Bìoball air-loidhne

Banɔkpɛkpɛ Axɔ̃ɛ 28 - Nyangbo New Testament

Paulo Ediku Malta Ogbogbòɔ

¹ Gɛ budiku ogbogbòɔ nɛ ishu yɔyɔ mɛ koɔ, bɔba mɔsɛ bekulu aƒumɛ ketukpɔ alɛ asɛ̀ Malta.

² Banunɔ gɛ alɛ aƒumɛ ketukpɔ alɛ nabha abhɛtɛ ɛyamɛ gbangbã akɔ ɔlɔ. Bakpɛ kifú kɛlɛ bekulu bɔlɔ ɔsɛ bɔbaŋãlɛ ɛlɛ ɔmɔsɛ subha adɔ kɛlɛ bɔbɔlɔ zã.

³ Paulo eshogò bɔdzrɔbiyì, kɛlɛ gɛ alɔkɔ bɔlɛ aakpɛ kifuɔ mɛ koɔ, eblidza gulũ teli gɛ kifúɔ hunu yɛ pɛ ekoeyì nɛ bɔdzyɛ nɔ mɛɛ, aba akpɛ akanà yɛahɔkpɔ.

⁴ Gɛ banunɔ gɛ betsiɖi aƒumɛ ketukpɔ nabha amɔ eblidza gɛ akpɛ asɔ̃ nɛ yɛahɔkpɔɔ, betseɖe bagɔlɔ asɛ, “Anyɛ alɛ ebedzì anɔ gɛ eyianɔ, ɔmɔsɛ gɛ ebu yɛkpã eyinɔ nɛ aƒuɔ mɛ ebeke tsyɛɛ, beke kulu kebhu nɛ yɛ asɛ tɛ̀ atɛzã nɛkpã.”

⁵ Pɔ, Paulo eshuku eblidza akpɛ kifúɔ mɛ kɛlɛ kɛnanà gɛ bhɛtɛ yɛ.

⁶ Banunɔ ezeɖi asɛ ebèyeke alo ebeglebe adɔ etsì odunu ɔlɛ, pɔ gɛ bazã epo kibè dzloloɔ pɛ bagɛ mɔ asɛ kibui nanà bhɛtɛ yɛɛ, betsyina balɛ ekpeɖekpeɖe mɛ pɛ baɖɔ asɛ obudì anɔ yɛenu.

⁷ Bevũ teli azã kibe ɛlɛ gɛenu Publio, anɔ gɛ yɛaŋã bukusi nɛ aƒumɛ kesiakpa nabha ayɛ. Ayɛkɛ bɔlɔ akpɛ yɛɔpã mɛ kɛlɛ nɛ ewui tata mɛɛ, akpɛ bɔlɔ samɛ kɛlɛ awɔa bufu akɔ ɔlɔ.

⁸ Yɛakaa adɔ bɔnyã eli bɔdɔ̃ abha, gɛ buwui vũi pɛ azadɛ dzyosu. Paulo etsoku edì ɖii, kɛlɛ gɛ ekulu Owusoso Akaa ebekeɛ, atɔɖɔ yɛahɔɛ nɛ yɛabha kɛlɛ yɛishumɛ gagalĩ.

⁹ Gɛ kibui ɛlɛ ba ɛlɛ mɛɛ, banyanyã gɔgɔɛ nɔ̀ nɛ aƒumɛ ketukpɔ alɛ nabha aba, kɛlɛ ebu banyã akɔ alɛ.

¹⁰ Badɛmɛ bɔlɔ ibui nɛ edzo gelee abha, kɛlɛ nɛ kibeɛ gɛ bɔbà tɔnɔ̀ kelĩabha kidzoɔ, bakɔ ɔlɔ bɔdɔ̃ gɛ bɔɔpɛ nɔ̀.

Roma Tikuku

¹¹ Nɛ bewoele tata edeɛ gɛ bɔzã ekukùɔ mɛ nɛ aƒumɛ ketukpɔ alɛ nabha, bɔzɛ tɔnɔ kelĩabha kidzo. Kelĩabhaohuɔ gɛ bukuɔ ɔlɛ onu Aleksandro ohu gɛ bekulù ɔlɛ sɛ taabha eyi obudì, Kasto nɛ̀ Pulox.

