Yɛdh 7 - RUAC KUƆTH IN RƐL RƆ

Ben guutdä I-thɛ-rɛl

¹ Kä cu ruac Kuɔth Nhial ben kä ɣä wëë i̱,

² “Ji̱n lö gat ran, mɛmɛ ɛ ruacdä ɣän, Kuäär ni Kuoth Nhial, min la̱tdä muɔ̱ɔ̱n ji̱ I-thɛ-rɛl. Guut! Ci guut ben bëë pekni ɣɔaa da̱ŋ ŋuaan.

³ Täämɛ guut cɛ ben kä yɛ, ɣän bä ŋɛ̈ɛ̈nydä luɔ̱ny yɛ. Ɣän bä yɛ luk ce̱tnikɛ duɔ̱pkun, kä bä yɛ tɔ̱ŋ kɛ kui̱ dueerikun tin di̱t.

⁴ Ɣän /cä yɛ bi guic gɔɔyä, kä bä thil pälikä. Ɣän bä yɛ tɔ̱ŋ kɛ dupkun, guäth in te dueerkun ni rɛydun. Kä ɛ jɛn bi yɛn ɛ cu ŋa̱c ɛn ɣöö ɛ ɣän Kuoth Nhial.”

⁵ Kä nɛmɛ ɛ min ci Kuäär ni Kuoth Nhial ɛ lar wëë i̱, “Bi riɛkɔ riɛkɔ guɔ̱ɔ̱r! Nɛnɛ, jɛn a bëëni.

⁶ Guut cɛ ben, ci guut ben. Cɛ rɔ jiëc yɛ, nɛ̈nɛ jɛ, jɛn a bëëni!

⁷ Ci da̱kdun ben kä yɛ lö nɛy ti cieŋ muun. Ci gua̱a̱th ben, kä ci cäŋ thia̱k, ɛ cäŋ rikä a /ci mɔ a cäŋ tɛthä lɔaac.

⁸ Kä ni ɛn täämɛ bä ŋɛ̈ɛ̈nydä wuɔ̱c yɛ kɛ pɛ̈th. Ɣän bä ŋɛ̈ɛ̈nydä thuɔ̱k yɛ. Ɣän bä yɛ luk ce̱tnikɛ duɔ̱pkun, kä bä yɛ tɔ̱ŋ kɛ kui̱ dueerikun diaal.

⁹ Ɣän /cä yɛ bi guic agɔaa, kä bä thil pälikä. Ɣän bä yɛ tɔ̱ŋ kɛ dupkun, gua̱a̱th in te dueerkun ni rɛydun. Kä ɛ jɛn bi yɛnɛ cu ŋa̱c ɔ ɛn ɣöö ɛ ɣän Kuoth Nhial ɛ nin duääc yɛ.

¹⁰ Guɛcɛ cäŋ! Nɛ̈nɛ jɛ cɛ ben! Ci da̱kdun rɔ tok. Ci ciaŋdun in thuɔ̱k ku jɔɔc, kä ci liakdun cop ni peekdɛ.

¹¹ Kä gak ɛ kɛɛt nyuɔɔni. Kä thilɛ mi bi kään kä kɛ, kä thilɛ mi bi duɔth kä kuakiɛn kiɛ ria̱ŋdiɛn, kä thilɛ raan rɛydiɛn mi ba ciɛŋ agɔaa.

¹² Ci gua̱a̱th ben, ci cäŋ thia̱k, a ram in kɔk duɔ̱ɔ̱r lɔcdu /ci tɛth, kä a ram min kɔk duɔ̱ɔ̱r /ci pär, kɛ ɣöö te waŋ lɔaacdä kɛ kɛn diaal.

¹³ “Kɛ kui̱ ɛmɔ, nɛy tin kɔakɛ ŋɔak, /cikɛ bi loc kä tin cikɛn kɛ kɔak kɛ pek in ŋotkɛ teekä. Kɛ ɣöö nyuuth ɛmɛ kɛ kui̱ dolä kɛɛliw /ca jɛ bi wäny. Kä kɛ kui̱ dueerikiɛn, thilɛ ram mi bi tëkdɛ kän.

