Yɛdh 5 - RUAC KUƆTH IN RƐL RƆ

Luk kɛ kui̱ Jɛ-ru-tha-lɛm

¹ Kä cu Kuoth Nhial wee i̱, “Kä ji̱n, lö gat ran, käni thɛp mi moth ce̱tnikɛ reet, kä mut wi̱cdu kɛnɛ ti̱kdu. Kä käni, theemni ti thɛmi nikɛ, kä dääkni miem.

² Kä waŋ kɛl diɔ̱ɔ̱kni mieem kɛ mac rɛy wec, mi wä ni̱n tin ca go̱o̱l ni wec wä thuuk. Kä naŋ kɛl diɔ̱ɔ̱kni mieem kä wër temni jɛ kɛ thɛpdu min jäli jɔk wec. Kä bi kɛl diɔ̱ɔ̱kni kiɛth rɛy jiɔam. Kɛ ɣöö bäkɛ joc kɛ thɛp.

³ Kä bi tha̱a̱ŋ mieem ti tɔt ka̱n bikɛ yian tetdä bieydu.

⁴ Kä bi ŋɔak nyɔk kɛ käni kä miem, kä bikɛ yuɔr maac a bikɛ waaŋ. Kä bi mac ben ɛn wani mi bi ji̱ thuɔk duëël I-thɛ-rɛl diaal waŋ.”

⁵ Kä cu Kuäär ni Kuoth Nhial wee i̱, “Nɛmɛ ɛ jɛn Jɛ-ru-tha-lɛm. Cä jɛ la̱th rɛy dööri, kä ca jɛ go̱l ɛ wi̱c diaal.

⁶ Duundɛ ɣöö jɛn, /cɛ kac raar kä luëëkä kɛnɛ ŋuɔ̱tkä a lenyɛ ni döör kɛnɛ wi̱i̱ tin ca jɛ go̱l, lo̱kɛ ŋuɔ̱tkä kä /cɛ luëëkä guur.

⁷ Kɛ kui̱ ɛmɔ, ci Kuäär ni Kuoth Nhial ruac ɛn ɣöö, ji̱n ci lenyni döör diaal tin ca ji̱ go̱l kɛ nyuɔɔn, kä /keni luëëkä tit kä /keni ŋuɔ̱tkä luɔ̱th, a curi lät ce̱tnikɛ döör diaal tin ca ji̱ go̱l,

⁸ kɛ kui̱ ɛmɔ, ɣän laarä jɛ ɛn ɣöö, ɣän puɔ̱nydä bi ben gaak ni ɣän kɛ ji̱. Bä lukdä ben lat ni rɛydun a nɛn döör diaal ɛ.

⁹ Kä kɛ kui̱ dueerikun diaal ti̱ti̱, ɣän bä yɛ lät kä mi jiääk mi /ka̱n met la̱t, kä thil mi ce̱tkɛ jɛ mi bä met la̱t.

¹⁰ Kä ɛ puc, bi diëëth gan gaatkiɛn cam rɛydun, kä bi gaat diëëthkiɛn cam. Ɣän, bä yɛ luk, kä ram ɔ bi kään ɔ kä yɛ, ɣän bä jɛ kiɛth rɛy jiɔam.

¹¹ Kɛ kui̱ ɛmɔ, ce̱tnikɛ ɣän Kuäär ni Kuoth Nhial in tëk, nɛmɛ ɛ ruac Kuɔth, ɛ puc kɛ ɣöö ci yɛn luak ya̱r kɛ nyinkun tin jiäk. Ɣän bä gɔɔydä woc, /cä yɛ bi kän, kä /cä yɛ bi pälikä.

¹² Kä ba kɛl diɔ̱ɔ̱knikun näk, ɛ liaw kɛnɛ buɔth, kä ba kɛl diɔ̱ɔ̱knikun näk kɛ thɛp, kä bä kɛl diɔ̱ɔ̱knikun kiɛth rɛy jiɔam kä bäkɛ joc kɛ thɛp.

¹³ “Kä bi yɛn di̱t ŋɛnyädä jek kɛnɛ waŋ lɔaacdä amäni mi ci lɔcdä thuuk. Mi wä kɛn ti̱ti̱ diaal wä tuɔɔk, bi yɛnɛ ŋa̱c ɛn ɣöö ɛ ɣän Kuoth Nhial ɛ nëë ruac kɛ yɛ kɛ tiɛɛlä, kä nyuth yɛ ŋɛ̈ɛ̈nydä.

¹⁴ Ɣän bä yɛ jakä da̱kɛ, kä ba yɛ dɔl ɛ döör tin gölkɛ yɛ, kɛnɛ nɛy diaal tin bi rët kɛ gua̱a̱th ɛmɔ.

¹⁵ Inɔ, bi döör diaal tin ca yɛ go̱l yɛ dɔl. Kä bi yɛn a nyuuth mi bikɛ moc kɛ dual, bi mɛmɛ tuɔɔk mi wa̱a̱ yɛ wä tɔ̱ŋ kɛ ŋɛ̈ɛ̈nydä min di̱i̱t. Ɛ ɣän Kuoth Nhial ɛnɛ ruac kɛ yɛ mɛ.

¹⁶ Ɣän mi wa̱a̱ bäär buath jäk kä yɛ, kɛ ɣöö bɛ yɛ wä däk, ɛn bäär in bi yɛ wä näk, mi wa̱a̱ buaath wä nöŋ yɛ, kɛ ɣöö bä mi̱ethdun jakä cuŋ.

¹⁷ Ɣän bä yɛ jäkä buɔth kɛnɛ ley tin camkɛ naath, bikɛ gaatkun ben mac kä bikɛn kɛ cam. Kä bi liaw kɛnɛ ko̱o̱ri ben rɛydun. Kä bä yɛ nöŋ thɛp mi bi yɛ näk. Ɛ ɣän Kuoth Nhial laar mɛmɛ ɔ.”