Banɔkpɛkpɛ Axɔ̃ɛ 15 - Nyangbo New Testament

Ɔhamɛ Besheshèɛ Kɛtakpu Tɔtɔ̃ Nɛ Yerusalem

¹ Banyɛ teli ezhi ede Yudea aba Antioxia pɛ baba kasɛ ɔhamɛanɛ bɔdɔ̃ asɛ, “Onupɛ begibhui kɛhɔ̃a akɔ anɔ nɛ ɔkɔɔ gɛ Mose akasɛ ɔlɔ nulũɔ, atɛ bɔmɔ ɛkpã.”

² Kibui ɛlɛ̀ badzì kawlɔ̃akɛ nɛ̀ ebui mɛ tsatsaɖakɛ nɛ Paulo, Barnaba nɛ̀ banunɔ nɛishi. Kliso bebu Paulo nɛ̀ Barnaba ɔplɛnɔ bayɛyɛkɛŋã teli, asɛ bavɛ Yerusalem tɛ bavɛ adɛmɔ banɔkpɛkpɛ nɛ̀ ɔhamɛ beshesheɛ nɛ kibui ɛlɛ shu.

³ Ɔhaa abakpɛ balɛidzo, kɛlɛ gɛ bagã kidzoɔ afala nɛ Foenisia nɛ̀ Samaria nɔ, betseɖe alɛ kana gɛ bagɛ etinu Yudanɛ tsyɛ etsyina balɛ etúɔ mɛ. Kibui ɛlɛ kɔ bayɛyɛkɛŋã amɔ same popopo.

⁴ Gɛ Paulo nɛ̀ Barnaba ediku Yerusalemuɔ, ɔha, banɔkpɛkpɛ nɛ̀ Yerusalemuɔ ɔhamɛ beshesheɛ ayɛkɛ alɛ. Paulo nɛ̀ Barnaba abakɔ alɛ tititì nɛ kɛka nyia ka gɛ Owusoso Akaa abhɛtɛ aganà balɛ abha shu.

⁵ Kɛlɛ bayɛyɛkɛŋã teli gɛede Farisianɛ kɛzaa mɛ alɔ kititi kɛlɛ baɖɔ asɛ, “Kɛlɛ ɔsɛ bebhui kɛhɔ̃a akɔ bagɛ betinu Yudanɛ tɛ̀ bebisi edenɔ balɛ ahɔɛ mɛ asɛ babhɛtɛ atɔɖɔ Mose ɔsha nabha.”

⁶ Banɔkpɛkpɛ nɛ̀ ɔhamɛ beshesheɛ adɛtɔ̃ kɛtakpu tɛ̀ babhɛtɛ ekpeɖekpeɖe mɛ nɛ kibui bibisi ɛlɛ shu.

⁷ Gɛ bapɔɛ kɛlɛishu ebekeɛ, Petro alɔ pɛ aɖɔ etseɖe alɛ asɛ, “Mɛadzya alɛ mɔ, nɔbaka asɛ kibe tili gɛba falaa, Owusoso Akaa ebu banɔ teli edenɔ wɔnɔɛshi ɔsɛ tɛ̀ bagɛ etinu Yudanɛ tsyɛ elũ Kibui Gbangbã ɛlɛ odenɔ mɛolugbũ mɛ̀ tɛ̀ bayɛkɛ aŋã.

⁸ Owusoso Akaa gɛenyi anɔdzyrame kitúɔ mɛ, akasɛ asɛ ayɛkɛ balɛ tsyɛ ɔgana Ɔfɔfuĩa Gbangbã tɛkɔkɔ alɛ mɛ asɛ kɛkɔ gɛ akɔ bɔlɔ tsyɛ ana.

⁹ Egibu ɔtɔ nanà nɛ bɔlɔ nɛ̀ balɛishi, pɔ adalɛ balɛ etúɔ mɛ ɔgana tɛyɛyɛkɛŋã mɛ.

¹⁰ Otsiɛnɔ pɔ, kiɖe so pɛ nɔpɛ ɔsɛ tɛ nofeke Owusoso Akaa oɖi? Kiɖeso pɛ nɔlɔkɔ etukuɔ gɛ bɔlɔ alo bɔlɔ akaa alɛ tsyɛ agɛlà etukùɔ, ɔlɔkɔ tɔɖɔ badɔkpasɛanɛ xɔnɔ atakpu dza?

¹¹ Ao! bɔyɛkɛ ŋã ɔsɛ gana bɔlɔ Apalete Yesu tibhui bhuibuɔ mɛɛ, kɛlɛ bayɛkɛ akɔ bɔlɔ asɛ balɛ ana.”