¹⁴ Cikɛ kaaŋ koth kä cikɛ ŋɔak diaal rialikä, duundɛ ɣöö thilɛ ram mi bi wä ko̱o̱r, kɛ ɣöö te waŋ lɔaacdä kɛ kɛn diaal.

¹⁵ Ko̱r a raar, kä juey kɛnɛ buɔth a rɛy wec, kä nɛy tin te rɛy ka̱a̱kni ba kɛ näk ko̱o̱r, kä nɛy tin te rɛy wec, bi buɔth kɛnɛ juey kɛ thuk.

¹⁶ Kä mi wëë tekɛ nɛy ti ca rɔ̱ bar, bakɛ wä jek wuɔ̱thni päämni ce̱tnikɛ guɔ̱kni löli, kä pär kɛn diaal kɛ kui̱ dueerikiɛn.

¹⁷ Kä bɛ tet diaal nuäŋ, kä bi mua̱a̱l diaal kɔ̱a̱c ce̱tnikɛ pi̱.

¹⁸ Kä bikɛ rɔ̱ kum kɛ bieyni cuali, kä bi dual kɛ kum ɛ dur. Kä bi nɛy diaal pöc, kä bɛ kɛn diaal moc wok.

¹⁹ Kä bikɛ ciɛkdiɛn in bo̱r ya̱k rɛy duɔ̱pni, kä bi da̱a̱pdiɛn ce̱tnikɛ mi ca ya̱r. Kä /ci ciɛkdiɛn in bo̱r kɛnɛ da̱a̱pdiɛn kɛ bi kän kɛ cäŋ waŋä lɔaac Kuɔth Nhial. /Cikɛ buɔthdiɛn bi woc, kä /cikɛ jia̱a̱ckiɛn bi thiäŋ kɛ kɛ. Kɛ ɣöö ɛ jɛn min jakɛ kä kac rɛy dui̱rä.

²⁰ Kä liakɛ rɔ̱ kɛ yio̱w pua̱a̱nydiɛn tin gɔw, tëë cua lätni jiäkiɛn, kɛnɛ kuth guääyni. Kɛ kui̱ ɛmɔ, bä kɛn ti̱ti̱ locni mi jiääk kä kɛ.

²¹ Kä bä jɛ ka̱m jur ala pɛ̈c köör, bä jɛ thöp ji̱ nyuɔɔni wec muɔ̱ɔ̱n ala mi ca pɛc, kä bikɛ jɛ ya̱r.

²² Ɣän bä wi̱cdä riet jɔ̱ɔ̱r kä kɛ, kɛ ɣöö dëë kɛ gua̱a̱th in la duŋdä ya̱r, bi ma̱a̱c nath wä rɛydɛ, kä bikɛ jɛ ya̱r.

²³ La̱tdɛ kuatni kɛ kui̱ pɛ̈ɛ̈cni, kɛ ɣöö wec cɛ thia̱a̱ŋ kɛ riɛm, wec cɛ thia̱a̱ŋ kɛ gak gaakni.

²⁴ Ɣän bä do̱r in jiäk ni jɛn nööŋ, kä bɛ dho̱rkiɛn ben ka̱n. Ɣän bä liak nɛɛni tin buɔ̱m buɔ̱ɔ̱m woc, kä ba gua̱thkiɛn tin gɔw ya̱r.

²⁵ Mi wä ti bɛ̈c bɛ̈ɛ̈c wä ben, bikɛ mal go̱r, duundɛ ɣöö thilɛ mal mi bikɛn ɛ jek.

²⁶ Kä ba riɛk guɔ̱ɔ̱r ɛ riɛk, kä ba ca wee guɔ̱ɔ̱r ɛ ca wee. Kä bikɛ nyuuth go̱r kä gök, kä bi ŋi̱i̱c thil kä bo̱o̱th palä, kä bɛ thil luek kä nɛy tin di̱t.

²⁷ Kä bi kuäär pa̱r, kä bi rueec thia̱ŋ kɛ buar, kä bɛ tet ji̱ wec lath. Kä bä lät kɛ kɛ ce̱tnikɛ duɔ̱ɔ̱pdiɛn, kä bäkɛ luk ce̱tnikɛ lukdiɛn in la luk kɛ kɛ. Kä bikɛn ɛ ŋa̱c ɛn ɣöö ɛ ɣän Kuoth Nhial.”