Yo-el 2 - RUAC KUƆTH IN RƐL RƆ

Läär kɛ cäŋ Kuɔth Nhial

¹ Kuɔth ɛ kaaŋ läärä kä Dha-yɔn, päämdä min rɛl gɔɔydɛ rɔ! Kä a ji̱ wi̱c diaal lathɛ kɛ dual, kɛ ɣöö ci cäŋ Kuɔth Nhial thia̱k kɛ ben.

² Ɛ jɛn cäŋ muɔ̱th wunä mi col, rɛm mi di̱i̱t mi bum a bëëni, cäänɛ jɛ päämni a cɛ ɣɔw kum ɛ dur ce̱tkɛ muth. Thilɛ duɔ̱ɔ̱r mi ci me̱t ce̱tkɛ jɛ ni tukä ɣɔaa, kä /cɛ rɔ bi me̱t nyɔk ri̱cni tɔ̱ bi ben tɔ̱.

³ Nhiamdiɛn ɛ mac waŋä mi pɛt ti diaal, kä jɔkdiɛn ɛ bo̱l maac mi pɛt. Nhiamdiɛn ci piny ce̱tnikɛ kak E-dɛn, kä jɔkdiɛn ɛ därdɔaar mi luɔ̱t, mi thil ka̱n mi dëë me̱t jek thi̱n.

⁴ Ce̱t nëndiɛn kɛ nën jio̱o̱kni tuɔ̱ruɔ̱k, kä wurkɛ ce̱tnikɛ jiöŋkööri.

⁵ Kɛ min kackɛ biɛɛni päämni. Tekɛ gi̱r gi̱r ce̱tkɛ nikɛ thurbiɛɛli, kä tëë gäk gäk ce̱tkɛ mac waŋä. Cikɛ rɔ luay ce̱tnikɛ rɛm, ce̱t kɛn kɛ lathker mi bum mi rial rɔ ikä kɛ wä ko̱o̱r.

⁶ Kɛ nëndiɛn, la nɛy diaal a bath. Kä cɛ wäŋ diaal cu yɔm.

⁷ Ce̱tkɛ wäth köör la ma̱kɛ naath, kɔatkɛ pa̱nyni ce̱tkɛ lathkëëri. Kɛn diaal jääl ram ɔ ni duɔ̱ɔ̱pdɛ, a /ca lɛ päl, wä ni kɛn kɛ wä.

⁸ A /ci ram ɔ dee lɛ me̱t wä dup raam min dɔ̱ŋ, jääl ram ɔ ni duɔ̱ɔ̱pdɛ, rɛy mutni ti ŋuan wä ni kɛn kɛ wä thi̱n, amäni min cikɛ kɛ joc.

⁹ La kackɛ wi̱c, a /ci pa̱nyni kɛ gaŋ. Kä kööt kɛn duel cothkɛ rɛc ce̱tkɛ cueec kɛ wernyini.

¹⁰ Kä lathɛ piny kɛnɛ nhial nhiamdiɛn, bi cäŋ kɛnɛ pay a muth, kä bi kuɛl riaw riaawdiɛn thil.

¹¹ Ɛ jɛn cu jɔw Kuɔth Nhial ben kä rɛmdɛ min di̱i̱t, kɛn tin liɛŋkɛ ruacdɛ bumkɛ kä ŋuankɛ. Inɔ bi cäŋ Kuɔth Nhial ku lɛ bɛ̈c i̱di! Kä ɛŋa bi jɛ rut ɔ?

Ciöt kɛ riet nath kɛ rɔ

¹² Kä ci Kuoth Nhial ɛ lar i̱, “A cäŋɛ niɛ täämɛ, luɔ̱nyɛ kä ɣä kɛ lɔcdun kɛɛliw kɛ thëk kɛnɛ wiee.

¹³ A jiɛth ni lo̱ckun, a /ci mɔ a rɛtni bieyni.” Bia ri̱etdɛ rɔ̱ Kuoth Nhial ni Kuothdun, kɛ ɣöö ɛ Kuoth mi gɔaa mi tëë kɛ pälikä, kuiy gakdɛ kä di̱t nhökdɛ mi thil pek. Ni ciaŋ tekɛ pälikä kɛ ji̱ dueeri tin ca rɔ̱ ri̱t.

¹⁴ Kä ɛŋa mi ŋäcɛ i̱ dɔ̱ŋ bi Kuoth Nhial wi̱cdɛ car, a bɛ yɛ poth. A dee yɛn ɛ cu moc kɛ muc bɛɛl kɛnɛ kɔaŋ.

¹⁵ Kuɔth ɛ kaaŋ kä Dha-yɔn. Kä la̱tdɛ thëk mi thuɔ̱k, kä cɔalɛ duɔl matdä nath mi rɛl rɔ.

¹⁶ Duɔlɛ naath guäth kɛl, rialɛ kɛ ikä ala ti ca lɛy. Duɔlɛ nɛy tin di̱t kɛɛl, kɛ gaat amäni tin pay dap bä, a kɛn diaal bëë amäni tin pay kuɛɛn.

