Yɛdh 47 - RUAC KUƆTH IN RƐL RƆ

Löny pi̱i̱ni mi bä luaak Kuɔth

¹ Kä cuɛ ɣä nyɔk kɛ no̱o̱ŋ thok luaak Kuɔth, ɛn wani tëë kɛ pi̱ ti bä lönydiɛn raar kɛ tuut luaak Kuɔth, kä wä lönydiɛn kui̱ känyä ca̱ŋ. (Kɛ ɣöö luaak Kuɔth lotdɛ ni kui̱c känyä ca̱ŋ.) Kä pi̱ bä lönydiɛn kɛ kui̱c cuëëc tuɔ̱t luaak Kuɔth, kui̱c cuëëc yi̱kä.

² Kä cuɛ ɣä lɛ naŋ raar kɛ duɔ̱ɔ̱p thuɔk kuec caam. Kä cuɛ ɣä naŋ raar naŋɛ ɣä thok in te raar min lot ni kui̱c känyä ca̱ŋ. Kä lo̱ny pi̱ raar kɛ pek kuec cuëëc.

³ Kä cu wut ɛmɔ wä kui̱ känyä ca̱ŋ a te tetdɛ kɛ taŋ thëm, kä cuɛ jua̱th tetni ti bathdɔɔr kɛl thɛm, kä cuɛ ɣä naŋ kɛ rɛy pi̱i̱ni, kä cu pi̱ ɣä cuɔ̱p ni tɛ̈l.

⁴ Kä cuɛ jua̱th tetni ti bathdɔɔr kɛl nyɔkɛ thëm, kä cuɛ ɣä naŋ kɛ rɛy pi̱i̱ni, kä cu pi̱ ɣä cuɔ̱p ni mua̱a̱l. Kä cuɛ jua̱th tetni ti bathdɔɔr kɛl nyɔk kɛ thëm, kä cuɛ ɣä naŋ kɛ rɛy pi̱i̱ni, kä cu pi̱ ɣä cuɔ̱p ni lɛtdä.

⁵ Kä cuɛ jua̱th tetni ti bathdɔɔr kɛl thɛm bä, kä cuɛ la yier mi cä dëë luäŋ kɛ jiëth, kɛ ɣöö ci pi̱ ben ni nhial. Kä cuɛ luëŋ a dëë kɛt ni jɛ, cuɛ a yier mi /ca dee luäŋ kɛ jiëth.

⁶ Kä cuɛ ɣä thiec wëë i̱, “Gat ran, ji̱n ci nɛmɛ nɛn?” Kä cuɛ ɣä nyɔk kɛ loc jɔk kɛ bap yiëër.

⁷ Kä min cä luny jɔk, cua̱ jiɛn ti ŋuan nɛn ca rɔ̱ ber bap yieer kui̱c ɛmɛ kɛnɛ kui̱c in dɔ̱ŋ.

⁸ Kä cuɛ ruac kɛ ɣä wëë i̱, “Kɛn pi̱ ti̱ti̱ wä lönydiɛn kui̱ rööl känyä ca̱ŋ, kä bikɛ wä amäni lo̱o̱l Jɔr-dɛn. Kä bikɛ wä cop ni baar in wac pi̱, bar in thil pi̱kɛ löny, kä bi pikɛ cu gɔw.

⁹ Kä gua̱a̱th ɔ bi löny kiɛɛr wä thi̱n ɔ bi ley diaal tin te rɛy yiëër tëk thi̱n, kä bɛ tekɛ rɛc ti ŋuan ɛlɔ̱ŋ mi wä pi̱ wä cop ɛn wani. Bi pi̱kɛ gɔw, kä bi ley diaal cieŋ guäth in wä löny yiëër thi̱n.

¹⁰ Kä bi dëëp rɛc cuɔ̱ŋ thi̱n kɛ ɣöö bikɛ dɛɛp kɛ rɛc jɔk yiëër a känɛ nikä Een-gɛ-di a räth nikä Een-ɛg-la-yim. Kä ba gua̱a̱th mi ɣa̱rkɛ cambakni thi̱n. Kä bi rɛckɛ a rɛc ti gööl kä ŋuan ɛlɔ̱ŋ, bikɛ ce̱tnikɛ rɛc Bar in te kam wi̱i̱ni.

¹¹ Duundɛ ɣöö /ci kar yiëër ɛmɛ bi thia̱ŋ kɛ pi̱ ti gɔw, bikɛ tey ala pi̱ milɛkä.

