Banɔkpɛkpɛ Axɔ̃ɛ 10 - Nyangbo New TestamentKornelio Akpɛ Banɔ Nɛ Petro Ɔkɔ 1 Nɛ Kaisarea nɔ, anyɛ teli azã gɛ bezekulu yɛasɛ Kornelio, edzi anɔ gɛ agbana keyuiza asɛ banɔ akpã gɛ bezekulu asɛ Italia Keyuizaa. 2 Yɛnɛ̀ yɛɔpãa petee lɔkɔ balɛishu akɔ pɛ Owusoso Akaa kifùsisi zã alɛ mɛ. Azabhɛtɛ ɛyamɛ gbangbã ɔkɔ betsyuitsyuiɛ pɛ azã Owusoso Akaa tikukulu abha kibe nyia be. 3 Kiwui tinikpo asɛ kemuze ɔɖatàta tɛtà mɛ anaa, bebu kibui tili akasɛ yɛ. Amɔ Owusoso Akaa axɔ̃ɛdɛ teli gɛ aba yɛɔkɔ pɛ ebetseɖe yɛasɛ, “Kornelio!” 4 Kornelio akpɛ awɔ̃ eɖi axɔ̃ɛdɛ nɛ kifu sisi mɛ pɛ ebisi yɛasɛ, “Apalete, kibui ɖuwoe?” Axɔ̃ɛdɛ ebuiliulũ akɔɛ yɛasɛ, “Kikuluɔ gɛ okulu Owusoso Akaa nɛ̀ kana gɛ ɔkɔ betsyuitsyuiɛ bɔdɔ̃ɔ bayì nɛ Owusoso Akaa namɛ kɛlɛ kiku yɛawɔ̃. 5 Kpɛ̀ banɔ ɔsɛsɛ Yopa tɛ̀ bekulu anyɛ teli gɛ bekulu yɛasɛ Simon, pɛ bekèkulu tsyɛ asɛ Petro ɔmana. 6 Alɛ Simon gɛenu bagãpi axɔ̃ɛ wɔawɔa eleteɛ nɔpãmɛ, anɔ gɛ yɛɔpã lɛ aƒuɔ shuɔ.” 7 Gɛ axɔ̃ɛdɛ gɛ aɖɔaɖɔ nɛ yɛ ashɛɛ, Kornelio ekulu yɛaxɔ̃ɛdɛ taabha, nɛ̀ keyuadɛdɛ tenikpo gɛ adɛ yɛaxɔ̃ɛ, pɛ ekènu anɔ gɛ aplɛnɔ yɛ tsyɛ amana. 8 Etseɖe balɛ kɛka nyia ka gɛba ɛlɛ mɛɛ, kɛlɛ akpɛ alɛ nɛ Yopa. Petro Yɛɔlalà Zaza 9 Gɛ keliɛ aza asɛ ɔɖa tatá lɔfɔ nɛ̀ taabha mɛ gɛ bazã kidzo gagã nabha pɛ betso aplɛnɔ ɔmaa, Petro ewu avɛ buvũɔ adamɛ ɔkɔ tɛ edikulu Owusoso Akaa. 10 Bɔbhɛ ziyii kɛlɛ apɛ kɛdɔ̃ tili tɛ aŋã, kɛlɛ gɛ batɔ bɔdɔ̃ɔ, ezhi eku taɖa mɛ. 11 Amɔ gɛ kititíɛ gɛ dalɛ dzi, kɛlɛ amɔ kɛdɔ̃ tili gɛ kidzi asɛ kɛpɔtɛ hohoe tili ana, gɛ bezhinɔ ɛlɛ esi nɛ kɛlɛ batɔ̃ talɛ mɛ. 12 Bɔtsɛɖɛkpɔ tɔɔlɛ̃ bagã ediedi, bagã gɛetsì nɛ kesiakpa, ɔplɛnɔ kititì bɔzhɔɛ ediedi azã kɛpɔtɛ ɛlɛ mɛ. 13 Kɛlɛ ozĩ toli otseɖe yɛɔsɛ, “Petro, lɔ tɛ oyi bagã alɛ ɔtã!” 14 Petro ebuiliulũ asɛ, “Apalete, ɛtɛbalà, ɛka ŋã kɛdɔ̃ nanà gɛ kɛlɛishu gɛdalɛ alo pɛ kigibhui oɖi.” 15 Kaɖɔ ezeyì bɔbhalà etseɖe Petro asɛ, “Tɔokulu kɛdɔ̃ nanà gɛ Owusoso Akaa abhɛtɛ pɛ kɛdalɛ sɛ kɛlɛishu gibhui.” 16 Kibui ɛlɛ ba ɛlɛ mɛ̀ bɔba tɛta, kɛlɛ odunu ɔlɛ koɔ, bedzini kɛpɔtɛɛ efeke ewunɔ avɛnɔ kititíɛ. 17 Kibeɛ gɛ bɔlala lɛ zɛbhɛtɛ Petro ibiɛ, banunɔ gɛ Kornelio akpɛ adɛmɔ ɛkɛlɛ gɛ Simon bɔpãa lɛ kɛlɛ bawɔeli kedulũɔ. 