Yo-el 3 - RUAC KUƆTH IN RƐL RƆ

Luk Kuɔth kɛ döör tin kɔ̱ŋ

¹ “Kɛ ni̱ni tɔ̱tɔ̱, ɛn guäth ɔ, mi wa Juda kɛnɛ Jɛ-ru-tha-lɛm wä luɔ̱c buɔ̱mdiɛn.

² Ɣän bä döör diaal duɔl wi̱i̱ lo̱o̱lä mi cɔali Yɛ-ɣo-ca-pat, kɛ ɣöö bäkɛ wä luk thi̱n. Kɛ kui̱ kä tin diaal tin ca lät kä nɛɛkä ni ji̱ I-thɛ-rɛl. Inɔ cikɛ kɛ riaw rɛy nɛɛni kɔ̱kiɛn, kä cikɛ mundä da̱a̱k.

³ Yor kɛn gaakni kɛ kui̱ nɛɛnikä, kɔakɛ dhɔɔl kɛnɛ nyier ala ja̱a̱ŋ, kɛ ɣöö ba yio̱w ben kɔk ni leer kɛnɛ kɔaŋ.

⁴ “A ku yɛn a ŋu kä ɣä, yɛn ji̱ Dhor kɛ yɛn ji̱ Dhi-don kɛ yɛn ji̱ Pi-li-thɛt diaal? Go̱o̱r yɛnɛ i̱ bia ɣä cuɔ̱l mi cä la̱t? Kä mi ɛ jɛn inɔ, mi wä yɛn ɣä cuɔ̱l duɔ̱ɔ̱r, niɛ täämɛ kɛ pɛ̈th bä lät jiäknikun tin cia la̱t cuɔ̱l yɛ.

⁵ Kɛ ɣöö cia til ciɛkdä min bo̱r kɛnɛ dääpdä ka̱n, kä cia gɔɔy ti̱lädä naŋ rɛy lueeknikun.

⁶ Kä ci yɛn ji̱ Juda kɛn ji̱ Jɛ-ru-tha-lɛm kök ji̱ Gɛ-rith cia kɛ nɔ̱a̱n kɛ dho̱rkiɛn.

⁷ Kä nɛ̈nɛ jɛ ɛn täämɛ ɣän bäkɛ wä jiɛc gua̱thni tin cia kɛ wä kɔak thi̱n, kä bä lätkun luɔc ni wi̱i̱dun.

⁸ Bä gaatkun kɛnɛ nyieekun kök gaat Juda, kä bikɛn kɛ lɛ wä kök ji̱ Cɛba, nɛy ti nɔ̱a̱n ɛlɔ̱ŋ, ɛ jɛn ruacdä ɣän Kuɔth Nhial.”

⁹ Latdɛ ruac ɛmɛ rɛy dööri diaal i̱, rialɛ rɔ̱ ikä kɛ kui̱ köör. Cɔalɛ wäth köörun. Jakɛ wutni köör diaal kä bä thiekä wanɛ mɛ.

¹⁰ Kä jakɛ yamɛnikun kä thɛpni, kä jakɛ puɔ̱rikun kä mutni. Ɛ nyuän laar jɛ i̱, “Ɛ ɣän wääth köör.”

¹¹ Ŋɔalɛ ben kɛ pɛ̈th, yɛn ji̱ wec muɔ̱ɔ̱n diaal pëkni diaal, kä duɔlɛ rɔ̱ ɛn wi̱ni, ku rɛmdu jäk kä piny, lö Kuoth Nhial.

¹² Kä a ji̱ wec muɔ̱ɔ̱n rɔ rialikä, kä akɛ bä wi̱i̱ lo̱o̱lä Yɛ-ɣo-ca-pat. Ɛn wi̱ni bä nyuur kɛ ɣöö bäkɛ ben luk.

¹³ Kɛ ɣöö di̱t dueerkiɛn ni kakä bɛɛl mi ci cop, kɛ kui̱ ɛmɔ rial ɛ carcaari ikä kɛ ŋër bɛɛl, kä bi kɔaŋdiɛn in ba dhiɛm thääk cu thia̱ŋ a lɛnykɛ.

¹⁴ Bathdɔɔri ti bathdɔɔri nath ka wi̱i̱ lo̱o̱lä ŋukä luɔ̱k. Ɛn gua̱a̱th ɛmɛ, ci cäŋ Kuɔth Nhial thia̱k kɛ ben thi̱n.

¹⁵ Kä ci cäŋ kɛnɛ pay a muth, kä ci kuɛl riaw riaawdiɛn thil.

Puɔ̱th Kuɔth kɛ nɛɛkɛ

¹⁶ Kuoth Nhial tuɔ̱kɛ ni kä Dha-yɔn, kä päl jɔwdɛ ni kä Jɛ-ru-tha-lɛm, cɛ nhial kɛnɛ piny cu lath. Duundɛ ɣöö Kuoth Nhial ɛ gua̱th luäkä kä nɛɛkɛ, ɛ köt mi bum kä ji̱ I-thɛ-rɛl.

¹⁷ “Kä bia cu ŋa̱c, ɛn ɣöö ɛ jɛn ɣän Kuoth Nhial Kuothdun, in cieŋ kä Dha-yɔn, wi̱i̱ päämdä in rɛl gɔɔydɛ rɔ. Kä bi Jɛ-ru-tha-lɛm a wec mi rɛl rɔ, mi /ca bi lɛ me̱t ka̱n ɛ nɛy kɔ̱kiɛn.

¹⁸ Ɛn cäŋ ɛmɔ bi pääm diaal wuɔ̱th kɛ kɔaŋ mi kɛc kɛc, kä bikɛ lo̱o̱ny kɛ cak, kä bi wäŋ Juda diaal tekɛ pi̱ ti ŋuan, kä bi waŋ pi̱kɛ ben ni luaak Kuɔth Nhial, lonykɛ rɛy lo̱o̱lä Ci-tim.

¹⁹ “Kä ɛn I-jëp bɛ da̱k kä ba Ɛ-dɔm gɛy ce̱tnikɛ därdɔaar. Kɛ ɣöö cikɛ ji̱ Juda ciɛŋ a jiäk, kä cikɛ kɛ na̱k baŋ wi̱i̱diɛn.

²⁰ Duundɛ ɣöö ba Juda ciɛŋ a thil pek, kä Jɛ-ru-tha-lɛm ba ciɛŋ ɛ ri̱c diaal ɛ wee kɛ wä.

²¹ Kä bä nɛy tëë ca näk col, kä /cä ji̱ dueeri bi pälikä. Kɛ ɣöö ɣän Kuoth Nhial bä cu cieŋ kä Dha-yɔn.”