Bìoball air-loidhne

Banɔkpɛkpɛ Axɔ̃ɛ 21 - Nyangbo New Testament

Paulo Kidzogagã Ɔvɛnɔ Yerusalem

¹ Kibèɛ gɛ bɔɖɔ ɔsɛ basɛnɛ alɛ o pɛ bɔshɛɛ, bɔdɛgã kelĩabha kidzoɔ pɛ bɔvɛ tĩi diyì nɛ Kos. Gɛ keliɛ azaa, bɔvɛ Rodo, kɛlɛ odenɔ ɛkɛlɛɛ bɔvɛ Patara.

² Bɔmɔ Kelĩabhaohu toli gɛ lɔtsakɛ ɔvɛ Foenisia, kɛlɛ budiku ɔlɛ pɛ bɔtɔnɔ kelĩabha kidzoɔ.

³ Kibeɛ gɛ bɔmɔ Kipro sɛsɛ, bɔgã fala nɛ bɔpialɛ ɔkɔ ebeɛ, pɛ budiyì nɛ Siria. Budiku Tiro, ɛkɛlɛ gɛ kɛlɛ ɔsɛ kelĩabhaohuɔ bu ɔlɛ etukuɔ.

⁴ Gɛ bɔmɔ badɔkpasɛanɛ teli nɛ ɛkɛlɛ soɔ, bɔzã balɛ ɔbha ewui tegegene. Gana Ɔfɔfuĩa nɔ mɛɛ, betseɖe Paulo asɛ atɛvɛ Yerusalemuɔ.

⁵ Pɔ gɛ bɔlɔ kibeɛ naa, bɔshɛ kɛlɛ bɔvɛ bɔlɔ kidzo gagã nabha. Badɔkpasɛanɛ petee, balɛ edzinì nɛ̀ balɛ̀ eyi alɛ nyɔ̃ɔ azã bɔlɔ kede pɛ bagbana ɔlɔ koeyinɔ nɛ ɔmamɛ, kɛlɛ budzu ekluisi esi nɛ aƒu nɔtɔ̃ pɛ bukulu Owusoso Akaa.

⁶ Gɛ bɔkasɛ bagɔlɔ ahɔɛ ebekeɛ, budi tsoku kelĩabhaohuɔ mɛ, kɛlɛ balɛ tsyɛ etsyina avɛ bɔpã mɛ.

⁷ Bɔzã bɔlɔ kelĩabha kidzogagã nabha odenɔ Tiro pɛ budiyì nɛ Ptolemai, nɛ ɛkɛlɛ bɔsɛnɔ badzyaa kɛlɛ bɔzã balɛ ɔbha kiwui tinikpo.

⁸ Gɛ bɔshɛ kelizaza, budiyì nɛ Kaesarea kɛlɛ bɔdɛzã Filipo gɛ aɖɔ kibuiɛ akana pɛ enu banɔ Tegegeneɛ gɛ bebu nɛ yerusalemuɔ ɔmaɛmɛ tenikpoɔ bɔpã mɛ.

⁹ Beyiadzɛ talɛ gɛ bakazana anyɛ azã yɛahɔɛ gɛ baɖɔ ebui elú.

¹⁰ Gɛ bɔzã ɛkɛlɛ ewui kɛbɔbhlui nɔ, ebuiɖɔluanɔ teli gɛ bekulu yɛasɛ Agabo ede Yudea aba.

¹¹ Gɛ aba bɔlɔ ɔbhaa, alɔkɔ Paulo yɛatsatsatɔɖɔ pɛ alɔkɔ yɛanyã yɛahɔɛ ɛtsɛɖɛ nɛ̀ ɛhɔɛ pɛ aɖɔ asɛ, “Ɔfɔfuĩa Gbangbã ɔɖɔ ɔsɛ, ‘Kidzo ɛlɛ nabha Yudanɛ abanyã atsatsatɔɖɔ alɛ eleteɛ pɛ babà lɔkɔ yɛakpɛ ahɔɛ akɔ bagɛ betinu Yudanɛ.’ ”

¹² Gɛ bulũ kibui ɛlɛ, bɔlɔ nɛ̀ banunɔ nɛ ɛkɛlɛ kɔ Paulo kɛtakpu asɛ etì wu avɛ Yerusalemuɔ.

¹³ Kɛlɛ Paulo ebuiliulũ asɛ, “Kiɖe sopɛ nɔobiyoyò pɛ nɔyɛɛ mɛ kitúɔ ana? Gɛnɛ mɛ tɛnyanyã ete shu mɛ balɛ ɔkɔ, pɔ ɛbalɛ tsyɛ sɛ tɛ̀ itsi nɛ Yerusalem nɛ Apalete Yesu yɛinyeɛ nɛtakpu.”

¹⁴ Gɛ etielũ bɔlɔ bulũ tɛwɔɛwɔɛ nɔ soɔ, bɔshɛnɛ ahɔɛ nɛishu pɛ bɔɖɔ ɔsɛ, “Apaleteɛ tɛpɛpɛ nɔ kɛlɛ ba ɛlɛ mɛ.”