18 Bebisi nɛ̀ ozĩ tɛ betì, onupɛ bɔpãlɛ mɛ Simoniɛ gɛ bekulu asɛ Petroɔ alɛ. 19 Kibeɛ gɛ Petro aza bhɛtɛ ekpeɖekpeɖe mɛ nɛ bɔlala shuɔ, Ɔfɔfuĩa nɔ otseɖe yɛɔsɛ, “Simon, banyɛ tatá abapɛ wɔ. 20 Kliso lɔ tɛ̀ ozhi ɔvɛ kesiɛ. Tizĩ kibè nɛ tɛvɛvɛ nɛ alɛ ɔmɔsɛ mɛkpɛ alɛ nɛ wɔkɔ.” 21 Petro ezhi avɛ banunɔ ɔbha kɛlɛ editseɖe balɛ asɛ, “Mɛinu anunɔ gɛ nɔpɛ nɔ. Kiɖuwoe sopɛ nɔba?” 22 Banyɛ ebuiliulũ asɛ, “Bude Keyuiza otugbànɔ Kornelio ɔkɔ. Enu anɔ gɛ yɛishu dalɛ pɛ esi Owusoso Akaa nɛifù, anɔ gɛ Yudanɛ petee adɛmɛ yɛibui. Axɔ̃ɛdɛ dadalɛ teli etseɖe yɛasɛ akɔ wɔba yɛɔpã mɛ tɛ̀ ebelũ wɔebuiɛ gɛ ɔpɛ ɔsɛ tɛ̀ ɔɖɔ otseɖe yɛ.” 23 Kliso Petro ayɛkɛ banyɛ akpɛ yɛɔpã mɛ asɛ yefù ana. Gɛ keliɛ azaa, Petro avɛ nɛ̀ balɛ, kɛlɛ badzya teli nɛ Yopa tsyɛ atɔnɔ balɛ avɛ. Petro Avɛ Kornelio Pãmɛ 24 Bediku Kaisarea nɛ kelizazaa mɛ̀. Kornelio ezeɖi balɛ kidzo mɛ kliso ekulu yɛeshopo alɛ nɛ̀ yɛɔbhia alɛ eshogò. 25 Gɛ Petro etsoku bɔpã mɛɛ, Kornelio abatsyana yɛ kɛlɛ edzu ekluisi esi nɛ yɛotugbà tɛ alɔkɔ akasɛ ishu esi zhizhinɔ ɔkɔɛ. 26 Pɔ Petro efeke yɛ ewunɔ pɛ aɖɔ asɛ, “Lɔɛtití, anɔdzyrame ete mɛtsyɛ inu.” 27 Kibeɛ gɛ azaɖɔaɖɔ niyɛ̀ɛ, Petro etsoku kɛmɛɛ kɛlɛ adɛ tɔnɔ banɔɛza gbagbla tili gɛishogò dzì. 28 Kɛlɛ Petro etseɖe alɛ asɛ, “Nonyi piapii ɔsɛ, ɔsha ogɛkɔ kidzo ɔsɛ Yudaeyi nanà akpɛ ɔha nɛ̀ anunɔ gɛetinu Yudaeyi alo tɛ̀ avɛ yɛɔkɔ tsyɛ. Pɔ Owusoso Akaa ebui ɛlɛ akasɛ mɛ asɛ, ɛtakà kulu anɔ nanà ɔsɛ̀ yɛishu gɛdalɛ alo ligibhui. 29 Kliso gɛ nɔkpɛ banɔ nɛ miedeɛ, igishukù mɛtakpu pɛ ɛɖɔ ɔsɛ ɛtɛbà. Otsiɛ nɔkɔ mɛitì kɛnɔnɔ shu so pɛ nɔkpɛ banɔ nɛ miedeɛ.” 30 Kornelio ebuiliulũ asɛ, “Ewui talɛ ede nɛ alɛ gɛizi kulu kitití ayɛ nɛ mɛɔpã mɛ, nɛ kemuze ɔɖa tatá tɛta mɛ. Nɛ matì matì mɛɛ, ɛmɔ anyɛ teli nɛ bɔdɔ̃ kpɛkpɛ gitséɛ mɛ gɛ eli kititì nɛ mɛotugbà. 31 Kɛlɛ aɖɔ asɛ, ‘Kornelio, Owusoso Akaa elũ wɔ tikukuluɔ gɛ okulu yɛ, kɛlɛ abakà ɛyamɛ gbangbã gɛ ɔbhɛtɛ ɔkɔ betsyuitsyuiɛ. 32 Kpɛ banɔ nɛ Yopa tɛ̀ bedikulu Simon gɛ bekulu tsyɛ asɛ Petro ɔmana. Atsɛ nɛ Simon gɛenu bagãpi axɔ̃ɛwɔaelete ɔkɔ, anɔ gɛ yɛɔpã lɛ aƒuɔ shuɔ.’ 33 Kliso odunũ ɔlɛ koɔ kɛlɛ mɛkpɛ banɔ nɛ wuiede, kɛlɛ apɛ asɛ ɔba. Bɔlɔ pete lɛ Owusoso Akaa namɛ pɛ bɔtaatɔ̃ nɛ̀ kɛka nyia ka gɛ Apaleteɛ akpɛ wɔahɔɛ asɛ tɛ̀ otseɖe bɔlɔɔ.” 