Yɛdh 44 - RUAC KUƆTH IN RƐL RƆ

Ŋuɔ̱t kɛ kui̱ thuɔk känyä ca̱ŋ

¹ Kä cu wut ɛmɔ ɣä nööŋ thok luaak Kuɔth in te raar, min lot ni käny ca̱ŋ, kä jɛn tëë gääkä.

² Kä cu ruac Kuɔth Nhial ben kä ɣä wëë i̱, “Thok ɛmɛ, bɛ te ni gääkä. /Ca jɛ bi lɛp, kä thilɛ ram mi bi wä rɛc kɛ jɛ, kɛ ɣöö ci Kuoth Nhial ni Kuoth I-thɛ-rɛl wä rɛc kɛ jɛ. Kɛ kui̱ ɛmɔ, jɛn bɛ te ni gääkä.

³ Ɛ ni rueec kä rɔa, kɛ ɣöö ɛ rueec bɛ la wëë nyuur thi̱n, kɛ ɣöö bɛ wä mi̱th nhiam Kuɔth Nhial. Kä bɛ wä rɛc kɛ duɔ̱ɔ̱p ba̱a̱ŋ in te thok kal, kä bɛ la wëë raar kɛ jɛn duɔ̱ɔ̱p ɛmɔ bä.”

Ŋut tin ba jakni naath kä wä luaak Kuɔth

⁴ Kä cu wut ɛmɔ ɣä nööŋ kɛ duɔ̱ɔ̱p in te kui̱c caam nhiam luaak Kuɔth. Kä min cä guic, cua̱ buay Kuɔth Nhial nɛn cɛ luaak Kuɔth Nhial thiäŋ, kä cua̱ tɛɛthni buupä.

⁵ Kä cu ruac Kuɔth Nhial ben kä ɣä wëë i̱, “Gat ran, ji̱n gui̱cni agɔaa, kä li̱ŋni agɔaa kä päli ji̱thku piny, kɛ tin diaal tin bä la̱r ji̱ kɛ kui̱ ŋuɔ̱tni luaak Kuɔth Nhial kɛnɛ luëëkɛ diaal. Kä ji̱n tit nɛy tin ba nhök wä luaak Kuɔth kɛnɛ nɛy tin /ca bi nhök wä luaak Kuɔth.

⁶ Kä läri jɛ kɛn ji̱ thuɔk duëël in ci kac raar, thok duëël I-thɛ-rɛl ɛn ɣöö ci Kuäär ni Kuoth Nhial wee i̱, ‘Lö thok duëël I-thɛ-rɛl ɛ la̱t nyuɔɔnikun ku tekɛ pek,

⁷ kɛ nhökdun kɛ nɛy ti thil kuoth ben rɛy luaakdä, kɛ nɛy ti /ka̱n lo̱ckiɛn kɛnɛ pua̱nykiɛn cuɛl, kɛ ɣöö ba luaakdä ben ya̱r, mi tho̱p yɛn ɣä mi̱ethdä, thiɔl kɛnɛ riɛm. Cia mat ruacdä ya̱r kɛ lätkun diaal tin jiäk.

⁸ Kä /ken yɛn muckä tin gɔw ka̱m ɣä ɛ yɛn. Cuarɛ cu jak ni jur kä thöpkɛ kɛ ɣä ɛ kɛn, rɛy luaakdä.

⁹ “ ‘Kä cu Kuäär ni Kuoth Nhial wee i̱, “Thilɛ juɔ̱r mi /ka̱n cuɛl lɔɔc kɛnɛ puɔ̱ny kä jur diaal tin cieŋ rɛy nɛɛni ji̱ I-thɛ-rɛl mi bi wä rɛy luaakdä.

¹⁰ Duundɛ ɣöö ji̱ Lii-bay tëë ci wä raar, tëë ci bath a ca wä guɔ̱ɔ̱r ni kuth guääynikiɛn, mëë ci ji̱ I-thɛ-rɛl kac raar kä ɣä, bikɛ duäcdiɛn rut.

¹¹ Kɛn bikɛ lät rɛy luaakdä, kä bikɛ thuk luaakdä yien, kä bikɛ lät rɛy luaak. Kɛn bikɛ muc tin waŋkɛ ŋuɔ̱t, kä bikɛ luuri thöp kɛ kui̱ nath, kä bikɛ kɛ tit kä bikɛ kɛ lätikä.

¹² Kä kɛ ɣöö cikɛn kɛ lätikä ni nhiam kuthni guääynikiɛn, kä cikɛ thok duëël I-thɛ-rɛl jakä dui̱r, kɛ kui̱c ɛmɔ cä rɔ yac kɛ kui̱diɛn, ɛn ɣöö bikɛ duäcdiɛn rut ruac ni ɣän Kuäär ni Kuoth Nhial.

¹³ Kɛn /cikɛ bi ben nhiamdä, kɛ ɣöö bikɛ ɣä ben lät ikä ala bööth palä. Kä /cikɛ bi ben thieekä mucnikä tin gɔw, kɛn ŋɔak tin rɛl gɔɔydiɛn rɔ̱. Duundɛ ɣöö bikɛ pöcdiɛn rut kɛnɛ lät tin jiäk tëë cikɛn kɛ la̱t.