¹⁵ Nɛ kibui ɛlɛ niediɛ, bɔbalɛ pɛ buwu vɛ Yerusalem.

¹⁶ Badɔkpasɛanɛ teli gɛede Kaisareanɔ agbana bɔlɔ avɛnɔ ediku Mnason gɛenu adɔkpasɛanɛ tenikpo yɛɔpã mɛ pɛbɔzã ɛkɛlɛ. Enu anɔ gɛede Kipro pɛ edzi adɔkpasɛnɛ gɛiputɔ̀ tenikpo.

Paulo Yerusalem Tikuku

¹⁷ Gɛ budiku Yerusalemuɔ, baadzya ayɛkɛ bɔlɔ nɛ̀ same.

¹⁸ Gɛ keliɛ azaa, Paulo nɛ̀ bɔlɔ banɔ gɔgɔɛ nɔ vɛ diɖi Yakobo, kɛlɛ ɔhamɛ besheshèɛ petee azã ɛkɛlɛ.

¹⁹ Paulo asɛnɔ alɛ kɛlɛ akɔ alɛ tititì piapi nɛ kɛgɛ Owusoso Akaa abhɛtɛ nɛ bagɛ etinu Yudanɛ nɛishi ɔganà yɛɔdɔ kakasɛ mɛ.

²⁰ Gɛ belũ kibui ɛlɛ, bakpɛ Owusoso Akaa nɛinyè nɛitití. Kɛlɛ betseɖe Paulo asɛ, “Madzya, ɖi Yudanɛ ihotu tɛshɛ nɔnɔ gɛ bayɛkɛ aŋã pɛ banyana ɔsha mɛ evunɔɔ.

²¹ Bakɔ betì asɛ wɔkasɛ Yudanɛ petee gɛ bakpasɛ bagɛ betinu Yudanɛ nɛishi asɛ betsodzi nɛ Mose ɔshaa niede, pɛ ootsèɖe balɛ ɔsɛ betee bhui kɛhɔ̃a akɔ balɛ eyi alɛ alo tɛ̀ bazanà ɛkpã nɛ bɔlɔ ɛkɔɔ nulũ.

²² Kiɖe kɛlɛ ɔsɛ bɔbhɛtɛ? Bebèlũ kɛgbã asɛ ɔba xɔɔ,

²³ klisoɔ bhɛtɛ kɛgɛ butseɖe wɔ. Banyɛ talɛ akpasɛ bɔlɔ ishi gɛ batanà bɔdɔ̃ elú.

²⁴ Gbanà banyɛ alɛ ɔvɛnɔ, tɛ̀ wɔnɔ alɛ odiplu shu tɛ̀ ɔbuia kɛlɛ shu abhɛ, sɛ tɛ̀ bashɛ atakpuɔ ɔkɔ alɛ. Kɛlɛ aka nyia aka ebetì asɛ̀ ebui alɛ gɛ baɖɔ nɛ wɔshuɔ ama alɛ mɛ̀, tɛ̀ kɛkasɛ ɔsɛ̀ wɔtsyɛ oshù ɔshaa.

²⁵ Bagɛ betinu Yudanɛ pɛ bayɛkɛ aŋã xɔnɔɔ, bɔtɛ fɔnɔ keplukpa akɔ alɛ nɛ kɛgɛ bɔtɔɖɔ shu ɔsɛ, batɛ aŋã bɔdɔ̃ gɛ batɔ ɔkɔ ibudiɛ, dzyosu nɛ̀ kɛdzya gidè bagã gɛ bedzyinì balɛ iliɛ, nɛ̀ tɛ̀ batakaŋã kɛgɔlɔ.”

²⁶ Gɛ keliɛ azaa, Paulo agbana banyɛ avɛnɔ ediplu ishu nɛ̀ balɛ. Kɛlɛ avɛ Akaavũɔ pɛ adɛkɔ tititì nɛ kiwuiɛ gɛ kɛlɛ ɔsɛ ishu puplu kiwuiɛ belèɛ pɛ babàkɔ bɔdɔ̃ nɛ balɛ ɔmayɛmɛ aka nyia aka ulũɔ.

Bevũ Paulo

²⁷ Gɛ ewui tegegeneɛ ebelè ebèkeɛ, Yudanɛ teli gɛede Asia bɔdɔ̃ mɛ adɛmɔ Paulo nɛ Akaavũɔ mɛ. Betsú kifu akpɛ banɔ nɔ petee mɛ kɛlɛ bedivũ yɛ,

²⁸ pɛ bakpɛ ozĩ asɛ, “Israelanɛ, nɔplɛnɔ ɔlɔ mɔ! Anyɛ gɛ akasɛ banɔ nɔ petee bɔdɔ̃ nɛ ɔkɔ nyia ɔkɔ afalanɔ pɛ alɔɛtití nɛ bɔlɔ banunɔ nɛ̀ ɔshaa shu nɛ̀ ɛkɛlɛ tsyɛ nɛ alɛ. Nɛ kɛlɛ̀ niedeɛ, adɛgbana Helanɛ amana Akaavũɔ shu pɛ akpɛ ɔdadalɛ ɔkɔlɛ̀ bɔtsɔ̃.”