34 Kɛlɛ Petro akpa kaɖɔɖɔ asɛ, “Otsi alɛ ilũ kɛlɛ esi piapii ɔsɛ, Owusoso Akaa etiɖì banɔ amɛ 35 pɔ ayɛkɛ banɔ edenɔ kɛmadi ka nyia ka mɛ gɛ esì yɛifu pɛ abhɛtɛ kɛgɛ ɛlɛ kɛlɛ ɔzãkɔ. 36 Nonyi kibuiɛ gɛ Owusoso Akaa asɛsɛ Israelanɛ, asɛ tɛ baɖɔ ishu yɔyɔ kibui gbangbã ɔgana Yesu Kristo abha gɛenu Apalete akɔ kɛka nyia ka. 37 Nonyi kɛgɛ ba ɛlɛ mɛ nɛ Yudea petee, bakpɛ kɛlɛ esi odenɔ Galilea, nɛ bulĩkpɛkpɛ kibui gbangbã gɛ Yohanes aaɖɔ niede, 38 kana gɛ Owusoso Akaa asara bɔbɔ akɔ Yesu Nazareteyiɛ nɛ̀ Ɔfɔfuĩa Gbangbã nɛ̀ ohumi, nɛ kana gɛ azagã fala pɛ azabhɛtɛ ebui gbangbã, pɛ ebu banyã nɛ bagazã abosam yɛ ohumi niesi pete mɛ, ɔmɔsɛ Owusoso Akaa azãplɛnii. 39 “Bɔzã mɔ kɛka nyia ka gɛ abhɛtɛ nɛ Yudanɛ kesiakpa nabha nɛ̀ Yerusalem. Pɔ bakpalà yɛ nɛ osi shu yɛetsí. 40 Pɔ Owusoso Akaa efeke yɛeyinɔ nɛ bekpuɔ mɛ nɛ kiwui tramɛ nabha, kɛlɛ ebui yɛakasɛ banɔ. 41 Gɛnɛ anɔ ka nyia ka yɛamɔɛ. Pɔ bagɛ Owusoso Akaa ebu elu pɛ bamɔ ebuiɛ gɛ abhɛtɛɛ, nɛ bɔlɔ gɛ bɔŋã pɛ bɔwɔɛ nɛyɛ nɛ kibeɛ gɛ alɔ edenɔ bekpuɔ mɛ ede. 42 Akpɛ ɔlɔ asɛ bɔɖɔ Kibui Gbangbã tseɖe banunɔ, tɛ̀ bɔkɔ beti asɛ yɛenu anunɔ gɛ Owusoso Akaa asara bɔbɔ akɔ asɛ tɛ ekulu kebhu nɛ̀ benunuɔ nɛ̀ betsitsíɛ petee. 43 Bebuiɖɔluanɛ pete aɖɔ nɛishu asɛ, anɔ ka nyia ka gɛ ayɛkɛ yɛabha ŋãa, babàlɔkɔ yɛ ebui kpa etsye yɛ gana yɛinye mɛ.” 44 Kibeɛ gɛ Petro azaɖɔ ebui alɛ, Ɔfɔfuĩa Gbangbã ɔba banunɔ gɛelũ kibuiɛ petee abha. 45 Kɛbhɛtɛ bayɛyɛkɛŋã gɛ bebhui kɛhɔ̃a kɔ alɛ pɛ batɔnɔ Petro nɛibi ɔsɛ Ɔfɔfuĩa Gbangbã tɛyɛyɛkɛ ba bagɛ betinu Yudanɛ tsyɛ abha. 46 Ɔmɔsɛ belũ gɛ bezehu beluhũ vɔvɔ pɛ baakpɛ Owusoso Akaa nɛinyè nɛitití. Kɛlɛ Petro aɖɔ asɛ, 47 “Anɔ teli abalà abhɛtɛ ɛlɛ asɛ tɛ batɛ kpɛ bulĩ akɔ banɔ alɛ dza?” Balɛ tsyɛ ayɛkɛ Ɔfɔfuĩa Gbangbã asɛ kana gɛ bɔyɛkɛ̀ ɔlɛ ana. 48 Kliso akɔ bakpɛ bulĩ akɔ alɛ nɛ Yesu Kristo yɛinyeɛ mɛ. Kɛlɛ bebisi edenɔ Petro ɔkɔ asɛ tɛ̀ azã balɛ ɔbha ewui bhlui teli. |
© (Active), Ghana Institute of Linguistics, Literacy and Bible Translation. All rights reserved.