Yɛdh 8 - RUAC KUƆTH IN RƐL RƆ

Lät nyuɔɔni rɛy luaak Kuɔth

¹ Kɛ cäŋ kä dhieec kä bäkɛl päthni kɛ bäkɛl runi, mëë ta̱a̱ nyuurä dhɔrä, kä te di̱t Juda nyuurä nhiamdä, cu buɔ̱m Kua̱r ni Kuoth Nhial ben kä ɣä ɛn wani.

² Kä cua̱ guic, cua̱ mi ce̱tkɛ raan nɛn, ɛ känɛ jɛ lɛtädɛ a bä piny ce̱t ta̱a̱dɛ kɛ mac. Kä a känɛ lɛtädɛ a wä nhial riawɛ ce̱t ta̱a̱dɛ kɛ ciɛk la̱ŋ mi jaŋ jaŋ.

³ Kä cuɛ mi ce̱tkɛ tet riny. Kä cuɛ ɣä käp kɛ miem wecdä. Kä cu yiëë ɣä kap nhial kam piɛny kɛnɛ pua̱a̱r. Kä cuɛ ɣä naŋ kä Jɛ-ru-tha-lɛm kɛ nyuuth Kuɔth kɛ duɔ̱ɔ̱p thuɔk kal in te rɛci, min lot ni kui̱c caam, min te puɔ̱ny kuɔth guääyni min la jak Kuoth kä ŋɛ̈ɛ̈ny thi̱n.

⁴ Kä cua̱ gɔɔy Kuɔth I-thɛ-rɛl nɛn ɛn wani, ce̱tnikɛ nyuuth ëë cä nɛn mëë ta̱a̱ rɛy lo̱o̱lä.

⁵ Kä cu Kuoth ruac kɛ ɣä wëë i̱, “Gat ran, guic nhial pek caam.” Kä cua̱ guic pek caam, kä ɛ wani thok rɛ̈ɛ̈k kuec caam gekä yi̱kä, te puɔ̱ny in la jak Kuoth kä ŋɛ̈ɛ̈ny thi̱n.

⁶ Kä cuɛ ruac kɛ ɣä wëë i̱, “Gat ran, ji̱n nɛɛni tɔ̱ lätkɛn kɛ tɔ̱? Jiäk tɔ̱ di̱t tɔ̱ lät ji̱ I-thɛ-rɛl kɛ tɔ̱ wanɛ mi, tin jakɛ ɣä kä ɣöö bä na̱n kɛ luaakdä? Duundɛ ɣöö bi ŋot kɛ mi nɛɛni ti di̱t kɔ̱kiɛn ti jiäk.”

⁷ Kä cuɛ ɣä naŋ thok kal in te raar, kä cua̱ guic cua̱ kɔ̱a̱a̱k mi te puɔ̱ɔ̱ny pa̱a̱ny nɛn.

⁸ Kä cuɛ ɣä jiök i̱, “Gat ran, ji̱n tɛt puɔ̱ny pa̱a̱ny,” kä min cä puɔ̱ny pa̱a̱ny tɛt, cua̱ thok mi wäkɛ naath rɛc jek ɛn wani.

⁹ Kä cuɛ ɣä jiök i̱, “Wër rɛc, kä nɛn tin jiäk tin la̱tkɛ ɛ kɛn ɛn wanɛ.”

¹⁰ Inɔ, ɣän cua̱ wä rɛc, kä cua̱ guic, ɛn puɔ̱ny pa̱a̱ny ca jɛ thiäŋ kɛ thurɛni muɔɔli diaal, kɛnɛ ley ti jiäk, amäni kuth ji̱ I-thɛ-rɛl diaal.

¹¹ Kä te di̱t ji̱ I-thɛ-rɛl ti jiɛn bärɔw cuŋä nhiamdiɛn ɛn wani, kä te Yɛ̈-ä-dhɛ̈n-yaa gat Ca-pan cuŋä rɛydiɛn. Kä te ramɔ kɛ mi waaŋɛ ni wäl in kur kur tetädɛ, kä ci tol wa̱l in kur kur rɔ jiac ni nhial.

¹² Kä cu Kuoth ruac kɛ ɣä wëë i̱, “Gat ran, ji̱n ci min la̱tkɛ ɛ di̱t ji̱ I-thɛ-rɛl kɛ tɛ̱̈ɛ̱̈ nɛn, min te ram ɔ guäth kuɔth guäynidɛ? Kɛ ɣöö ruackɛ wäkɛ i̱, ‘Kuoth Nhial /cɛ nɛy nɛn, Kuoth Nhial cɛ mun ba̱ny piny.’ ”

¹³ Kä cu Kuoth ɣä jiök bä i̱, “Ji̱n bi ŋotkɛ mi nɛɛni ti jiäk kɔ̱kiɛn ti di̱tnikɛn kä ti lät kɛn kɛ ti.”

¹⁴ Kä cuɛ ɣä nöŋ thok kal luaak Kuɔth in te kui̱c caam, te män nyuurä ɛn wani wiee kɛ parkɛ kuoth Ta-mudh.

¹⁵ Kä cuɛ ruac kɛ ɣä wëë i̱, “Ji̱n ci nɛmɛ nɛn lö gat ran? Kä bi ti jiäk ti ŋuan ti di̱tnikɛn kä ti̱ti̱ nɛn.”

¹⁶ Kä cuɛ ɣä nööŋ, thok kal luaak Kuɔth in te rɛci. Kä ɛn wani, gekä thuɔk luaak Kuɔth rɛci, kamä yi̱kä kɛnɛ bäŋ te wutni ti jiɛn da̱ŋ rɛw wi̱cdɛ dhieec thi̱n, ti ca jio̱kiɛn riet luaak Kuɔth, kä cikɛ nhiamdiɛn riet kui̱c känyä ca̱ŋ, käm kɛn rɔ̱ mua̱a̱l palkɛ cäŋ.

¹⁷ Kä cu Kuoth Nhial ɣä jiök i̱, “Gat ran, ci mɛmɛ nɛn? Cɛ jiäk ɛlɔ̱ŋ ɛn ɣöö lät thok duëël Juda dueer ti di̱t ti la̱tkɛ ti ɛn wanɛ? Ɛ bi kɛ wec ku dhil kɛ muɔ̱c gak gaakni ti ba ŋɛ̈ɛ̈nydä jak kä ŋot kɛ wä nhiam? Kä nɛnɛ kueth kɛn ni ɣä kɛ ti diaal!

¹⁸ Kɛ kui̱ ɛmɔ, ɣän bä lät kɛ waŋ lɔaac, kä /cä kɛ bi guic agɔaa, kä bä thil pälikä kɛ kɛ. Kä cäŋ bikɛ ben wiee ni ji̱thdä kɛ jɔw mi di̱i̱t, ɣän /cäkɛ bi liŋ.”