²⁹ (Beti eputɔ amɔ Trofimo gɛenu Efeso eyiɛ nɛ̀ Paulo nɛ ɔmã mɛ, gɛ balɔkɔ ɛlɛ asɛ Paulo yɛagbanà yɛ amana Akaavũɔ shu.)

³⁰ Ozĩ oyì nɛ ɔmàmɛ petee, kɛlɛ banɔ nɔ ebu tɛtsɛɖɛmɛ ekoeyì edenɔ kawɔ̃pɛ ka nyia ka mɛ aba. Gɛ bevũ Pauloɔ ebekeɛ, betsìi nɛ kesiakpa edenɔ Akaavũɔ shu, kɛlɛ badã budulũɔ odunũ ɔlɛ.

³¹ Gɛ bapɛ asɛ tɛ̀ beyi yɛ, ebui alɛ ediku keyuadɛdɛ gɛ agbana Romanɛ keyuizaa natɔ̃ mɛ ɔsɛ kititì lɔlɔɛ ebui eku Yerusalem ɔmã mɛ.

³² Tsiɔ̃ ɔlɛ koɔ, kɛlɛ agbana ɛzãkɔ banunɔ nɛ̀ buyuadɛdɛ teli pɛ bebu tɛtsɛɖɛ mɛ avɛ banɔɛzaa mɛ. Kibeɛ gɛ banɔɛza amɔ keyuiza otugbà anɔ nɔ̀ nɛ̀ yɛ̀ buyuadɛdɛ, bayɔlɔ Paulo huisì.

³³ Keyuiza otugbà anɔ nɔ̀ avɛ edivũi, kɛlɛ akɔ asɛ banyã yɛ nɛ̀ ɛɖahui tɛbha. Kɛlɛ ebisì yɛ anɔ nɔɛdi gɛ enuɔ nɛ̀ kɛgɛ yɛabhɛtɛɛ.

³⁴ Banunɔ teli nɛ banɔɛza mɛ akpɛ ozĩ aɖɔ kibui ɛlɛ̀, kɛlɛ beteli tsyɛ aɖɔ kɛbhlatɔ, kɛlɛ gɛ keyuiza otugbà anɔ nɔ̀ agɛmɔ kibuiɛ nɛtakpu nɛ ozĩɛ gɛ loyìɛ soɔ, akɔ ɔsha asɛ bagbana Paulo avɛnɔ buyuadɛdɛ ɔzãkɔɔ.

³⁵ Gɛ Paulo ediku gedulũɔ, kana gɛ banunɔ bamɛ atã kifuɔ ebewù kabha soɔ, kɛlɛ ɔsɛ buyuadɛdɛ abhasà yɛ ewunɔ kabha.

³⁶ Banɔɛza gɛzã balɛ kedeɛ zã ozĩ kpɛkpɛ nabha asɛ, “Noyìi!”

Paulo Aɖɔ Kaɖɔ Akɔ Banɔɛzaa

³⁷ Kibeɛ gɛ buyuadɛdɛ agbanà Paulo ebèku buyuadɛ ɔzãkɔɔ, ebisi keyuiza otugbà anɔ nɔ̀ asɛ, “Ɔtɔɔkɔ mɛidzo tɛ ɛɖɔ kibui tili tseɖe wɔ dza?” Ebisi yɛasɛ, “Olũ Helanɛ buluhũ dza?”

³⁸ Gɛnɛ wɔonu Egipte eyiɛ gɛ ɔmana kititì lɔlɔ ebui pɛ ɔgbana batɔmɛ gagalĩ banɔ ihotu tɛlɛ ɔvɛnɔ oxuiɛ kibeɛ tili gɛbafala dza?”

³⁹ Paulo ebuiliulũ asɛ, “Inu Yudaeyi gɛide Tarso nɛ Kilikia, ɔma gɛ batɛwɔ̀ nɛ ɔlɛ shu mɛ mɛide. Ɛkɔ wɔɛtakpu, kɔ mɛɖɔ kaɖɔ ɔkɔ banɔɛza.”

⁴⁰ Gɛ keyuiza otugbà anɔ nɔ̀ akɔ yɛidzo ebekeɛ, Paulo alɔɛtití nɛ kedulũ okpó nabha pɛ akasɛ banunɔ ahɔɛ asɛ tɛ̀ bataatɔ̃. Gɛ balɛ nyɔ̃ɔ ataatɔ̃ ebekeɛ, aɖɔaɖɔ akɔ alɛ nɛ Aramaik buluhũ mɛ asɛ.

« Roimhe

Air adhart »

Lean sinn:

Ceanglaichean taic

Sanasan