¹⁴ Kä ŋotdɛ ɣän bä kɛ kuany ala la̱a̱t rɛy luaak Kuɔth, bikɛ nyinkɛ diaal, tin görkɛ la̱tdiɛn la̱t.” ’ ”

Bööth palä kä ji̱ Lii-bay

¹⁵ Ɛn wa̱nɔ, cu Kuäär ni Kuoth Nhial mɛmɛ lar wëë i̱, “Bi ji̱ Lii-bay tin la bööth palä, tin la kuay Dha-dok tëë lät rɛy luaak Kuɔth mëë ci ji̱ I-thɛ-rɛl diaal kac raar kä ɣä, ben thiäkädä kä bikɛn ɣä lätikä. Bikɛ ɣä thöp muc thiɔaal kɛnɛ muc riɛm, ruac ni ɣän Kuäär ni Kuoth Nhial.

¹⁶ Kɛ kɛn bi ben rɛy luaakdä mɔ, kä kɛ kɛn bi tharbëtdä cop ɔ, tɔ̱ ba ɣä lätikä tɔ̱.

¹⁷ Mi wäkɛ wä rɛy kal in te rɛci, bikɛ la̱th ni bi̱i̱ in ca tak agɔaa. Thilɛ bi̱i̱ miemni mi bikɛn ɛ la̱th pua̱nynikiɛn, guäth in lätkɛ thukni käli kal in te rɛci.

¹⁸ Kä bikɛ la̱th ni kuɔ̱mni bieyni ti ca tak agɔaa, kä bikɛ rɔ̱ moc kɛ thuruaali biey in ca tak agɔaa. Kä /cikɛ mi bikɛ jakä näk lethkɛ bi la̱th.

¹⁹ Kä mi wäkɛ wä kä naath rɛy kal in te raar, bikɛ bieyni tin lätkɛ kɛ ka̱m raar, bikɛn kɛ la̱th duëli tin rɛl gɔɔydiɛn rɔ̱. Kä bikɛ bieyni ti kɔ̱ŋ cu la̱th, kɛ ɣöö /ci ciaŋ bieyni in rɛl rɔ bi cop kä naath.

²⁰ Kä /cikɛ wuɔ̱thkiɛn bi mut, kä /cikɛ miem wuɔ̱thnikiɛn bi jakä bär bä, kä bikɛn a gir ni miem wuɔ̱thnikiɛn kä rɔa.

²¹ Kä bɛ thil bo̱o̱th palä mi bi kɔaŋ math mi wëë wä rɛy kal in te rɛci.

²² Kä /cikɛ ciek jɔkä bi kuɛn, kä /cikɛ kɛ̈ɛ̈ bi kuɛn. Bikɛ kuɛn ni nyam mi la nyal mi la kuay thuɔk duëël I-thɛ-rɛl pa̱ny kɛnɛ ciek jɔkä mi cɔwdɛ mɔ bo̱o̱th palä.

²³ Bikɛ nɛɛkä ŋi̱eec kɛ dääk kä min rɛl gɔɔydɛ rɔ kɛnɛ min la duɔ̱ɔ̱r baaŋ. Kä bikɛn kɛ nyuɔ̱th dääk kä mi jiääk kɛnɛ mi gɔaa.

²⁴ Kä mi cɛ tekɛ rɔal mi ci tuɔɔk, kɛn bikɛ lät ce̱tkɛ kua̱r luɔ̱k bä, bikɛ luk ŋok ce̱tnikɛ lukdä. Kä bikɛ luëëkä käp kɛnɛ ŋuɔ̱t kɛ gua̱th ti̱mnikä diaal, kä bikɛ ca̱ŋ lɔ̱ŋnikä tit ala mi rɛl rɔ.

²⁵ Kä /cikɛ rɔ̱ bi ya̱r kɛ wä gekä raam mi ci li̱w. Ɛ ni mi ɛ gua̱n kiɛ man kɛnɛ mi ɛ gatdɛ kiɛ nyaadɛ kɛnɛ mi ɛ däman kiɛ nyiman mi ŋot a /ka̱n kuɛn ci li̱w ɔ, ɛ jɛn bikɛ rɔ̱ kulɛ ya̱rɔ.

²⁶ Kɛ kɔr kä mi cɛ loc gɔɔyä, ba jɛ moc kɛ ni̱n da̱ŋ bärɔw ti /cɛ bi lät thi̱n.

²⁷ Kä kɛ jɛn cäŋ in bi wee kɛ jɛ guäth in rɛl gɔɔydɛ rɔ, rɛy kal in te ni rɛci, a bɛ wä lät guäth in rɛl gɔɔydɛ rɔ, bɛ muc dui̱rädɛ cu thöp, ruac ni ɣän Kuäär ni Kuoth Nhial.

²⁸ “Kä bi mɛmɛ a duŋdiɛn mi ɣɛl kɛn ɛ. Ɛ ɣän bia̱ ɣɛ̈liɛn ɔ, kä cia kɛ bi moc duɔ̱ɔ̱r muun I-thɛ-rɛl. Bi ɣän a duŋdiɛn.

²⁹ Kä bi mi̱ethdiɛn a muc bɛɛl, kɛnɛ muc dui̱rä kɛ muc cutdä, kɛ ŋɔak diaal tin ca thöp ɣä rɛy I-thɛ-rɛl kɛɛliw bi kä nyinkiɛn.

³⁰ Kä dɛy jiɛn diaal tin jio̱l kä dɛy jiɛn diaal tin gööl, kɛnɛ muc diaal tin la thöpɛ kä muckun, bɛ a duŋ bööthni palä. Kä bia nupdun in nhiam la thöpɛ bööth palä, kɛ ɣöö dɔ̱ŋ bi puɔ̱th kulɛ te ciëëŋnikun.

³¹ Kä /ci bööth palä dit kiɛ ley mi ci li̱w kä rɔa kiɛ ca näk ɛ ley kɔ̱kiɛn bi cam.”