¹² Kɛza petee abadɔ kananáa gɛ belũ kaɖɔ gɛ Barnaba nɛ̀ Paulo aɖɔ etseɖe alɛ nɛ atsyindzye ebuiɛ gɛ labhɛtɛ ibiɛ gɛ Owusoso Akaa abhɛtɛ nɛ bagɛ etinu Yudanɛ nɛishi ɔgana balɛ abha.

¹³ Gɛ bebhui balɛ kaɖɔɔ, Yakobo tsyɛ aɖɔaɖɔ asɛ, “Mɛadzya alɛ mɔ, nɔtatɔ̃ nɛ mɛ.

¹⁴ Simon gɛenu Petroɔ ashɔrɔ bɔlɔ kana gɛ putɔnɔ Owusoso Akaa akasɛ yɛ tili tɛlɔlɔkɔ nɛ kibuɔ gɛ ebu banɔ edenɔ bagɛ etinu Yudanɛ mɛ akɔ yɛishu.

¹⁵ Owusoso Akaa ebuiɖɔluanɛ ebuiɛ lashɔnɔ kibui ɛlɛ gɛ bafɔnɔ elu asɛ,

¹⁶ “ ‘Nɛ kɛlɛ niedeɛ ɛbatsyina ba tɛ̀ ɛbadzinì David kagba gayɛ nɔ dzu. Ɛbadzini kivũkpuɔ dzu, kɛlɛ ɛbadzini kalɛ bhɛtɛ avɔvɔ,

¹⁷ ɔsɛ tɛ banɔ gɔgɔɛ nɔ tsyɛ atɔnɔ Apaleteɛ niede, ɔplɛnɔ bagɛ etinu Yudanɛ petee gɛ mɛinyeɛ lɛ balɛishuɔ. kana Apaleteɛ gɛ abhɛtɛ ebui alɛ aɖɔ,

¹⁸ ebui gɛ benyi edenɔ kibè tili ke.

¹⁹ “Kinu mɛ kebhu kukulu ɔsɛ, kɛma ɔsɛ tɛ̀ bɔkɔ ebuiɛ agagalĩ ɔkɔ bagɛ etinu Yudanɛ gɛ betsyina aba Owusoso Akaa niede.

²⁰ Pɔ nɔkɔ bɔfɔnɔ keplukpa ɔkɔ alɛ boŋ tɛ̀ bayɔlɔ ibudi bɔdɔ̃ ŋaŋã gɛ bɔlɛishu gɛdalɛ, kɛgɔlɔ ŋaŋã, nɛ̀ bɔdzya nɔnɔ gɛide bagã gɛ bedzinì balɛ ili nɛ̀ butsì tɛŋaŋã mɛ.

²¹ Ɔmɔsɛ bakala Mose ɔsha ɔkɔ banunɔ nɛ ɔma ka nyia ka mɛ odenɔ kuku ibeɛ, kɛlɛ bakalà ɔlɛ nɛ balɛ ɛtsyɔakɔ nɛ Kimoelewui ka nyia ka abha.”

Ɔhamɛ Besheshèɛ Eplukpa Gɛ Bafɔnɔ Asɛsɛ Bagɛ Etinu Yudanɛ

²² Kɛlɛ banɔkpɛkpɛ nɛ̀ beshesheɛ ɔlɔkɔ ɔplɛnɔ ɔhaa petee adɛmɛ asɛ bebebu balɛ ahɔɛmɛ banɔ teli nɛ kɛzaa mɛ aplɛnɔ Paulo nɛ̀ Barnaba tɛ basɛsɛ alɛ nɛ Antioxia. Banunɔ gɛ bebuɔ balɛ enu, Yuda, (gɛbekulu tsyɛ asɛ Barsaba) nɛ̀ Sila, banɔ taabha alɛ enu otugbà banɔ nɛ ɔhaa nɛishi.

²³ Keplukpa gɛ bafɔnɔ akpɛ balɛ ahɔɛ mɛ ebuiɛ alɛ enu asɛ, Bɔlɔ banɔkpɛkpɛ nɛ̀ beshesheɛ gɛenu wɔnɔ adzya alɛ, Bɔfɔnɔ keplukpa alɛ ɔsɛsɛ bagɛ etinu Yudanɛ nɛ Antioxia, Siria nɛ̀ Kilikia nɔ, Bɔsɛnɛ wɔnɔ.

²⁴ Bulũ ɔsɛ bɔlɔ ɔmayɛ teli ekoeyì nɛ bɔlɔ ishi, gɛ bɔgɛ kpɛ alɛ pɛ baba alɔkɔ ebui teli akpɛ wɔnɔ buluhũ nɔ, babakpɛ wɔnɔ buluhũ nɛ̀ balɛ ebui ɖɔɖɔ.

