Banɔkpɛkpɛ Axɔ̃ɛ 12 - Nyangbo New Testament

Petro Tikokoeyi Odenɔ Ɔɖavũɔmɛ Nu Atsyindzye Ibui

¹ Kibe ɛlɛ Ekusi Herodes Agripa evũ ɔhamɛ banunɔ teli, kɛlɛ azatɔɖɔ ɛlɛ asɛ tɛ̀ atɔnɔ balɛ edè.

² Akɔ beyi Yakobo, gɛenu Yohanes yɛadzya nɛ̀ bɛtɛ̀.

³ Gɛ amɔ asɛ kibui ɛlɛ ku Yudanɛ sameɛ, ebu katsɛɖɛ edivũ Petro tsyɛ. Kibui ɛlɛ ba ɛlɛ mɛ nɛ Amawɔɛ Gɛ Agɛnyanyã Kiwui ŋaŋã nabha.

⁴ Gɛ evũ Petroɔ ebekeɛ, akpɛ yɛɔɖavũ, pɛ alɔkɔɛ akpɛ ahɔɛ akɔ keyuiza ivolo tɛlɛ gɛ̀ buyuadɛdɛ talɛ azã balɛ ulũ. Herodes atɔɖɔ ɛlɛ asɛ tɛ̀ agbanà yɛ amana kɛtsalɛ mɛ ɔkɔ kebhu kukulu gɛ̀ onupɛ baŋã Amawɔɛ Gɛagɛnyanyã Kiwuiɛ ebeke.

⁵ Kliso Petro azã ɔɖavũɔ mɛ, pɔ ɔhaa ezekulu Owusoso Akaa nɛ yɛtakpu gagalĩi nɛ̀ awuhũdzadzã.

⁶ Elishi alɛ flogo tɛ̀ Herodes abagbanà yɛ amana kebhuɔ oklukɔɔ, banyã Petro nɛ̀ ɛɖahui tɛbhà pɛ azadɔ taɖa nɛ buyuadɛdɛ taabha nɛishi, flogo pɛ buyuadɛ bhlatɔ tsyɛ azã azãepo kedulũɔ.

⁷ Nɛ balɛ matì matì mɛɛ, Apaleteɛ yɛaxɔ̃ɛdɛ ebekoeyì, kɛlɛ kifu dɛkɛ ku ɔɖavũɔ mɛ. Axɔ̃ɛdɛ etũ Petro kɛdɔ̃ nɛ yɛɔwɔã mɛ̀ pɛ anyɛmii. Etseɖe yɛasɛ, “Hɔa, tɛ ɔlɔ!” kɛlɛ ɛɖahuiɛ wɔlɛ̀ nɛ Petro yɛɔhɔkpɔ.

⁸ Kɛlɛ axɔ̃ɛdɛ etseɖe yɛasɛ, “Lɔkɔ wɔ̀ bɔdɔ̃ kpɛkpɛ nɛ̀ ɔtsɛɖɛkɔlɔ ɔkpɛ.” Kɛlɛ Petro abhɛtɛ ana. Eze tseɖe yɛasɛ, “Lɔkɔ wɔakpɛkpɛ dzloloɔ ɔplɛnɔ wɔshu tɛ̀ ɔtɔnɔ mɛ.”

⁹ Petro azã yiede ekoeyì nɛ ɔɖavũɔ mɛ, pɔ egitì asɛ̀ kɛgɛ axɔ̃ɛdɛ aabhɛtɛ nu kibui gbã, ezeɖi asɛ bɔlala mɛ ebui yɛamɔ anà.

¹⁰ Bagã fala nɛ buyuadɛ kɛza gɛiputɔ, nɛ̀ kɛbhalà shu kɛlɛ bebèku ɔɖa kedulũɔ gɛ bagã ekoeyì avɛ ɔmahohoeɛ mɛ. Kadalɛ nɛ kalɛishu ahɔɛ mɛ̀, kɛlɛ̀ bagãfala nɛ kalɛ mɛ. Gɛ bagã tipɔ tenikpo idzo ebekeɛ, nɛ yɛ matì matì mɛɛ axɔ̃ɛdɛ ayala nɛ yɛamɛ.

¹¹ Kɛlɛ̀ Petro yɛamɛ adalɛ kɛlɛ aɖɔ asɛ, “Kɛlɛ otsi alɛ ayɛkɛ aŋã asɛ Apaleteɛ yɛasɛsɛ yɛaxɔ̃ɛdɛ asɛ tɛ̀ ebebu mɛ eyinɔ nɛ Ekusi Herodes yɛawɔ̃fɔnɔ mɛ̀, nɛ̀ kɛka nyia ka gɛ Yudanɛ atɔɖɔ asɛ tɛ babhɛtɛ̀ nɛ mɛishuɔ.”

