Yɛdh 46 - RUAC KUƆTH IN RƐL RƆ

Rueec kɛnɛ ca̱ŋ ti̱mä

¹ Kä cu Kuäär ni Kuoth Nhial mɛmɛ lar wëë i̱, “A thok kal in te rɛci min lotni käny ca̱ŋ te gääkä, a jɛ /ca lɛp kɛ ni̱n jokä da̱ŋ bäkɛl tin lät kɛ naath. Duundɛ ɣöö a jɛ la lɛ̈pkɛ kɛ cäŋ lɔ̱ŋä kɛnɛ cäŋ tëth path.

² Kä bi rueec wä rɛy kal kɛ thuk yacɛkä min te raar, kä bɛ wä cuɔ̱ŋ tuutdä thuɔk kal. Kä bi bo̱o̱th palä muc tin waŋkɛ kɛnɛ muc kɛ kui̱ gɔɔyä thöp, kä bɛ rɔ ka̱m mua̱a̱l tuutdä thuɔk kal. Kɛ kɔrɛ bɛ cu wä raar, duundɛ ɣöö /ca kal bi gäk amäni thiaŋ.

³ Kä bi ji̱ wec diaal rɔ̱ ka̱m mua̱a̱l thok kal ɛmɔ nhiam Kuɔth Nhial kɛ ca̱ŋ lɔ̱ŋni kɛnɛ ca̱ŋ tin tɛth kɛ pay.

⁴ Kä muc tin waŋkɛ tin bi rueec kɛ thöp Kuoth Nhial kɛ ca̱ŋ lɔ̱ŋni bikɛ a thääk deet rɔɔmni da̱ŋ bäkɛl ti thil mɛ̈ɛ̈ny kɛ tuut dɛ̈ɛ̈l rɔɔmä kɛl, mi thil mɛ̈ɛ̈ny.

⁵ Kä muc bɛɛl tin bɛ thöp kɛ kui̱ tha̱a̱k dɛ̈ɛ̈l rɔɔmä bɛ la dieny bɛɛl kɛl. Kä muc bɛɛl tin bɛ thöp kɛ kui̱ thääkni deet rɔɔmni bikɛ ŋuan ce̱tnikɛ pek ɛ go̱o̱r lɔcdɛ jɛ mɔ ɛn ɣöö bɛ thöp, kɛɛl kɛ bul liɛth kɛ kui̱ diëny ɔ kä kɛn diaal.

⁶ Kɛ cäŋ in tɛth kɛ pay, bi rueec ruath tha̱a̱k mi thil mɛ̈ɛ̈ny thöp ala muc, kä bɛ thääk deet rɔɔmni da̱ŋ bäkɛl kɛ tut dɛ̈ɛ̈l rɔɔmä kɛl thöp thil mɛ̈ɛ̈ny.

⁷ Kä kɛ kui̱ mucni bɛɛl, jɛn bɛ dieny bɛɛl kɛl thöp kɛ kui̱ ruath tha̱a̱k, kɛ dieny kɛl kɛ kui̱ tha̱a̱k dɛ̈ɛ̈l rɔɔmä kɛl. Kä bɛ diënyni bɛɛl ti ŋuan thöp kɛ kui̱ thääkni deet rɔɔmni ce̱tnikɛ pek ɛ go̱o̱r lɔcdɛ jɛ mɔ ɛn ɣöö bɛ thöp, kä bɛ bul liɛth thöp bä kɛ kui̱ dieny ɔ kä diënyni diaal.

⁸ Mi wä rueec wä rɛy kal, bɛ wä rɛc kɛ duɔ̱ɔ̱p wääthni tin te thok kal, kä bɛ loc raar nikɛ jɛn duɔ̱ɔ̱p ɔ kɛl ɔ.

⁹ “Kä mi wä naath ben nhiam Kuɔth Nhial kɛ ɣöö bikɛ ben pal kɛ cäŋ ti̱mä, ramɔ bi ben rɛc ɔ kɛ thok kuec caam, bɛ wä raar kɛ thok kuec cuëëc. Kä ram mi wä coth rɛc kɛ thok kuec cuëëc bɛ wä raar kɛ thok kuec caam. /Cikɛ bi luny raar kɛ thok kal in wee kɛ rɛc, duundɛ ɣöö bi wä nikɛn raar kɛ nhiamdiɛn.

¹⁰ Mi wäkɛ wä rɛy luaak Kuɔth bi rueec wä rɛc kɛ kɛ kɛɛl, kä mi wäkɛ wä loc raar, bi rueec wä raar kɛ kɛ kɛɛl.

¹¹ “Kɛ cäŋ ti̱mä min ca rialikä, bi muc bɛɛl kɛ kui̱ ruaath tha̱a̱k la dieny kɛl, kä tut dɛ̈ɛ̈l rɔɔmä bä bɛ a dieny bɛɛl kɛl. Kä kɛ kui̱ thääkni deet rɔɔmni, bi raan muc bɛɛl ti ŋuan ti ce̱tnikɛ tin go̱o̱r lɔcdɛ jɛ thöp, kɛɛl kɛ bul liɛth kɛ kui̱ diëny kɛl.

