Yɛdh 9 - RUAC KUƆTH IN RƐL RƆ

Näk ji̱ kuthni guäyni

¹ Kä cua̱ Kuɔth liŋ cio̱tdɛ kɛ jɔw mi di̱i̱t wëë i̱, “Bia wanɛ mɛ yɛn tin ba wec ben däk, a te ramɔ yio̱w köörɛ tetkädɛ.”

² Kä cu wutni da̱ŋ bäkɛl käny raar kɛ thok in te nhial min lot ni kui̱c caam, a te ram ɔ yio̱w köörɛ tin buɔ̱m buɔ̱ɔ̱m tetädɛ. Kä te rɛydiɛn kɛ wut mi ciɛŋ bi̱i̱ mi ca tak agɔaa kä te duŋ gɔ̱rä gekädɛ. Cukɛ wä rɛc kä cukɛ wä cuɔ̱ŋ gekä yi̱kä cikä min yian.

³ Kä täämɛ, cu wuɔ̱t Kuɔth I-thɛ-rɛl rɔ jiac nhial kä ley tin tekɛ gɔ̱k, guäth in la tëë thi̱n, kä cuɛ wä ni thok luaak Kuɔth. Kä cu Kuoth Nhial wut in tekɛ bi̱i̱ mi ca tak agɔaa kä te duŋ gɔ̱rä gekädɛ cɔl.

⁴ Kä cuɛ jɛ jiök i̱, “Wër, jäl rɛy wec Jɛ-ru-tha-lɛm, wër moc nhiam nɛɛni tin jiɛth lo̱ckiɛn kä pär kɛ kui̱ jiäkni diaal tin la̱tkɛ kä Jɛ-ru-tha-lɛm kɛ biɛl.”

⁵ Kä min ta̱a̱ li̱ŋ, cuɛ nɛy ti kɔ̱ŋ jiök i̱, “Wiaa ja̱lɛ rɛy wec kɛ kɔr wutdä mɔmɔ wiaa na̱kɛ naath, kä /cuarɛ raan päl kä /cuarɛ tekɛ nhök kɛ raan.

⁶ Na̱kɛ dɔŋ wutni kɛnɛ män, kɛ ŋuɛ̈tni wutni kɛnɛ ŋuɛ̈tni mään, kɛ gaat, duundɛ ɣöö /cuarɛ nɛy tin tekɛ biɛl gueer. Kä tuɔkɛ jɛ ni luaakdä.” Ɛ jɛn, cu kɛn ɛ tok nikɛ di̱t tin te thok luaak Kuɔth.

⁷ Kä cuɛ kɛ jiök i̱, “Ya̱rɛ luak, thia̱ŋɛ rɛy kal kɛ pua̱ny nɛɛni tin cia näk. Wiaa!” Inɔ, cukɛ wä cukɛ naath wä näk rɛy wec.

⁸ Kä min näk kɛn naath, cua ɣä ba̱ny piny ɣän kä rɔaadä, cu lɔcdä jiääk kä cua̱ wiee wa̱a̱ i̱, “Aɣ Kuäär ni Kuoth Nhial! Ɛ bikɛ ku näk kɛn nɛy diaal tëë ci kään kä I-thɛ-rɛl mëë ci ŋɛ̈ɛ̈nydu luɔny kä Jɛ-ru-tha-lɛm?”

⁹ Kä cuɛ ɣä jiök i̱, “Dueer ji̱ dhɔaar I-thɛ-rɛl kɛnɛ Juda di̱tkɛ ɛlɔ̱ŋ. Kä mun cɛ thia̱ŋ kɛ riɛm, kä wec ɛ gua̱a̱th nyuɔɔni, kɛ ɣöö ruac kɛ i̱, ‘Ci Kuoth Nhial wec ba̱ny piny, kä jɛn Kuoth Nhial /cɛ nen.’

¹⁰ Duundɛ ɣöö ɣän /cäkɛ bi pälikä, kä /cä bi tekɛ nhök kɛ kɛ, duundɛ ɣöö bä lätkiɛn tin jiäk la̱th ni wuɔ̱thnikiɛn.”

¹¹ Ɛn wan ɔ, cu wut in ciɛŋ bi̱i̱ in ca tak agɔaa ruac luɔ̱ɔ̱c jɔk wëë i̱, “Cä jɛ la̱t ce̱tnikɛ mëë ci la̱r ɣä.”