¹² Kä kui̱cni yiëër da̱ŋ rɛw, bi jiɛn ti gööl ti camkɛ piith thi̱n. Kä /ci ji̱th kiɛn bi kööt, kä bikɛ dɛykiɛn kuir, duundɛ ɣöö bikɛ dɛy ti gɔw a kuiir päthni diaal, kɛ ɣöö pi̱ tin wackɛ ni kɛ, bäkɛ ni luaak Kuɔth Nhial. Bi dɛykiɛn a mi̱eth, kä bi ji̱thkiɛn a wal kɛ kui̱ puɔlä pua̱a̱ny.”

Këthni muɔ̱ɔ̱n tin pay tuɔɔk

¹³ Kä cu Kuäär ni Kuoth Nhial mɛmɛ lar wëë i̱, “Ti̱ti̱ kɛ kɛn këth tin bi dääkni mun kamni thuk duëli ji̱ I-thɛ-rɛl da̱ŋ wäl rɛw ala duŋdiɛn. Kä bi Jo-thɛp tekɛ kui̱c da̱ŋ rɛw.

¹⁴ Kä bi jɛ da̱a̱k a päär. Ɣän cä rɔ yac ɛn ɣöö bä jɛ ka̱m kuaykun, ɛn mun ɛmɛ bɛ la duŋdun.

¹⁵ “Kä mɛmɛ bɛ a key muɔ̱ɔ̱n. Kui̱c caam, ɛ känɛ jɛ Bar in te kam wi̱i̱ni kɛ duɔ̱ɔ̱p in ret kɛ Ɣɛth-lon a wä kä Lɛbo-ɣä-mat wä mäni Dhɛ-dad,

¹⁶ kɛ Bɛ-ro-thaa kɛnɛ Thib-ra-yim (tin te kam këth Da-math-kɛth kɛnɛ key Ä-math), a räth nikä Ɣa-dher-a-ti-kon min te këth Ɣɔ-ran.

¹⁷ Kä jɛn key bɛ rɔ tok ni baar a wä nikä Ɣä-dhar-e-non, min te kui̱c caam këth Da-math-kɛth, kɛnɛ key Ä-math kui̱c caam. Ɛn mɛmɛ bɛ a jɛn pek kuec caam.

¹⁸ “Kä kui̱c känyä ca̱ŋ, kamä Ɣɔ-ran kɛnɛ Da-math-kɛth kui̱ kiɛɛr Jɔr-dɛn kamä Gil-yad kɛnɛ mun I-thɛ-rɛl, a känɛ jɛ kui̱ känyä ca̱ŋ baar a räth nikä Ta-mar. Ɛn mɛmɛ bɛ la jɛn pek kuec känyä ca̱ŋ.

¹⁹ “Kä kui̱c cuëëc, bɛ rɔ tok nikä Ta-mar a räth ni rɛy tɔ̱ɔ̱rä Mɛ-ri-bath-ka-dec, a lɛnɛ ka̱n niɛ wani a räth ni rɛy waŋ I-jëp amäni Bar in te kam wi̱i̱ni. Ɛn mɛmɛ bɛ la jɛn pek kuec cuëëc.

²⁰ “Kä kui̱c konyä ca̱ŋ bɛ rɔ tok ni Bar in te kam wi̱i̱ni, kä bi keydɛ rɔ wä car nikɛ Lɛbo-ɣä-mat. Ɛn mɛmɛ bɛ la jɛn pek kuec konyä ca̱ŋ.

²¹ “Inɔ, bia mun ɛmɛ dääk kä rɔ̱ ce̱tnikɛ thuk duëli ji̱ I-thɛ-rɛl.

²² Kä bia jɛ cu ka̱n ala duŋdun kɛɛl kɛ jur tin cieŋ rɛydun, tɔ̱ ca gaat dap rɛydun tɔ̱. Bi yɛn kɛ ciɛŋ ala nɛy ti cieŋ kä I-thɛ-rɛl ɛmɛ. Kɛɛl kɛ yɛ bia kɛ moc kɛ mun mi la duŋdiɛn rɛy thukni duëli ji̱ I-thɛ-rɛl.

²³ Ram ɔ bi cieŋ rɛydun ɔ kä jur, bia jɛ dhil ka̱mɛ ala duŋdɛ, ruac ni ɣän Kuäär ni Kuoth Nhial.”