akpɛ ɔma bɔnɔ besheshèɛ nɛ̀ ɔshadɔkasɛ mɛ. Bevũ Stefano kɛlɛ bagbana yɛamana Ɔhaesheshèɛ ɔkɔ.

¹³ Baɖɔ asɛnɛ ebui nɛishu asɛ, “Anyɛ alɛ atɛ ayɔlɔ̀ ebui kpa tɛɖɔɖɔ nɛ ɔzãkɔ dadalɛ ɔlɛ nɛ̀ ɔshaa shu.

¹⁴ Ɔmɔsɛ bulũ yɛaɖɔ asɛ Yesu Nazareteyi alɛ abayɛ ɔzãkɔ ɔlɛ, kɛlɛ ebetsyina ɛkɔɔ gɛ Mose akpɛ eluɔ akɔ ɔlɔ.”

¹⁵ Ɔhamɛesheshèɛ gɛ bazã ɛkɛlɛ petee edzu awuhũ nɛ yɛabha, kɛlɛ bamɔ asɛ yamɛ edzì asɛ axɔ̃ɛdɛ ayɛ mɛ̀ ana.