Yɛdh 6 - RUAC KUƆTH IN RƐL RƆ

La̱m Kuɔth Nhial kɛ kuth guäyni I-thɛ-rɛl

¹ Kä cu ruac Kuɔth Nhial ben kä ɣä wëë i̱,

² “Gat ran, ji̱n ri̱tni wi̱cdu peek päämni I-thɛ-rɛl, kä lat ruaacni go̱o̱kä kɛ kui̱diɛn,

³ kä larɛ ɛn ɣöö yɛn pääm I-thɛ-rɛl liɛŋɛ riet Kua̱r ni Kuoth! Kä cu Kuäär ni Kuoth Nhial ruac ɛmɛ lar kɛ kui̱ päämni, kɛnɛ rët kɛ löli kɛnɛ täp ɛn ɣöö, ɣän puɔ̱nydä bä yɛ nöŋ mut, kä bä gua̱th palikun däk.

⁴ Kä bi yi̱knikun a ti ca päl, kä bi gua̱th walkun tin kuɔ̱r kuɔ̱ɔ̱r töl. Kä bä nɛɛkun tin ca näk yuɔr piny nhiam kuthni guääynikun.

⁵ Kä bä ri̱ŋ ji̱ I-thɛ-rɛl tin ca näk yuɔr piny nhiam kuthni guäynikiɛn. Kä bä cɔ̱wkun yäk gëëkni yi̱knikun.

⁶ Gua̱th diaal tin cieŋ yɛn thi̱n, bi wi̱i̱kun a day ti thil raan, kä bi gua̱th palikun da̱k. Kä bi yi̱knikun te ni lutdä. Kä bi kuth guäynikun töl, kä bi gua̱th tin la te cuuŋni wal tin kur thi̱n da̱k, kä bä lätkun diaal woc.

⁷ Kä bi nɛɛkun tin ca näk tëth rɛydun. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.

⁸ “Duundɛ ɣöö, ɣän bä tha̱a̱ŋ nath kän. Kä bi tha̱a̱ŋkun kään rɛy dööri kä ba yɛ kiɛth rɛy wi̱i̱ni.

⁹ Kä nɛy tin bi kään kä yɛ ba ɣä tim rɛy dööri tin ba yɛ naŋ thi̱n ala pɛ̈ɛ̈c. Kä cikɛ lɔcdä jak kä jiäk kɛ ciaaŋ lo̱cnikiɛn kɛ ɣöö cikɛ rɔ̱ ri̱t kä ɣä kä guic wäŋkiɛn tin ni kuth guäynikiɛn. Kä bikɛ rɔ̱ lo̱k kɛ kui̱ jiäkni tin ci kɛn kɛ la̱t kɛnɛ kui̱ jiäkni diaal tin lökä.

¹⁰ Kä ɛ jɛn bikɛ jɛ cu ŋa̱c ɛn ɣöö ɛ ɣän Kuoth Nhial. Ɣän /cä dhiät nikɛ baaŋ kɛ ɣöö bä da̱k ɛmɛ nöŋkɛ.”

¹¹ Kä nɛmɛ ɛ min laar Kuäär ni Kuoth Nhial ɛ wëë i̱, “Patdɛ tetkun, kä pi̱emɛ ciökun kä piny kä larɛ jɛ i̱, ‘Wiee kɛ kui̱ jiäkni kɛnɛ dueer tëë ca la̱t ji̱ thuɔk duëël I-thɛ-rɛl!’ Kɛ ɣöö bikɛ li̱w kɛ ko̱r kɛnɛ buɔth kɛ liaw.

¹² Kä nɛy tin na̱n bikɛ li̱w kɛ juey. Kä bi nɛy tin thia̱k li̱w ko̱o̱r. Kä bi nɛy tin ci kään tin ŋot teekä li̱w kɛ buɔth. Kä bi ŋɛ̈ɛ̈nydä cu pɛn wi̱i̱diɛn inɔ.

¹³ Kä bikɛn ɛ ŋa̱c ɛn ɣöö ɛ ɣän Kuoth Nhial, mi wä nɛɛkiɛn tin ci li̱w te catdä rɛy kuthni guäynikiɛn, gëëkni yi̱knikiɛn kɛ gua̱th pali diaal, kɛ wuɔ̱th päämni tin ba̱r ba̱a̱r, kɛnɛ thär jiɛn tin tɔ̱ɔ̱c diaal kɛ ji̱th kuëli diaal kɛnɛ tin diaal tin la nööŋkɛ ŋuäny mi gɔaa kuth guäynikiɛn.

¹⁴ Kä bä tetdä ri̱c a jiäk kɛ kui̱diɛn, kä bä mundiɛn jak kä te ni lutdä gua̱thni diaal tin cakɛ kiɛth thi̱n ɛ cieŋkɛ thi̱n, ni däär dɔaar wä amäni Rib-laa. Bikɛ jɛ cu ŋa̱c ɛn ɣöö ɛ ɣän Kuäär ni Kuoth.”