¹⁷ Kä ɛ bööth palä, tin la ji̱ la̱t Kuɔth Nhial pal kɛ wiee kam yi̱kä kɛnɛ thok luaak Kuɔth. Wäkɛ i̱, “Aɣ Kuoth Nhial päli nɛɛku ikä, /cu kɔ lɛn jak kä yakɛ, kä dɔal kɛ kɔ ɛ nɛy kɔ̱kiɛn, ɛ lar kɛnɛ i̱, ‘Kuothdiɛn a ni kä?’ ”

Luc Kuoth mun gɔɔydɛ

¹⁸ Ɛ jɛn cu Kuoth ku diɛɛr kɛ mun nɛɛnikɛ, a kɔ̱c lɔcdɛ kɛ nɛɛkɛ.

¹⁹ Cu Kuoth Nhial nɛɛkɛ ku loc, jiökɛ kɛ i̱, “Nɛ̈nɛ jɛ ɣän ja̱kä yɛ kä bɛl, kɔaŋ, kɛ liɛth ti ba yɛ ro̱ŋ. Kä /cä yɛ bi jak kä ba nyɔk kɛ ya̱k ɛ nɛy kɔ̱kiɛn.

²⁰ “Ɣän bä rɛm in bä kui̱ caam woc, bä tha̱a̱ŋkiɛn cuac rɛy dɔaar. Bä tin nhiamkiɛn cuac rɛy Bar in Wac, kä tin jɔak bäkɛ cuac rɛy Bar in Bo̱r in te kam wi̱i̱ni. A bi ŋuäny ri̱ŋdiɛn jiääk. Bäkɛ nor kɛ kui̱ kä tin diaal tëë ca lät kä yɛ.

²¹ “/Cu dual, lö mun, a lɔcdu tɛth, kɛ kui̱ kä tin di̱t tin ci Kuoth kɛ la̱t.

²² Kä /cuarɛ dual lö ley dɔaar, kɛ ɣöö ci tɔ̱a̱ri a tɔ̱ɔ̱c kɛ wal, kä ci jiɛn dɛykiɛn kuir, a ci bɛl ŋuan.

²³ “A lɔcdun tɛth, yɛn ji̱ Dha-yɔn, ɛ lɔcdun tɛth kɛ Kuoth Nhial in la Kuothdun, kɛ ɣöö cɛ yɛ moc kɛ nhiaal ala cuɔ̱ɔ̱ŋdun, kä cɛ yɛ wuɔ̱c nhiaal jiɔam kɛnɛ nhiaal ruëël ce̱tkɛ mëë wenkä.

²⁴ Gua̱th kɔ̱a̱m bɛɛl bikɛ thia̱a̱ŋ, kä bi thääk thia̱ŋ kɛ kɔaŋ kɛnɛ liɛth.

²⁵ “Ɣän bä yɛ cuɔ̱l run tëë bäkɛ buɔ̱n kɔaryɔam mëë cam bɛlkun, a bɛ kɛ dup ɛ dup. Ɛ ɣän ɛn nëë jäk rɛm kɔaryɔamdä min di̱i̱t kä rɛydun.

²⁶ “Ɛn täämɛ bia tekɛ ti ŋuan ti bia cam, a bia ria̱ŋ. Kä bia ciöt Kuoth Nhial in la Kuothdu cu liak, mëë ci yɛ lät kä ti gɔw. Kä /ca nɛɛkä bi me̱t nyɔk kɛ jak kä po̱c amäni cäŋ.

²⁷ Kä bia cu ŋa̱c ɛn ɣöö ɛ ɣän ɛn nëë te kɛɛl kɛ ji̱ I-thɛ-rɛl, kä ɣän Kuoth Nhial ɛ ɣän Kuothdun, ɛ ni ɣän kärɔa, thilɛ Kuoth mi dɔ̱diɛn. A /ca nɛɛkä bi me̱t nyɔk kɛ jak kä po̱c amäni cäŋ.”

Cäŋ Kuɔth Nhial

²⁸ “Kɛ kɔr kä mɔmɔ ɣän bä yiëëdä wuɔ̱c nɛy diaal. A bi gaatkun kɛnɛ nyieekun ruaacni go̱o̱kä lat. Kä bi di̱t wutnikun la̱a̱k läkikä, kä bi ŋuɛ̈tnikun nyuuthni nɛn.

²⁹ Ɛn ni̱ni tɔ̱tɔ̱ bä yiëëdä wuɔ̱c ja̱a̱ŋ diaal bä, wutni kɛnɛ män.

³⁰ “Kä bä nyuuthni ŋun, nhial kɛnɛ piny, riɛm kɛnɛ mac kɛ wuɔ̱n tuɔɔl.

³¹ Bi cäŋ riet ala muth, kä bi pay riet ala riɛm a /ken cäŋ Kuɔth Nhial ni ben cäŋ bɛcä in di̱i̱t.

³² Kä kɛn tin diaal tin cɔalkɛ ciöt Kuɔth Nhial bikɛ cu kään, nikɛ mëë ci Kuoth Nhial ɛ lar ba ka̱n jek pääm Dha-yɔn kɛnɛ rɛk Jɛ-ru-tha-lɛm, rɛy nɛɛni tin ci kään ba tha̱a̱ŋkiɛn kuany ɛ Kuoth Nhial.”