¹² Budizhi nɛ Sirakuse ogbogbòɔ, kɛlɛ bɔzã ɛkɛlɛ ewui tata.

¹³ Denɔ ɛkɛlɛ bɔzɛ tɔnɔ kelĩabha kidzoɔ kɛlɛ budiku Regio. Gɛ keliɛ azaa, kanɔ nɔ̀ bɔpialɛ ɔkɔ kɛlɛɛ nɔ zɛkpɛ tifufù esi, kɛlɛ gɛ keliɛ azazaa, budiyì nɛ Puteoli

¹⁴ Ɛkɛlɛ bɔdɛ tɔnɔ badzya teli gɛ bekulu ɔlɔ asɛ bɔzã balɛ ɔbha ɔgɔnɛ zɛzɛ. Ɛkɛlɛ bɔlɔde pɛ budiku Roma.

¹⁵ Badzya nɛ ɛkɛlɛ etilũ asɛ bɔɔbà, kliso baba tsyana ɔlɔ avɛnɔ ɔkɔ dzlolo gɛonu Apio kedziɛ mɛ nɛ̀ beefù ɔtsɛkɔ. Gɛ Paulo anyamɔ banyɛ alɛ koɔ kɛlɛ ehu Owusoso Akaa nɛahɔɛ pɛ kemikpɛkpɛ eku yɛ mɛ.

¹⁶ Gɛ budiku Roma nɔ̀, bashɛnɛ ahɔɛ nɛ Paulo shu asɛ tɛ̀ azã yɛishu ahɔɛ mɛ tɛ̀ keyuadɛdɛ tenikpo azãpoe.

Bezepo Paulo Pɛ Aɖɔ Kibuiɛ Nɛ Roma

¹⁷ Ewui tata edeɛ, Paulo ɛkulu Yudanɛ besheshèɛ eshogò. Gɛ beshogò ebekeɛ, etseɖe balɛ asɛ, “Mɛadzya alɛ Israelanɛ mɔ, ɛgɛ bhɛtɛ kibui kpa nanà nɛ̀ bɔlɔ banunɔ alo bɔlɔ ashuĩ alɛ ɛkɔɔ shu flogo, bevũ mɛ nɛ Yerusalem pɛ balɔkɔ mɛ akpɛ ahɔɛ akɔ Romanɛ.

¹⁸ Bapɔɛ ebui mɛ nimɛ kɛlɛ bapɛ asɛ tɛ̀ bashɛnɛ ahɔɛ nɛ mɛishu, ɔmɔsɛ ɛgɛ bhɛtɛ kibui kpa nanà gɛ bashɔnɔ ɔkɔ butsí.

¹⁹ Pɔ gɛ Yudanɛ agɛ dɛmɛ ana soɔ, bebètũilɛ akpɛ mɛulũ asɛ ɛvɛ Romanɛ Ekusi Gbagbla ɔkɔ, gɛnɛ gɛ kibui nanà gɛlɛ mahɔɛ gɛ ɛpɛ sɛ tɛ̀ ɛlɔkɔ nɛ mɛ banunɔ shu flogo.

²⁰ Nɛ kibui ɛlɛ shu soɔ, ɛpɛ sɛ tɛ ɛmɔ wɔ tɛ̀ bɔɖɔaɖɔ. Mɛ awɔ̃ lulu ɔkɔ Israelanɛ so pɛ banyã mɛ nɛ̀ ɛɖahui ɛlɛ.”

²¹ Bebuiliulũ asɛ, “Bɔkà yɛkɛ buplukpa nanà odenɔ Yudea nɛ wɔshu, kɛlɛ badzya ɔmayɛmɛ nanà gɛede ɛkɛlɛ aba, aka kɔ bɔlɔ tititì nanà alo pɛ abaɖɔ kibui kpa nanà nɛ wɔshu.