²⁵ Kliso bɔlɔ petee badɛmɛ ɔtɔɖɔ ɛlɛ abha ɔsɛ tɛ̀ bubu banɔ teli ɔkpɛ wɔnɔ ɔkɔ aplɛnɔ bɔlɔ ɔbhia alɛ gɛ bɔdɛmɛ nɔ gɛenu Barnaba nɛ̀ Paulo,

²⁶ banɔ gɛ balɔkɔ balɛ ɛkpã etsye nɛ bɔlɔ Apalete Yesu Kristo ɛtakpu.

²⁷ Klisoɔ bɔkpɛ Yuda nɛ̀ Sila nɛ wɔnɔ ɔkɔ tɛ̀ babà ɖɔaɖɔ atɔɖɔ kɛklagbu nɛ kɛgɛ ɛlɛ ishu bɔfɔnɔ keplukpa alɛ akɔ wɔnɔ.

²⁸ Kɛpɛ̃ ɔkɔ Ɔfɔfuĩa Gbangbã nɛ̀ bɔlɔ tɛ bɔtɛ tɔɖɔ wɔnɔ kituku nanà gɛdɛ ebui alɛ gɛ bɔba tseɖe wɔnɔ.

²⁹ Nobu ishu oyinɔ odenɔ bɔŋaŋã gɛ batɔ akɔ ibudiɛ, dzyosu nɛ̀ bɔdzya gɛide bagã gɛ bedzyinì balɛ iliɛ mɛ, ɔlɔkɔ ɔplɛnɔ kɛgɔlɔ ŋaŋã. Nɔkpɛ kemi tɛ̀ nɔshɛnɛ ahɔɛ nɛ ebui alɛ nɛidi shu. Bɔsɛnɔ wɔnɔ piapii.

³⁰ Bakpɛ banɔ nɔ nɛidzo pɛ bashɛ avɛ Antioxia. Ɛkɛlɛ, bedishogò ɔha pɛ balɔkɔ keplukpa akɔ alɛ.

³¹ Banunɔ akalà keplukpa kɛlɛ same eku alɛ nɛ kalɛ mɛ ebuiɛ shu.

³² Yuda nɛ̀ Sila gɛedzi ebuiɖɔluanɔ baɖɔ ebui gele alɔkɔ akpɛ badzya kemi nɛ̀ ohumi nɔ.

³³ Gɛ baza ɛkɛlɛ nɛ ewui teli edeɛ, ɔha ɔkpɛ balɛ kidzo betsyina ashɛ nɛ̀ tiyuyulà nɛ̀ ishu yɔyɔ ɔsɛsɛ bagɛ akpɛ balɛ ɔkɔ.

³⁴ Sila atɔɖɔ ɛlɛ asɛ abawɔ ɛkɛlɛ.

³⁵ Paulo nɛ̀ Barnaba xɔnɔ awɔ Antioxia, ɛkɛlɛ balɛ nɛ̀ banunɔ teli azakasɛ bɔdɔ̃ pɛ bazaɖɔ Apalete nibuiɛ.

Kawlɔ̃akɛ Eku Paulo Nɛ̀ Barnaba Ɛshi

³⁶ Kidegba, Paulo ebetseɖe Barnaba asɛ, “Kɔ butsyina ɔvɛ tɛ budiɖi bɔlɔ adzya alɛ nɛ ɛma mɛ gɛ bɔɖɔ Apalete nibuiɛ kana tɛ̀ buɖì kana gɛ balɛ.”

³⁷ Barnaba apɛ asɛ tɛ agbana Yohanes, gɛ bezekulu tsyɛ asɛ Markoɔ avɛ aplɛnɔ alɛ,

³⁸ Pɔ kigiku Paulo xɔnɔ awã ana, ɔmɔsɛ atɛ shɛnɛ ɔhɔɛ nɛ balɛ ishu elu eɖi nɛ Pamfilia kɛlɛ, agavɛ ɛlɛ abha awɔa axɔ̃ɛ nɛ alɛ.

³⁹ Kibui ɛlɛ kɔ kawlɔ̃akɛ nyagãa eku Paulo nɛ̀ Barnaba ishi, kɛkɔ ɔsɛ bebu ɔtɔ nɛ bagɔlɔ shu. Barnaba agbana Marko aplɛnɔ yɛishu kɛlɛ beku kelĩabhaohu avɛ Kipro.

⁴⁰ Paulo xɔnɔ ebu Sila aplɛnɔ yɛishu, kɛlɛ gɛ ɔha alɔkɔ balɛ akpɛ ahɔɛ akɔ Apaleteɛ asɛ ebhui balɛ ebuɔ, batɔnɔ kidzo ashɛ.

⁴¹ Agã ekoeyì nɛ Siria nɛ̀ Kilikia pɛ azakpɛ ɔhamɛanɛ ohumi.