Banɔkpɛkpɛ Axɔ̃ɛ 11 - Nyangbo New Testament

Petro Ebu Yɛishu Lũ Nɛ Yerusalem

¹ Banɔkpɛkpɛ nɛ̀ bagɛ ayɛkɛ aŋã nɛ Yudea bɔdɔ̃ mɛ pete ebelũ asɛ bagɛ betinu Yudanɛ tsyɛ ayɛkɛ Owusoso Akaa nɛibuiɛ.

² Kliso gɛ Petro avɛ ediku Yerusalemuɔ, Yudanɛ gɛ bebhui kɛhɔ̃a akɔ baɖɔaɖɔ alɔɛtití nɛishu.

³ kɛlɛ baɖɔ asɛ, “Ɔdɛ́ bagɛ begibhui kɛhɔ̃ akɔ alɛ bapãmɛ pɛ ɔdɛŋã bɔdɔ̃ nɛ alɛ.”

⁴ Petro avɛ kɛlɛ abha ebu kɛka nyia ka mɛ ɔkɔ alɛ piapii asɛ gɛ kɛba ɛlɛ mɛ asɛ,

⁵ “Ɛzã Yopa ɔma mɛ pɛ izikulu Owusoso Akaa, kɛlɛ asɛ taɖamɛ anaa, ɛmɔ tibubu kasɛ. Ɛmɔ kɛdɔ̃ tilì gɛiyì kɛpɔtɛ gbagbla tili gɛ kizhi odenɔ kititiɛ ɔganà kɛlɛ batɔ̃ talɛ̃ mɛ, kɛlɛ kizhi ba ɛkɛlɛ gɛ ɛzãa.

⁶ Iɖi kɛpɔtɛ mɛ kɛlɛ ɛmɔ kesiakpa abha bagã ɛtsɛɖɛkpɔ tɔlɛ bagãa, bagãhoe, bagã gɛ bèetsì nɛ kesiakpa nɛ̀ kititì bɔzhɔɛ nɔ.

⁷ Kɛlɛ ilũ ozĩ toli gɛotseɖe mɛ ɔsɛ, ‘Petro lɔ, yi alɛ tɛ̀ ɔtã.’

⁸ “Ibuiliulũ ɔsɛ, ‘Apalete, ɛtɛ balà! Kɛdɔ nanà ma gɛ kɛlɛishu gɛdalɛ alo pɛ kɛlɛishu gibhuiɛ tiku mɛ olugbũ mɛ oɖi.’

⁹ “Kaɖɔ ezeyì bɔbhalà odenɔ kititíɛ ɔsɛ, ‘Tɛokulu kɛdɔ̃ nɔnɔ gɛ Owusoso Akaa adalɛ kɛlɛishuɔ sɛ kɛdɔ̃ gɛgi bhui.’

¹⁰ Kibui ɛlɛ ba ɛlɛ mɛ bɔba tɛ̀ta, kɛlɛ beze feke kɛpɔtɛ ewunɔ avɛnɔ kititíɛ.

¹¹ “Nɛ kibe ɛlɛɛ koɔ, banyɛ tatá gɛ bakpɛ edenɔ Kaisarea nɔ abawɔ eli bɔpã mɛ gɛ ɛzãa.”

¹² Ɔfɔfuĩa nɔ otseɖe mɛ ɔsɛ, ɛlɔ tɔnɔ̀ alɛ ɔvɛ. Badzya tehlo alɛ tsyɛ avɛ aplɛnɔ mɛ, kɛlɛ budiku anyɛ nɔpã mɛ.

¹³ Etseɖe bɔlɔ kana gɛ amɔ axɔ̃ɛdɛ ebu yɛishu akasɛ yɛ nɛ bɔpã mɛ pɛ etseɖe yɛasɛ, ‘Kpɛ anɔ nɛ Simon gɛbekulu tsyɛ asɛ Petroɔ ɔkɔ nɛ Yopa tɛ̀ aba.

¹⁴ Abà mana wɔ ɔklasɔ̃, kɛlɛ gana ɔlɛ mɛɛ, wɔ nɛ̀ wɔpãa bɔmɔ ɛkpã.’

¹⁵ “Kibeɛ gɛ ɛɖɔ kaɖɔ koɔ, Ɔfɔfuĩa Gbangbã ɔbɔdɔ̃ balɛ abha asɛ gɛ lɔba ɔlɔ tsyɛ abha nɛ kesikpɛkpɛ mɛ.

¹⁶ Kɛlɛ ɛbaka kibuiɛ gɛ Apaleteɛ aɖɔ asɛ, ‘Yohanes akpɛ bulĩ nɛ kɛtakpu akɔ anɔ nɛ̀ bulĩ, pɔ wɔnɔ xɔnɔ Ɔfɔfuĩa Gbangbã babà lɔkɔ akpɛ bɔlɛ akɔ wɔnɔ nɔ̀.’