²² Pɔ bɔpɛ sɛ tɛ̀ bulũ kɛgɛ ɔmɔ nɛ kɛlɛ shuɔ, ɔmɔsɛ bunyi sɛ banunɔ nɛ ɔkɔ nyia ɔkɔ aɖɔaɖɔ nɛ ɔhakpa alɛ shu.”

²³ Batɔɖɔ kiwui asɛ tɛ babamɔ Paulo, kɛlɛ balɛ anɔ nɔ̀ gɛaba ebekpe atɔɖɔ nɛ ɛkɛlɛ gɛ Paulo azãa. Odenɔ kɛvɔlɔ vɛnɔ owlagoɔ, ezebu ebui mɛ pɛ adalɛ Owusoso Akaa bukusi ŋaŋã shu kɔ alɛ, kɛlɛ apɛ asɛ tɛ̀ etsyina balɛ ekpeɖekpeɖeɛ mɛ odenɔ Mose ɔshaa nɛ̀ ebuiɖɔluanɛ buplukpa mɛ avɛnɔ Yesu ɔkɔ.

²⁴ Beteli ekpeɖekpeɖe mɛ ebetsyina nɛ ebuiɛ gɛ azaɖɔ shu, pɔ bagɔgɔɛ nɔ xɔnɔ agɛ yɛkɛ aŋã.

²⁵ Bazawlɔãkɛ ebuiɛ nɛ bagɔlɔ mɛ kɛlɛ bakpa ashɛ kibeɛ gɛ Paulo aɖɔ kibui gɔgɔɛ ɛlɛ asɛ, “Ɔfɔfuĩa Gbangbã ɔɖɔ kibui gbã otseɖe wɔnɔ ashuĩ alɛ kibeɛ gɛ aɖɔ gana ebuiɖɔluanɔ Yesaya abha asɛ,

²⁶ “ ‘Vɛ banɔ alɛ ɔkɔ tɛ̀ oditseɖe alɛ ɔsɛ, “Nobozolũ ebuiɛ, pɔ noti bozolũ alɛ esi, Nɔbɔzɔmɔ bɔdɔ̃ pɔ noti bozolũ bɔlɛ esi.”

²⁷ Ɔmɔsɛ banɔ alɛ ekpeɖekpeɖeɛ mɛ etibu tɛtsɛɖɛ, agagalĩ flogo pɛ belũ kibui akpɛ batɔ̃ mɛ, kɛlɛ badã balɛ awuhũɔ. Tsyɛ alo balɛ awuhũɔ atamɔ bɔdɔ̃ flogo, kɛlɛ betelũ nɛ̀ balɛ atɔ̃ɔ, betelũ ebui esi nɛ̀ balɛ etúɔ kɛlɛ betetsyinà pɛ ɛtabu banyã ɔkɔ alɛ.’

²⁸ “Kliso ɛpɛ ɔsɛ tɛ̀ notì ɔsɛ basɛsɛ Owusoso Akaa yɛanɔ bubu lu ɔkɔ ɛkpã nɛ bagɛ betinu Yudanɛ ɔkɔ, kɛlɛ balɛ xɔnɔ abà taatɔ̃ nɛ̀ kibuiɛ!”

²⁹ Gɛ aɖɔ kibui ɛlɛ ebekeɛ, Yudanɛ ashɛ pɛ baza wlɔãkɛ kibui gagalĩ nɛ bagɔlɔ mɛ.

³⁰ Paulo azã ɛkɛlɛ agɔ taabha nɛ bɔpã tuli gɛ abuia kɛbhɛ asɛ tɛ̀ azã bɔlɛ mɛ, kɛlɛ ayɛkɛ banunɔ nyɔ̃ɔ gɛ bazaba yɛɔkɔ asɛ tɛ bamɔɛ nɔ̀.

³¹ Gɛ ananà egidzu ahɔɛ nɛ yɛabha soɔ, aɖɔ Owusoso Akaa bukusiŋaŋã kibuiɛ nɛ bupù mɛ, kɛlɛ akasɛ bɔdɔ̃ nɛ Apalete Yesu Kristo shu.

« Roimhe

Air adhart »

Lean sinn:

Ceanglaichean taic

Sanasan