¹² Gɛ kibui ɛlɛ mɛ badalɛ ɔkɔɛɛ, avɛ Maria gɛenu Yohanes gɛ beekulu Markoɔ yɛeliɛ ɔpãmɛ ɛkɛlɛ gɛ̀ banɔ kpekpè teli eshogò pɛ beze kulu Owusoso Akaa.

¹³ Petro ebho ɔtɔ̃ kedulũ opupuɔ, kɛlɛ adzɛnuvɔɛ axɔ̃ɛdɛ teli gɛ bezekulu yɛasɛ Roda elũ pɛ avɛ ɔlɛ̀ shu.

¹⁴ Gɛ Roda elũ asɛ Petro yɛaɖɔaɖɔɔ, same ekui falanɔɛfú, kliso ebu tɛtsɛɖɛmɛ ashɛ gɛ agɛ dalɛ opupuɔ, kɛlɛ edetseɖe ɔhaa asɛ, “Petro alɛ kedulũɔ!”

¹⁵ Banunɔ ebuiliulũ akɔɛ asɛ, “Ɔma piapii.” Pɔ gɛ etũilɛ akpɛ asɛ̀ kɛkpasɛ ɛlɛ mɛ anaa, baɖɔ asɛ, “Kɛlɛ́ɛ ebedzi yɛaxɔ̃ɛdɛ yɛaba.”

¹⁶ Pɔ Petro azã kedulũɔ pɛ ezebho opupuɔ, kɛlɛ gɛ badalɛ ɔlɛ pɛ bamɔɛ, kɛbhɛtɛ balɛ ibi popopo.

¹⁷ Petro akasɛ alɛ ahɔɛ asɛ bataatɔ̃ kɛlɛ aɖɔ etseɖe alɛ nɛ kibuɔ gɛ Apaleteɛ ebui eyinɔ nɛ ɔɖavũɔ mɛ. Etseɖe balɛ asɛ, “Notseɖe Yakobo nɛ̀ yɛadzya alɛ nɛ kibui ɛlɛ shu kɛlɛ ashɛ avɛ ɔkɔ bhlatɔ.”

¹⁸ Gɛ keliɛ azaa, kawlɔ̃akɛ azã buyuadɛdɛ nɛishi nɛ kɛgɛ ba ɛlɛ mɛ̀ nɛ Petroɔ shu.

¹⁹ Gɛ Ekusi Herodes akɔ bapɛ yɛ piapii pɛ bagɛ mɔ yɛ ɔgãkɔɔ, edzini buyuadɛdɛ gɛepo ɛkɛlɛ ebisi piapii, kɛlɛ akɔ ɔsha asɛ tɛ̀ beyi alɛ. Kɛlɛ Ekusi Herodes alɔ ede Yudea pɛ avɛ Kaisarea pɛ adɛzã ɛkɛlɛ nɛ kibè tili.

Ekusi Herodes Agripa Yɛutsi

²⁰ Herodes azapɛ ebela nɛ̀ Tiro nɛ̀ Sidoanɛ, pɔ otsi alɛ xɔnɔ babhɛtɛ tenikpo pɛ bekulu banɔ pɛ̀ bazã kesi nii. Gɛ bamɔ tɛpɛplɛnɔ odenɔ Blasto gɛenu Ekusiɛ yɛaxɔ̃ɛdɛ gɛ yɛabha yɛ ayɛkɛ aŋãa ɔkɔɔ, bebisi ishu yɔyɔ, ɔmɔsɛ ekusiɛ yɛesiakpa mɛ bamɔ bɔdɔ̃ gɛ baŋãa edenɔ.

²¹ Nɛ kiwuiɛ gɛ batɔɖɔ elu nabhaa, Herodes akpɛ yɛekusi akpɛkpɛ dzloloɔ, azã yɛekusi kegbu nabha, kɛlɛ azaɖɔaɖɔ etseɖe banunɔ nɛ ɔtsyɔakɔ.

²² Banunɔ akpɛ ozĩ asɛ, “Gɛnɛ anɔdzyrame kaɖɔ nɛ alɛ, pɔ obudì ayɛ.”

²³ Gɛ Herodes agɛkpɛ Owusoso Akaa nɛinyè nɛitití soɔ, tsiɔ ɔlɛ koɔ, Apaleteɛ yɛaxɔ̃ɛdɛ teli ebehui ebho, kɛlɛ asɔ̃ abaŋãyɛ pɛ etsi. (Anɔkpa yɛedzì kɛlɛ so pɛ baɖɔ asɛ asɔ̃ aŋã yɛ pɛ̀ etsi.)

²⁴ Pɔ Owusoso Akaa nɛibuiɛ xɔnɔ zɛvɛ ɛlɛ abha pɛ kɛɛnɛ tɔɖɔ.

²⁵ Gɛ Barnaba nɛ̀ Saulo adɛ kɛxɔ̃ɛ gɛ bakpɛ alɛ ebekeɛ, bagbana Yohanes gɛ bezekulu tsyɛ asɛ Markoɔ evunɔ edenɔ Yerusalem amana.