¹⁷ Kliso onupɛ Owusoso Akaa akɔ alɛ kɛdɔ̃ kɔkɔ asɛ gɛ akɔ bɔlɔ tsyɛ ana, bɔlɔ asɛ bagɛ ayɛkɛ Yesu Kristo abha aŋãa, kɛlɛ afana mɛinu pɛ ababhɛtɛ mɛ asɛ ɛbalà lɔɛtití nɛ Owusoso Akaa shu?”

¹⁸ Gɛ belũ kibui ɛlɛɛ, ananà egefekè kibui nanà, pɔ bakpɛ Owusoso Akaa nɛinye nɛitití pɛ baɖɔ asɛ, “Kɛlɛ́ otsiɛnɔ, Owusoso Akaa akɔ bagɛ̀ betinu Yudanɛ tsyɛ etumɛ tsyitsyina tɛ bamɔ ɛkpã.”

Ɔhaa Nɛ Antioxia

¹⁹ Banunɔ gɛ bapɔ̃ɛ alɛ mɛ akanà ɔganà balɛ ede tɛtɔtɔnɔ gɛkpà ɔplɛnɔ Stefano yɛ tiyiyiɛ, bagã kidzo avɛnɔ idzlolo ɔkɔ asɛ Foenisia ana, Kipro nɛ̀ Antoxia pɛ badaaɖɔ Kibui Gbangbã eetseɖe Yudanɛ ete.

²⁰ Beteli nɛ balɛ mɛ, banɔ gɛede Kipro nɛ̀ Kirene, bavɛ Antioxia pɛ badaaɖɔ kibuiɛ etseɖe Helanɛ tsyɛ, betseɖe balɛ kibui gbangbã nɛ Apalete Yesu shu.

²¹ Apaleteɛ ɔhɔɛ ɔzã balɛ abha, kliso banɔ kpekpè teli ayɛkɛ aŋã pɛ betsyina avɛ Apaleteɛ ɔkɔ.

²² Kibui ɛlɛ baku ɔhaa gɛ̀ lɔlɛ̀ Yerusalemuɔ atɔ̃mɛ, kɛlɛ basɛsɛ Barnaba nɛ Antioxia.

²³ Gɛ ediku pɛ amɔ asɛ kibui gbã kinu ɔsɛ Owusoso Akaa ebhui balɛ ebuɔ, same ekui, kɛlɛ akpɛ balɛ petee kemi asɛ tɛ̀ balɔkɔ̀ balɛ etúɔ nyɔ̃ɔ azã nɛ̀ ɛkpã ɔkɔ Apaleteɛ.

²⁴ Barnaba edzi anɔ gbangbã teli gɛ̀ Ɔfɔfuĩa Gbangbã ɔzã yɛmɛ̀ pɛ̀ ayɛkɛ aŋã, kɛlɛ bagbana banɔ kpekpè teli amana Apaleteɛ ɔkɔ.

²⁵ Kɛlɛ Barnaba abavɛ Tarso asɛ tɛ̀ adɛpɛ Saulo,

²⁶ kɛlɛ gɛ adɛmɔɛ, agbani amana Antioxia. Nɛ kɛgɔ zɛzɛ petee mɛ̀, Barnaba nɛ̀ Saulo atsyɔa nɛ̀ ɛháa pɛ bazakasɛ banɔ kpekpè teli bɔdɔ̃. Antioxia ɔha mɛ beputɔ ekulu badɔkpasɛanɛ asɛ Kristoanɛ.

²⁷ Nɛ kibe ɛlɛ, bebuiɖɔluanɔ teli ede Yerusalem aba Antioxia.

²⁸ Balɛ ɔmayɛmɛ tenikpo gɛ bezekulu asɛ Agaboɔ, abalɔɛtití, kɛlɛ ɔgana Ɔfɔfuĩa nɔ mɛɛ, aɖɔ elú asɛ bɔbhɛ gagalĩ tuli badɔ nɛ Roma kɛmadiɛ petee mɛ. (Kibui ɛlɛ ba ɛlɛ mɛ nɛ Klauda bukusi ŋãbe.)

²⁹ Kliso badɔkpasɛanɛ asɛ kana gɛ balɛ ɔmayɛmɛ aka nyia aka abalà akɔ̀, batɔɖɔ ɛlɛ asɛ babàkɔ ɔhamɛanɛ gɛ̀ balɛ̀ Yudea dɔ mɛ tɛpɛplɛnɔ.

³⁰ Kɛgɛ babhɛtɛ kɛlɛinu ɔsɛ, basɛsɛ besheshèɛ bɔdɔ̃ ɔganà Barnaba nɛ̀ Saulo abha.

« Roimhe

Air adhart »

Lean sinn:

Ceanglaichean taic

Sanasan