¹² Mi wä rueec muc tɛthä lɔaac wä thöp, a cäŋ kuɛ la muc mi waŋkɛ kiɛ muc kɛ kui̱ gɔɔyä mi la muc tɛthä lɔaac kɛ kui̱ Kuɔth Nhial, ba thok kal in te kui̱c känyä ca̱ŋ lëp jɛ, bɛ mucdɛ min waŋkɛ kiɛ muckɛ kɛ kui̱ gɔɔyä thöp ce̱tkɛ mëë la lätdɛ kɛ cäŋ lɔ̱ŋä. Kä jɛn bɛ wä raar, kä kɔr kä min cɛ wä raar ba kal cu gäk.”

Muc tin la thöpkɛ ciaŋ

¹³ “Kä bi bo̱o̱th palä ruath dɛ̈ɛ̈l rɔɔmä mi ruɔ̱ndɛ kɛl kä thil diw la tho̱p Kuoth Nhial ni ciaŋ ala muc mi waŋkɛ, runwaŋni diaal bɛ jɛ la tho̱pɛ.

¹⁴ Kä bɛ muc bɛɛl la tho̱pɛ kɛ jɛ kɛɛl kɛ runwaŋni diaal ni ciaŋ. Kä bɛ kɛl bäkɛli diëny bɛɛl kɛnɛ kɛl diɔ̱ɔ̱kni bulä liɛth a tho̱pɛ kɛ runwaŋ ni ciaŋ kɛ ɣöö bakɛ lät ni nup, mi la muc bɛɛl mi thöpkɛ Kuoth Nhial. Kä bi mɛmɛ a ŋut gua̱thni diaal.

¹⁵ Inɔ, ba ruath dɛ̈ɛ̈l rɔɔmä kɛnɛ muc bɛɛl kɛ liɛɛth a thöpkɛ ala muc mi waŋkɛ ni ciaŋ a thil pa̱k.”

Rueec kɛnɛ mun

¹⁶ Kä cu Kuäär ni Kuoth Nhial mɛmɛ lar wëë i̱, “Mi wä rueec mun wä thöp ram kɛl kä gaatkɛ ala muc kä mundɛ, bi mun ɛmɔ a duŋ gatdɛ ce̱tkɛ ta̱a̱ kuaknikiɛn.

¹⁷ Duundɛ ɣöö mi cɛ mun thöp ram mi duŋdiɛn la̱t kɛ̈ɛ̈l, bi mun ɛmɔ a duŋ läätdä amäni cäŋ in cɛ lɔar kä kuaanydɛ, bi mun kulɛ loc kä rueec. Kɛ ni gaatkɛ bi mun ka̱n tɔ̱ kä jɛ ala duŋdiɛn.

¹⁸ Kä /ci rueec mun bi ka̱n mi la duŋ raam mi dɔ̱diɛn, kiɛ bɛ kɛ dhuɔc raar muundiɛn. Bɛ gaatkɛ moc mundiɛn kä mundɛ, kɛ ɣöö thilɛ ram mi göörä kä nɛɛkä ɛn ɣöö ba mundɛ lɛ woc kä jɛ.”

Duël tha̱t luaak Kuɔth

¹⁹ Kä cuɛ ɣä nööŋ kɛ thok in la wäkɛ naath rɛc, min te gekä thuɔk kal, min te kui̱ duëli tin ca rɔ̱ car kui̱c caam tin rɛl gɔɔydiɛn rɔ̱, tin la duël bööthni palä. Kä ɛn wani cuɛ ɣä nyuɔ̱th gua̱a̱th mi te ni peek kui̱c konyä ca̱ŋ.

²⁰ Kä cuɛ ruac kɛ ɣä wëë i̱, “Nɛmɛ ɛ jɛn gua̱a̱th in bi bööth palä muc cutdä kɛnɛ muc dui̱rä a thaal thi̱n, kä bɛ a jɛn gua̱a̱th in bikɛ muc bɛɛl a buɔ̱l kɛ thi̱n. Kɛ kui̱ kä ɣöö /cikɛn kɛ bilɛ nööŋ rɛy kal in te raar, a ba gɔɔydiɛn in rɛl rɔ lɛ nɛn ɛ naath.”

²¹ Kä cuɛ ɣä nööŋ raar naŋɛ ɣä rɛy kal in te raar, cuɛ ɣä jakä ja̱a̱lä gɔŋtɔtni kal da̱ŋ ŋuaan. Kä gɔŋtɔtni kal diaal te mɔ kɛ kalɛ kä rɔa.

²² Kä gɔŋtɔtni da̱ŋ ŋuaan tekɛ käl ti tɔatni ti tekɛ jua̱th tetni ti jiɛn da̱ŋ ŋuaan bärɛ piny kɛnɛ jua̱th tetni ti jiɛn da̱ŋ diɔ̱k ɣäp ɣääpdɛ. Kä kɛn da̱ŋ ŋuaan päärkɛ.

²³ Kä kɛn käl da̱ŋ ŋuaan ca rɛydiɛn go̱l kɛ päny muɔ̱ɔ̱n, kä ca lät kä dööl tha̱t ti göl kɛ jɛ.

²⁴ Kä cuɛ ruac kɛ ɣä wëë i̱, “Ti̱ti̱ kɛ duël tha̱t tin bi nɛy tin lät rɛy luaak Kuɔth muc nath a thaal thi̱n.”